Dong 5 - Iwo Surua Mua Wie Pha Bible

Nim nane shiishaiduii

¹ Biang shii hanyie dug pha jia airo phazoi wad shii nim ne um pha doh; jine nyimanyi ithuathek zey pha ji re-è chaig srane chebthek miley rog shii nab rek ne ruii.

² Chiih-è gu è hamangkhliie riichaiboh jia doh, hanyie ne ziak ne yao, “Hanyie ne nabthek shii chui ne nim pha ji shii hong mua spho lei?”

³ Jishii hamangkhung hà dinne sohnyiak dinne sohjambling pha bucho hà ne hanyie nim shii hong ne iliing riig mua spho jia de oi ro.

⁴ Gu ne khiwegkho ne chomage nyieliieshii nim pha ji shii hong ne iliing hà riig mua spho hanyie jia shii de adoh ro.

⁵ Chiihphado dukhothek pha è jia yi gu shii yao, “Acho rabo. Riig bo! Judah pha jad pha Bargi, Dawid ro boh riing, è ne yang pha ji shii muajong ro, chiih-è ai ne miley nabthek shii chui ne nim shii hong mua ruii phro.”

⁶ Chiihphado Isieng miseypho nane dukhothek wi è shan pha biang duchoi shii shiishaiduii yi riu gu è doh. Shiishaiduii ne ua muii pha duiine doh. Aishii iriangthek miley nane imieg miley um, nyie jine Hamangkhung-aphuii ro miley ragungthek ro nyie jine zab pha sohnyiak hà thojong pha ji ro.

⁷ Shiishaiduii wuii srane hanyie yi biang shii dug pha jia airo phazoi wad re-è nim pha ji yiemuii.

⁸ Ai è rek shii, isieng miseypho wi nane ichiignawi dukhothek ne shiishaiduii ibi shii lakhiung niing. Zab shii ben nane san pha shiikhiiakhjamthek shii bisi chab srane, nyie jine Hamangkhung-aphuii ro branthek misiathek ro.

⁹ Ithek ne iwo ibai bai: “Nane nim shii yie ne nabthek shii hong mua spho ro. Chiih-è na shii ne uamuii, chiih-è naro iy pha khlem re-è zab pha iiriing, nyuakthek zab pha branthek shii chiih-è jad shii ne Hamangkhung-aphuii pha pheg phi ro.

¹⁰ Nane gathek ro Hamangkhung-aphuii ro blia rek pha ithek shii sajathua phabithek pha rabjong ro. Chiih-è ithek ne sohnyiak shii bokhoh ruii phro.”

¹¹ Din ne gu è riig, chiih-è gu è hamangkhliiethek shii yoi, ithek ne atham mua pha um ro! ithek ne biang shii isieng miseypho, chiih-è dukhothek shan ne riu,

¹² chiih-è goh gang re-è bai: “shiishaiduii hanyie shii ua muii pha ji shii ne blu, nuruii, khani nane chuh, ilab, biisiie, chiih-è chiong mua spho ro!”

¹³ Chiih-è hamangkhung pha zab zen, sohnyiak lakhung, sohjambling pha bucho, chiih-è khamuii hà—hamangnyiak pha zab shii chai um pha—thek ne bai ramuii pha jine gu è yoi: “Hanyie biang shii dug pha aishii chiih-è shiishaiduii shii ne, chiong nane ilab, biisiie ne idang nane idang pha ro!”

¹⁴ Isieng ibeymuthung wi è chang, “Amen!” Chiih-è dukhothek lakhiung niing srane misiasia.