Dong 4 - Iwo Surua Mua Wie Pha Bible

Hamangkhung hà misiasia

¹ Ji è rekdang pha ji shii yoh dong ne hamangkhung pha habin hong pha doh. Chiih-è goh yi thu-ung duiine, yoi, pha ibi shii gu shii yao, “Thawuii bo ichiih, chiih-è hìpha iidoh shii nyie rey ruii pha ji nathek riig yi pha ro.”

² Khthiie gu shii Luruak è phrai muii. Thiisa hamangkhung hà biang shii bran jia dug ne um.

³ Airo mizia yi khlieng nane kharnelian pha igong lubaothek duiine chuang pha doh, chiih-è biang shii ne zab shan ne chiigmakhuang ne igong lubao pha emerald duiine mia.

⁴ Biang shii ne gai ichiignawi biangthek de shan ne um, ji shii yi ichiignawi dukhothek imo guii ne san pha ragothek khak ne dug ne um.

⁵ Biang è haliao khliingthek, bliakthek thog, ne hakhliing chiie. Biang pha ibi shii miley muchuangthek chuang pha ji hang ne um, nyie jine Hamangkhung-aphuii ro miley ragungthek ro.

⁶ Biang pha ibi shii sasia pha khamuii duiine doh, jine sang khrysthal lubao duiine mia ro. Biang pha zab ithua shii ne isieng miseypho wi ibi iidoh imieg um pha è cheg muii.

⁷ Igobi pha ji yi bargi duiine mia; din pha ji yi suwuiiphuii duiine mia; uomchiieng pha ji yi bran mizia duiine mizia um; chiih-è wichiieng pha ji yi biichiing khey pha duiine mia.

⁸ Zab isieng miseyphothek wi ne jijia shii iyigthek riig um, chiih-è ithek ne iliing nane fuang shii zab imieg ley um ro. Inai nane habiu ithek ne athodang pha ibai bai: “So, so, so, ne Ithong Hamangkhung-aphuii Bohblu ro, hanyie ne umjong, hanyie ne um, hanyie yi wuiiramuii pha ji ro.”

⁹ Isieng wi ji è hanyie yi biang hà dug pha jia hanyie yi idang nane idang sieng pha ji shii, biisiie nane ilab chiih-è lasothek pha ibai bai muii ro. Ithek è rek mage shii,

¹⁰ ichiignawi dukhothek yi hanyie è biang shii dug muii pha moe shii chiih mage, chiih-è hanyie ne idang nane idang sieng pha aishii sia. Ithek è awaithek ro ragothek yi biang moe fen srane yao:

¹¹ “Gathek ro Ithong nane Hamangkhung-aphuii! Nane biisiie, ilab, nane blu ne mua spho chak ro. Chiih-è nane zab pha manathek shii rab, chiih-è na è yang pha ji è ithek shii ne rey ne sieng yi pha ne ithek shii phi.”