Zude 1 - Nouveau Testament bété de Gagnoa

Bhɛleweli

¹ -Ame, Zude, Zezu Kli 'na "kulɔbhɔnyɔ "ne Zake -ɔ "nɔwli, 'e 'kɛle -ye -a To Lagɔ la- -wɛ "ku. 'Ɔ -woa "ne 'ɔ -suloa Zezu Kli "me.

² Lagɔ 'pɔ 'anyɛɛ 'nyɛzedle -se 'ɔ 'nyɛ 'anye "kuwɛtɛ "ne -waleɛ 'na 'kwleyi!

-Wa -sloale yowlɛweli "me -wɛ 'wa yua 'ce "kle 'yea-

³ -A 'tito -awale, 'e 'yɔbhɔ nɛ kpɛnyee -gbɔ 'e "kɛ 'anye "ku 'kɛle 'popoɛ -ɛ -noɔ -anye 'klekle nɛ yɛ -wɛ za. -Mɔ, -dɛmeda, 'e yi 'kɛle klepaa, -se 'e "kɛ 'anye 'kwɛme "tamalea-. 'A 'gwele- 'ayi kɔ, 'dlekukɛleɛ 'ye Lagɔ 'je- -godogodo 'na dɛ -wa -noɔ 'ɔnoa 'waa -wɛ kɔ za.

⁴ 'E 'kɛle 'anye "ku sɛko -wɛ 'nyakpa -gbeyia -yi 'diɛɛ "me 'anye 'glɛme. 'Wa -cicia -anyɛɛ Lagɔ 'na 'ŋwɛnɛ -de kɔ, -se 'wa "kɛ -kɛ -se 'wa 'yɔbhɔ -wɛ 'wayi "ku slu, "ne 'wa 'pɔ -lɔ Zezu Kli 'kwlɛ "me, -anyɛɛ -sloanyɔ -bholo -kpee, -anyɛɛ "Bhenyɔ "ne Anyinɛnyɔ. -Dɛme 'ye 'ɛ "ne 'awɔ -noɔ, Lagɔbɔgo -bhulɛ 'awɔ 'wanɛɛ 'gbapeweli "kle.

⁵ 'A -yi -kɛ 'tee "ɛ -ye 'e "kɛ 'anye bhulɛle 'klekle ne. 'Ɛ -ko sɔbhɔ "ne 'e 'luɔle -lɔ 'anye -ɛne za: Anyinɛnyɔ Lagɔ -sɛ 'ɔnɛɛ yua -wa -noɔ nɛ 'juyua 'waa Ezipte -wɛ 'galu 'yli, 'ɛ 'bha- lɛ lɔbhɔ, "ne 'ɔ yi -lɔ -wa "no 'dleku -kɛle -wɛ lɔbhɔ "ne 'wa yi -lɔ "ku.

⁶ 'A 'luɔle- -kɛ "nɔgɔzilia 'na weli -ɛ -yloa -wɛ "ku! 'Wa "ne 'wanɛɛ 'bhɛloɛ -ye 'wa -kɛ 'awɔ -wɛ -kulɛ. -Mɔ, 'wa 'bha- -dee 'wa -ko 'awɔ -wɛ. Ɛza, Lagɔ 'poa- -godogodo 'na dɛ -jiɛ "me, titiɛ "me, 'wa "kɛ "bhle gbobhle -zle wole-.

⁷ 'A 'luɔle- -kɛ Sodɔme 'na weli "ku, Gomɔle "ne 'du -ɛ -ko moa 'awɔ yɔko -wɛ 'wɔ "ku: 'Wa -no -me "nyɛnye "ɛ sɛbhele -wɛ. "Ɛ zoku -wɛ 'na -konya -su 'awɔ 'wayi -gbeyi "ku "ne 'wa -nyɛ 'kpeteklinya 'wɔ "bhaa go 'awɔ, "ne 'wa -zlɛ -lɔ gbo, 'widia -nyɛ 'widia "bhaa go 'awɔ. -Dɛmeda, 'wa 'gbapele -kosu -ɛ "ne nyimɔ -wɛ "me, "ne 'wa yi -lɔ kosɛ -nyɛnye -tle.

⁸ 'Anye 'glɛme, -ɛ 'nyakpa -gbeyia -wɛ no -me "ɛ 'du -wɛ 'wɔ "me 'na -konya 'na sɛ. 'Wa 'pɔ -li 'na -ɛ "ne 'ɛyi yɛ -wɛ "ku 'dle. 'Ɛnɛɛ za, 'wa -gɛlele -lɔ 'dlepɔsɛ -gbeyi -ɛ "kɛ 'wanɛɛ ku 'fe -pla -wɛ. 'Wa "ne 'yɔbhɔ Anyinɛnyɔ 'na 'kamaleɛ, 'wa 'yli "nɔgɔzilia 'wa me 'ŋlu -wɛ.

⁹ Misɛle, 'nabhɛ "nɔgɔzilia 'na "cifi "ne -ɛwɛ -no, "ne 'ɔ -nyɛ Sata "bhaa 'wa -gwele Moyize 'na -gɛzɛ "ku. "Ne "ɛ -gɔlegweɛ -wɛ "me, 'ɔ "ne 'ɔnɛɛ 'yliyli -gbo 'ŋunu-, -ye 'ɔ -bhulɛ 'ɛyikɔ ne lɛ: «Anyinɛnyɔ Lagɔ 'yea- -eyi 'kle!»

¹⁰ "Ɛ 'nyakpa -gbeyia -wɛ 'yli- -ye 'wa "ne -yi -wɛ. "Ne -ɛ yua 'wlime -wɛ 'wa no -lɔ sɛgbɛɛ 'nɛmea 'wa "ne "nɛ- ne, 'ɛyi -wɛ 'nabhɛ 'bhua -lɔ "ku.

¹¹ 'Kpilɛkpilɛ 'sibhɔloa-! 'Wa -bhli Kayɛ 'na -gwe, 'wa -wlɛ yo Balaame 'nasɛ 'dlasi za, 'wa yi Kole 'nasɛ "ku, sɛko -wɛ 'wa "pɔle- Lagɔ 'kɛle yɔko -see Kole "pɔle- Moyize 'kɛle yɔko -wɛ.

¹² 'Wanɛɛ lɔbhɔkoɛ -nyimɔ 'anye 'klecɛnya 'na 'ŋwɛnɛsɛ 'na 'gɔme liliɛ. Lɔbhɔ -wɛ, 'wa li "ne 'wa -nɔmɔ "ne 'ɛ 'ple- lɔbhɔ, "ne 'ɛ "noa 'zu "ku -le, 'wayi kɔ 'wa 'pɔ -lɔ "ku 'dle. 'Wa -ko sɛgbɛɛ 'ŋu -kɔbhɔ 'ylime "ne 'ɛ "ne -lɔbhɔ "ne -pepe kɔme -lɔ "ɛ "nɔgɔjatlɛ -wɛ. 'Wa -ko sɛgbɛɛ su -ɛ "ne 'ɛnɛɛ 'tlo dɛku bhuɛ 'yli -ko, "ne 'ɛ -bhli lɛ "ne 'ɛ "ku- lɛ gou.

¹³ 'Wa -ŋwenia 'wanɛɛ nonoli -ɛ -le 'zu "ku -wɛ moɔ 'klekle sɛgbɛɛ jinyɛ 'na -gbɔkɔle 'pɔ 'ɛnɛɛ 'fifli 'cicɛ "ku. 'Wa -ko sɛgbɛɛ -zeli -ɛ "ne me -dɛ -kɛ "ne Lagɔ -sɛ lɛ lɔbhɔ 'ɛnɛɛ 'glidɛ "gu titiɛ "me.

¹⁴ Enɔke, -a To 'wa To 'wɔ 'na 'wukwɛ -gbɔɔsɔ nɛ, Ada 'bha- lɛ lɔbhɔ "bhuɔ ne, 'ɔ -bhulɛ 'ce "kle "ɛ 'nyakpa -wɛ 'na "kukoweli, 'ɔ nɛɛ: «'A -gɛyli, Anyinɛnyɔ yi yi, 'ɔ -nyɛ "nɔgɔzilia 'na 'gbagboa "bhaa.

¹⁵ -Se 'ɔ "kɛ -glɔnya 'klekle gbobhlele-. 'Ɔ yi 'nyakpa -gbeyia 'klekle gbo 'wlime gbli 'wanɛɛ jɛzloli -ye 'wa -no 'wli -wɛ za. 'Ɔ yi 'nyinyonolinonya 'na 'bhabhanoa -wɛ 'gbapea-, 'yli -ye 'wa 'ylu- -wɛ za.»

¹⁶ "Ɛ 'nyakpa -wɛ 'ŋwɛnɛ "ne 'lɔbhoa me 'ce. 'Wanɛɛ "meŋwuŋwaleɛ "ne "nenidɛ -kɛ, "ne 'wa -gɛlele -lɔ 'dlepɔsɛ -nyɛnye. "Ne -ɛ 'bhaloa "me -wɛ "ne 'nɛne, "ne 'wa 'kwa -lɔ -ye 'wa "kɛ "ku li -wɛ 'ŋlu.

'Klecɛnya 'na 'demezoweli

¹⁷ -Mɔ, -a -wale 'wanye, 'a 'luɔle- 'ce Anyinɛnyɔ Zezu Kli 'na weli -ye "kɔlepɔnya -bhulɛle 'awɔ 'anye -wɛ "ku.

¹⁸ Ŋwɛnɛɛ: «Zikpɛ 'na "kubhiɛ dɛku, 'nyakpa yi 'ce 'anye sile-, "ne 'wa yi 'ce Lagɔ 'dɛtlomale-, 'wanɛɛ 'dlepɔsɛ -nyɛnye 'na -gɛleleɛ "me.»

¹⁹ 'Ɛ -soɔ -noa -wɛ dlidlile -lɔ 'klecɛnya "me. 'Wa 'pɔ 'nyakpa -sɛku 'dle "ne Lagɔzuzu "noa "me -ko.

²⁰ -Mɔ, 'anye, 'dleglɛtitoa nye, 'anyɛɛ zikpɛ 'ɛ 'gli 'anyɛɛ 'dlekukɛleɛ 'wlewle "me. 'A bhubhɔ- -se Zuzu Wlewle "kɛ 'anye kwɛle-.

²¹ 'A ko Lagɔ 'na -waleɛ "me. 'A "zo Anyinɛnyɔ Zezu Kli 'anyɛɛ 'dlekukɛleɛ "me. 'Ɔnɛɛ 'nɛne -ko -ylime, 'ɔ yi 'ce 'anye zikpɛ -ɛ -ka lɛ "kubhiɛ ne 'nyɛ -godogodo.

²² 'A "pɔ -nyɔ 'wanɛɛ 'dlekukɛleɛ "ne "me 'tɛ- -wɛ 'na 'nyɛzedle.

²³ 'A 'fua, 'a soa- gbobhlele -kosu "me. 'A 'pɔ me -kɛ 'lelee -bedia 'na 'nyɛzedle. -Mɔ, 'a 'luɔ- -kɛ, 'a 'toa -kɛ yɔko 'nyiɔ-: 'Wanɛɛ "me pla- li 'nabhɛ -zi -kɛ 'fe 'wanɛɛ nonoli -nyɛnye za.

Lagɔ me 'ŋlu

^24-25 -A -kwa Lagɔ -bholo -kpee 'ŋlu, -ɔ 'fuɔ -anye Zezu Kli Anyinɛnyɔ "me! 'Ɔ yi -gbɔ "ne 'a -ka 'nyinyonoli "me 'bhlile-, 'ɔ yi -gbɔ "ne 'a -ka 'nuɔsɔbhɔledɛ kɛle-, 'ŋwɛnɛ -lɛbhɛ "me, 'ɔyi 'yliku, 'ɔnɛɛ 'ŋlu "me. 'Ɔ 'bhe- -lɔ 'ŋlumeɛ, "kuziɛ, 'bhɛloɛ "ne -kamaleɛ, -dɛme "ne -godogodo! Amɛn!