Zake 5 - Nouveau Testament bété de Gagnoa

'Anye lɛkɛlenya, 'a "tu -mlɛ!

¹ -Dɛmenadɛ ne "ku, 'anye, lɛkɛlenya, 'a "tu, -se 'a "kpa "me, 'kpilɛkpilɛ -ɛ yile- 'anye lo -wɛ za!

² 'Anyɛɛ -klɔgbɔ li -wɛ zu-, "ne 'anyɛɛ "koti ŋɔnoa -li.

³ 'Anyɛɛ -badlɛ, "ne 'anyɛɛ 'dlasi 'ɛ -plɛ tititi. 'Ɛnɛɛ tiletileɛ -wɛ yi 'anye gbobhlele-, "ne 'ɛ yi 'lelee 'anye siɛ- sɛgbɛɛ -kosu. Zikpɛ 'na "kubhiɛ -dɛku "ne -la dɛtlo-, "ne 'a gugwɔle- -lɔ 'ayi 'dle "me.

⁴ 'A gɛyli, 'anyɛɛ 'kwlɛ "me 'na libhɔnonya, 'a -su 'wanɛɛ 'peɛle -dlɛ, 'wanɛɛ "mekpaweli -ylɛ Anyinɛnyɔ -ɔ 'bhɛle- -li 'klekle "ku.

⁵ 'A -gwlɛ -klɔgbɔpɛɛ "me dodo ne "ku, "ne 'a -no -ye 'a 'yɔbhɔ -wɛ. 'A -li 'tee -sɔɔdɛku 'alua ŋɔŋo 'lɔbhoa nɛ "kukusɛ "ku -wɛ.

⁶ 'Nyakpa 'na -wa "ne gbo -nyimɔ -wɛ, 'a gblua- gbo 'wlime, 'a 'lɔbhoa- "ne 'wa "ku-. 'Wa "ne "me 'cici-.

'A 'piɛ "bhle 'dle, Anyinɛnyɔ yi!

⁷ -Nyɔsɔwanye, 'a 'piɛ "bhle 'dle. Anyinɛnyɔ yi! 'A wlo gloglonyɔ "ku. 'Ɔ 'piɛ- "bhle 'dle, "ne 'ɔ wolo -lɔ -ye 'ɔ -glo -wɛ "ku. 'Ɛ kɛ -zɛle, "ne 'ɔ 'di -lɔ -ka "ne 'ɛ bhiɛ -lɔ 'lɛɛ "me.

⁸ 'Anye 'lelee, 'a 'piɛ "bhle 'dle. 'A "tamale- 'kwɛme, Anyinɛnyɔ yi -la 'du ylɛ!

⁹ -Nyɔsɔwanye, 'a te 'alua "me klu, -se Lagɔ te kɛ 'anye gbobhlele-. "Ɛ gbobhlenyɔ -wɛ ne lɛ, 'ɔ -ko 'anye gbanuɛ "me!

¹⁰ "Nyɔsɔwanye, "guɔkwɔmenya -wa -bhulɛle Anyinɛnyɔ 'na 'tɔ "me -wɛ 'ye- 'kle kpɛnyee, -mɔ, 'wa 'piɛ- nɛ "bhle 'dle. 'A didaloa- 'se.

¹¹ 'A wolo- 'se, 'nyakpa 'na -wa 'ye 'kle -wɛ "ku, -a 'kwoa- 'ŋlu. 'A 'no- Zɔbo, -ɔ -kɛ -zigbadle, 'na 'de. 'A -yi -me 'lelee -ye Anyinɛnyɔ 'jo- kɔ 'ɛnɛɛ 'wlisɛledɛme. -Ɛɛ, Anyinɛnyɔ -wɔtɔ 'dle "ne 'ɔ -kɛ 'nyɛzedle.

'A te zligbɔ

¹² -Tia, -nyɔsɔwanye, 'a te zligbɔ. 'Ɛ yi dodo "zo, 'ɛ yi "nɔgo "zo, -ye 'ɛ -kɛ 'se -noɔ "ne -ye 'ɛ "mɔ 'se -noɔ, 'a 'te "ku zligbɔle-. 'Anyɛɛ "kuŋunuɛ "zo "kuŋunuɛ -se 'anyɛɛ losɛɛ "zo losɛɛ, -se Lagɔ te -kɛ 'anye gbobhlele-.

'A bhubhɔ 'gwizinya za

¹³ 'Anye 'glɛme, 'nyɔkpɔ "mɔ -yɛ, 'ɔ bhubhɔ- Lagɔ. 'Ŋwɛnɛ kɔ 'lɔbhɔ ne, 'ɔ 'dile Lagɔ lo keyi.

¹⁴ 'Nyɔkpɔ kɛ gbape, 'ɔ la 'ɔnɛɛ Lagɔgligbɛ "me 'na "yitia -se 'wa "kɔ 'kpe bhia-, -se 'wa "kɛ 'ɔnɛɛ za bhubhɔ- Anyinɛnyɔ 'na 'tɔ "me.

¹⁵ 'Ɛ 'dlekukɛlesɛ 'na bhubhɔ-weli -wɛ yi gwizinyɔ yamalea-. Anyinɛnyɔ yu 'wli "ku 'libhi. 'Ɔ kɛ 'nyinyonoli -no ne, Lagɔ yi 'ɔnɛɛ 'nyinyonoli 'na gbo 'yi 'tale-.

¹⁶ Zaa, 'a sɛsɛle- 'anyɛɛ 'nyinyonoli 'na 'de. 'A bhubhɔ- 'alua za -se 'a "kɛ -kɛ yamale-. 'Nyɔkpɔ 'na -ɔ ŋwinɛle- "me -wɛ, na bhubhɔweli 'tɛ- "me.

¹⁷ "Guɔkwɔmenyɔ Eli -anyɛɛ sɛ 'ye 'ɔ -noɔ me 'awɔ -lɔ 'nyɔkpɔ yɔ. 'Ɔ -bhubhɔ Lagɔ -kpɛnyee -se 'ŋu te kɛ lɔbhɔ. "Ne 'ɛ 'ŋu "ne 'diɛɛ -lɔbhɔ 'ylobɛ ta 'cibhɛ 'na dɛ.

¹⁸ "Ne Eli yi -lɔ "kusɔ bhubhɔle- "ne 'ŋu yi -lɔ lɔbhɔ, "ne dodo yi -lɔ lilɛ 'nyɛ-.

'A lale- -ɔ -bhli 'kwlɛ -wɛ 'anye lo

¹⁹ -Nyɔsɔwanye, 'anye 'glɛme, 'na -bholo kɛ 'kwlɛ bhli-, 'nyɔkpɔ 'bhɛle- 'ɔ "kɔ -gwe 'na -gwe "ku sibha-.

²⁰ Weli -cibhɛ ne ko 'anye 'dleku: 'Nyɔkpɔ kɛ 'ɔluyu "nyɛnyenoɛ 'na -gwe -ye 'ɔ bhli -wɛ "ku -sɛ, 'kwiɛ 'yli 'ye 'ɔ -sɔ -lɔ. -Ye 'ɔ -no -doɔ -wɛ za, Lagɔ yi 'ce 'nyinyonoli 'kwleyi 'na gbo 'yi 'tale-.