Zake 4 - Nouveau Testament bété de Gagnoa

-E kɛ zikpɛ ne "ku 'na -li -wa, Lagɔ 'ye -e "ne -lɔ -wa

¹ 'Anye 'glɛme 'na gbonoɛ -dee 'ɛ 'bhale bhɔ? "Ne -dee 'anyɛɛ yokotɔkpɔtɔkpɔleɛ 'bhale bhɔ? 'Anyɛɛ 'dlepɔsɛ "nyɛnye "ne bhɔ 'anye "ɛ soɔ -su 'a?

² 'A 'yɔbhɔ -bɛɛ', -mɔ, 'a -cɛ yle! 'Ɛza 'a kli -lɔ 'nyakpa -lɔbhɔ -za. 'A no lɔbhɔzo, "ne 'a "ne 'bhɛle- "ne 'a "kɛ -ye 'a 'tɛle 'siɛ -wɛ yle? 'Ɛza 'a "tɔtɔ -lɔ, "ne 'a gwe -lɔ. Sɔɔbɛɛza 'a "ne yle bhɔ "ɛ -ye 'a 'yɔbhɔ -wɛ? 'A "ne Lagɔ 'na zlɛ sɛ -yi za yɛ -lɔ.

³ 'A "kɛ zlɛ ne, 'a "ne yle! "Naa-, "nyɛnye "ku 'a zlɛ -lɔ zɛ! Sɛko -wɛ, 'a zlɛ -se 'a "kɛ 'anyɛɛ 'dlepɔsɛ -nyɛnye 'ɛyikɔ 'ŋwɛnɛ labha-.

⁴ 'A "ne bhɔ sɛ -yi -gbɔ: -E kɛ zikpɛ ne "ku 'na -li -wa, Lagɔ 'ye -e "ne -lɔ -wa. "Naa-, -ɔ kɛ no -gbɔ zikpɛ ne "ku 'na -li 'ye 'ɔ -wa, Lagɔ 'na 'gblenyɔ 'ye 'ɔ -noɔ -lɔ.

⁵ "Fu 'ye Lagɔbɔgo "ne -no nɛɛ: «Lagɔ -wa zuzu -ye 'ɔ "zo- -anye "me -wɛ kpɛnyee za 'ɔ "ne 'yɔbhɔlo lɔbhɔzo "me.»

⁶ -Mɔ, Lagɔ 'nyɛ- -anye -bɛɛ' "yitɛ -bholo "fu. "Naa-, Lagɔbɔgo lɛ- -me 'lelee sɛne nɛɛ: Lagɔ "ne "bhabhanya -wa. -Mɔ, -wa 'kwlialea 'wayi "ku -wɛ, 'ɔ "pɔ 'wanɛɛ 'nyɛzedle.

⁷ Zaa, 'a "zo Lagɔ 'plome, 'a sɛ zuzu -nyɛnye 'na lo, -se 'ɔ "kɛ 'anye guɔ ylile-.

⁸ 'A 'nyiɔ- Lagɔ yɔko, -se 'ɔ "kɛ 'anye yɔko 'nyiɔ- -me. 'A "zoa- 'ayi 'wlele, 'anye -wa -noɔ 'nyinyonolinonya 'waa -wɛ! 'A 'wɛle- 'anyɛɛ 'dlezɔ, 'anye -wa -noɔ -fɔfɔlemɔ -kolemɔ 'waa -wɛ

⁹ 'A 'nyɛne- 'se "klo, 'a 'wuɔ 'se -gbudu, -se 'a "tu 'se! 'Anyɛɛ glasiɛ 'ylile- 'se 'lugbu "me, -se 'anyɛɛ 'ŋwɛnɛ 'ylile- 'se "klo 'nyɛneɛ "me!

¹⁰ 'A 'kwlialea- 'ayi "ku Anyinɛnyɔ 'yliku, -se 'ɔ "kɛ 'anye -bhlegbi "me "zo.

'A te 'alua gbobhlele-

¹¹ -Nyɔsɔwanye, 'a te 'alua 'na "ku 'na weli -nyɛnye bhulɛ-! -Eyi -mɔɔ bhulɛ -eluyu 'na "ku 'na weli -nyɛnye, "ne -e 'bhlelo gbo -wɛ, -Lɔ 'na "ku 'na weli -nyɛnye 'ye -e bhulɛ -lɔ, "ne -e bhlele me 'lelee -lɔ "ɛ -Lɔ -wɛ gbo. -Eyi -mɔɔ 'bhlele Lagɔ 'na -Lɔ gbo -wɛ, "ɛ -Lɔ -wɛ 'ye -e "ne "zo -lɔ 'plome, 'ɛnɛɛ gbobhlenyɔ 'ye -e noɔ- -lɔ.

¹² Lagɔ -bholo -kpee -ɔ 'nyɛ -Lɔ, "ne -ɔ -noɔ gbobhlenyɔ yɔ, 'ɔyi -bholo -kpee 'bhɛle- -lɔ "ne 'ɔ "kɛ 'nyɔkpɔ fuɔ "ne 'ɔ "kɔ 'kwiɛ "me 'piɛ. -Mɔ, -eyi -mɔɔ bhlele -eluyu gbo -wɛ, -se -e libhi bhɔ -eyi "ku 'a?

'A te bha!

¹³ -Mɔ, 'anye -wa no nɛɛ: «-Zeka "ne 'zegbɛ! -A yi -glɔku me, "ne -a yi "bhle 'ylobɛ -bholo -sɛ, "ne -a yi "bhle -anyɛɛ pɔlo 'pɔle, "ne -a yi 'dlasi yle.»

¹⁴ -Ye 'a gbɔ "ɛ soɔ -wɛ, 'a -yi kɛ bhɔ -zle 'na -ɛ "kɛ 'anye "ku ze 'a? -Ɛɛ, 'a -ko sɛgbɛɛ zlu -ɛ kwli "ne 'ɛ diɔle 'zɛnyee -wɛ.

¹⁵ Sɛne 'ye 'a "kɛ nɛ -lɔ no nɛɛ: «Anyinɛnyɔ 'cɛ -kɛ "ku 'ŋunu-, "ne -a kɛ -na yɛ -me ne, -a yi -ɛne no, "ne -a yi -ɛce no.»

¹⁶ -Mɔ 'bhɔ. 'A zia 'ayi "ku -bhulɛweli "me. -Soɔ 'na bhabhɛ -wɛ "nyɛnye yɛ -lɔ.

¹⁷ 'Nyɔkpɔ 'na -ɔ -yi 'nɛne 'na nosɛ, "ne 'ɔ "ne no -wɛ, 'nyinyonoli 'ye 'ɔ no -lɔ.