Zake 2 - Nouveau Testament bété de Gagnoa

'A te 'nyakpa "me dlidlile-

¹ -Nyɔsɔwanye, 'a -kɛ 'ŋlumenyɔ Anyinɛnyɔ Zezu Kli 'dleku za, 'a te 'nyakpa "me dlidlile-.

² Sɛgbɛɛ, 'a "zo- 'wli, "ne 'nyɔkpɔ -bholo yi 'anye 'glɛme, "ne 'ɔ -pla -klɔgbɔsɛ "me, "ne 'ɔ "zo- -badlɛ 'sɔ "me, "ne "nyɛzenyɔ -bholo "ne 'tee "me -pla "ne 'ɔ yi -me -lɔ 'anye 'glɛme.

³ 'A "zo -ɔ -pla -klɔgbɔsɛ "me -wɛ 'plome "ne 'a bhulɛlo -lɔ nɛɛ: «-Eyi, gli kpiɛ 'na -kpiɛ ne "ku» "ne 'a bhulɛle 'lelee -lɔ "ɛ "nyɛzenyɔ -wɛ nɛɛ: «"Nyegbele 'ya! -E kɛ 'yɔbhɔ» "ne «gli dodo ne "ku -ame yɔko.»

⁴ 'A kɛ sɔbhɔ "zo ne, 'ayi 'ye 'a -na bhɔ "me dlidlile- 'a? Gwlɛ 'ye 'a -na bhɔ doɔ plɛ 'a?

⁵ 'A 'fo 'yukwli, -awale 'wanye, Lagɔ "ne bhɔ -glɔnya 'yliku "ɛ 'nyɛzenya -wɛ lɔbhɔ -sɛ 'a? 'Ɔ 'yɔbhɔ -gbɔ 'ɔ "koa -klɔgbɔnya "zoa- 'dlekukɛleɛ "me, -se 'wa "kɛ Lagɔ 'na 'Kamalezikpɛ -ye 'ɔ -sɛ lɔbhɔ -wa -kɛ 'ɔnɛɛ 'ŋwɛnɛ "me -wɛ za yle.

⁶ -Mɔ, 'anye, 'a zia 'nyɛzenya 'dii. -Klɔgbɔnya -na bhɔ 'anye "ku 'nɔŋole 'a? -Wa kɔme bhɔ 'anye 'gbobhlezejilɛ "ku? "Ɛ "ne bhɔ 'wayi 'waa?

⁷ "Ɛ -klɔgbɔnya -wɛ 'waa- ziɛ -lɔ 'anyɛɛ 'tɔ "namanɔ -ye Lagɔ -ziɛle 'anye 'dii.

⁸ Lagɔbɔgo nɛɛ: «-Wamale -eluyu, -see -e -wa -eyi -wɛ» 'a kɛ sɔbhɔ "zo ne, sɔbhɔ 'nɛne. "Ɛwɛ -noɔ -lɔ Lagɔ 'na 'kamale zikpɛ "me 'na -Lɔ yɛ.

⁹ 'Ɛza, 'a kɛ 'nyakpa "me dlidlile- ne, 'nyinyonoli 'ye 'a no -lɔ. 'A 'cɛ sɔbhɔ 'sa ne, Moyize 'na -Lɔ yi 'anye gbo lua-, "naa-, 'a "ne "zo 'plome zɛ.

¹⁰ 'Nyɔkpɔ -ɔ -gɛle -Lɔ -wɛ kɛ 'ɛnɛɛ 'glɛme 'na -bholo 'plome -sɛ ne, -Lɔ 'klekle 'ye 'ɔ -sɛ -lɔ 'plome.

¹¹ "Naa-, Lagɔ nɛɛ: Te -kɛ gbo zlɛ. "Ne 'ɔ -bhulɛ -me 'lelee nɛɛ: Te -kɛ 'nyɔkpɔ 'lɔbhɔ. Sɔbhɔ za, -e "mɔ gbo -zlɛ "ne -e kɛ 'nyɔkpɔ 'lɔbhɔ-, -Lɔ 'ye -e -sɛ -lɔ 'plome.

¹² 'Anyɛɛ bhulɛsɛ, "ne 'anyɛɛ nonoli "me 'ye 'wa "kɛ -kɛ -lɔ 'anye 'gbobhlele-, -Lɔ 'na -ɛ yelea kɔ -wɛ "me.

¹³ Sɛko -wɛ, 'gbobhle -zle -kɛ ylɛ-, 'nyɔkpɔ -ɔ "ne "pɔ 'ɔluyu 'na 'nyɛzedle -wɛ, Lagɔ -ka 'ɔnɛɛ 'nyɛzedle "pɔ. -Mɔ 'nyɛzedle -kɛleɛ zi gbobhleleɛ "ku.

'Dlekukɛleɛ "ne nonoli

¹⁴ -Nyɔsɔwanye, 'nyɔkpɔ kɛ no nɛɛ: «'E -kɛ Lagɔ 'dleku.» "Ne 'ɔ "mɔ 'ɔnɛɛ 'dlekukɛlesɛ tua ne, -ye 'ɛ -ko bhɔ "me 'a? 'Ɔnɛɛ 'dlekukɛleɛ -wɛ yu bhɔ 'fuɔ 'a?

¹⁵ Sɛgbɛɛ "nɔwli -bholo, -lalɛce "nɔyɔ -bholo "ne "meplakoti -kɛ, "ne 'wa "ne lilibɛɛ -kɛ zle 'klekle "me,

¹⁶ "ne 'anye 'glɛme 'na -bholo bhulɛloa -lɔ nɛɛ: «'Degasɛ! 'A pla- "me, -se 'a li 'tee!» "Ɛ bhulɛweli -wɛ -se 'ɛ sɛ bhɔ zɔ 'a? 'A -noa kɛ "ku -yi ne.

¹⁷ "Ɛ sɛbhele -wɛ yɛ -lɔ 'dlekukɛleɛ 'na dɛku. 'Dlekukɛleɛ 'na -ɛ "ne nonoli 'glɛglɛ- -wɛ "ku- -ye 'ɛ "ku- -lɔ.

¹⁸ 'Nyɔkpɔ yi -lalɛce no -gbɔ: «-e -kɛ Lagɔ 'dleku, "ne -ame, 'e no -li 'na -li.» 'E yu lo 'yɔbhɔ nɛɛ: «sloa- -ame -see -neɛ' 'dlekukɛlesɛ "kɛ lele- 'ɛ "mɔ nonoli glɛglɛ-. -Se -ame 'e "kɛ -eyi 'neɛ nonoli "me 'neɛ 'dlekukɛlesɛ tua.»

¹⁹ -E -kɛ bhɔ 'dleku -gbɔ Lagɔ yle -bholo -kpee 'a? -Ɛɛ, -neɛ' weli 'nɛne. -Mɔ, zuzu -nyɛnyea -cɛ -me -kɛ 'lelee 'dleku, "ne 'guguza 'wa tɛtɛle.

²⁰ -Ɔ "ne "nɛ- lɛ, -e 'yɔbhɔ bhɔ -gbɔ 'wa tua -eyi -see 'dlekukɛleɛ -ɛ "ne nonoli glɛgle- "ne -bɛɛ' "me -ko 'a?

²¹ -A 'to 'wa 'to Ablame, -see Lagɔ -yibhlelo bhɔ -gbɔ "meŋwinɛlenyɔ yɔ 'a? 'Ɛ "ne bhɔ -sɔɔdɛku 'ɔ 'piɛ- 'ɔ yowli Izake bɔbɔledɛme -wɛ yɛ?

²² -E -gɛyli, 'ɔnɛɛ nonoli, "ne 'ɔnɛɛ 'dlekukɛleɛ -bhele yɛ -lɔ, 'ɔnɛɛ nonoli -gbɔ -lɔ "ne 'ɔnɛɛ 'dlekukɛleɛ "ne -lɔ nuɛsɔbhɔledɛ -kɛ.

²³ Soɔ 'ye -ye Lagɔbɔgo -bhulɛ -wɛ 'wlole- -lɔ 'yli: Ablame -kɛle Lagɔ 'dleku, 'ɛza, Lagɔ -yibhlele -lɔ 'ɔnɛɛ "meŋwinɛleɛ "ne 'ɔ yu -lɔ 'ɔnɛɛ 'tito la.

²⁴ 'A -gɛyli, Lagɔ kɛ no -gbɔ 'nyɔkpɔ ŋwinɛle- "me ne, 'ɛ "ne -kɛ 'dlekukɛleɛ 'ɛyikɔ za yɛ, -mɔ, nonoli "me za yɛ -me -lɔ.

²⁵ Ylaabo, gbozlɛŋɔnɔ -nɛ, 'ɛ sɛbhele -wɛ yɛ 'awɔ -lɔ. Lagɔ yo 'awɔ 'ylime -gbɔ 'ɔ ŋwinɛle- "me, 'ɔnɛɛ -ye 'ɔ -no 'awɔ -wɛ za. "Naa-, 'nyakpa -ye Izlayɛleyua lebhe- -wɛ, 'ɔ 'zoloa- 'awɔ 'yliku 'tee, "ne 'ɔ yua -lɔ kwɛle- "ne 'wa yi -lɔ -gwe 'na -vinɛ bhli.

²⁶ -Tiaa, -see ku "mɔ nyɔpɔnyɔŋo "me -ko "ne 'ɛ "ku -wɛ, "ɛ sɛbhele -wɛ, 'dlekukɛleɛ "ku- -lɔ 'ɛ "mɔ nonoli glɛglɛ-.