Zake 1 - Nouveau Testament bété de Gagnoa

Bhɛleweli

¹ -Ame Zake, 'mɔɔ -noɔ Lagɔ "ne Anyinɛnyɔ Zezu Kli 'na "kulɔbhɔnyɔ yɔ -wɛ, 'e bhɛle Lagɔ 'na -gligbɛnya -wa -ŋwɛne dodo -kpɛtɛ ne "ku 'klekle -wɛ.

'Ŋwɛnɛ 'lɔbhɔ 'anye -ko 'kplɛkplɛɛ "me -wɛ

² -Nyɔsɔwanye, 'a kɛ 'kplɛkplɛɛ "me -ko ne 'ŋwɛnɛ 'lɔbhɔ 'anye.

³ "Naa-, 'a -yi sɛ -gbɔ 'a kɛ 'kplɛkplɛɛ "me -ko, "ne 'anyɛɛ 'dlekukɛleɛ kɛ "me 'tɛ-, 'ɛɛ "kɛ -lɔ -gbɔ "ne 'a "kɛ -lɔ "me "tamale-.

⁴ Zaa, 'a "tamale- -kɛ 'kwɛme -kaa -se 'a 'cɛ -kɛ 'wli sɛ, "naa-, 'a 'cɛ sɔbhɔ 'sa ne, 'a -ka 'ce 'nuɔsɔbhɔledɛ yle- "ne -bɛɛ' -ka 'ce 'lelee 'anye kɔ bɔ.

'A kɛ 'bhubhɔ 'dlebhɛ te 'anye 'lɔbhɔ

⁵ 'Anye 'glɛme 'na -ɔ "ne "nɛ- -wɛ, 'ɔ 'yɔbhɔle "ɛ "nanoɛ -wɛ Lagɔ -ɔ 'nyɛ 'nyakpa 'klekle, "ne 'ɔ "ne 'gbɔtɔle 'nyɔkpɔ "ku "ne 'ɔ 'nyɛle 'dle -wɔtɛ "me.

⁶ 'Ɔ zlɛle- -kɛ 'dlekukɛleɛ "me. -Mɔ, 'dlebhɛ 'to 'ce 'lɔbhɔ, "naa-, -ye 'dlebhɛ lɔbhɔ -wɛ -ko sɛgbɛɛ jinyɛ 'na -gbɔkɔle -ye pepe zuzua "me "ne 'ɛ pɛ "nɔgɔ "ku -wɛ.

⁷ Sɔbhɔ 'na nyɔ -wɛ te 'ce 'dlepɔ -gbɔ Anyinɛnyɔ yu -ye 'ɔ "kɔ 'yɔbhɔle -wɛ kɔ 'je.

⁸ "Naa-, 'nyɔkpɔ 'na -ɔ "ne -gwe 'na -ye 'ɔ "kɛ bhli -wɛ dɛ -yi yɔ -lɔ. 'Ɔ me -zlewɛ 'yuku, "ne 'ɔ yili -zlewɛ 'beme.

Poɛ "ne -klɔgbɔ

⁹ "Nɔwli 'na -ɔ "ne -bɛɛ' -kɛ -wɛ, zu 'to 'lɔbhɔ -mɔ, 'ŋwɛnɛ 'lɔbhɔ, sɛko -wɛ, Lagɔ 'na dɛku, "yitɔ yɔ -lɔ zɛ.

¹⁰ "Ne 'klecɛnyɔ 'na -ɔ pɔ -klɔgbɔ -wɛ, Lagɔ kɔ yu "zoa-, 'ŋwɛnɛ 'lɔbhɔ. "Naa-, -klɔgbɔnyɔ "ne -gwlɛ zɛ. 'Ɛ -ko sɛgbɛɛ "kwlɛ -piti -ɛ sɛ -bhebhe -wɛ,

¹¹ ylo kɛ 'po "ne 'ɛ 'cɛ -siɛ, yɛ 'ye 'ɛ yɛ -lɔ, "ne 'ɛ bhli -lɔ zɔ, "ne 'ɛ nyimɔ- -lɔ "ku. Sɔbhɔ 'ye 'yli -bholo "me, -klɔgbɔnyɔ "kɛ 'ce -lɔ me, 'ɔ -nyɛ 'ɔnɛɛ nonoli 'klekle "bhaa.

Lagɔ "ne noa- 'nyɔkpɔ "nyɛnye

¹² 'Ŋwɛnɛ 'lɔbhɔ 'se 'nyɔkpɔ 'na -ɔ "ne bhlile- "mebeamɔ, "ne 'ɔ "tamalea 'ɔyi 'kwɛme -wɛ. "Naa-, 'ɔ kɛ 'ɔnɛɛ -kosɛ "namanɔ 'nyakpa 'ylime 'tua ne, 'ɔ yi 'ce zikpɛ yle. Lagɔ 'na 'peɛleɛ -ye 'ɔ no -gbɔ 'ɔ "kɛ -wa "zo- 'wanɛɛ 'ŋwɛnɛ "me kɔ 'je -wɛ yɛ -lɔ.

¹³ 'Ɛza, 'nyɔkpɔ 'na 'dle kɛ "nyɛnye -nodɛ plele-, "ne 'ɔ -ka -lɔ no nɛɛ: «Lagɔ 'pɔ- -lɔ -ame "nyɛnyenoɛ 'dlezɔ.» Lagɔ "ne "pɔ sɛ -nyɛnye 'dle, "ne 'ɔ "ne 'toa- 'nyɔkpɔ 'gbi.

¹⁴ -Mɔ, -ɔkɔkokɔko 'na 'dlepɔsɛ -nyɛnye 'peliɔ -lɔ "nyɛnyenoɛ 'yli, "ne 'ɛ noɔ -lɔ -ye 'ɔ 'yɔbhɔ -wɛ.

¹⁵ 'Ɛza, -e "mɔ "ɛ 'dlepɔsɛ -nyɛnye -wɛ 'yi 'tale-, "ne 'ɛ -kɛ -ye 'ɛ 'yɔbhɔ -wɛ no ne, 'nyinyonoli 'ye 'ɛ 'ylile -lɔ "me. "Ne "ɛ 'nyinyonoli -wɛ kɛ -la 'kpɔmale- ne, 'ɛ 'ylile -lɔ 'kwiɛ "me.

¹⁶ Zaa, -awale 'wanye -lɛ, 'a te -kɛ 'ayi ylo no.

¹⁷ -Mɔ, -li 'na "namanɔ -ɛ yle 'anye -wɛ, "ne -bɛɛ' 'na "namanɔ -ye 'wa 'nyɛ 'anye "fu -wɛ, "nɔgɔ "me 'ye 'ɛ 'bhale -lɔ, Lagɔ -ɔ 'wlɛ- ylo "ne -zeli -wɛ 'je -lɔ 'anye kɔ. Lagɔ "ne bheliɔ- kɔ, 'ɔ "ne 'bha- bhulɛ "ku, 'ɔ "ne zuzu -kɛ.

¹⁸ Lagɔ 'yɔbhɔ nɛ -gbɔ 'ɔ "kɛ -anye zikpɛ 'nyɛ 'ɔnɛɛ weli -ɛ -noɔ gbɛklɛklɛ yɛ -wɛ "me. "Naa-, -anye -noɔ -lɔ -li 'klekle -ye 'ɔ 'wlɛ- -wɛ 'na tɛtɛnoa 'waa zɛ.

'A 'fo Lagɔ 'na weli 'yukwli -se 'a no -ye 'ɛ bhulɛ -wɛ

¹⁹ -Awale 'wanye, -ye 'a "kɛ yibhlele- ne lɛ: -Ɔkɔkokɔko yi 'yukwli 'fo -ku "pulɔ, -mɔ, 'ɔ te -kɛ bhulɛ -ku "pulɔ, "ne 'ɔ te -kɛ kɛle pɔ -ku "pulɔ.

²⁰ "Naa-, 'nyɔkpɔ 'na -ye kɛle 'lɔbhɔ -wɛ 'ɔ "ne no -da -ɛ ŋwinɛle- "me Lagɔ 'yliku.

²¹ Zaa, 'a 'tale- "nyɛnye "ne -li 'klekle -ɛ pla 'anye 'fe -wɛ 'yi, -se 'dlewɔtɛ "me, 'a 'sa weli -ye Lagɔ "zo- 'anye 'dlezɔ -wɛ kɔ, 'ɛ bhɛle -se 'ɛ "kɛ 'anyɛɛ zikpɛ 'fuɔ.

²² 'A te -kɛ "fu 'yukwli fo, -mɔ 'a no -kɛ -ye 'ɛ bhulɛle 'anye -wɛ, 'ɛ "mɔ -kɛ sɔbhɔ yɛ ne, 'ayi 'ye 'a no -kɛ -lɔ ylo 'ayigɛsɛ.

²³ -Ɛɛ -ɔ 'fo Lagɔ 'na weli 'yukwli, "ne 'ɔ no -ye 'ɛ bhulɛ -wɛ 'na -ye 'ɔ 'wlole- ne lɛ: 'Ɔ -ko sɛgbɛɛ 'nyɔkpɔ -ɔ -wlole pepleyi "me, "ne 'ɔ 'ye- -see 'ɔ -ko gou -wɛ 'ylime,

²⁴ 'ɔ 'wolo 'ɔyi "ku, "ne 'ɔ kɛ -me, 'ɔ 'dlu -lɔ "ɛ -see 'ɔ -ko -wɛ "ku cuu.

²⁵ -Mɔ, 'nyɔkpɔ 'na -ɔ ciɛ -Lɔ "namanɔ -ɛ yelea kɔ 'tee -wɛ ne lɛ. 'Ɔ -kɛ "ɛ -Lɔ -wɛ kɔ, 'ɔ fo Lagɔ 'na weli 'yukwli, "ne 'ɔ "ne 'dlu- "ku, "ne 'ɔ 'plɛ "ku. Sɔbhɔ 'na 'nyɔkpɔ -wɛ, -ye 'ɔ kɛ 'se no -ce yu 'ce 'ŋwana "ku -lele.

²⁶ Zaa, 'nyɔkpɔ kɛ no -gbɔ 'ɔ -noɔ 'klecɛnyɔ 'na "namanɔ yɔ, "ne 'ɔ kɛ bhulɛ -ku "pulɔ, 'ɔyi 'nabhɛ 'ye 'ɔ no -lɔ ylo, "ne 'ɔnɛɛ -see 'ɔ 'nɔŋo- Lagɔ 'yliku 'tee -wɛ "ne -la -bɛɛ' "me -ko.

²⁷ -A To Lagɔ 'yliku 'na bɔbɔbɔboɛ gbaa ne lɛ: -A slu -kɛ "kuyua -nyɛ -kwiziŋwenea -wa -ko 'nyɛze "me -wɛ 'tee, -se -a te -kɛ dodo ne "ku 'na -li -ɛ 'pla 'fe -wɛ mamale-.