'Ylikloylɛleweli 9 - Nouveau Testament bété de Gagnoa

Lɛglɛ 'na 'umgbunɛ 'di- gbo

¹ "Nɔgɔzilɔ 'na 'umgbunɔ yi -lɔ 'ɔnɛɛ lɛglɛ 'gbo 'dia-. 'E -gɛ -zeli -ɛ 'bha nɛ "nɔgɔ "me "ne -ɛ bhli dodo "ku -wɛ 'yli. "Ne 'wa yu -lɔ "kuduku 'na 'safɛ kɔ 'je.

² -Zeli yi -lɔ "kuduku 'na -gbulɛ kɛle-, 'gbɔylo 'gblɛ nɛ "nɔgɔ "me. "Ɛ 'gbɔylo -wɛ 'wlole- nɛ -kosu -gbagbo 'na 'gbɔylo. Ylo -nyɛ -pepe "bhaa 'tile- nɛ "ɛ "kuduku 'na 'gbɔylo -ɛ 'bhale "bhle -wɛ za.

³ 'Kpakpaa 'bhale nɛ "ɛ 'gbɔylo -wɛ "me "ne 'wa 'ŋwɛne- nɛ -lɔ dodo "ku. "Ne "ɛ 'kpakpaa -wɛ, 'wa yua -lɔ dodo ne "ku 'na gagagbitoa 'na 'bhɛloɛ kɔ 'je.

⁴ 'Wa 'titlua- kɔ -gbɔ 'wa te -kɛ -piti, 'glogloli "ne su "nyɛnye no, -mɔ 'nyakpa -wa "ne Lagɔ 'na 'be "klo -su -wɛ, 'wayikɔ 'wa -na 'no -kɛ 'wli.

⁵ 'Wa -bhulɛloa -gbɔ 'wa 'toa nɛ -kɛ 'lɔbhɔ -se 'wa te -kɛ "ku. -Mɔ, 'wa 'gbapua- 'ce 'umgbu 'na dɛ. 'Gbapegbapeɛ -ye "ɛ 'kpakpaa nɛme nɛ 'nyakpa "ku -ko nɛ sɛgbɛɛ gagagbito 'na -nimimiɛ 'na 'glo.

⁶ Lɔbhɔ 'na dɛ "ku, 'nyakpa yi 'ce 'kwiɛ 'siɛ tɛle-, -mɔ, 'wa -cɛ yle. 'Wa yi no -gbɔ 'kwiɛ 'wa 'yɔbhɔ, -mɔ, 'kwiɛ yua "guɔ 'ylile-.

⁷ "Ɛ 'kpakpaa -wɛ 'wlole- nɛ -sokofania -ye 'wa -jijalea lɛ 'wli to -gwe -za. 'Wa -su nɛ -bɛɛ' -bholo 'wli, 'ɛ 'wlole- -badlɛ -maflɛ. 'Wanɛɛ "klo -le nɛ sɛgbɛɛ 'nyakpa -nɛ.

⁸ 'Wanɛɛ 'wli 'na 'nyi -ko nɛ sɛgbɛɛ 'ŋwenea 'na 'nyi "ne 'wanɛɛ glɛ -ko nɛ sɛgbɛɛ slukua -nɛ.

⁹ 'Wa -pla -bɛɛ' -ɛ 'wale- kɛkle "ku -wɛ "me, 'ɛ -le sɛgbɛɛ togwekoti 'na 'leyinɛ, "ne 'wanɛɛ -kopi 'na 'kple -le nɛ sɛgbɛɛ togwemobi -ye -sokofania 'na 'kwleyia 'jli lɛ ne.

¹⁰ "Ɛ 'kpakpaa -wɛ -kɛ nɛ goyi sɛgbɛɛ -gagagbitoa 'na 'glɛ -ɛ -tɛleɔ 'yli -wɛ. 'Wanɛɛ goyi 'nyoa nɛ -lɔ 'bhɛloɛ -se 'wa "kɛ 'nyakpa "nyɛnye no 'ce 'umgbu 'na dɛ.

¹¹ "Ɛ 'kpakpaa -wɛ 'na -klɔgbɔnyɔ -noɔ -lɔ "kuduku 'na -zilɔ -ye 'wa la eblegbo "me Abadɔ "ne 'glɛkegbo "me Apoliɔ, 'ɛ sɛ zɔ nɛɛ: «-Li 'klekle 'na "kubhianyɔ.»

¹² "Kleyeɛ 'na tɛtɛnɛ 'ple- "bhuɔ. 'A -gɛ 'yli: "Kleyeɛ "sɔ 'bhale 'lelee 'beme.

Lɛglɛ 'na 'gbeplonɛ 'di- gbo

¹³ "Nɔgɔzilɔ 'na 'gbeplonɔ yi -lɔ 'ɔnɛɛ lɛglɛ 'gbo 'dia-. 'E 'no- weli -ɛ 'bhale bɔbɔledɛ -ɛ -noɔ -badlɛ "ku 'na 'gwe -mɔɔnɔ -ɛ -ko Lagɔ 'yli "ku -wɛ "me.

¹⁴ "Ɛ weli -wɛ bhulɛle nɛ "nɔgɔzilɔ 'na 'gbeplonɔ -ɔ -su lɛglɛ -wɛ nɛɛ: Vulu- "nɔgɔzilia -mɔɔnɔ -ye 'wa -gbɛtele 'ŋu "yitɛ -ye 'wa la Eflate yɔko -wɛ.

¹⁵ "Ne 'wa yi 'se -lɔ "ɛ "nɔgɔzilia -mɔɔnɔ -wɛ vulu- ne. 'Wa -jijaloa nɛ 'wli "ɛ 'gle ne, 'yli ne, 'ce ne "ne 'ylobɛ ne 'na za, -se 'wa "kɛ dodo ne "ku 'na 'nyakpa -ye 'wa -dli "ku ta "me -wɛ 'na 'cibhɛ 'na tanɛ 'wli bhia-.

¹⁶ 'Wa -bhulɛle -ame "slojanya -wa 'gli- -sokofania "klo 'na zinɔsɛ. 'Wa -yle nɛ mlinyɔ -glo 'umgbu 'na 'wukwɛ "sɔ (200 000 000).

¹⁷ "Ɛ 'ylikloylaleli -wɛ "me, -see 'e 'yeme "ɛ -sokofania -nyɛ 'wanɛɛ "kloglinya "bhaa ne lɛ: 'Wa -pla nɛ togwekoti -ye 'wa nole- 'leyi nu "me, 'ɛɛ 'wale nɛ -lɔ 'wanɛɛ 'kekle "ku. 'Ɛnɛɛ ku -zɛle nɛ sɛgbɛɛ -kosu, 'kpɔ sɛgbɛɛ -biŋu "ne sɛgbɛɛ 'tiyi -ye 'wa la safile -wɛ, "ne 'ɛ -zɛle nɛ 'lelee sɛgbɛɛ 'kpɔŋosu. "Ɛ -sokofania -wɛ 'na 'wli -le nɛ sɛgbɛɛ -slukua -nɛ. 'Wanɛɛ nu, -kosu, 'gbɔylo "ne -biŋu 'bhale nɛ "bhle.

¹⁸ 'Kpilɛkpilɛ "yitɛ ta -ɛ 'bhaloa nu nɛ: -Kosu, 'gbɔylo, "ne -biŋu bhia nɛ dodo ne "ku 'na 'nyakpa -ye 'wa -dli ta "ku "me 'na 'cibhɛ 'na tanɛ 'wli.

¹⁹ -Sokofania 'na 'bhɛloɛ 'wanɛɛ nu "ne -goyi "me 'ye 'ɛ -ko -lɔ. 'Wanɛɛ -goyi -le sɛgbɛɛ 'tɛbhea. "Ɛ -goyi -wɛ -kɛ nɛ 'wli, 'ɛyi 'wa nole nɛ -lɔ 'nyakpa "nyɛnye "me.

²⁰ 'Ɛ "nyɛnye "yitɛ -wɛ "ne -kɛ 'nyakpa 'klekle 'lɔbhɔ-. 'Nyakpa 'na -wa -to lɔbhɔ -wɛ, 'wa "ne 'wanɛɛ zikpɛ kɔ 'bhelia-. 'Wa "ne demo -nyɛ "fu 'na lagɔ -wɛ 'wɔ, -wa "ne 'bhɛle- "ne 'wa "kɛ 'siɛ 'ye, "ne 'wa "kɛ gbo 'no, "ne 'wa "kɛ 'nɔŋo, "ne 'wa -noloa -badlɛ, 'dlasi, -dlɛ, 'tiyi "ne su "ku, 'na bɔbɔ -za 'diɔle.

²¹ "Ɛ 'nyakpa -wɛ, 'wa "ne 'wanɛɛ 'nyakpalɛbhɛɛ 'yi 'tale-, "ne 'wa bɔbɔ -nazɛ "gu, "ne 'wa -su -lɔ 'wanɛɛ zikpɛ 'kpetekli "ne 'wa 'yli -lɔ 'wi.