'Ylikloylɛleweli 8 - Nouveau Testament bété de Gagnoa

'Bhlɛbhlɛyu -vulu "bɔgo 'na 'gwaledɛ 'na -gbɔɔsɔnɛ "ku

¹ 'Bhlɛbhlɛyu -vulu lɛ "ɛ "bɔgo 'na 'gwaledɛ 'na -gbɔɔsɔnɛ ne, "nɔgɔ "me -plɛ -vlee 'glecibhɛ 'na dɛ.

² "Ne 'e yi -lɔ "nɔgɔzilia -gbɔɔsɔ -wa 'nyegbe- Lagɔ 'yli "ku -wɛ 'ylime 'ye. 'Wa 'joa- lɛglɛ -gbɔɔsɔ kɔ.

³ "Nɔgɔzilɔ 'na -vinɔ -yi, "ne 'ɔ yi -lɔ bɔbɔledɛ 'nyegbe-, 'ɔ -su -badlɛslɔ -mee 'wa 'bhuale 'wle -wɛ, 'wa 'jo- -lasiklɔ 'na 'kwleyi kɔ -se 'ɔ 'cɛ Lagɔ kɔ 'je 'ɔ -nyɛ 'wlewlea 'klekle 'na 'bhubhɔweli "bhaa, "ne bɔbɔledɛ -ɛ -noɔ -badlɛ "ku "ne 'ɛ -ko 'leyli-gbɔglo 'yli "ku -wɛ "bhaa.

⁴ "Ɛ "nɔgɔzilɔ -wɛ 'na 'kwlɛ "me 'wele 'na gbɔylo 'bhale nɛ -lɔ "ne 'nyakpa 'klekle -wa -noɔ Lagɔ -noa 'waa -wɛ 'na 'bhubhɔweli "bhaa 'ɛ 'gblɛle nɛ -lɔ Lagɔ lo.

⁵ "Ne "ɛ "nɔgɔzilɔ yi -lɔ slɔ -mee 'wa 'bhuale 'wele -wɛ "ku 'libhi, "ne 'ɔ yi -lɔ bɔbɔledɛ 'na -kosu "ku 'yiɛ, "ne 'ɔ 'yi -lɔ dodo "ku "pɔ. "Ne -gbagbadɛ yi -lɔ "gba, weli 'bhale "bhle "ne 'ŋu yi -lɔ 'yli 'bhle, "ne dodo yi -lɔ tɛtɛle-.

Lɛglɛ 'na -mɔɔnɔnɛ 'na weli

⁶ "Ne "nɔgɔzilia -gbɔɔsɔ -wa -su lɛglɛ -gbɔɔsɔ -wɛ yi -lɔ 'wayi 'wli 'jijale- -se 'wa 'cɛ 'gbo 'dia-.

⁷ "Ne tɛtɛnɔ yi -lɔ lɛglɛ 'gbo 'dia-, -zeli "ne -kosu -nyɛ dlu "bhaa -bhlebhlele lo "ne 'ɛ yi -lɔ dodo "ku bhli. "Ne dodo -ye 'wa 'dli- 'pɛɛ ta "ku "me -wɛ 'na 'pɛɛ 'na tanɛ yi -lɔ si, dodo "ku 'na su 'klekle -ye 'wa -dli 'pɛɛ ta "ku "me -wɛ 'na 'pɛɛ 'na tanɛ yi -lɔ si, "ne -piti 'na 'yiyɛle -wɛ 'klekle yi -lɔ si.

⁸ "Ne "nɔgɔzilɔ 'na "sɔnɔ yi -lɔ 'ɔnɛɛ lɛglɛ 'gbo 'dia-, -bɛɛ' -le sɛgbɛɛ -gaga "yitɛ 'diɔ- 'yli "ne 'ɛ yi jinyɛ "me 'bhli-, "ne jinyɛ 'na 'cibhɛ 'na tanɛ yi -lɔ dlu "zo.

⁹ -Yɛyɛnɛmea 'klekle -ye 'wa -dli ta "ku "me -wɛ 'na 'cibhɛ 'na tanɛ -ɛ -ko jinyɛ "me yi -lɔ "ku, "ne bato 'klekle -ye 'wa -dli ta "ku "me -wɛ 'na 'cibhɛ 'na tanɛ yi -lɔ "kubhiɛ.

¹⁰ "Ne "nɔgɔzilɔ 'na tanɔ yi -lɔ 'ɔnɛɛ lɛglɛ 'gbo 'dia-. "Ne -zeli 'na "yitɛ yi -lɔ "nɔgɔ "me 'bha- "ne 'ɛ yi -lɔ zɔ bhli-, 'ɛ -le sɛgbɛɛ ylo. 'Ɛ -bhli bɔɔ 'na 'cibhɛ 'na tanɛ -nyɛ 'ŋuwli "bhaa "me.

¹¹ 'Ɛ -zeli -wɛ 'pa- -lɔ «"kɛkɛle.» "Ne "ɛ 'ŋu 'na 'cibhɛ 'na tanɛ yi -lɔ nu 'kamale-, "ne 'nyakpa 'na -kwleyia -wa nɛmɔ- "ɛ 'ŋu -wɛ yi -lɔ "ku, sɛko -wɛ "ɛ 'ŋu -wɛ -kamale nu zɛ.

¹² "Ne "nɔgɔzilɔ 'na -mɔɔnɔnɔ yi -lɔ 'ɔnɛɛ lɛglɛ 'gbo 'dia-, ylo -ye 'wa -dli ta "ku "me -wɛ 'na 'cibhɛ 'na tanɛ, 'ce -ye 'wa -dli ta "ku "me -wɛ 'na 'cibhɛ 'na tanɛ, "ne -zeli -ye 'wa -dli ta "ku "me -wɛ 'na 'cibhɛ 'na tanɛ yi -lɔ 'lɔbhɔ-, "ne "ɛ -dee 'lɔbhɔ- -wɛ yi -lɔ 'kpɔ "zo: "Ne zle -ye 'wa -dli ta "ku "me -wɛ 'na 'cibhɛ 'na tanɛ -nyɛ "titiɛ -ye 'wa -dli ta "ku "me -wɛ 'na 'cibhɛ 'na tanɛ "bhaa yi 'lelee -lɔ 'ɛnɛɛ zle bhlia-.

¹³ 'E 'na 'wolo 'lelee, "pepe "bhlule "nɔgɔ "me fɛfɛ, "ne 'e yi -lɔ 'ɔnɛɛ "yitɛ "ku 'na "mekpaweli 'no nɛɛ: 'Kpilɛkpilɛ! 'Kpilɛkpilɛ! 'Kpilɛkpilɛ yi -kɛ dodo ne "ku 'na 'nyakpa 'klekle 'lɔbhɔ, -sɔɔdɛku "nɔgɔzilia ta 'na 'bebhiɛlenoa -wɛ kɛ -kɛ 'wanɛɛ lɛglɛ 'gbo 'dia-.