'Ylikloylɛleweli 7 - Nouveau Testament bété de Gagnoa

"Nɔgɔzilɔ "zo Lagɔ 'na 'nyakpa 'be "klo

¹ 'Ɛyi -wɛ "kɛ -ple "bhuɔ ne, 'e 'ye- "nɔgɔzilia -mɔɔnɔ 'ylime, 'wa 'nyegbe- dodo 'na 'gwegwe -mɔɔnɔ 'yli. 'Wa 'nyegbea- dodo ne "ku 'na -pepe -mɔɔnɔ, -se -pepe te -ka -la dodo ne "ku, jinyɛ "klo, "ne su -wɛ 'wɔ 'wli yi gou.

² 'E -gɛ "nɔgɔzilɔ 'na -vinɔ 'yli, 'ɔ 'gblɛ -mee ylo 'bhale -wɛ. 'Ɔ -su -bɛɛ' -ye 'wa "zole -yɛyɛ Lagɔ 'na 'be "klo -wɛ kɔ. 'Ɔ 'kpale "nɔgɔzilia -mɔɔnɔ -wa -yle 'bhɛloɛ -se 'wa "kɛ dodo "ne jinyɛ "nyɛnye no -wɛ "ku nɛɛ:

³ 'A te -kɛ dodo, jinyɛ "ne su -wɛ 'wɔ "nyɛnye no! -A "kɛ -na -kɛ -anyɛɛ Lagɔ 'na "kulɔbhɔnya 'be "klo "zo "bhuɔ.

⁴ "Ne 'e yi -lɔ -ye -wa "zo- Lagɔ 'na 'be "klo -wɛ 'na "kudimasɛ "me 'no. 'Wa -yle -gɛmɛnɛ -wlulu -glo 'umgbu 'wlulu -glo "sɔ 'wlulu -mɔɔnɔ (144.000), Izlayɛle 'na -gligbɛ 'klekle "ku 'na 'nyakpa 'waa -lɔ:

⁵ Zuda 'na -gligbɛ "ku -gɛmɛnɛ -wlulu kogbɔ "sɔ (12.000) 'wa "zo- 'awɔ -lɔ 'be "klo, Wlubɛne 'na -gligbɛ "ku -gɛmɛnɛ -wlulu kogbɔ "sɔ (12.000), Gade 'na -gligbɛ "ku -gɛmɛnɛ -wlulu kogbɔ "sɔ (12.000),

⁶ Azɛle 'na -gligbɛ "ku -gɛmɛnɛ -wlulu kogbɔ "sɔ (12.000), Nɛfotali 'na -gligbɛ "ku -gɛmɛnɛ -wlulu kogbɔ "sɔ (12.000), Manase 'na -gligbɛ "ku -gɛmɛnɛ -wlulu kogbɔ "sɔ (12.000).

⁷ Simeɔ 'na -gligbɛ "ku -gɛmɛnɛ -wlulu kogbɔ "sɔ (12.000), Levi 'na -gligbɛ "ku -gɛmɛnɛ -wlulu kogbɔ "sɔ (12.000), Isakale 'na -gligbɛ "ku -gɛmɛnɛ -wlulu kogbɔ "sɔ (12.000)

⁸ Zabulɔ 'na -gligbɛ "ku -gɛmɛnɛ -wlulu kogbɔ "sɔ (12.000), Zozɛfo 'na -gligbɛ "ku -gɛmɛnɛ -wlulu kogbɔ "sɔ (12.000), Bɛzamɛ 'na -gligbɛ "ku -gɛmɛnɛ -wlulu kogbɔ "sɔ (12.000). 'Wayi 'klekle -yle nɛ "ɛ 'be -wɛ.

-Zakpɛ "yitɛ 'na weli

⁹ 'Ɛwɛ "kɛ -ple "bhuɔ ne, 'e "kɛ 'lelee 'siɛ 'wolo- ne, "ne 'e yi -lɔ 'nyakpa 'na -zakpɛ "yitɛ 'ylime 'ye, 'wa "ne nɛ zɛle -sɛ -kɛ: Dodo 'klekle, -glɔ 'klekle, 'nyakpa 'klekle "ne gbɔgbɔgbo 'klekle. 'Wa 'nyegbe- 'awɔ -klɔgbɔnyɔ 'na 'leyli-gbɔglo "ne 'bhlɛbhlɛyu 'yli "ku. 'Wa -pla nɛ "koti 'glɛgbɛ 'fɛɛ "me "ne 'wa -su nɛ 'gbli kɔ.

¹⁰ 'Wa 'kpa nɛ "me "yitɛ "ku nɛɛ: «-Anyɛɛ Lagɔ -ɔ -gli 'leyli-gbɔglo "ku -nyɛ 'bhlɛbhlɛyu, "bhaa 'waa- 'fuɔ -lɔ -anye.»

¹¹ "Nɔgɔzilia 'klekle bli- nɛ "ɛ 'leyli-gbɔglo, nyɛbhlogɔgoa -nyɛ -yɛyɛnya -mɔɔnɔ -wɛ "bhaa. 'Wa -gla nɛ dodo 'wli, -klɔgbɔnyɔ 'na 'leyli-gbɔglo 'yli "ku, "ne 'wa "zo nɛ -lɔ Lagɔ

¹² nɛɛ: «Amɛn! 'Ŋlukwɛɛ, -klɔgbɔ, 'ylimeyamaleɛ, -bhlegbi, 'bhɛloɛ, "ne 'kwɛmetamaleɛ 'ɛɛ -noɔ -lɔ -anyɛɛ Lagɔ -nɛ yɛ -godogodo! Amɛn!»

¹³ Nyɛbhlogɔgoa 'na -bholo 'yɔbhɔ- -ame lo nɛɛ: «"Ɛ 'nyakpa -wa -pla "koti 'glɛgbɛ 'fɛɛ "me ne, -sɔnya 'waa bhɔ, "ne -dee 'wa 'bhale bhɔ?»

¹⁴ 'E -bhulɛloo nɛɛ: «Anyinɛnyɔ "mɔ -yi -lɔ sɛ.» "Ne 'ɔ yi -lɔ -ame bhulɛle- nɛɛ: «'Nyakpa 'na -ye 'wa 'gbapea- kpɛnyee 'waa -lɔ. 'Bhlɛbhlɛyu 'na dlu nu 'wa -wɛle -lɔ 'wanɛɛ "koti, -ɛwɛza, 'wanɛɛ "koti -plɛ -lɔ 'buu.

¹⁵ 'Ɛnɛɛ za, 'wa 'nyegbe- -lɔ Lagɔ 'na 'leyli-gbɔglo 'yli "ku. "Ne -see titiɛ yi "ne zle ze -wɛ 'wa 'lɔbhɔ -lɔ Lagɔ "ku, 'ɔnɛɛ "Mebɔbɔlebhudu "me. "Ne -ɔ -gli "ɛ -klɔgbɔnyɔ 'na 'leyli-gbɔglo "ku -wɛ "koa -lɔ "klo 'kole-.

¹⁶ Ŋɔŋo -koa 'ce 'lɔbhɔ, 'ŋuto -koa 'ce 'lɔbhɔ, ylo -koa 'ce 'lɔbhɔ, "ne sinɔ -koa 'ce 'lɔbhɔ.

¹⁷ Sɛko -wɛ 'bhlɛbhlɛyu -ɔ -ko "ɛ 'leyli-gbɔglo 'na jijɛ "ku -wɛ "kɛ -la -lɔ 'wanɛɛ "klokolenyɔ "zo. 'Ɔ yua 'ce 'ŋuwli "ku kɔme-, 'ŋu 'na -ɛ nyɛ zikpɛ -wɛ. "Ne Lagɔ yi 'ce 'wanɛɛ 'ylime 'na miɛ 'klekle 'siɛ-.»