'Ylikloylɛleweli 5 - Nouveau Testament bété de Gagnoa

'Bhlɛbhlɛyu "kɛ -lɔ "bɔgo "ku vulu-

¹ Zaa, -ɔ 'gli- 'leyli-gbɔglo "me -wɛ, 'e 'ye- "bɔgo 'ɔnɛɛ lilikwlɛsɔ "me 'ylime 'ɛ -giglileɔ, 'ɛnɛɛ pɛ "sɔkpɔsɔkpɔ "klo kɛleɔ-. 'Wa -gwale -dawli gbɔɔsɔ.

² "Ne 'e 'ye- "nɔgɔzilɔ 'na "me 'tamalenɔ 'ylime, 'ɔ 'kpa: «-Ɔ -kɛ bhɔ "ɛ "bɔgo ne 'na "ku vulu- -sɛ 'a? -Ɔ 'bhɛle- bhɔ "ne 'ɔ "kɛ 'ɛnɛɛ 'gwaledɛ vulu- "ne 'ɔ "kɛ "ɛ "bɔgo -wɛ "ku vulu- 'a?»

³ 'Nyɔkpɔ "ne -le, "nɔgɔ "me, dodo "ku, "ne glu, 'nyɔkpɔ "ne 'bhɛle- "ne 'ɔ "kɛ "ɛ "bɔgo -wɛ "ku vulu-, "ne 'ɔ 'cɛ "me 'wolo-.

⁴ 'E labha nɛ miɛ kpɛnyee. "Naa-, 'nyɔkpɔ 'na -ɔ -kɛ "ɛ "bɔgo -wɛ 'na "ku vulu -sɛ, "ne 'ɛnɛɛ "ku wolo -sɛ -wɛ "ne -le.

⁵ "Ne nyɛbhlogɔgoa -wɛ 'na 'glɛme 'na -bholo yi -lɔ -ame bhulɛle- nɛɛ: «Te 'tu! -E -gɛ 'yli: Zuda 'na -gligbɛ -wɛ "ku 'na sluku, -klɔgbɔnyɔ Davide 'na ŋeyi "me 'na 'nyɔkpɔ -ɔ 'to- -lɔ 'wli "ku -wɛ. 'Ɔyi, 'ɔɔ "kɛ -lɔ "ɛ "bɔgo -wɛ 'na 'gwaledɛ gbɔɔsɔ -wɛ vulu- "ne 'ɔ 'cɛ -lɔ "ku vulu-.»

⁶ "Ne 'e yi -lɔ 'bhlɛbhlɛyu 'ylime 'ye, 'ɔ 'nyegbe- 'leyli-gbɔglo 'na jijɛ "ku, -yɛyɛnya -mɔɔnɔ "ne nyɛbhlogɔgoa 'na jijɛ "ku. 'Ɔ -le sɛgbɛɛ 'bhlɛbhlɛyu -ye 'wa 'di- 'wli "ku bɔbɔ za -wɛ. 'Ɔ -kɛ 'gwe -gbɔɔsɔ "ne 'yli -gbɔɔsɔ, 'waa- -noɔ -lɔ Lagɔ 'na Zuzu -gbɔɔsɔ -ye Lagɔ -lebhele dodo ne "ku 'klekle -wɛ 'waa.

⁷ 'Bhlɛbhlɛyu 'nyiɔ-, 'ɔ -yi -se 'ɔ "kɛ -ɔ 'gli- 'leyli-gbɔglo "ku 'na "bɔgo -ye 'ɔ -su lilikwlɛ "me -wɛ "ku 'libhi.

⁸ -Sɔɔdɛku, "ɛ 'bhlɛbhlɛyu libhi- "ɛ "bɔgo "ku -wɛ, "ɛ -yɛyɛnya -mɔɔnɔ -wɛ, "ne nyɛbhlogɔgoa 'na glo -bholo yɛ -mɔɔnɔ 'pɔlo- 'kokomini yɔko. -Ɔkɔkokɔko -su -dɔdɔ, "ne 'wawɛ -su 'leylislɔ kɔ, -badlɛ "ne 'wele 'yiɛ- "ku. -Wa -noɔ Lagɔ -noa 'wa -wɛ 'na bhubhɔweli 'na bhulɛ "me 'ye 'ɛ -ko -lɔ.

⁹ 'Wa 'di nɛ lo lele nɛɛ: -E -kɛ "bɔgo -wɛ 'na "ku libhisɛ, "ne 'ɛnɛɛ 'gwaledɛ 'na 'vulusɛ. "Naa-, 'wa 'lɔbhɔ- -eyi "ne -e "ku-. -Neɛ' dlu "me -e 'jeti- 'nyakpa. Gbɔgbɔgbo 'klekle, 'nyakpa 'klekle, -glɔ 'klekle, "ne 'dodo ne "ku 'na konya 'klekle, -e 'joa- Lagɔ kɔ.

¹⁰ -E "zoa- Lagɔ 'na -gligbɛnya. "Ne -e "zoa- bɔbɔnya -se 'wa "kɛ -anyɛɛ Lagɔ "ku lɔbhɔ-, -se 'wa "kɛ 'ce dodo ne "ku 'na 'nyakpa 'klekle 'na -klɔgbɔnya "zo.

¹¹ 'E 'wolo "ku 'yiɛ, "ne 'e yi -lɔ "nɔgɔzilia -kwleyi 'na weli 'no. 'Wa -zu nɛ kpɛnyee za 'wa "ne nɛ zɛle sɛ -kɛ. 'Wa -bli nɛ "ɛ 'leyli-gbɔglo -wɛ, -yɛyɛnya -nyɛ 'nyɛbhlegɔgoa "bhaa.

¹² 'Wanɛɛ lobhleweli 'tɛ- "me, 'ɛ nɛɛ: 'Bhlɛbhlɛyu -ye 'wa 'di- 'wli "ku bɔbɔ -za -wɛ -kɛ 'bhɛloɛ, -klɔgbɔ, 'ylimeyamaleɛ, 'kwɛmetamaleɛ, "kuwezeleɛ, 'ŋlumeɛ "ne 'ŋlukwɛɛ 'na yle -sɛ.

¹³ 'Wlɛwlɛ -li 'klekle -ɛ -ko "nɔgɔ "me, dodo "ku, glu, "ne jinyɛ "klo, "ne -ɛ -ko "bhle 'klekle -wɛ, 'e -nyini 'ɛnɛɛ -weli "me nɛɛ: -Ɔ 'gli- 'leyli-gbɔglo "me "ne 'bhlɛbhlɛyu 'waa- 'bhe- -lɔ lo keyi -dileɛ, -bhlegbi, 'ŋlu, 'ŋlukwɛɛ "ne 'bhɛloɛ -godogodo 'na dɛ.

¹⁴ "Ne "ɛ -yɛyɛnya -mɔɔnɔ -wɛ 'ŋunu -lɔ "ku: Amɛn! "Ne "ɛ 'nyɛbhlegɔgoa -wɛ gla -lɔ "klo dodo, "ne 'wa "zo -lɔ Lagɔ.