'Ylikloylɛleweli 4 - Nouveau Testament bété de Gagnoa

Lagɔ 'na 'ŋlukwalo "nɔgɔ "me

¹ 'Ɛyi -wɛ "kɛ 'ple "bhuɔ ne, -bɛɛ' -bholo -ylɛle -ame 'yli "klo. 'E 'ye- "nɔgɔ "me -gbulɛ 'ylime 'ɛ -kɛleɔ. "Ne weli -ye 'e 'no- 'awɔ "ne 'ɛ 'di nɛ 'gwe sɛgbɛɛ lɛglɛ -wɛ yi -lɔ -ame sɛne bhulɛle- nɛɛ: 'Gblɛ dɛne -se 'e "kɛ -eyi -ɛ "kɛ -watɔ yi -wɛ 'dɛ 'sloa-.

² "Ɛ doɔ cuu ne, Zuzu Wlewle -bhli -ame keyi, "ne 'e yi -lɔ -klɔgbɔnyɔ 'na -gbɔglo -ɛ 'gli- "nɔgɔ "me -wɛ 'ylime 'ye, 'nyɔkpɔ 'gli- "me.

³ -Ɔ 'gli- "ɛ -gbɔglo -wɛ "ku 'lelele "me sɛgbɛɛ -zlitiyi -ye 'wa la zasepe "ne sandoane -wɛ. -Daylolo -bli "ɛ -klɔgbɔ-gbɔglo -wɛ, 'ɛ 'lelele "me sɛgbɛɛ -zlitiyi -ye 'wa la emelɔde -wɛ.

⁴ "Ɛ 'leyli-gbɔglo -wɛ, -gbɔglo 'na glo -bholo yɛ -mɔɔnɔ -bli, "ɛ -gbɔglo -wɛ "me, nyɛbhlegɔgoa 'na glo -bholo yɛ -mɔɔnɔ 'gli- "me. 'Wa -pla "koti 'fɛɛ "me, 'wa 'gbli- -badlɛ-dagblulɛ 'wlime.

⁵ "Ɛ -Klɔgbɔnyɔ 'na 'leyli-gbɔglo -wɛ "me, 'dɛle, 'nyakpa 'na weli "ne -gbagbadɛ 'bhale nɛ "bhle, 'napɛ gbɔɔsɔ 'na -ɛ 'le kpɛnyee -wɛ 'lele 'leyli 'yli "ku, Lagɔ 'na Zuzu gbɔɔsɔ -wɛ 'waa -lɔ.

⁶ "Ɛ -Klɔgbɔnyɔ 'na 'leyli-gbɔglo -wɛ 'yli "ku, -bɛɛ' -bholo -ko lɔbhɔ sɛgbɛɛ jinyɛ, -ɛ 'wlole- 'vɛle "ne zle ylɛle "me gbɛklɛklɛ sɛgbɛɛ -bɛɛ' -ye 'wa la klisetale -wɛ. "Ɛ -gbɔglo -wɛ 'na jijɛ "ku "ne 'ɛnɛɛ yɔko, -yɛyɛnya -mɔɔnɔ -ko lɔbhɔ, 'wa -kɛ 'yli 'na 'kwleyi 'beme "ne "klo "ku.

⁷ Tɛtɛ -yɛyɛnyɔ -wɛ 'wlole- sluku, "sɔnɔ 'wlole- 'bhliwɔ 'na 'yunɔ, tanɔ -kɛ 'nyɔkpɔklo, -mɔɔnɔ 'wlole- 'cɛcɛ -ɔ 'vlu -wɛ.

⁸ "Ɛ -yɛyɛnya -mɔɔnɔ -wɛ, -ɔkɔkokɔko -kɛ -kopi 'gbeplo. 'Wa -kɛ 'yli moɔ 'klekle, -kopi "ku, "ne -kopi "me. -See zle 'ze "ne "titiɛ yi -wɛ, 'wa "bhle lo "ne -wa "ne 'diɔle-. Ŋwɛnɛɛ: «Wlewle, 'Wlewle, 'Wlewle, 'ɔ -noɔ -lɔ Anyinɛnyɔ, Lagɔ -ɔ -kɛ 'bhɛloɛ, -ɔ -le 'awɔ, -ɔ -le, "ne -ɔ yi!»

⁹ -Ɔ 'gli- 'leyli-gbɔglo "me -wɛ, 'ɔyi, -ɔ -yɛ -godogodo, -see -yɛyɛnya 'bhle 'ce 'yiɛ -wɛ, 'ɔyi 'wa 'kwa -lɔ 'ŋlu, 'wa "zo -lɔ -bhlegbi "me, "ne 'wa 'bhɛlo -lɔ.

¹⁰ "Ne "ɛ 'nyɛbhlegɔgoa 'na glo -bholo yɛ -mɔɔnɔ -wɛ 'pɔle -lɔ -ɔ 'gli- 'leyli -gbɔglo "me -wɛ 'kokomini 'dle "me. -Ɔ -yɛ -godogodo -wɛ 'wa "zo -lɔ "ne 'wa 'pɔ -lɔ 'wanɛɛ -maflɛ "ɛ 'leyli-gbɔglo -wɛ 'yli "ku "ne 'wa no -lɔ nɛɛ:

¹¹ «Anyinɛnyɔ -anyɛɛ Lagɔ, -e -kɛ -bhlegbi "me -zosɛ, -e -kɛ 'ŋlumesɛ "ne 'bhɛloɛ. -Mɔɔ 'wlɛ -lɔ -li 'klekle, -e 'yɔbhɔ- -gbɔ 'ɛ 'lele-, "ne 'ɛ yi -lɔ 'wlɔ-.»