'Ylikloylɛleweli 3 - Nouveau Testament bété de Gagnoa

"Bɔgo -ye 'wa 'pɔ- Salededu "me 'na Lagɔgligbɛ "ku

¹ "Kɛle "nɔgɔzilɔ -ɔ -ko Salededu "me 'na Lagɔgligbɛ "me -wɛ "ku nɛɛ: -Ɔ -kɛ Lagɔ 'na Zuzu gbɔɔsɔ "ne -zeli gbɔɔsɔ 'na weli ne lɛ. 'E -yi -neɛ' nonoli 'klekle, 'e -yi sɛ -gbɔ 'nyakpa 'pɔ 'dle -gbɔ: -E -yɛ, -mɔ, -e "ku-.

² 'Bha- 'yla "me, -se 'cibhɛ -ɛ -to -eyi "me "ne 'ɛ me "ku ka -wɛ "zoleɛ- 'yli "ku. 'E 'ye- 'ylime -gbɔ -neɛ' nonoli "ne -kɛ Lagɔ 'yli "ku -kpee -ko.

³ -Neɛ' 'dle 'sibhɔ -kɛ -ye 'wa -sloa -eyi "ne -ye -e 'no- "me -wɛ "ku. Slule- -eyi "me -se 'bheliɔ kɔ. -E "mɔ -kɛ 'yla "me 'bha- ne, 'e yi -eyi "ku 'libhi vuvusɛ sɛgbɛɛ 'winyɔ, -e -ka -sɔɔdɛku 'e "kɛ yi -wɛ yibhlele-.

⁴ 'Ɛ -ko sɔbhɔ, Salɛdedu "me 'na 'nyakpa 'na -bedia "ne 'wayi 'fe -pla. "Ɛ 'wayi -wɛ yi "koti 'fɛɛ "me 'pla- "ne 'wa yi -ame gɛlele-, "naa-, 'wa -kɛ 'ɛnɛɛ slusɛ zɛ.

⁵ Sɔbhɔ, -ɔ -to 'wliku "kɛ -lɔ "koti 'fɛɛ 'slu-, 'ɔnɛɛ 'tɔ -ɛ kɛleɔ- zikpɛ 'na "bɔgo "me -wɛ, 'e -cɛ "ku 'titli, -ame To 'yli "ku, "ne 'ɔnɛɛ "nɔgɔzilia 'yli "ku, 'e yu yibhlele- -gbɔ 'nyɔkpɔ ne 'neɔ yɔ -lɔ.

⁶ -Ɔ kɛ 'yukwli -kɛ, 'ɔ 'fo -ye Zuzu Wlewle bhulɛle Lagɔgligbɛ -wɛ 'wɔ 'yukwli.

"Bɔgo -ye 'wa kɛle- Filadɛlefidu "me 'na Lagɔgligbɛ "ku

⁷ "Kɛle Filadɛlefidu "me 'na Lagɔgligbɛ "me 'na "nɔgɔzilɔ "ku nɛɛ: Sɛne 'ye -ɔ -ko 'Wlewle "ne -ɔ -noɔ 'gbɛklɛklɛbhulɛnyɔ yɔ "ne -ɔ -su -klɔgbɔnyɔ Davide 'na 'safɛ -ɔ kɛ -Bhudu-gbulɛ -kɛle, 'nyɔkpɔ "ne 'bhɛle- "ne 'ɔ "kɛ lɔbhɔ 'gbaa. "Ne -ɔ kɛ lɔbhɔ 'gba-, 'nyɔkpɔ "ne 'bhɛle- "ne 'ɔ "kɛ lɔbhɔ kɛle-.

⁸ 'E -yi -neɛ' nonoli 'klekle. 'Wolo "ku, 'e 'nyegbea- -eyi -gbulɛ 'na -ɛ -kɛleɔ -wɛ 'yli "ku, -ɔ 'cɛ 'gba "ne -le. -E "ne -tia "me 'tɛ-, -mɔ, -e -kɛ 'neɛ weli kɔ "ne -e "ne -no -gbɔ -e "ne -ame -yi.

⁹ 'Nyakpa -wa no Sata 'na -zakpɛ -wɛ, -ye 'e "koa 'wli no ne lɛ. Ŋwɛnɛɛ zufonya 'wa -noɔ, -mɔ, 'wa "ne 'wayi 'waa, zaa yo 'wa 'wlɛ -lɔ. 'E yua 'kpokposɛ -kokomini 'pa- -eyi 'yli "ku -se 'wa "kɛ -eyi "zo, -se 'wa "kɛ 'lelee 'sɛ yibhlele- -gbɔ 'e -wa -eyi.

¹⁰ -E -slule 'se 'na weli 'dlebhlepiɛ "me ne, 'ɛnɛɛ za, -ame 'nabhɛ 'lelee, 'e yi -eyi kwɛle- 'gbapegbapeɛ kɛ lɔbhɔ -ylɛ ne. 'Diɛɛ, 'gbapegbapeɛ yi 'ce -glɔ ŋwɛne- "ne dodo ne "ku 'na 'nyakpa 'klekle 'na -see 'wa -ko -wɛ yi 'ce yibhleleɔ-.

¹¹ 'E yi -la yi. -Ye -e -su -wɛ 'slu- 'tee, 'nyɔkpɔ te -kɛ -eyi -neɛ' -klɔgbɔ-dagbulɛ 'wlime -sɛ.

¹² 'Nyakpa -wa -to 'wli "ku -wɛ, 'e yua 'neɛ "mebɔbɔle-bhudu "me "zo sɛgbɛɛ 'gblɛ "ne 'wa -ka 'ce "bhle zɔ 'wlo gou. "Ɛ -wa -to 'wli "ku -wɛ, 'e yua 'ce 'neɛ Lagɔ 'na 'tɔ -nyɛ 'ɔnɛɛ 'du 'na 'tɔ "bhaa "klo kɛle. "Ɛ 'du -wɛ, Zeluzalɛme -lele -ɛ 'bhale "nɔgɔ "me 'neɛ Lagɔ yɔko -wɛ yɛ -lɔ. 'Wayi, 'e yua 'lelee 'neɛ 'tɔ lele -ye 'e -yle -wɛ "klo 'kɛle.

¹³ -Ɔ kɛ 'yukwli -kɛ, 'ɔ 'fo Zuzu Wlewle 'na -ye 'ɔ bhulɛle Lagɔgligbɛ -wɛ 'wɔ 'yukwli.

"Bɔgo -ye 'wa kɛle- Laodisedu "me 'na Lagɔgligbɛ "ku

¹⁴ "Kɛle "nɔgɔzilɔ -ɔ -ko Laodisedu "me 'na Lagɔgligbɛ "me -wɛ "ku nɛɛ: -Ɔ 'pa- Amɛn "ne -ɔ -noɔ -ɔyeɛdɛ 'na 'dletɛlenyɔ gbaa -ye -li 'klekle 'bhale "me -wɛ 'na -ye 'ɔ -bhulɛ ne lɛ.

¹⁵ 'E -yi -neɛ' nonoli: 'E -yi sɛ -gbɔ -e "ne -bɔŋo "ne -e "ne -su. Bɔŋobɔŋoɛ "ne simasimaleɛ 'glɛme -e kɛ nɛ -bholo "ku 'libhi-, 'ɛ yi nɛ 'namale-!

¹⁶ -Mɔ, -e -ko -kɛ 'se -kpɛtɛkpɛtɛ za, -e "ne -bɔŋo "ne -e "ne -su, 'ɛnɛɛ za, 'e yi -eyi gwɛsɛ-.

¹⁷ "Naa-, sɛne 'ye -e lɛ- -lɔ nɛɛ: 'E -kɛ lɛ, 'e -yle 'dlasi 'na 'kwleyi, 'e -na -bɛɛ' lo 'yɔbhɔ, -mɔ, -e "ne 'sɛ -yi -gbɔ 'nyɛzenyɔ 'ye -e -noɔ. -E -le 'nyɛze "ku, 'poɛnyɔ 'ye -e -noɔ -lɔ, -e "ne 'yli "klo -kɛ, "ne -e 'diɔ- wlu.

¹⁸ -Ɛwɛɛ za, 'e "zo -eyi 'de "me -gbɔ 'pea- -ame -badlɛ kɔ -ye -kosu "zoa- 'wlele -wɛ, -se -e "kɛ -klɔgbɔnyɔ "zo. 'Pea- "koti 'fɛɛ -se -e 'cɛ "me 'pla-, 'wa te 'neɛ 'wludiɔnɔ 'ylime 'ye, -se zu te -kɛ -eyi 'lɔbhɔ. 'Pea- 'yli "me 'pɛle -nyakpo -se 'e "kɛ 'siɛ 'ye 'tee.

¹⁹ 'Nyakpa 'klekle -ye 'e -wa -wɛ, 'e 'gbɔtɔloa "ku "ne 'e 'joa "me. Zaa, "tamale 'yli "ku -se 'bheliɔ kɔ!

²⁰ 'Wolo- "ku: 'E 'nyegbe- -gbanuɛ "ku "ne 'e 'gbɔtɔ lɔbhɔ. 'Nyɔkpɔ kɛ 'neɛ weli 'no-, "ne 'ɔ "kɛ lɔbhɔ -kɛle 'e yi "bhle plɛ, "ne 'ɔ -nyɔ "bhaa -a yi li, "ne 'ɔyi -nyɛ -ame "bhaa -a yi li.

²¹ -See -ame, 'e 'to- 'wli "ku "ne 'e yi -a To yɔko 'gli -ka me 'ɔnɛɛ -klɔgbɔ-gbɔglo "ku -wɛ, sɔbhɔ 'ye -ɔ -to 'wli "ku -wɛ, 'e "kɔ 'ce 'lelee -lɔ -ayi yɔko 'jilɛ 'neɛ -klɔgbɔ-gbɔglo "ku.

²² -Ɔ kɛ 'yukwli -kɛ, 'ɔ 'fo Zuzu Wlewle 'na -ye 'ɔ bhulɛle Lagɔgligbɛ -wɛ 'wɔ 'yukwli.