'Ylikloylɛleweli 22 - Nouveau Testament bété de Gagnoa

¹ -Ɛwɛ "kɛ 'ple "bhuɔ ne, "nɔgɔzilɔ -tua -ame 'ŋuwli "yitɛ -ɛ 'nyɛ zikpɛ -wɛ 'ylime. 'Ɛ 'lelele "me sɛgbɛɛ zlitiyi -ye 'wa la klisetale -wɛ, 'ɛ 'bhale Lagɔ "ne 'bhlɛbhlɛyu 'na 'leyli-gbɔglo "me.

² "Ne "ɛ 'ŋu -wɛ -gbisiɔ "ne 'ɛ -ylɛ 'du 'na digbɛ -jijɛ "ku. "Ɛ 'ŋu 'na 'pɛɛ "sɔ -kpɔ -wɛ "ku, su -ɛ "nyɛ -zikpɛ -wɛ -ko lɔbhɔ. "Ɛ su -wɛ tlo bhi "ku kogbɔ "sɔ 'ylobɛ "me, "ku -bholo 'ce -bholo "me, "ne 'ɛnɛɛ kpe 'yamalea -glɔnya 'klekle.

³ "Kubhleɛ "ne -la -le. Lagɔ "ne 'bhlɛbhlɛyu 'na 'leyli-gbɔglo yi "ɛ 'du -wɛ "me ko, "ne Lagɔ 'na "kulɔbhɔnya yu 'ce "zo.

⁴ 'Wa yi 'ce 'ɔnɛɛ "klo 'ylime 'ye "ne 'wa yi 'ce 'ɔnɛɛ 'tɔ 'wanɛɛ "klo 'kɛle.

⁵ "Titiɛ -ka 'ce -la yi, "ne 'wa -ka -la 'napɛ 'na zle "ne ylopozle lo 'yɔbhɔ. "Naa-, Anyinɛnyɔ Lagɔ "koa -lɔ "ku 'lea-, "ne 'wa "kɛ -lɔ 'kamalea- -godogodo 'na dɛ.

Zezu 'na yiyiɛ

⁶ -Ɛwɛ "kɛ 'ple "bhuɔ ne, "nɔgɔzilɔ -bhulɛle -ame nɛɛ: Bhulɛweli ne -kɛ 'dlekukɛlesɛ "ne 'ɛ -ko gbaa. Anyinɛnyɔ Lagɔ 'nyɛ- "guɔkwɔmenya Zuzu Wlewle. 'Ɔ -lebhe 'ɔnɛɛ "nɔgɔzilɔ -se 'ɔ "kɛ 'ɔnɛɛ "kulɔbhɔnya -ɛ "kɛ yi -wɛ 'ylime tua.

⁷ Zezu nɛɛ: 'Fo 'yukwli, 'e "kɛ yi 'na dɛ "ne -la dɛtlo. Zaa, 'ŋwɛnɛ 'lɔbhɔ -ɔ -fo weli -ɛ 'bhale Lagɔ nu "ne -ɛ -ko "bɔgo ne "me -wɛ 'yukwli.

⁸ -Ame Zaa, "mɔ 'no- -lɔ "ne "mɔ 'ye- -lɔ 'ylime. 'E 'no- "ne 'e 'ye- lɛ 'ylime "bhuɔ ne, 'e "pɔle- "nɔgɔzilɔ 'kokomini 'dle "me -se 'e "kɔ "zo, 'ɔyi, -ɔ -tua nɛ "ɛ li -wɛ 'wɔ -ame 'ylime.

⁹ -Mɔ, "nɔgɔzilɔ -bhulɛle -ame nɛɛ: "Luɔ -kɛ, te -kɛ sɔbhɔ no. "Kulɔbhɔnyɔ 'ye 'e -noɔ -me -lɔ -neɛ' sɛ, sɛgbɛɛ -e "nowlia -nyɛ -e "nɔyoa 'wɔ, "guɔkwɔmenya 'wɔ 'nasɛ, "ne -wa "zo -ɛ -ko "ɛ "bɔgo ne "me 'plome -wɛ 'nasɛ. Lagɔ 'ye -e "kɛ -lɔ "zo.

¹⁰ "Ne 'ɔ yi 'lelee -lɔ -ame bhulɛle- nɛɛ: Te -kɛ "ɛ Lagɔ 'na weli -ɛ -ko "ɛ "bɔgo ne "me -wɛ "ku zizi-. "Naa-, "tɛnye 'na -ye 'ɛ "kɛ "me 'yli 'wlole "ne -la dɛtlo.

¹¹ -Ɔ -noɔ "nyɛnye yɔ -wɛ, 'ɔ no "nyɛnye 'yiɛ! -Ɔ -wa -ɛ "ne 'wlele -ko -wɛ, 'ɔ kɛle- -ɛ "ne 'wlele -ko -wɛ 'na wamaleɛ kɔ 'yiɛ. -Mɔ, -ɔ 'ŋwinɛle- "me -wɛ, 'ɔ no -ɛ 'ŋwinɛle- "me 'yiɛ. -Ɔ -noɔ Lagɔ -nɔ yɔ -wɛ, 'ɔ "zo Lagɔ -nɔ 'yiɛ.

¹² Zezu nɛɛ: «'Fo 'yukwli, 'e yi -la yi. 'E -su -ɔkɔkokɔko 'na 'peɛleɛ -se 'e "kɛ -ɔkɔkokɔko 'na -ye 'ɔ -no -wɛ 'na 'peɛleɛ kɔ 'je.

¹³ 'Mɔɔ -noɔ -lɔ Alefa "ne Omega yɔ, tɛtɛnyɔ "ne 'bebhiɛlenyɔ, "kuciledɛ "ne 'kobhiɛledɛ.»

¹⁴ 'Ŋwɛnɛ 'lɔbhɔ -wa wɛle 'wanɛɛ "meplali -wɛ! Sɔbhɔ za 'wa yi 'ce su -ɛ 'nyɛ zikpɛ 'na 'bhuɛ 'na lisɛ yle, "ne 'wa yi 'ce 'du "yitɛ 'na -gbanuɛ "me 'na ylɛlesɛ yle- -se 'wa "kɛ "bhle plɛ.

¹⁵ -Mɔ, -wa "kɛ 'du keyi 'to- -wɛ ne lɛ: -Wa no -li -ɛ sɛ geji "ku, "gunya "ne -wa me 'ŋwenea lo 'kpɛtɛkli, 'nyakpalɔbhɔnya "ne -wa "zo "fu 'na lagɔ, "ne -wa -wa yowlɛɛ "ne -wa 'wlɛ yo.

¹⁶ -Ame Zezu, 'e -lebhe 'na "nɔgɔzilɔ -se 'ɔ "kɛ Lagɔgligbɛ "me 'na 'nyakpa bhulɛle- -gbɔ "ɛ weli -wɛ 'klekle 'diɛɛ yɛ -lɔ. -Klɔgbɔnyɔ Davide 'na ŋeyi "me 'ye 'ɛ 'bhale -lɔ "ne 'e -noɔ -lɔ 'ɔnɛɛ -gligbɛ "ku 'na yu yɔ, -mɔɔ -noɔ -lɔ 'zegbakpɔme 'na -zeli -ɛ 'le -wɛ yɔ.

¹⁷ Lagɔ zuzu "ne 'ŋuyu-digbɔ -ɔ -kwɔ 'widi -wɛ nɛɛ: Yi! -Ɔ kɛ "ɛ weli ne 'no-, 'ɔ no -gbɔ yi! -Ye 'ŋuto 'lɔbhɔ -wɛ, 'ɔ yi. -Ɔ 'cɛ 'yɔbhɔ ne, 'ɔ yi 'ŋu 'na -ɛ 'nyɛ zikpɛ -wɛ "fu -yle.

'Bebhiɛleweli

¹⁸ 'Nyakpa 'klekle, -wa 'no- "ɛ weli -ɛ 'bhale Lagɔ 'nu "ne -ɛ kɛleɔ- "bɔgo ne "me, -ame Zaa -ye 'e 'titliloa 'yukwli "me ne lɛ: 'Nyɔkpɔ cɛ keyi 'pɔ-, Lagɔ yi "ɛ kpilɛkpilɛ -nyɔ 'na weli 'wa kɛle- "ɛ "bɔgo ne "me ne, 'ɔ -nɛ keyi 'pɔ.

¹⁹ 'Nyɔkpɔ kɛ "ɛ guɔkwɔmeweli -ɛ 'kɛleɔ- "bɔgo ne "me -wɛ "ku -sɛ, su -ɛ 'nyɛ zikpɛ -wɛ 'na 'bhuɛ -ye 'ɔ "kɛ nɛ -yle -wɛ, Lagɔ yi 'ce 'ɔnɛɛ kɔ -sɛ, "ne 'ɔ -ka 'ce 'du 'wlewle -nyɔ 'na weli 'kɛleɔ- "ɛ "bɔgo ne "me "me plɛ.

²⁰ Zezu bhulɛ nɛɛ 'ɛyi 'klekle 'diɛɛ yɛ -lɔ, "ne 'ɔ no 'lelee -lɔ nɛɛ: 'Diɛɛ, 'e yi -la yi. Amɛn! Yi, Anyinɛnyɔ Zezu!

²¹ Anyinɛnyɔ Zezu "pɔ 'anye 'ŋu 'klekle!