'Ylikloylɛleweli 20 - Nouveau Testament bété de Gagnoa

Sata -gwɔ 'ylobɛ 'na -gɛmɛnɛ -wlulu -bholo (1.000) 'na dɛ.

¹ 'E 'ye- "nɔgɔzilɔ 'ylime, 'ɔ 'bha "nɔgɔ "me, 'ɔ 'kwli zɔ. 'Ɔ -su "kuduku 'na 'safɛ "ne 'gɔgɔ "yitɛ kɔ.

² "Ne 'ɔ yi -lɔ "ɛ -gbogbomɛnɛgɔ -wɛ "sa, "ɛ -gbogbomɛnɛgɔ -wɛ, bhlɛme 'na 'tɛbhɛ -wɛ yɔ -lɔ, zuzu -nyɛnye 'na "cifi, Sata. "Nɔgɔzilɔ yu -lɔ gwa 'ylobɛ 'na -gɛmɛnɛ -wlulu -bholo 'na dɛ (1.000).

³ "Ne 'ɔ yu -lɔ "kuduku "pɔ, "ne 'ɔ yi -lɔ 'safɛ "ku 'pɔ klekle "ne 'ɔ yi -lɔ lɔbhɔ yibhleledɛ "zo, -se 'ɔ te -ka -la dodo ylo no -kaa -se 'ylobɛ 'na -gɛmɛnɛ -wlulu -bholo (1.000) 'na 'wlisɛledɛ "kɛ ylɛ. 'Ɛyi -wɛ "kɛ 'ple "bhuɔ ne, 'wa yu 'yi 'tale- "tɛnye 'tekeyi 'na dɛ.

⁴ 'Ɛyi -wɛ 'ple- lɛ "bhuɔ ne, 'e 'ye- -Klɔgbɔnya 'na 'leyli-gbɔglo 'wɔ 'ylime, -wa 'cɛ "ku 'gli -wɛ, 'wayi, 'wa 'je- -lɔ 'gbobhleɛ kɔ. 'Nyakpa -ye 'wa 'di- 'wli "ku, -se 'wa -noɔ Zezu 'na -wayeɛdɛ 'waa "ne 'wa -sɛle Lagɔ 'na bhulɛweli 'nyakpa za, 'e 'ye -me 'lelee 'wanɛɛ 'wugɔŋo 'ylime. 'Wa "ne "ɛ nɛmɛ -nyɛ 'ɔnɛɛ 'yuslokpo "bhaa "zo-, 'wa "ne nɛ 'ɔnɛɛ 'be "klo "ne sɔ yɔko -kɛ. 'Wa 'wlo- gluzɔ "ne Klise "bhaa 'wa yi -lɔ -klɔgbɔnya "zo 'ylobɛ 'na -gɛmɛnɛ -wlulu -bholo (1.000) 'na dɛ.

⁵ 'Waa- -noɔ -lɔ tɛtɛnoa -ye Lagɔ 'wloa- -glukonya 'glɛme zɔ 'waa, 'wayi -wɛ -ka -la gluzɔ 'wlo 'ylobɛ 'na -gɛmɛnɛ -wlulu -bholo (1.000) "mɔ -na 'wlizɔ 'bhiɛ ne.

⁶ -Wa 'wlo- gluzɔ tɛɛ -wɛ, 'ŋwɛnɛ 'lɔbhoa, 'wa -noɔ Lagɔ -noa 'waa -wɛ. 'Kwiɛ 'na "sɔnɛ "ne -la 'wanɛɛ moɔ 'bhɛloɛ -kɛ. 'Wa yi Lagɔ -nyɛ Klise "bhaa 'na bɔbɔnya "zo, "ne Klise "bhaa 'wa yi 'kamalea- 'ylobɛ 'na -gɛmɛnɛ -wlulu -bholo (1.000) 'na dɛ.

Zezu -lu Sata

⁷ 'Ylobɛ 'na -gɛmɛnɛ -wlulu -bholo (1.000) kɛ 'ce 'ple- "bhuɔ ne, 'wa yi Sata -jiɛ "me -sɛ.

⁸ 'Ɔ yi zɔ 'wlo "ne 'ɔ yi me "ne 'ɔ yi dodo 'klekle ylo no, dodo 'na -dawli -mɔɔnɔ -dee 'wa la Goge "ne Magoge -se 'ɔ "koa 'wli "zo -se 'wa kɛ to "me me: 'Wa yi 'ce zimale kpɛnyee sɛgbɛɛ jinyɛ yɔko 'na -ylomɛ yo.

⁹ 'Wa yli dodo ne 'klekle lo. "Ne 'wa yi -lɔ -wa -noɔ Lagɔ -noa -wɛ 'na kodɛ "ne 'du 'wlewle -ye Lagɔ -wa -wɛ bli. -Mɔ, -kosu yi 'ce "nɔgɔ "me 'bhale- "ne 'ɛ yua 'ce siɛ-

¹⁰ "Ne Sata -ɔ noa nɛ ylo -wɛ, 'wa 'yɔ -kosu -gbagbo "me "pɔ, -dee nɛmɛ "ne "guɔkwɔmenyɔ 'gbeyi -ko -wɛ. 'Wa yi 'ce "bhle 'gbapele- kpɛnyee zle 'klekle "me "ne -godogodo 'na dɛ.

'Bebhiɛle gbobhleɛ

¹¹ Zaa, 'e 'ye- 'leyli-gbɔglo "yitɛ 'fɛɛ 'ylime, 'nyɔkpɔ gli- 'klo. Dodo "ne "nɔgɔ zizɔlo- 'ylime, 'wa "noa -la 'yli -gɛ.

¹² "Ne 'e 'ye- "kudukonya 'ylime, yua "ne "yitia, 'wa 'nyegbe- 'leyli-gbɔglo 'yli "ku, "ne Lagɔbɔgo yi -lɔ "ku 'kɛleɔ-, "ne "bɔgo 'na -vinɛ yi -lɔ "ku kɛleɔ-, -ɛɛ -noɔ -lɔ Zikpɛ -bɔgo yɛ. "Ne 'wa yi -lɔ "kudukonya 'gbobhlele- -see 'ɛ 'kɛleɔ- 'awɔ Lagɔ-bɔgo "me -wɛ.

¹³ Jinyɛ yi -lɔ "kudukonya -wa -ko "bhle -wɛ 'yi 'tale- "ne 'kwiɛ "ne "kuduku yi 'lelee -lɔ 'wanɛɛ "kudukonya 'yi 'tale- "ne 'wa yua -lɔ 'wanɛɛ -ye 'wa -no -wɛ 'na gbo bhlele-.

¹⁴ "Ne 'wa yi -lɔ 'kwiɛ -nyɛ "kuduku "bhaa -kosu-gbagbo "me "pɔ. "Ɛ -Kosu-gbagbo -wɛ -noɔ -lɔ 'kwiɛ 'na "sɔnɛɛ yɛ.

¹⁵ 'Nyɔkpɔ 'na nyɔ 'na 'tɔ "ne zikpɛbɔgo "me kɛleɔ- -wɛ, -kosu-gbagbo "me 'wa 'pɔ -lɔ.