'Ylikloylɛleweli 2 - Nouveau Testament bété de Gagnoa

"Bɔgo -ye 'wa 'pɔ- Efɛze 'na Lagɔgligbɛ "ku

¹ "Kɛle "nɔgɔzilɔ -ɔ -ko Efɛzedu "me 'na Lagɔgligbɛ "me -wɛ "ku: «Sɛne -ɔ -su -zeli gbɔɔsɔ lilikwlɛ "me, "ne -ɔ 'nɔŋole- 'napɛ 'na 'glɛdɛ gbɔɔsɔ -ɛ -noɔ -badlɛ "ku 'na jijɛku -wɛ lɛ -lɔ.

² 'E -yi -neɛ' nonoli, 'e -yi -neɛ' 'kwɛmetamalesɛ, "ne -neɛ' 'dlebhlepiɛsɛ. 'E -yi sɛ -gbɔ -e "ne 'yɔbhɔ konyinɛnya 'na "ku koleɛ. -Wa no -gbɔ "kɔlepɔnya 'wa -noɔ, -mɔ, 'wa "ne 'wayi 'waa, -e 'boa- "me, "ne -e yibhlele- sɛ -gbɔ yowlɛnya 'waa -lɔ.

³ -E 'piɛ- "bhle 'dle, -e 'kplɛ- 'neɛ za, "ne 'kwɛme "ne -eyi yɔle-.

⁴ -Mɔ, -ɛ "ne -ame -gɛ 'nɛne -neɛ' dɛku ne lɛ. -E "ne -la -ame -wa, -see -e -wa nɛ -ame "kucidɛku -wɛ.

⁵ -E 'ci- "ku 'tee "ne -e 'yi -lɔ "ku 'bha-, zaa 'bhelia- -neɛ' -kosɛ kɔ, -ye -e no nɛ "kle -wɛ 'no. -E "mɔ -kɛ kɔ 'bheliɔ-, 'e yi -eyi lo yile- "ne 'e yi -neɛ' 'napɛ 'glidɛ "ku -sɛ.

⁶ 'Ɛ -ko "ɛ soɔ, -mɔ -neɛ' 'cibhɛ 'na -ɛ 'nɛne -ame -gɛ ne lɛ: Nikolayitenya 'na nonoli "ne -eyi -gɛ 'nɛne -see 'ɛ "ne -ame -gɛ 'nɛne -me -wɛ.

⁷ -Ɔ kɛ 'yukwli -kɛ, 'ɔ fo -ye Zuzu Wlewle bhulɛle Lagɔgligbɛ 'wɔ -wɛ 'yukwli! -Ɔ kɛ 'wliku 'to-, 'e yu 'ce subhi -ɛ 'nyɛ zikpɛ "ne -ɛ -ko Lagɔ 'na 'laabhueyi "me -wɛ kɔ 'je -se 'ɔ 'cɛ li.»

"Bɔgo -ye 'wa 'pɔ- Similene 'na Lagɔgligbɛ "ku

⁸ «"Kɛle "nɔgɔzilɔ -ɔ -ko Similenedu "me 'na Lagɔgligbɛ "me -wɛ "ku nɛɛ: 'Tɛtɛnyɔ, "ne 'bebhiɛlenyɔ, -ɔ "ku- 'awɔ, "ne -ɔ 'wlo- gluzɔ -wɛ 'na -ye 'ɔ bhulɛ ne lɛ.

⁹ 'E -yi -neɛ' 'gbapegbapeɛ "ne -neɛ' 'poɛkɛlesɛ, 'ɛ -ko sɔbhɔ "ne -e -noɔ lɛkɛlenyɔ yɔ! -Wa la 'wayi Zufonya "ne -wa "ne 'wayi 'waa -wɛ 'na -slowli -ye 'wa 'pɔ -eyi "ku -wɛ, 'e -yi. Sata 'na -zakpɛ 'waa -lɔ.

¹⁰ Te -kɛ 'gbapegbapeɛ -ɛ 'ylile -eyi lo -wɛ -gɛ 'gu, fo 'yukwli, Sata yi 'anyɛɛ 'glɛme 'na -bedia -jiɛ "me 'pɔ, -se 'wa "kɛ 'anye "me 'bea. 'A yi 'ce 'gbape 'yli kogbɔ 'na dɛ, -kɛle 'dletɛleɛ -kaa -neɛ' 'kwiɛ. -E 'cɛ -no, 'e yi 'ce -eyi zikpɛ 'na -ɛ -ka "kubhiɛ "nyɛ sɛgbɛɛ -klɔgbɔ-dagbulɛ.

¹¹ -Ɔ kɛ 'yukwli -kɛ, 'ɔ 'fo -ye Zuzu Wlewle bhulɛle Lagɔgligbɛ -wɛ 'wɔ 'yukwli! -Ɔ -to 'wliku -wɛ -ka 'kwiɛ 'na "sɔnɛ kɔ 'gbapele-.»

"Bɔgo -ye 'wa 'pɔ- Pɛlegamedu "me 'na Lagɔgligbɛ "ku

¹² «"Kɛle "nɔgɔzilɔ -ɔ -ko Pɛlegamedu "me 'na Lagɔgligbɛ "me -wɛ "ku nɛɛ: -Ɔ -su -jijigbɛlɛ -ɛ 'nɔ- -wɛ 'na bhulɛweli ne lɛ.

¹³ 'E -yi -dee -e 'gli-: Lɔbhɔ 'ye Sata 'na 'leyli -gbɔglo -ko -lɔ. -Mɔ, -e -glɛ -ame 'glɛ, -e "ne -neɛ' 'dlekukɛleɛ keyi -glɛ, -sɔɔdɛku 'nabhɛ, Atipa -ɔ tɛle- -ame 'dle 'wa 'lɔbhɔlo- 'anyɛɛ moɔ, -dee Sata -ko -wɛ.

¹⁴ -Mɔ, -ɛ "ne -ame -gɛ 'nɛne -neɛ' dɛku ne lɛ, 'ɛyi 'e "kɛ -lɔ -eyi bhulɛle-: -Neɛ' moɔ, -wa -gɛlele Balaame 'na -sloaweli -wɛ -ko "bhle. "Ɛ Balaame -wɛ "zo- 'awɔ -lɔ Balake 'de "me -gbɔ 'ɔ 'cile- Izlayɛleyua -gbotu. 'Ɔ 'yɔbhɔ 'awɔ -gbɔ 'wa li nɛmɛ -ye 'wa -bɔbɔle "fu 'na lagɔ -wɛ -se 'ŋwenea "kɛ 'widia -seselia "ne 'widia "kɛ 'ŋwenea -seselia

¹⁵ "Ɛ sɛbhele -wɛ: -E 'luku 'nabhɛ, 'nyakpa 'na -bedia -wa -gɛlele Nikolayitenya 'na -sloasɛ -wɛ -ko -me 'lelee "bhle.

¹⁶ Zaa, 'bhelia -neɛ' zikpɛ kɔ! 'Ɛ "mɔ -kɛ sɔbhɔ yɛ, 'e yi -dɛmedɛme -neɛ' moɔ yi, -se -gbɛlɛ -ɛ 'bhale -ame nu -wɛ "me, 'e "koa to kɔme-.

¹⁷ 'Ɔ kɛ 'yukwli -kɛ, 'ɔ 'fo -ye Zuzu Wlewle bhulɛle Lagɔgligbɛ -wɛ 'wɔ 'yukwli! -Ɔ -to 'wliku -wɛ, 'e yu lilɛ -ye 'wa la mane -ɛ zizɔ- "ku -wɛ "nyɛ. "Ne 'e yu 'lelee 'tiyi 'fɛɛ kɔ 'je. "Ɛ 'tiyi -wɛ 'tɔ 'lele kɛleɔ- "klo, "ɛ 'tɔ -wɛ 'nyɔkpɔ "ne -yi, 'ɛ "mɔ -ɔ -yle "ɛ 'tiyi -wɛ yɔ.»

"Bɔgo -ye 'wa 'pɔ- Tiyatiledu "me 'na Lagɔgligbɛ "ku

¹⁸ "Kɛle "nɔgɔzilɔ -ɔ -ko Tiatiledu "me 'na Lagɔgligbɛ "me -wɛ "ku nɛɛ: Sɛne Lagɔ Yowli -nyɔ 'na 'yli sɛ 'dɛle sɛgbɛɛ -kosu, "ne 'ɔnɛɛ bho -le sɛgbɛɛ 'leyi 'wa 'titli- lɛ -lɔ.

¹⁹ 'E -yi -neɛ' nonoli, "ne 'e -yi -see -e -wa 'nyakpa, -neɛ' 'dlekukɛlesɛ, -neɛ' libhɔ "ne -neɛ' 'dlebhlepiɛsɛ. 'E -yi sɛ -gbɔ -neɛ' 'bebhiɛle nonoli 'zu "ne 'ɛ -zi tɛtɛnɛ "ku.

²⁰ -Mɔ, -neɛ' -ɛ "ne -ame -gɛ 'nɛne- ne lɛ: Zezabɛle, 'ŋɔnɔ -ɔ la 'ɔyi "guɔkwɔmeŋɔnɔ -wɛ, -e 'talo 'yi "ne 'ɔ sloa, "ne 'ɔ bhlia 'neɛ "kulɔbhɔnya 'kwlɛ -se 'ŋwenea "kɛ 'widia -seselia "ne 'widia "kɛ 'ŋwenea -seselia, -se 'wa "kɛ 'nɛmea -ye 'wa -bɔbɔle "fu 'na lagɔ -wɛ li.

²¹ 'E 'talo- 'yi, "ne 'e 'piɛ- "bhle 'dle -se 'ɔ "kɛ -kɛ 'ɔnɛɛ zikpɛ kɔ 'bhelia, -mɔ, 'ɔ "ne kɔ -bheliɔ gbo 'ŋunu-, "ne 'ɔ -su 'ɔyi 'kpetekli 'yiɛ.

²² 'Ɛnɛɛ za, 'e "kɔ gu 'na sokwli "me 'piɛ. 'Ɔlua nyɔ 'wɔ "bhaa 'wa -zlɛ gbo -wɛ, 'e yua 'lelee 'gbapegbapeɛ 'na "yitɛ "nyɛ, 'wa "mɔ 'wanɛɛ nonoli -nyɛnye 'yi 'tale-.

²³ 'E yi 'lelee 'ɔnɛɛ yua 'lɔbhɔ "ne 'wa 'yi ku, -se Lagɔgligbɛ 'klekle "kɛ 'sɛ yibhlele- -gbɔ -ame, "mɔ yibhlele -lɔ 'nyakpa 'klekle 'na 'dlepɔsɛ, "ne -ɛ -koa 'dlezɔ, "ne -ɔkɔkokɔko 'na -ye 'ɔ no -wɛ 'na 'peɛleɛ 'ye Lagɔ "kɔ -lɔ kɔ 'je.

²⁴ -Mɔ, 'anye Tiatiledu "me 'na 'nyakpa 'klekle 'na -bedia -wa "ne Zezabɛle 'na slosɛ -gɛle -wɛ, "ne 'anye -wa "ne -ye 'wa la Sata 'na diɛweli -ɛ zizɔ- -wɛ 'ciɛ-: Sɛne 'ye 'e bhulɛle lɛ 'anye: 'E -ka 'anye 'gbudu 'na -vinɛ 'wli 'jilɛ.

²⁵ -Mɔ, 'anye -ye 'a 'ciɛ- -wɛ, 'a -kɛle kɔ klekle -kaa -se 'neɛ yi dɛku "kɛ ylɛ.

^26-28 -Wa "kɛ 'ce 'neɛ "ku lɔbhɔgbo "ku 'ŋunu- -kaa zikpɛ 'na "kubhiɛɛ, 'wa 'nya -wɛ 'waa- -to -lɔ 'wliku, 'e yua 'ce 'bhɛloɛ -ye 'a To 'je- -ame kɔ -wɛ "nyɛ, "ne 'ɔ yi 'nyakpa 'klekle 'na "bhenyɔ "zo, "ne 'ɔ yua -glasɛ 'slu-. "Ne 'wa yua "ku 'bhia-, sɛgbɛɛ mɛ 'na -slɔ 'wa -wlɛ, "ne 'e yua zegbakpɔzeli kɔ 'je.

²⁹ «-Ɔ kɛ 'yukwli -kɛ, 'ɔ 'fo -ye Zuzu Wlewle bhulɛle Lagɔgligbɛ -wɛ 'wɔ 'yukwli.»