'Ylikloylɛleweli 19 - Nouveau Testament bété de Gagnoa

¹ 'Ɛyi -wɛ "kɛ -ple "bhuɔ ne, 'e 'no- "nɔgɔ -jiji, sɛgbɛɛ 'nyakpa -kwleyia 'na -jiji, 'ɛ nɛɛ: Alleluya! 'A 'kwa Lagɔ 'ŋlu! -Anyɛɛ Lagɔ -ɔ 'fuɔ, 'ɔɔ 'bhe- -lɔ 'ŋlu "ne 'bhɛloɛ!

² 'Ɔnɛɛ 'gbobhlesɛ -ko gbɛklɛklɛ "ne 'ɛ 'ŋwinɛle- "me. 'Ɔ 'pɔ- 'widiaseseliaŋɔnɔ "yitɔ -jiɛ "me. Dodo 'ye 'ɔ pla nɛ -lɔ 'fe 'ɔnɛɛ 'widiaseseliɛ "me. Lagɔ 'yeɔ- 'kle, sɛko -wɛ, 'ɔ 'lɔbhɔ- Lagɔ 'na "kulɔbhɔnya.

³ "Ne "ɛ -zakpɛ -wɛ yi -lɔ "kusɔ 'nole- nɛɛ: Alleluya! 'A 'kwa Lagɔ 'ŋlu! -Kosu 'na -ɛ siɛ 'du "yitɛ 'na 'gbɔylo 'gblɛ "nɔgɔ "me -godogodo 'na dɛ.

⁴ 'Nyɛbhlegɔgoa 'na glo -bholo yɛ -mɔɔnɔ "ne -yɛyɛnya -mɔɔnɔ -wɛ yi -lɔ -kokomini 'pɔ. 'Wa "zo- Lagɔ -ɔ 'gli- 'leyli-gbɔglo "ku, "ne 'wa lɛ -lɔ sɛne nɛɛ: Amɛn! Alleluya! 'A 'kwa Lagɔ 'ŋlu!

'Bhlɛbhlɛyu 'na 'sueplɛweli

⁵ "Ne weli 'bhale -lɔ "ɛ -klɔgbɔnyɔ 'na kpiɛ "me, 'ɛ nɛɛ: 'A 'kwa -anyɛɛ Lagɔ 'ŋlu, 'anye, 'ɔnɛɛ "kulɔbhɔnya 'klekle, 'anye "zo 'plome -wɛ, yua "ne "yitia.

⁶ "Ne 'e yi -lɔ -jiji 'no sɛgbɛɛ 'nyakpa -kwleyia 'na -jiji, 'ɛ -leɛ jinyɛ "pɔ 'gbɔkɔle "yitɛ, "ne 'ɛ -leɛ -gbagbadɛ 'gba. "Ɛ weli -wɛ nɛɛ: Alleluya! 'A 'kwa Lagɔ 'ŋlu. 'Diɛɛ, -dɛmeda, Anyinɛnyɔ, -anyɛɛ Lagɔ -ɔ -kɛ 'bhɛloɛ 'klekle, libhi- 'ɔnɛɛ 'kamaleɛ "ku.

⁷ 'A -ya 'vluvlule- "me 'ŋwɛnɛ za, 'ŋwɛnɛ 'lɔbhɔ -anye -se -a 'kwɔ 'ŋlu, "naa-, -dɛmeda, 'bhlɛbhlɛyu 'na 'ŋukwɔyli -ylɛ -lɔ. -Ye 'bhlɛbhlɛyu -tɔ 'ɔyi "ku -wɛ 'telia- 'ɔyi.

⁸ 'Ɔ -yle lokwi "namanɔ -ɛ -ko 'fofo, -ɛ 'lelele "me "ne 'ɛ -ko 'wlele. "Ɛ lokwi "namanɔ -ɛ -ko 'fofo -wɛ, -noɔ -lɔ Lagɔ 'na -wa -noɔ 'ɔnoa 'waa -wɛ 'na nonoli -ɛ 'ŋwinɛle- "me -wɛ yɛ.

⁹ "Nɔgɔzilɔ -bhulɛle -ame nɛɛ: "Kɛle, 'ŋwɛnɛ 'lɔbhɔ -ye 'wa lale- Lagɔ 'na 'bhlɛbhlɛyu 'na 'ŋukwɔ lilɛ "ku -wɛ. "Ne "nɔgɔzilɔ yi 'lelee -lɔ no nɛɛ: Lagɔ 'ɔyigɛsɛ 'na bhulɛweli gbaa yɛ -lɔ.

¹⁰ "Ne 'e yi -lɔ "nɔgɔzilɔ -kokomini 'yli "ku "pɔle, -se 'e "kɔ "zo. ''Ne 'ɔ yi -lɔ no nɛɛ: Te -kɛ 'soɔ no. "Kulɔbhɔnyɔ 'ye 'e -noɔ -me -lɔ -neɛ' sɛ, sɛgbɛɛ "nowlia -nyɛ -e "nɔyoa 'wɔ "bhaa -wa tɛle- Zezu Kli 'na bhulɛweli -ɛ -ko gbaa 'dle, "ne 'ɔ -tua 'nyakpa 'ylime -wɛ. Lagɔ 'ye -e "kɛ -lɔ "zo. Zezu 'na bhulɛweli -ye 'ɔ -tua 'nyakpa 'ylime -wɛ "me 'ye "guɔkwɔmenya 'na bhuleweli 'bhale -lɔ.

'Sokofani 'na slunyɔ 'gli- 'sokofani 'fɔ "klo

¹¹ -Ɛwɛ "kɛ -ple "bhuɔ ne, 'e -gɛ "nɔgɔ 'yli 'ɛ -vuluɔ "ku. 'Sokofani 'na 'fɔ 'buu 'wlole- "klo zɔ, -ɔ glu- "klo -wɛ 'pa- -lɔ "Meŋwinɛlenyɔ, "ne Gbabhulɛnyɔ. 'Ɔ gwe to "ne 'ɔ 'bhle 'gbo "me ŋwinɛleɛ "me.

¹² 'Ɔnɛɛ 'yli sɛ dɛle sɛgbɛɛ -kosu, "ne 'ɔ -su -maflɛ 'na -gbagbo 'wli. 'Tɔ 'kɛleɔ yɔko "ne 'nyɔkpɔ "ne -yi, 'ɔyi -bholo -kpee -yi -lɔ.

¹³ 'Ɔnɛɛ "koti -ye 'ɔ -pla "me -wɛ -noɔ dlu -kpakpɛ yɛ, "ne 'ɔ 'pa- -lɔ Lagɔ 'na Bhulɛweli.

¹⁴ "Nɔgɔ "me 'na "slojanya 'na -zakpɛ -gɛlelo, -wa 'gli- 'sokofani 'fɔ "klo -wɛ. 'Wayi 'klekle -pla lokwikoti 'fɛɛ -ɛ -ko 'fofo "ne 'wlele -wɛ "me.

¹⁵ -Jijigbɛlɛ -ɛ 'nɔ- 'bhale -ɔ 'gli- "ɛ -sokofani "klo -wɛ nu, -se 'ɔ "kɛ dodo 'klekle 'lɔbhɔ. 'Ɔ yua 'ce slu- 'kpɔkpɔsɛ. "Ne 'ɔ yi -lɔ 'sɔkɔ "yitɛ "me -mee 'wa nimile ylɛzɛ -wɛ slu, 'ɛɛ -noɔ -lɔ Lagɔ -ɔ -kɛ 'bhɛloɛ 'na kɛle "yitɛ yɛ.

¹⁶ 'Tɔ kɛleɔ- 'ɔnɛɛ "koti -nyɛ bhɔgo "bhaa yɔko: -Klɔgbɔnya 'na -Klɔgbɔnyɔ, Anyinɛnya 'na Anyinɛnyɔ.

¹⁷ "Ne 'e yi -lɔ "nɔgɔzilɔ 'ylime 'ye, 'ɔ 'nyegbe- ylo "me. 'Ɔ 'kpale 'zea 'klekle -wa 'blule "nɔgɔ "me -wɛ "ku. 'A yi, 'a "zo 'wli Lagɔ 'na "kuzalilɛ za,

¹⁸ -se 'a "kɛ -klɔgbɔnya 'na 'yɛcɛ li, -slojanya 'na "cifia 'na 'yɛcɛ li, -wa -kɛ 'bhɛloɛ 'na 'yɛcɛ li, -sokofania "ne -wa glua- "klo -wɛ 'na 'yɛcɛ li, 'nyakpa 'klekle 'na 'yɛcɛ li, -wa -yele kɔ, 'juyua, yua "ne "yitia.

¹⁹ "Ne 'e -gɛ "ɛ nɛmɛ -wɛ 'yli, dodo ne "ku 'na -klɔgbɔnya -nyɛ 'wanɛɛ "slojanya "bhaa 'wa "zo- 'wli -se 'wa "kɛ -ɔ 'gli- -sokofani "klo -nyɛ 'ɔnɛɛ "slojanya "bhaa to "me yle.

²⁰ 'Wa 'sa- "ɛ nɛmɛ -wɛ -nyɛ "guɔkwɔmenyɔ -gbeyi "bhaa, "ɛ "guɔkwɔmenyɔ -gbeyi ne 'pɔle nɛ "ɛ nɛmɛ -wɛ 'yli "ku zɛzɛ. -Se 'ɔ "kɛ 'wa -yle "ɛ nɛmɛ -wɛ 'na 'be, "ne -wa "zo- nɛ 'ɔnɛɛ 'yuslokpo -wɛ ylo no. 'Wa 'pɔ- "ɛ nɛmɛ -wɛ "ne "guɔkwɔmenyɔ -gbeyi -kosu -gbagbo -dee -biŋu 'siɛle yɔko -wɛ "me.

²¹ -Jijigbɛlɛ -ɛ 'bhale -sokofani 'na "kloglinyɔ nu -wɛ 'lɔbhɔ- 'nyakpa -wa -to lɔbhɔ -wɛ "ne 'wa "ku-. "Ne 'zea 'klekle -lo 'wanɛɛ 'yɛcɛ -wɛ "ku.