'Ylikloylɛleweli 17 - Nouveau Testament bété de Gagnoa

'Widiseseliaŋɔnɔ "yitɔ 'na weli

¹ "Nɔgɔzilia gbɔɔsɔ -wa -su slɔ gbɔɔsɔ -wɛ 'na 'glɛme 'na -bholo -ylile -ame lo, "ne 'ɔ yi -lɔ -ame bhulɛle- nɛɛ: Yi -se 'e "kɛ -eyi 'widiaseseliaŋɔnɔ "yitɔ 'na 'gbobhleleɛ 'ylime 'tua-. "Ɛ 'widiaseseliaŋɔnɔ -wɛ, 'ɔɔ -noɔ -lɔ 'du "yitɛ -ɛ 'gli- 'ŋu "yitɛ yɔko -wɛ yɔ.

² Dodo ne "ku 'na -klɔgbonya "bhaa 'wa -zlɛ -lɔ gbo 'gɔme, "ne "ɛ 'gbozlɛ -wɛ yi -lɔ dodo ne "ku 'na konya 'lɔbhɔ sɛgbɛɛ no.

³ "Ne zuzu -bhli -ame keyi "ne "nɔgɔzilɔ yi -lɔ -ame 'kɔsɛku kɔme-. "Ne 'e yi -lɔ 'ŋɔnɔ 'ylime 'ye, -ɔ 'gli- nɛmɛ -zɛle "klo. "Ne 'tɔ -kwleyi 'kɛlo- yɔko 'klekle, 'ɛ ziɛ Lagɔ 'dii. "Ɛ nɛmɛ -wɛ -kɛ 'wli gbɔɔsɔ "ne 'gwe kogbɔ.

⁴ "Ɛ 'ŋɔnɔ -wɛ -pla 'tɔkɛlekoti 'na zɛle -ɛ -ŋwa 'yli keyi -wɛ "me, 'ɔ -su -badlɛgɔgɔ, zlitiyi "ne -nyɛne. 'Ɔ -su -badlɛslɔ 'na -ɛ yiɛ 'ɔnɛɛ nonoli -ɛ -le nyɛnyɛle "ku -nyɛ 'ɔnɛɛ 'gbozlɛ-li "bhaa kɔ.

⁵ 'Tɔ 'na -ɛ "ne "me -nyineɔ kɛleɔ- 'ɔnɛɛ "klo, 'ɛ sɛ zɔ nɛɛ: Babilɔnedu "yitɛ, dodo ne "ku 'na 'widiseseliaŋwenea "ne nonoli -ɛ -le nyɛnyɛle "ku -wɛ 'wa "nɔ.

⁶ 'E 'na 'wolo "ɛ 'ŋɔnɔ ne 'nɔmɔ -wa -noɔ Lagɔ -noa 'waa -wɛ 'na dlu, "ne Zezu 'na gɛlenya 'na dlu, "ne 'ɛ yu -lɔ 'lɔbhɔ sɛgbɛɛ no. 'E 'yo- lɛ 'ylime ne, 'ɛ -sɛ -ame geji "ku kpɛnyee.

⁷ "Ne "nɔgɔzilɔ yi -lɔ -ame bhulɛle- nɛɛ: Sɔɔbɛɛza 'ɛ -sɛ bhɔ -eyi geji "ku 'a? 'E yi -eyi "ɛ 'ŋɔnɔ -wɛ 'na diɛweli zɔ -sɛle "ne nɛmɛ -ɔ -su "ɛ 'ŋɔnɔ -wɛ 'na diɛweli. "Ɛ nɛmɛ -wɛ -kɛ 'wli gbɔɔsɔ "ne 'gwe kogbɔ.

⁸ "Ɛ nɛmɛ -ye 'e 'ye- 'ylime -wɛ -le 'awɔ, -mɔ, 'ɔ "ne -la -le, 'ɔ yi "kuduku 'bha "ne 'ɔ yi -dee 'ɔ "kɛ "kubhiɛle- -wɛ me. "Ne dodo ne "ku 'na konya -nyɔ 'wanɛɛ 'tɔ "ne zikpɛbɔgo ne "me kɛleɔ- "kucidɛku -wɛ, 'wa kɛ "ɛ nɛmɛ -wɛ 'ylime 'ye-, 'ɛ yua geji "ku -sɛ, "naa-, 'ɔ -le 'awɔ, -mɔ, 'ɔ "ne -la -le, 'ɔ yi 'ce "kusɔ yi.

⁹ -Dee 'nyakpa "kɛ 'ylime yamale- "ne 'wa "kɛ -li "me 'no ne lɛ: 'Wli gbɔɔsɔ -wɛ, tlo gbɔɔsɔ -ye 'ŋɔnɔ 'gli- 'wli -wɛ yɛ -lɔ, "ne 'wa -noɔ -me 'lelee -lɔ -klɔgbɔnya gbɔɔsɔ 'waa.

¹⁰ 'Wanɛɛ 'glɛme 'na 'umgbu -bhli zɔ "ne 'gbeplonɔ 'kamale -namlɛ -dɛme, gbɔɔsɔnɔ -namlɛ yi, -mɔ, 'ɔ kɛ 'ce -yi, 'ɔ -ka 'lɔbhɔ gwlɛ-.

¹¹ "Ne "ɛ nɛmɛ -wɛ, -ɔ -le 'awɔ, "ne -ɔ "ne -la -le ne, 'ɔyi 'nabhɛ, 'ɔ -noɔ -lɔ -klɔgbɔnyɔ 'na gbɔɔtanɔ yɔ, 'ɛ -klɔgbɔnya gbɔɔsɔ -wɛ 'na 'glɛme 'na -bholo yɔ -me -lɔ, "ne "kubhiɛ -ka 'ye 'ɔ me -lɔ.

¹² 'Gwe kogbɔ -ye -e 'ye- 'ylime -wɛ -klɔgbɔnya kogbɔ -wa -namlɛ 'kamaledu -yle 'waa -lɔ. -Mɔ, 'wa yi 'kamaleɛ 'na 'bhɛloɛ yle 'wa -nyɛ nɛmɛ "bhaa 'gle -bholo 'na dɛ.

¹³ "Ɛ -klɔgbɔnya kogbɔ -wɛ sɛbhele 'wa 'pɔ -lɔ 'dle nɛɛ: 'Wanɛɛ 'bhɛloɛ -nyɛ 'wanɛɛ 'kamaleɛ "bhaa 'wa "kɛ -lɔ nɛmɛ kɔ 'je.

¹⁴ 'Wa -nyɛ 'bhlɛbhlɛyu "bhaa yi 'ce gwe "ne 'ɔ yua lu, sɛko -wɛ, 'ɔɔ -noɔ Anyinɛnya 'na Anyinɛnyɔ yɔ, "ne 'ɔɔ -noɔ -klɔgbɔnya 'na -klɔgbɔnyɔ yɔ. 'Wayi 'ye Lagɔ la-, "ne 'ɔ -toa, -wa -kɔ 'dleku -wɛ "bhaa yua 'ce lu.

¹⁵ "Ne "nɔgɔzilɔ yi 'lelee -lɔ -ame bhulɛle- nɛɛ: 'Ŋu -wɛ 'wɔ -ye -e 'ye- 'ylime -dee "ɛ 'widiaseseliaŋɔnɔ 'gli -wɛ, 'waa- -noɔ -lɔ 'nyakpa 'klekle, -zakpɛ, dodo 'klekle "ne 'gbɔgbɔgbo 'klekle 'waa.

¹⁶ 'Gwe kogbɔ -ye -e 'ye- 'ylime -nyɛ nɛmɛ -wɛ "bhaa -ka -kɛ 'widiaseseliaŋɔnɔ -wɛ 'yli sɔbhɔ, 'wa yu -ye 'ɔ -kɛ -wɛ 'klekle kɔ -sɛ, "ne 'wa yu 'wlu 'di. 'Wa yu li, "ne 'wa yi -ɛ -to lɔbhɔ -wɛ -kosu "me "pɔ.

¹⁷ "Naa-, Lagɔ "zoa- 'dlezɔ -gbɔ 'ɔnɛɛ libhɔ -ye 'ɔ 'yɔbhɔ -wɛ 'wa 'no. 'Gwe kogbɔ -sɛ zɔ nɛɛ: -Klɔgbɔnya yi "ku 'kole-, -se 'wa "kɛ 'wanɛɛ 'bhɛloɛ slu -se 'wa "kɛ nɛmɛ "ku 'lɔbhɔ-, -se Lagɔ 'na weli -wɛ 'wɔ "kɛ 'yli 'wlole.

¹⁸ "Ne 'ŋɔnɔ -ye 'e 'ye- 'ylime -wɛ, 'ɔɔ -noɔ -lɔ 'du "yitɛ -ɛ 'kamalea dodo ne "ku 'na -klɔgbɔnya yɔ.