'Ylikloylɛleweli 16 - Nouveau Testament bété de Gagnoa

Lagɔ 'na kɛle 'na -slɔ gbɔɔsɔ

¹ "Ne 'e 'no- "mekpaweli "me, "ne 'ɛ 'bhale "ɛ "Mebɔbɔlebhudu -wɛ "me. 'Ɛ bhulɛle "nɔgɔzilia gbɔɔsɔ nɛɛ: 'A me -se 'a 'slu Lagɔ 'na kɛle 'na slɔ gbɔɔsɔ -wɛ dodo "ku.

² "Nɔgɔzilɔ 'na tɛtɛnɔ -me "ne 'ɔ yi -lɔ -ɛ -ko 'ɔnɛɛ slɔ "me -wɛ dodo "ku 'slu. "Ne 'nyakpa -wa "zo- nɛmɛ 'na 'be yɔko, "ne -wa "zo- 'ɔnɛɛ 'wlole -wɛ, 'gbiɛnyɛnye -ɛ kɛle yɔko yua -lɔ 'lɔbhɔ.

³ "Nɔgɔzilɔ 'na "sɔnɔ 'slu- -ɛ -ko 'ɔnɛɛ slɔ "me -wɛ jinyɛ "me. "Ne 'ŋu yi -lɔ lele- sɛgbɛɛ 'nyɔkpɔ -ɔ "ku- 'na dlu, "ne "ɛ jinyɛ "me 'na -yɛyɛli 'klekle -ɛ -ko "bhle -wɛ yi -lɔ "ku.

⁴ "Nɔgɔzilɔ 'na tanɔ 'slu- -ɛ -ko 'ɔnɛɛ slɔ "me -wɛ bɔɔ "me "ne 'ŋuwli "me, "ne "ɛ 'ŋu yi -lɔ 'dlu "zo 'klekle.

⁵ "Ne 'e yi -lɔ "nɔgɔzilɔ, -ɔ -kɛ 'bhɛloɛ 'ŋu 'klekle "klo -wɛ 'na weli 'no, 'ɔ nɛɛ: -Eyi, -mɔɔ -le, "ne -e -le 'awɔ, -eyi, -mɔɔ -ko 'wlewle, -E ŋwinɛle- "me, -se -e 'bhle soɔ gbo -wɛ za.

⁶ "Naa-, 'nyakpa 'slu- -wa -noɔ Lagɔ -noa 'waa "ne -neɛ' "guɔkwɔmenya 'na dlu siɛ, -e 'nyoa- dlu "ne 'wa yi -lɔ "nɔmɔ. 'Wa -yle -ɛ -ŋwoa "ku -wɛ.

⁷ "Ne 'e yi -lɔ weli 'no, 'ɛ 'bhale bɔbɔledɛ, 'ɛ nɛɛ: Anyinɛnyɔ Lagɔ -ɔ -kɛ 'bhɛloɛ, -neɛ' 'gbobhleɛ 'wɔ -ko gbaa "ne 'ɛ 'ŋwinɛle- "me.

⁸ "Nɔgɔzilɔ 'na -mɔɔnɔnɔ 'slu- -ɛ -ko 'ɔnɛɛ slɔ "me -wɛ ylo "klo "ne "ɛ ylo yi -lɔ 'bhɛloɛ yle -se 'ɛ "kɛ 'nyakpa 'siɛ- 'ɛnɛɛ -kosu nu.

⁹ 'Nyakpa, sinɔ 'na "yitɛ yua -lɔ 'siɛ-, "ne 'wa yi -lɔ Lagɔ 'na 'tɔ nyimɔ-, Lagɔ -ɔ -kɛ 'bhɛloɛ, 'wa "ne 'wanɛɛ zikpɛ kɔ 'bhelia-, "ne 'wa "kɛ Lagɔ 'ŋlu 'kwa-.

¹⁰ "Nɔgɔzilɔ 'na 'umgbunɔ 'slu- -ɛ -ko 'ɔnɛɛ slɔ "me -wɛ nɛmɛ 'na leyli-gbɔglo "ku, "ne 'ɔnɛɛ 'kamaledu yi -lɔ "titiɛ "me plɛ, "ne 'nyakpa nimi -lɔ 'wanɛɛ miɛ 'gbapegbape -za.

¹¹ 'Wa 'yli "nɔgɔ "me 'na Lagɔ, 'wanɛɛ 'gbapegbapeɛ "ne 'wanɛɛ 'gbi -wɛ 'wɔ za, -mɔ, 'wa no "nyɛnye -wɛ 'wɔ 'yiɛ.

¹² "Nɔgɔzilɔ 'na 'gbeplonɔ 'slu- -ɛ -ko 'ɔnɛɛ slɔ "me 'ŋu "yitɛ -ye 'wa la Eflate -wɛ "me, "ne "ɛ 'ŋu -wɛ yi -lɔ "me yɛ- sɛkɛsɛkɛ -se -klɔgbɔnya -wa 'bhale -mee ylo 'bhale -wɛ "kɛ ylɛledɛ yle -se 'wa "kɛ 'ple.

¹³ 'Ɛyi -wɛ "kɛ 'ple "bhuɔ ne, 'e 'ye- zuzu -nyɛnyea ta 'ylime, 'wa 'wlole- -bɛlea, -bholo 'bhale -gbogbomɛnɛgɔ nu, -bholo 'bhale nɛmɛ nu "ne -bholo 'bhale "guɔkwɔmenyɔ -gbeyi nu.

¹⁴ Zuzu -nyɛnyea -ye Sata -nɛme 'waa -lɔ, "ne 'wa no -lɔ -li -ɛ sɛ geji "ku -wɛ. 'Wa -yle dodo ne 'klekle "ku 'na -klɔgbɔnya "bhle, 'wa "koa 'wli "zo, -se to -ɛ "kɛ 'gweɔ- Lagɔ -ɔ -kɛ 'bhɛloɛ 'na 'yli "yitɛ 'na -zle -wɛ za.

¹⁵ Anyinɛnyɔ nɛɛ: 'A -gɛ 'yli, 'e yi 'winyɔ 'nasɛ yi, zaa, -ɔ ple yli, "ne -ɔ 'piɛ- 'ɔyi 'ɔnɛɛ "koti yɔko -wɛ 'ŋwɛnɛ 'lɔbhɔ, 'ɔ -ka 'wlu 'diɔ "ne 'ɔ "kɛ ŋɔŋo, 'wa te -kɛ -ɛ -le 'ɔnɛɛ dɛku 'zu "ku -wɛ 'ylime.

¹⁶ Zuzu -nyɛnyea "zole- -klɔgbɔnya 'dɛ -bhele 'wli, 'lɔbhɔ 'pa- -lɔ Alemagedone eble -gbo "me.

¹⁷ "Nɔgɔzilɔ 'na gbɔɔsɔnɔ -bhlule -ɛ -ko 'ɔnɛɛ slɔ "me -wɛ "nɔgɔ "ku, "ne "mekpaweli 'bhale 'Mebɔbɔlebhudu "ne 'leyli-gbɔglo "me, 'ɛ nɛɛ: -Dɛmeda, 'ɛ -bhiɛ.

¹⁸ "Ne 'ŋu 'bhle 'yli, weli, -gbagbadɛ 'gbaa, "ne dodo tɛtɛle "yitɛ "ku. -See 'nyakpa "mɔ 'awɔ Dodo ne "ku -ko, dodo 'na 'ce -zɛ soɔ tɛtɛle-.

¹⁹ "Ɛ 'du "yitɛ yi -lɔ 'pɛɛ ta "ku "me 'dliɔdliɔle-, "ne dodo 'klekle "ku 'na 'du yi -lɔ zɔ bhli. Lagɔ 'na 'dle yi -lɔ Babilɔne 'na 'du "yitɛ -wɛ "ku 'sibhɔ. "Ne Lagɔ 'yi -lɔ no 'na slɔ -ɛ -noɔ 'ɔnɛɛ kɛle "yitɛ 'na no -yɛ -wɛ kɔ 'je, -se 'ɔ 'cɛ 'nɔmɔ.

²⁰ 'Ŋusuɛledu 'klekle -bhiɛ "ku, "ne tlo -wɛ 'wɔ zizɔle-.

²¹ -Zeliyo "yiti 'bhale "nɔgɔ "me "ne 'ɛ bhli -lɔ 'nyakpa "ku, 'ɛnɛɛ gbuɛ -bholo -kɛ -lalɛce 'cilɔ -glo "sɔ. 'Nyakpa 'yli Lagɔ, -zeliyo 'na -kpilɛkpilɛ -ye 'ɛ -nɛme -wɛ za, "naa-, "ɛ kpilɛkpilɛ -wɛ 'tɛ- nɛ "me kpɛnyee zɛ.