'Ylikloylɛleweli 15 - Nouveau Testament bété de Gagnoa

"Nɔgɔzilia gbɔɔsɔ "ne 'bebhiɛlekpilɛkpilɛ

¹ "Ne 'e -gɛ "nɔgɔ "me 'be 'na -vinɛ 'yli. 'Ɛ 'kpɔ- "ne 'ɛ sɛ geji "ku: "Ɛ "nɔgɔzilia gbɔɔsɔ -wɛ -su kpilɛkpilɛ "yitɛ kɔ, "ɛ kpilɛkpilɛ -wɛ 'wɔ 'bebhiɛlekpilɛkpilɛ yɛ -lɔ. "Naa-, 'ɛyi ''me 'ye Lagɔ 'na kɛle ''kɛ -lɔ 'yli 'wlole.

² 'E 'ye- -bɛɛ' 'ylime 'ɛ leɛ jinyɛ -ɛ 'lelele "me sɛgbɛɛ 'vɛle, "ne -kosu "bhaa 'ɛ -bleble lo. "Ne 'e 'ye- 'nyakpa -wa -lu nɛmɛ -nyɛ 'ɔnɛɛ 'yuslokpo "bhaa, "ne 'ɔnɛɛ -zɛlesɛ -ɛ -ko 'ɔnɛɛ 'tɔ 'na bhulɛ "me to "me -wɛ 'ylime. 'Wa 'nyegbe- jinyɛ -ɛ -leɛ 'vɛle -wɛ "klo. 'Wa -su Lagɔ 'na -dɔdɔ 'wɔ.

³ 'Wa 'bhle Moyize, Lagɔ 'na "kulɔbhɔnyɔ -nyɛ 'bhlɛbhlɛyu "bhaa 'na lo nɛɛ: Anyinɛnyɔ Lagɔ -ɔ 'bhɛle- 'klekle -neɛ' nonoli 'kpɔ- "ne 'ɛ -le 'ŋwana "ku. -Glɔ 'klekle 'na -klɔgbɔnyɔ, -neɛ' -gwe 'je "me "ne 'ɛ -ko -kpee.

⁴ Anyinɛnyɔ, -ɔ -ka bhɔ -eyi 'plome "zo 'a? "Ne -ɔ -ka bhɔ -neɛ' 'tɔ 'ŋlu 'kwa-? "Naa-, -eyi -bholo -kpee -mɔɔ -ko -lɔ 'wlewle, -glɔnya 'klekle yi 'ce yi "ne 'wa yi 'ce -eyi 'kokomini 'dle "me 'pɔle, "naa-, 'wayi 'klekle yi -neɛ' nonoli -ɛ ŋwinɛle- "me -wɛ 'ylime 'ye.

⁵ "Ne 'e -gɛ "nɔgɔ "me "Mebɔbɔlebhudu -ye 'mɛnenoɛ-gligbɛ -ko zɔ -wɛ 'yli, 'ɛ -kɛleɔ.

⁶ "Ne "nɔgɔzilia gbɔɔsɔ -wa -su "ɛ kpilɛkpilɛ -gbɔɔsɔ -wɛ 'wlo- "Mebɔbɔlebhudu "me zɔ, 'wa -pla "koti 'fɛɛ 'na "namanɔ -ɛ 'lelele "me -wɛ "me. 'Wa -bhlele -badlɛbhɛto 'wɔ 'kekle "ku.

⁷ -Yɛyɛnya -mɔɔnɔ -wɛ 'na 'glɛme 'na -bholo 'je- "nɔgɔzilia gbɔɔsɔ -badlɛslɔ gbɔɔsɔ kɔ. 'Ɛ 'yiɛ- Lagɔ -ɔ -yɛ -godogodo -wɛ 'na 'kɛle "ku.

⁸ Lɔbhɔ 'ye Lagɔ 'na 'ŋlu "ne 'ɔnɛɛ 'bhɛloɛ yi -lɔ "Mebɔbɔlebhudu gbɔylo "ku 'yiɛ-, -se 'nyɔkpɔ te kɛ "ɛ "Mebɔbɔlebhudu -wɛ "me plɛ -kaa, -se kpilɛkpilɛ gbɔɔsɔ -ye "nɔgɔzilia gbɔɔsɔ -nɛme -wɛ 'na nenidɛ "kɛ ylɛ.