'Ylikloylɛleweli 14 - Nouveau Testament bété de Gagnoa

'Bhlɛbhlɛyu 'na -ye 'ɔ -sɛ 'galuyli -wɛ 'na lo

¹ 'E 'wolo "ku 'yiɛ, "ne 'e yi -lɔ 'bhlɛbhlɛyu 'ylime 'ye, 'ɔ 'nyegbe- Sinyɔ 'na tlo 'vli, 'ɔyi -nyɛ 'nyakpa 'na 'kwleyia (144.000) "bhaa. 'Bhlɛbhlɛyu 'na 'tɔ "ne 'ɔ 'to 'na 'tɔ kɛleɔ- 'wanɛɛ "klo.

² 'E 'no- weli -ɛ 'bhale "nɔgɔ "me -wɛ "me. "Ɛ -le nɛ sɛgbɛɛ jinyɛ 'pɔ -gbɔkɔle, "ne 'ɛ -leɛ -gbagbadɛ 'gba "yitɛ "ku. "Ne weli 'na -ye 'e 'no- "me -wɛ -leɛ -dɔdɔbhlenya 'wa 'bhle 'wanɛɛ -dɔdɔ.

³ "Ɛ 'nyakpa -kwleyia -wɛ 'wa 'dile- lo lele -ɔ 'gli- -klɔgbɔ-gbɔglo "me -wɛ -nyɛ -yɛyɛnya -mɔɔnɔ "ne "yitia "bhaa 'yli "ku. 'Nyɔkpɔ "ne 'bhɛle- "ne 'ɔ "kɛ "ɛ lo -wɛ 'ciɛ, 'ɛ "mɔ "ɛ 'nyakpa -kwleyia (144.000) -ye Lagɔ -jeti dodo ne "ku -wɛ 'waa.

⁴ 'Wayi, 'wa "ne 'wayi 'fe -pla 'ŋwenea "bhaa, "naa- 'wa ŋwɛne- "klo, 'wa -gɛlele 'bhlɛbhlɛyu -mee 'ɔ me 'klekle -wɛ. "Naa-, 'wa -jetua 'nyakpa 'glɛme -se 'wa "kɛ 'glogloli 'na tɛtɛnɛ -ye 'wa 'nyɛ Lagɔ "ne 'bhlɛbhlɛyu -wɛ "zo.

⁵ 'Wanɛɛ nuɛgwe "me yo "ne 'ce "bhle 'bhale- "naa- 'wa "ne nuɛsɔbhɔledɛ -kɛ.

"Nɔgɔzilia ta -bhulɛ Lagɔ 'na 'gbobhleweli

⁶ "Ne 'e 'ye- 'lelee "nɔgɔzilɔ 'na -vinɔ 'ylime -ɔ 'blule "nɔgɔ -didigba "me. 'Ɔ -su 'Denaade 'na -ɛ -ka lɛ "kubhiɛ ne, -se 'ɔ 'cɛ dodo klekle, -glɔ 'klekle, -gbɔgbɔgbo 'klekle "ne 'nyakpa 'klekle -sɛle.

⁷ "Nɔgɔzilɔ 'kpa "me, 'ɔ nɛɛ: 'A "zo Lagɔ 'plome, -se 'a 'kwɔ 'ŋlu, "naa-, lɔbhɔ -ylɛ, -dee 'ɔ "kɛ -glɔnya gbo bhlele- -wɛ. 'A bɔbɔ -ɔ 'wlɛ- "nɔgɔ -nyɛ dodo "bhaa "ne jinyɛ -nyɛ 'ŋuwli "bhaa -wɛ.

⁸ "Nɔgɔzilɔ 'na "sɔnɔ -gɛle tɛtɛnɔ, 'ɔ 'kpa "me, 'ɔ nɛɛ: 'Ɔ -bhli zɔ, 'ɔ -bhli zɔ, Babilɔnedu "yitɛ -bhli zɔ. 'Ɔ -gbɔ "ne dodo 'klekle yi -lɔ 'kpeteklino 'na -ɛ -nɛme Lagɔ 'na 'kɛle -wɛ 'nɔmɔ. 'Ɔnɛɛ 'kpeteklino 'lɔbhoa-.

⁹ "Nɔgɔzilɔ 'na tanɔ -gɛlele -me 'lelee "sɔ 'na tɛtɛnoa -wɛ. 'Ɔ 'kpa "me nɛɛ: 'Nyɔkpɔ kɛ nɛmɛ -nyɛ 'ɔnɛɛ 'yuslokpo "bhaa -kokomini 'dle "me 'pɔle-, "ne 'wa kɛ 'ɔnɛɛ sɔ "ne "klo 'be -tli,

¹⁰ 'ɔyi -wɛ yi 'ce 'lelee Lagɔ 'na 'kɛle 'na no 'nɔmɔ, "ɛ no -wɛ yi "me "tamale "ne Lagɔ 'yi 'ce 'ɔnɛɛ 'kɛle 'na -slɔ "me slu. "Ne 'ɔ yi 'ce -kosu -nyɛ -biŋu "bhaa "me 'gbapele- kpɛnyee, "nɔgɔzilia 'wlewle -nyɛ 'bhlɛbhlɛyu "bhaa 'yli "ku.

¹¹ -Kosu 'na 'gbɔylo -ɛ 'gbapea kpɛnyee -wɛ yi 'gblɛ -godogodo. -Ɔ kɛ -kɛ "ɛ nɛmɛ -nyɛ 'ɔnɛɛ 'yuslokpo "bhaa "zo-, "ne -ɔ kɛ -kɛ 'ɔnɛɛ 'tɔ 'na 'be yɔko -kɛ, 'ɔ -ka 'ce nyɔpɔledɛ yle zle gɛ "ne sabo.

¹² 'Wanɛɛ -wa -noa Lagɔ -noa 'waa, "ne -wa "zo- 'ɔnɛɛ gbagbɛ 'plome "ne -wa -kɛ Zezu Kli 'dleku -wɛ, 'wanɛɛ 'dle 'na "bhle 'piɛdɛ -ylɛ -lɔ.

¹³ "Ne 'e yi -lɔ weli -ɛ 'bhale "nɔgɔ "me -wɛ "no, 'ɛ nɛɛ: "Kɛle, -dɛmeda, 'ŋwɛnɛ 'lɔbhoa -mlɛ, -wa -nyɛ Anyinɛnyɔ "bhaa 'wa -kole "ku "ne 'wa "ku- -wɛ. Zuzu Wlewle nɛɛ: 'Diɛɛ, 'wa yi 'nyɔpɔ-, "naa-, 'wanɛɛ nonoli -gɛleloa zɛ.

'Diditenye -ylɛ

¹⁴ 'E -na 'wolo 'nɔgɔjatlɛ 'fɛɛ, -ɔ 'gli- "klo -wɛ, 'ɔ leɛ 'nyɔkpɔ, 'ɔ 'gbli- -badlɛdagbulɛ 'wlime, "ne 'ɔ -su -bhaka -ɛ 'nɔ- -plɔplɔ -wɛ kɔ.

¹⁵ "Nɔgɔzilɔ 'na -vinɔ 'wlo- "Mebɔbɔlebhudu "me zɔ. "Ne 'ɔ yi -lɔ -ɔ 'gli- "ɛ 'nɔgɔjatlɛ "me -wɛ "ku 'kpale nɛɛ: "Libhi -neɛ' -bhaka "ku -se -e "kɛ 'di, 'dididɛ "ku 'ya ylɛ, "naa-, dodo "ku 'na -li -ye 'wa -glo -wɛ 'ya zɛle-.

¹⁶ "Ne -ɔ 'gli- "ɛ 'nɔgɔjatlɛ "me -wɛ yi -lɔ -bhaka "me 'pɔ, "ne 'ɔ yi -lɔ -ɛ -ko dodo "ku 'klekle -wɛ 'di.

¹⁷ "Ne "nɔgɔzilɔ 'na -vinɔ yi -lɔ "nɔgɔ "me 'na "Mebɔbɔlebhudu "me 'bhale-. 'Ɔyi 'lelee, 'ɔ -su -bhaka -ɛ 'nɔ- 'tee -wɛ kɔ.

¹⁸ "Ne "nɔgɔzilɔ 'na -vinɔ, -ɔ -kɛ 'bhɛloɛ -kosu "ku -wɛ yi -lɔ bɔbɔledɛ 'bhale-. "Ne 'ɔ yi -lɔ, -ɔ -su plɛplɛ-bhaka -wɛ "ku 'kpale, 'ɔ nɛɛ: "Libhi -neɛ' plɛplɛ-bhaka "ku -se 'di dodo "ku 'na vinyelɛ "me 'na ylɛzɛ 'na 'gwlɛ, "naa- 'yo -zɛle zɛ.

¹⁹ "Nɔgɔzilɔ 'pɔ- 'ɔnɛɛ -bhaka dodo "ku. "Ne 'ɔ yi -lɔ "ɛ ylɛzɛ 'na 'gwlɛ -ɛ -ko -vinye 'yli -wɛ 'di, "ne 'ɔ 'yi -lɔ 'sɔkɔ "yitɛ "me -mee 'wa 'nimile ylɛzɛ -wɛ 'slu, 'ɛɛ -noɔ -lɔ Lagɔ 'na 'kɛle yɛ.

²⁰ 'Wa 'nimile- "ɛ ylɛzɛ 'du keyi, 'ɛnɛɛ 'nimiledɛ "me. "Ne dlu -kwleyi yi -lɔ "me 'bhale- 'ɛ 'gblɛ- "ne 'ɛ -neni sokoa -wa 'nyegble- "bhle -wɛ 'na -takpe ''ku, 'ɛnɛɛ gbisiɔnɛ -ylɛ 'cilɔ 'na glo 'umgbu 'na 'du ta (300 km) ''ku.