'Ylikloylɛleweli 13 - Nouveau Testament bété de Gagnoa

Nɛmɛ -ɔ 'bhale jinyɛ "me -wɛ

¹ -Ɛwɛ "kɛ 'ple "bhuɔ ne, 'e -gɛ nɛmɛ -bholo 'yli 'ɔ 'bhale nɛ jinyɛ "me, 'ɔ -kɛ nɛ 'gwe kogbɔ "ne 'wli gbɔɔsɔ. -Maflɛ 'gli "ɛ 'gwe -wɛ 'wɔ 'yli -bholo -bholo, "ne 'tɔ -ɛ yli Lagɔ -wɛ 'gli- nɛ 'wli -bholo -bholo "ku.

² "Ɛ nɛmɛ -ye 'e -gɛ 'yli -wɛ 'wlole- gbi, 'ɔnɛɛ bho -ko sɛgbɛɛ -kaakpɔ 'na bho, "ne 'ɔnɛɛ nuɛ -ko sɛgbɛɛ sluku 'na nuɛ. "Ɛ nɛmɛ ne -gbogbomɛnɛgɔ 'nyɔ- -lɔ 'ɔnɛɛ 'bhɛloɛ, 'ɔnɛɛ -klɔgbɔ-gbɔglo, "ne 'ɔnɛɛ 'kamaleɛ "yitɛ.

³ 'Ɔnɛɛ 'wli 'na -bholo -leɛ -ɛ 'lɔbhɔ- "kukusɛ, -mɔ, -dɛmeda, 'ɔnɛɛ -dee 'lɔbhɔ- "kukusɛ -wɛ -yamale. 'Ɛ lele- dodokpɛtɛ ne "ku 'na 'nyakpa 'klekle 'ŋwana "ku "ne 'wa yi -lɔ "ɛ nɛmɛ -wɛ -gɛlele.

⁴ 'Nyakpa 'klekle "zo 'awɔ "ɛ -gbogbomɛnɛgɔ -wɛ, "naa- 'ɔɔ 'nyɛ- -lɔ 'ɔnɛɛ 'bhɛloɛ "ɛ nɛmɛ -wɛ. 'Wa "zo -me 'awɔ 'lelee "ɛ nɛmɛ -wɛ "ne 'wa lɛ 'awɔ -lɔ sɛne nɛɛ: «-Ɔ -ko bhɔ sɛgbɛɛ "ɛ nɛmɛ ne? "Ne -nyɔ "bhaa 'wa "kɛ bhɔ gwe?»

⁵ 'Wa -bhulɛle "ɛ nɛmɛ -wɛ -gbɔ 'ɔ bhulɛ -glaweli -se 'ɔ 'yli Lagɔ. 'Wa 'nyɔ- 'bhɛloɛ -se 'ɔ "kɛ 'kamalea- 'ce -glo "sɔ 'ce "sɔ 'na dɛ.

⁶ "Ɛ nɛmɛ -wɛ ziɛ nɛ Lagɔ 'dii, 'ɔ ziɛ nɛ Lagɔ 'na 'tɔ 'dii, 'ɔ ziɛ nɛ Lagɔ 'na kodɛ 'dii, 'ɔ ziɛ nɛ me nɛ 'lelee "nɔgɔ "me 'na konya 'dii.

⁷ 'Wa 'nyɔ- 'bhɛloɛ -se 'ɔ "kɛ Lagɔ 'na 'nyakpa to "me yle, -se 'ɔ "koa to "me lu. 'Ɔ -yle -glɔ 'klekle 'na 'kamaleɛ, 'gbɔgbɔgbo 'klekle, "ne dodo klekle.

⁸ Dodo ne "ku 'na 'nyakpa 'klekle yu 'ce "zo, -mɔ nyɔ 'wɔ 'na 'tɔ kɛleɔ- zikpɛbɔgo "me -see zikpɛ "mɔ 'awɔ 'wlo "ne "bhle -ko -me. "Ɛ "bɔgo ne, 'bhlɛbhlɛyu -ye 'wa 'lɔbhɔ- bɔbɔ -za "ne 'ɔ yi "ku -wɛ 'bhe- -lɔ.

⁹ -Ɔ -kɛ 'yukwli -kɛ, 'ɔ 'fo 'yukwli.

¹⁰ 'Nyɔkpɔ kɛ lɔbhɔ -sɔ -jiɛnyɔ "ku ne, -jiɛnyɔ 'ye 'ɔ "kɛ -lɔ "zo. 'Nyɔkpɔ kɛ lɔbhɔ -sɔ -se 'ɔ "kɛ -jijigbɛlɛ 'yli "kule ne, -jijigbɛlɛ 'yli 'ɔ "kule -lɔ. -Wa -noɔ Lagɔ -noa 'wa -wɛ -dee 'wa "kɛ "bhle 'dle 'piɛle- "ne 'wa "kɛ 'dleku kɛle- -ylɛ -lɔ.

Nɛmɛ -ɔ 'bhale dodo "me -wɛ

¹¹ -Ɛwɛ 'ple- lɛ "bhuɔ ne, 'e 'ye- nɛmɛ 'na -vinɔ -ɔ 'bhale dodo "me 'ylime. 'Ɔ -kɛ nɛ 'gwe "sɔ 'wli sɛgbɛɛ 'bhlɛbhlɛyu 'na 'gwe, "ne 'ɔ bhulɛ -lɔ sɛgbɛɛ -gbogbomɛnɛgɔ.

¹² 'Ɔ -kɛ nɛ tɛtɛnɛmɛ -ɔ 'bhale- nɛ jinyɛ "me -wɛ 'na 'bhɛloɛ, "ɛ 'bhɛloɛ -wɛ 'klekle 'ye 'ɔ -sule -lɔ tɛtɛnɛmɛ 'yli "ku. 'Wa 'lɔbhɔ- nɛ "ɛ tɛtɛnɛmɛ -wɛ "kukusɛ, -mɔ, 'ɔ -yamale nɛ. Nɛmɛ -ɔ 'bhale- nɛ dodo "me -wɛ bhulɛle nɛ -lɔ zikpɛkonya -gbɔ 'wa "zo "ɛ tɛtɛnɛmɛ -wɛ "klepaa.

¹³ 'Ɔ 'pɔ nɛ zɛzɛ "yiti. 'Nyakpa 'klekle 'yli "ku, 'ɔ -sɛ nɛ -kosu "nɔgɔ "me "ne 'ɛ -yi dodo "ku.

¹⁴ Soɔ 'ye 'ɔ bhlia nɛ -lɔ dodo ne "ku 'na 'nyakpa 'kwlɛ. "Naa-, 'ɔ -yle nɛ 'bhɛloɛ -se 'ɔ "kɛ tɛtɛnɛmɛ 'yli "ku zɛzɛ "yiti 'pɔle. 'Ɔ bhulɛle zikpɛkonya -gbɔ 'wa no jinyɛ "me 'na nɛmɛ -ye 'lɔbhɔ- nɛ "kukusɛ -jijigbɛlɛ nu "ne 'ɔ -yamale nɛ -wɛ 'na yuslokponɔ.

¹⁵ Nɛmɛ -ɔ 'bhale- dodo "me -wɛ -yle 'bhɛloɛ "ne 'ɔ yi -lɔ "ɛ 'yuslokpo -wɛ nyɔŋo "me "zo. 'Ɛza "ɛ 'yuslokpo -wɛ bhulɛ nɛ "ne 'ɔ bhɛle- 'lelee nɛ -se 'ɔ "kɛ -wa no 'klekle -gbɔ 'wa -kɔ "zo -wɛ 'lɔbhɔ -se 'wa "kɛ "ku.

¹⁶ 'Ɔ nɛɛ 'nyakpa 'klekle, yua "ne "yitia, lɛkɛlenya "ne 'nyɛzenya, 'nyakpa 'na -wa -yele kɔ "ne juyua 'wa "zoa 'be lilikwlɛsɔ "me "ne "klo klepaa.

¹⁷ 'Nyɔkpɔ "ne 'awɔ 'bhɛle-, "ne 'ɔ kɛ 'pea, "ne 'ɔ kɛ 'pɔlo 'pɔ, 'ɔ "mɔ "ɛ 'be -wɛ -su ne, 'ɛ sɛ zɔ nɛɛ: "Ɛ nɛmɛ -wɛ 'na 'tɔ, "ne zɛlesɛ 'na -ɛ bhli 'ɔnɛɛ 'tɔ 'ylime -wɛ.

¹⁸ -Dee 'nyakpa "kɛ 'ylime -yamale -ylɛ -lɔ. -Ɔ "nɛ- -wɛ yi -ye 'wa -zɛle 'na -see 'ɛ -bhli "ku -wɛ "me 'no, sɛko -wɛ 'nyɔkpɔ 'na 'tɔ 'na bhulɛ "me 'ye 'ɛ -ko -lɔ. 'Ɛ -yle glo 'umgbu 'na 'wukwɛ 'gbeplo glo ta yɛ 'gbeplo (666).