'Ylikloylɛleweli 12 - Nouveau Testament bété de Gagnoa

'Ŋɔnɔ "ne -gbogbomɛnɛgɔ

¹ 'Be 'na "yitɛ 'wlole- "nɔgɔ "me zɔ: 'Ŋɔnɔ yɔ nɛ -lɔ. Ylo -bubɔ sɛgbɛɛ "meplakoti, 'ce -ko 'bhozɔ, "ne -zeli kogbɔ "sɔ 'na -maflɛ 'gblu- 'wlime.

² 'Ɔ -kɛ nɛ go, "ne 'ɔ 'gbape nɛ kpɛnyee 'gwɛle -ɛ 'lɔbhɔ -wɛ za, 'ɔ 'kpa nɛ "me.

³ 'Be 'na -vinɛ 'wlole- 'lelee "nɔgɔ "me zɔ: -Gbogbomɛnɛgɔ "yitɔ, 'ɔ -zɛle nɛ sɛgbɛɛ -kosu, "ne 'ɔ -kɛ nɛ 'wli gbɔɔsɔ "ne 'gwe kogbɔ. "Ɛ 'wli -wɛ 'wɔ -kɛ 'ɛnɛɛ -maflɛ -bholo -bholo.

⁴ 'Ɔnɛɛ goyi -yepe "nɔgɔ "me 'na -zeli -ye 'wa -dli "ku ta "me -wɛ 'na 'cibhɛ 'na tanɛ "ne 'ɛ 'slu- dodo "ku. "Ɛ -gbogbomɛnɛgɔ -wɛ 'nyegbe- nɛ "ɛ 'ŋɔnɔ -ɔ "kɛ 'gwɛle- -wɛ 'yli "ku -se 'ɔ "kɛ 'ɔnɛɛ yu li.

⁵ "Ne "ɛ 'ŋɔnɔ yi -lɔ 'widiyu -gwɛle, 'widiyu 'na -ɔ "kɛ lɛ dodo 'klekle yɔko 'kamalesɛ slu-. -Mɔ, "ɛ yu -wɛ, 'wa libhu- "ku "ne 'wa yu -lɔ Lagɔ -nyɛ 'ɔnɛɛ -klɔgbɔgbɔglo "bhaa yɔko kɔme-.

⁶ 'Ɛ kɛ "ɛ 'ŋɔnɔ ne yɔ, 'ɔ -fɔtɔle 'kɔsɛku, -mee Lagɔ -jijalea 'ɔnɛɛ kodɛ 'wli -se 'wa "kɔ "bhle lilɛ "nyɛle 'yli -glo 'umgbu 'na 'wukwɛ gbɔɔsɔ "ne 'yli -glo ta 'na dɛ (1.260).

⁷ "Ne to yi -lɔ "nɔgɔ "me bhli. Misɛle -nyɛ 'ɔnɛɛ "nɔgɔzilia 'wɔ "bhaa 'wa gwele nɛ "ɛ -gbogbomɛnɛgɔ "ku. 'Ɔyi 'lelee, 'ɔ -nyɛ 'ɔnɛɛ -zilia "bhaa 'wa 'gweloa me nɛ "ku,

⁸ -mɔ 'ɔ "ne nɛ "me 'tɛ- "ne 'ɔ "kɛ Misɛle "ku -zi. "Ne 'wa "ne -la "nɔgɔ "me 'na glisɛ -kɛ.

⁹ "Ne 'wa yi -lɔ "ɛ -gbogbomɛnɛgɔ -gwli -wɛ zikpoku 'pɔ. "Ɛ -gbogbomɛnɛgɔ ne, bhlɛgɔgɔtɛbhɛ yɛ -lɔ. 'Ɔyi 'wa la me -lɔ zuzu-nyɛnyea 'na "cifi "ne Sata. 'Ɔɔ no -lɔ -glɔ ne zɔ 'na 'nyakpa 'klekle ylo. 'Wa 'pɔ- dodo "ku 'ɔnɛɛ -zilia 'wɔ "bhaa.

¹⁰ 'E 'no- "mekpaweli "nɔgɔ "me. 'Ɛ nɛɛ: -Dɛmeda, lɔbhɔ -ylɛ, "tɛnye 'na -ye Lagɔ 'fuɔle lɛ "me, -dɛmeda -anyɛɛ Lagɔ -noɔ -lɔ -klɔgbɔnyɔ -ɔ -kɛ 'bhɛloɛ yɔ, -Dɛmeda, 'ɔnɛɛ Ŋwɛnɛŋwɛnɛyu -tua 'ɔnɛɛ 'bhɛloɛ 'ylime. "Naa-, -ɔ 'gbli nɛ -a "nowlia "ne -a "nɔyoa gbo 'wlime Lagɔ 'yli "ku zlegɛ "ne sabo -wɛ, 'wa -sɔ "nɔgɔ "me "ne 'wa 'pɔ- dodo "ku.

¹¹ -Mɔ, 'wayi, 'wa -lua to "me 'bhlɛbhlɛyu 'na dlu za "ne -see 'wa "zo- Lagɔweli 'na -wayeɛdɛ za. 'Wa 'bhale- 'wanɛɛ zikpɛ "me "ne 'wa 'ŋunu- 'kwiɛ 'na gbo.

¹² Zaa, 'a no 'se 'ŋwɛnɛ, "Nɔgɔ "ne "bhle 'na konya "bhaa! -Mɔ, kpilɛkpilɛ -yle -lɔ 'anye, Dodo -nyɛ jinyɛ "bhaa! Sata 'kwlile- 'anyɛɛ moɔ, "ne 'kɛle 'lɔbhɔ kpɛnyee, "naa-, 'ɔ -yi -sɛ -gbɔ 'ɔnɛɛ "tɛnye -ɛ -to "bhle -wɛ "ne -la zu.

¹³ -Gbogbomɛnɛgɔ 'ye- lɛ 'ylime -gbɔ 'wa 'pɔ- dodo "ku ne, 'ŋɔnɔ -ɔ -gwɛle 'widiyu -wɛ 'ye 'ɔ kpeti -da -lɔ 'be.

¹⁴ -Mɔ, "ɛ 'ŋɔnɔ -wɛ, 'wa 'jo- 'cɛcɛ "yitɔ 'na -kopi "sɔ kɔ, -se 'ɔ "kɛ 'kɔsɛku 'bhlule, -dee 'wa -jijale 'wli 'ɔnɛɛ za -wɛ, "ne lɔbhɔ 'tlole 'tɛbhɛ dɛ -wɛ. Lɔbhɔ 'ye 'wa kɔ -lɔ lilɛ "nyɛle "tɛnye -bholo, "tɛnye "sɔ "ne "tenye -cibhɛ 'na dɛ.

¹⁵ "Ɛ 'tɛbhɛ -wɛ -gwɛsɛ 'ŋu sɛgbɛɛ 'ŋuwli "yitɛ -se 'ɛ "kɛ "ɛ 'ŋɔnɔ -wɛ kɔme-.

¹⁶ -Mɔ dodo -yi "ɛ 'ŋɔnɔ -wɛ "ku: 'ɛ 'diɔ- 'nuɔ "ne 'ɛ yi -lɔ "ɛ 'ŋuwli "yitɛ -ɛ 'bhale -gbogbomɛnɛgɔ nu -wɛ 'mɛnɛ.

¹⁷ -Gbogbomɛnɛgɔ 'pɔle- 'ŋɔnɔ 'kɛle yɔko "yitɛ "ku, "ne 'ɔ yi -lɔ 'ŋɔnɔ 'na yua -wa -to lɔbhɔ -wɛ to "me ylele- -ka me, 'wayi -wɛ, -wa "zo Lagɔ 'na gbagbɛ 'plome "ne -wa -noɔ Zezu 'na -wayeɛdɛ 'waa.

¹⁸ "Ne "ɛ -gbogbomɛnɛgɔ yi -lɔ jinyɛ yɔko 'na -ylomɛ "klo "nyegbe- -ka me.