'Ylikloylɛleweli 11 - Nouveau Testament bété de Gagnoa

'Nyakpa "sɔ -wa 'ye "ɛ dɛ

¹ "Ne 'nyakpa yi -lɔ -ame 'jɛ -ɛ -le sɛgbɛɛ 'pepeyi -ye 'wa wɔkɔle nu -wɛ kɔ 'je. 'Ɔ nɛɛ: «Me, -se -e "kɛ Lagɔ 'na "Mebɔbɔlebhudu "ne bɔbɔledɛ wɔkɔ-. -Se zɛle- -me -kɛ 'lelee -wa bhubhɔle "bhle -wɛ,

² -mɔ, "Mebɔbɔlebhudu "me 'na keyi -wɛ "ku 'tale- "bhle 'yi, 'te -kɛ wɔkɔ -me, "naa- -wa "ne "zo Lagɔ -wɛ 'wa 'je- -lɔ kɔ zɛ. 'Wa yi 'ce "ɛ 'du 'wlewle -wɛ "me 'na -li 'klekle nyimɔ 'ce -glo "sɔ 'ce "sɔ 'na dɛ.

³ 'E yi 'ce 'neɛ -wayeɛdɛ "sɔ -wa -pla -gbudukoti "me -wɛ 'lebhe-. 'Wa yi 'ce Lagɔ 'na 'tɔ "me bhulɛle- 'yli 'na -gɛmɛnɛ -wlulu -bholo, 'yli -glo 'umgbu 'na 'wukwɛ "sɔ 'yli -glo ta 'na dɛ (1.260).»

⁴ "Ɛ -wayeɛdɛ "sɔ -wɛ, oliviesu "sɔ "ne 'napɛ 'na 'glɛdɛ "sɔ -wa 'nyegbe- dodo "ku Anyinɛnyɔ 'yli "ku -wɛ 'waa -lɔ.

⁵ 'Nyɔkpɔ kɛ -no -gbɔ 'ɔ "koa "nyɛnye no ne, -kosu 'wloloa nu "ne 'ɛ bhiɛ -lɔ 'wanɛɛ -gblenya 'wli. 'Diɛɛ, -ɔ kɛ 'ce -no -gbɔ 'ɔ "koa "nyɛnye no ne, "ɛ sɛbhele -wɛ 'ye 'ɔ "kɛ -lɔ "ku me.

⁶ "Ɛ -wayeɛdɛ "sɔ -wɛ, 'wa 'bhɛle- -se 'wa "kɛ "nɔgɔ "ku 'gba -se 'ŋu te -kɛ lɔbhɔ, -sɔɔdɛku 'wa bhulɛle Lagɔ 'na 'tɔ "me -wɛ. "Ne 'wa 'bhɛle- -se 'wa "kɛ 'ŋu dlu "me 'ylialea-. 'Wa 'bhɛle- 'lelee -se 'wa "kɛ "nyɛnye 'klekle dodo ne "ku -nɛme -see 'wa 'yɔbhɔ 'ce -wɛ.

⁷ -Mɔ, 'wa kɛ 'wanɛɛ 'desɛweli kɔ bhiɛ- "bhuɔ ne, nɛmɛ -ɔ 'bhale "kuduku -wɛ yua to "me yle, "ne 'ɔ yua to "me lu, "ne 'ɔ yua 'lɔbhɔ "ne 'wa yi "ku.

⁸ 'Wanɛɛ -gɛzea yi 'ce "ɛ 'du "yitɛ -wɛ "me 'na -digbɛ "me slu, "ɛ 'doɔ 'wa -kole -lɔ 'wanɛɛ "Bhenyɔ klowa "klo, "ɛ 'du -wɛ 'pa- -lɔ wɔkɔle- sɛku Sodɔme "ne Ezipte.

⁹ 'Nyakpa 'klekle, -glɔ 'klekle, 'gbɔgbɔgbo 'klekle "ne dodo 'klekle yi 'ce 'wanɛɛ -gɛzea 'ylɛ -ka yi 'yli ta 'cibhɛ 'na dɛ. 'Wa -ka 'ce "ku 'ŋunu -gbɔ 'wa zizua-.

¹⁰ Zikpɛkonya 'klekle yi 'ce -zli gbɔle 'wanɛɛ 'kwiɛ za. 'Ŋwɛnɛ -no -za 'wa yi 'ce -li 'nyɛnyɛle-, "naa- "ɛ "guɔkwɔmenya "sɔ -wɛ 'gbapua- nɛ kpɛnyee zɛ.

¹¹ -Mɔ, 'yli ta 'cibhɛ 'ple- lɛ "bhuɔ ne, Lagɔ 'na nyɔŋo -plɛ "ɛ "guɔkwɔmenya -wɛ "me, "ne 'wa yi -lɔ "ku -sɔ, "ne nyanɔ "yitɛ yi -lɔ -wa -yi 'ylɛ -ka 'lɔbhɔ.

¹² "Ne "ɛ "guɔkwɔmenya "sɔ -wɛ yi -lɔ "mekpaweli "yitɛ -ɛ 'bhale "nɔgɔ "me -wɛ "me 'no, 'ɛ nɛɛ: «'A 'gblɛ dɛne!» "Ne 'wa yi -lɔ "nɔgɔ "me 'gblɛ, nɔgɔjatlɛ "me 'wanɛɛ -gblenya 'yli "ku.

¹³ "Ɛ "tɛnye -bhele -wɛ "me dodo -tɛtɛle nɛ "yitɛ "ku. "Ne "ɛ 'du -ye 'wa -dli 'pɛɛ -kogbɔ "ku "me -wɛ 'na 'pɛɛ 'na kogbɔnɛ yi -lɔ 'tutluɔ- "ne 'nyakpa 'na -gɛmɛnɛ -wlulu gbɔɔsɔ (7.000) yi -lɔ "ku "ɛ dodo -tɛtɛleɛ -wɛ "me. "Ne 'wa -yɛ 'na -wa 'ye- 'ylime -wɛ nyanɔ yua -lɔ 'lɔbhɔ "ne 'wa yi -lɔ Lagɔ -ɔ -ko "nɔgɔ "me -wɛ 'ŋlu 'kwa.

¹⁴ 'Kpilɛkpilɛ 'na "sɔnɛ -wɛ -ple, -mɔ, 'a -gɛ 'yli, "ɛ kpilɛkpilɛ 'na tanɛ "ne -la dɛtlo.

Lɛglɛ 'na gbɔɔsɔnɛ 'di- gbo

¹⁵ "Nɔgɔzilɔ 'na gbɔɔsɔnɔ 'dia- 'ɔnɛɛ lɛglɛ gbo, weli "yitɛ 'bhale "nɔgɔ "me, 'ɛ nɛɛ: -Dɛmeda, dodo ne "ku 'na 'kamaleɛ Anyinɛnyɔ Lagɔ "ne 'ɔnɛɛ Klise 'ye 'ɛ 'bhale -lɔ kɔ. 'Ɔɔ "kɛ 'ce -lɔ -klɔgbɔnyɔ "zo -godogodo.

¹⁶ 'Nyɛbhlegɔgoa 'na glo -bholo yɛ -mɔɔnɔ, -wa 'gli- 'wanɛɛ 'leyli-gbɔglo "ku Lagɔ 'yli "ku -wɛ -bhli zɔ, 'wa -gla 'wanɛɛ "klo dodo "ne 'wa "zo -lɔ Lagɔ.

¹⁷ Ŋwɛnɛɛ: «Anyinɛnyɔ Lagɔ -ɔ -kɛ 'bhɛloɛ -eyi, -e -le "ne -e -le 'awɔ, -a bhɛle -eyi. -Neɛ' 'bhɛloɛ "yitɛ "me -e -gbɔ "ne -dɛmeda, -e -noɔ -Klɔgbɔnyɔ yɔ.

¹⁸ Dodo 'klekle 'pɔle- nɛ -eyi 'kɛle yɔko, -mɔ, -neɛ' 'kɛle -yi -lɔ. -Wa "ku- -wɛ 'na 'gbobhlele- 'gle -ylɛ. -Dee -e "kɛ -neɛ' "kulɔbhɔnya, "guɔkwɔmenya peɛloɛ "nyɛ -ylɛ -lɔ, -wa -noɔ -noa 'waa, -wa "zo -eyi 'plome 'dletɛleɛ "me, yua "ne "yitia. "Tɛnye 'na -ye -e "kɛ -wa 'bhia dodo "ku "ku bhia- -ylɛ -lɔ.»

¹⁹ "Nɔgɔ "me, Lagɔ 'na "Mebɔbɔlebhudu -vuluɔ "ku. 'Wa -gɛ 'mɛnenoɛcesu 'ɔnɛɛ "Mebɔbɔlebhudu "me 'yli. 'Ŋu -bhle yli, 'kple -gbɔ, -gbagbadɛ 'gba-, dodo -tɛtɛle "ne 'ŋu -lɔbhɔ "ne -zeliyo -bhli.