'Ylikloylɛleweli 1 - Nouveau Testament bété de Gagnoa

Zezu -sloa 'ɔyi -glɔnya

¹ "Ɛ "bɔgo ne "me, -li 'na -ye Zezu Kli -tua 'nyakpa 'ylime -ko -lɔ "bhle. Lagɔ -kwilɛlo -lɔ "ku -se 'ɔ "kɛ 'ɔnɛɛ "kulɔbhɔnya -ɛ "kɛ yi -wɛ 'na weli 'ylime 'tua-. Klise -lebhe -lɔ 'ɔnɛɛ "nɔgɔzilɔ 'ɔnɛɛ "kulɔbhɔnyɔ Zaa "ku, -se 'ɔ "kɔ "ɛ weli -wɛ 'ylime 'tua-.

² "Ɛ Zaa -yibhlele -ye 'ɔ 'ye- 'ylime 'klekle -wɛ, Lagɔ 'na weli yɛ -lɔ, "ne Zezu Kli 'na gbɛklɛklɛ -bhulɛweli yɛ -lɔ.

³ 'Ŋwɛnɛ 'lɔbhɔ -ɔ zɛle "ɛ "bɔgo ne "me! "Ne -wa fo weli -ɛ 'bhale Lagɔ nu 'yukwli -wɛ, "ne -wa -cɛ kɔ -wɛ, "naa- 'ɛnɛɛ 'yliwloledɛ "ne -la dɛtlo.

Zaa bhɛle Lagɔgligbɛ gbɔɔsɔ -ɛ -ko Azi -glɔ "me -wɛ

⁴ -Ame Zaa, 'mɔɔ 'kɛle lɛ Lagɔgligbɛ gbɔɔsɔ -ɛ -ko Azi -glɔ "me -wɛ "ku. -Jɔlo "ne "kuwɛtɛ yi 'anye "ku, -ɛ 'bhale lɛ Lagɔ -ɔ -le, -ɔ -le 'awɔ "ne -ɔ "kɛ yi -wɛ "me! 'Ɛ 'bhale me zuzu gbɔɔsɔ -wa -ko 'ɔnɛɛ 'leyli-gbɔglo 'yli "ku -wɛ "me!

⁵ Zezu Kli -ɔ -noɔ -ɔyeɛdɛ 'na 'dletɛlenyɔ yɔ, 'ɔ "nyɛ 'anye -jɔlo -nyɛ "kuwɛtɛ "bhaa. 'Ɔɔ -noɔ tɛtɛnyɔ 'na -ɔ 'wlo- -glukonya 'glɛme zɔ yɔ. 'Ɔɔ -noɔ -me 'lelee dodo ne "ku 'na -klɔgbɔnya 'na "cifi yɔ. Zezu Kli -wamale -anye "ne 'ɔ -sɛ -anye -anyɛɛ 'nyinyonoli 'na gbo 'wlime, 'ɔnɛɛ dlu 'na suɛsluɛ "me.

⁶ 'Ɔ "zoa- -anye klɔgbɔnya "ne bɔbɔnya -se -a "kɛ 'ɔ 'To Lagɔ "ku lɔbhɔ-. Zezu 'bhe- -lɔ 'ŋlumeɛ, "ne 'bhɛloɛ -godogodo! Amɛn.

⁷ 'A -gɛ 'yli: "nɔgɔjatlɛ "me 'ye 'ɔ 'bhale -lɔ, -Se 'nyakpa 'klekle "kɔ 'ylime 'ye, -wa 'pɔ- li -wɛ 'nabhɛ. 'Ɔnɛɛ 'tɔ "me, dodo ne "ku 'na ŋeyi 'klekle 'nyɛze yua 'lɔbhɔ. 'Diɛɛ! Amɛn

⁸ Anyinɛnyɔ Lagɔ nɛɛ: «'Mɔɔ -noɔ -lɔ Alefa "ne Omega yɔ, tɛtɛnyɔ "ne bebhiɛlenyɔ, 'mɔɔ -noɔ -lɔ -ɔ -le, -ɔ -le 'awɔ, "ne -ɔ "kɛ yi, 'mɔɔ -noɔ -lɔ -ɔ 'bhɛle- -li 'klekle yɔ.»

Zezu 'sibhɔ- Zaa 'yli "ku

⁹ -Ame, 'a "nɔwli Zaa, 'anye 'wɔ "bhaa -a 'gbapele 'gɔme. 'Anye 'wɔ "bhaa Lagɔ 'na 'Kamalezikpɛ "me -noa 'ye -a -noɔ -lɔ, 'e 'piɛ- "bhle 'dle "ne 'anye -nyɛ -ame "bhaa -a -kole "ku 'gɔme Zezu "me. 'Wa sa- -ame "ne 'wa -kɔme -ame 'ŋusuɛledu Patemɔse, sɛko -wɛ, 'e bhulɛ Lagɔ 'na weli "ne 'e "zo- Zezu 'na -ɔyeɛdɛ.

¹⁰ Lagɔ 'na gwlɛlezle, Lagɔzuzu -bhlile -ame keyi, "ne -ame 'beme, 'e 'no- "me tamaleweli, sɛgbɛɛ lɛglɛ 'na 'gbodiweli.

¹¹ 'Ɛ nɛɛ: -Ye 'e 'ye 'ylime -wɛ, 'kɛle "bɔgo "me, -se kɔme- Lagɔgligbɛ gbɔɔsɔ -wɛ "me: Efɛze, Similɛne, Pɛlegame, Tiatile, Saledɛse, Filadɛlefi "ne Laodise.

¹² "Ne 'e yi -lɔ 'beme 'wolo- -se 'e "kɛ -ɔ bhulɛle -ame -wɛ 'ylime 'ye, "ne 'e yi -lɔ 'napɛ 'na -ɛ -kɛ 'glɛdɛ gbɔɔsɔ "ne 'ɛ -noɔ -badlɛ "ku -wɛ 'ylime 'ye.

¹³ "Ɛ 'napɛ 'na 'glɛdɛ -wɛ 'na jijɛku, -bɛɛ' -bholo -ko "bhle, 'ɔ 'wlole- 'nyɔkpɔ yowli. 'Ɔ -pla "koti -glɛgbɛ "me, "ne 'ɔ -bhlele -badlɛ -bɛto 'kekle "ku.

¹⁴ 'Ɔnɛɛ 'wli 'na 'nyi -ko 'buu sɛgbɛɛ bhlɛbhlɛ 'na ŋɛne 'fɛɛ. "Ɛ 'fɛɛ -wɛ -ko gbɛklɛklɛ. 'Ɔnɛɛ 'yli -le sɛgbɛɛ -kosu sɛ 'dɛle.

¹⁵ 'Ɔnɛɛ bho 'lelele "me sɛgbɛɛ 'leyi 'wa 'titli-. 'Ɔnɛɛ weli 'tɛ- "me sɛgbɛɛ jinyɛ "pɔ -gbɔkɔle.

¹⁶ 'Ɔ -su -zeli gbɔɔsɔ kɔ 'ɔnɛɛ lilikwlɛ -sɔ "me. -Jijigbɛlɛ -ɛ 'nɔ- -wɛ 'bhalo 'nu. 'Ɔnɛɛ "klo 'lelele "me sɛgbɛɛ 'ylokwɛzɛleylo.

¹⁷ 'E kɔ 'ylime 'ye ne, 'ɔyi 'yli "ku 'ye 'e -bhli -lɔ sɛgbɛɛ "ku- 'ye 'e "ku-. 'Ɔ 'piɛ- -ame lilikwlɛsɔ "ku, "ne 'ɔ yi -lɔ no nɛɛ: Te 'se "gu! 'Mɔɔ -noɔ -lɔ tɛtɛnyɔ, "ne bebhiɛlenyɔ yɔ,

¹⁸ "ne -ɔ -yɛ gbligbli yɔ. 'E "ku- nɛ, -mɔ, 'a -gɛ 'yli, 'e -yɛ -godogodo 'na dɛ. 'E -su 'kwiɛ "ne "kuduku 'na 'safɛ.

¹⁹ Zaa, -ye -e 'ye- 'ylime -wɛ, "ne -ɛ 'ple- -dɛme ne, "ne -ɛ "kɛ 'lelee yi -wɛ 'kɛle.

²⁰ -Zeli gbɔɔsɔ -ye -e 'yele- 'neɛ lilikwlɛ -sɔ "me 'ylime, "ne -badlɛ -napɛ 'na 'glɛdɛ gbɔɔsɔ -wɛ, 'na zɔsɛsɛ ne lɛ: -Zeli gbɔɔsɔ -wɛ, Lagɔgligbɛ gbɔɔsɔ 'na "nɔgɔzilia gbɔɔsɔ 'waa -lɔ, "ne "ɛ 'napɛ 'na 'glɛdɛ gbɔɔsɔ -wɛ, Lagɔgligbɛ gbɔɔsɔ yɛ -lɔ.