Wlomɛnya 9 - Nouveau Testament bété de Gagnoa

Lagɔ -tɔ Izlayɛleyua

¹ Klise "bhaa -a -kole "ku, zaa, 'e yi gbaa bhulɛ-, 'e -ka yo 'wlɛ. Zuzu Wlewle bhulɛle- lɛ -ame "me -gbɔ 'diɛɛ yɛ -lɔ.

² 'Dle 'yiɛ -ame 'nuɔ "ne 'e 'gbapele kɔ yiɛ.

³ 'Diɛɛ, 'e 'yɔbhɔ nɛ -gbɔ Lagɔ "pɔ nɛ -ame 'kwlɛ "me, -se Klise "bhaa -a yliylile- nɛ guɔ, -ame "nowlia "ne -ame "nɔyoa zufonya 'na 'ylime, 'wayi 'wɔ "bhaa dɛ -bhele -a 'bhale -lɔ.

⁴ Izlayɛleyua 'waa -lɔ. Lagɔ "zoa- 'ɔnɛɛ yua. 'Ɔ -tua 'ɔnɛɛ 'ŋlumeɛ 'ylime. 'Wayi 'wɔ "bhaa 'wa -mɛnele. 'Ɔ 'nyoa- -Lɔ, bhubhɔsɛ, welipleɛ,

⁵ 'wa 'to 'wa 'to 'wɔ 'ŋlumenya "yitia 'waa -lɔ. 'Wanɛɛ -gligbɛ "ku 'wa -gwɛlele -lɔ Klise 'nyɔkpɔ sɛku, 'ɔyi, -ɔ -noɔ Lagɔ yɔ "ne -ɔ zi "ku 'klekle. 'Ɔ me 'ŋlu -godogodo! Amɛn.

⁶ "Ne weli -ye Lagɔ -ple -wɛ "ne "fu -to. "Naa-, yua -ye Izlayɛle 'gwɛle -wɛ, "ne Izlayɛle 'na yua gbaa 'waa 'klekle.

⁷ "Ne -wa 'bhale- Ablame 'na ŋeyi "me -wɛ "ne 'ɔnɛɛ yua gbaa 'waa 'klekle. "Naa-, Lagɔ -bhulɛle Ablame nɛɛ: 'Yua -nyɔ 'na weli 'e -plele -eyi kɔ -wɛ, Izake "me -e "koa -lɔ ylele-.

⁸ -Se "ɛ weli -wɛ sɛ zɔ ne lɛ: Yua -ye 'widi -nyɛ 'ŋɔnɔ "bhaa 'wa -gwɛle -wɛ 'wa "ne Lagɔ 'na yua 'waa. -Mɔ, Lagɔ 'na weli -ye 'ɔ -ple 'na yua -wɛ -noɔ -lɔ Lagɔ 'na yua gbaa 'waa.

⁹ "Naa-, weli -ye Lagɔ -ple -wɛ ne lɛ: 'Ylobɛ -bholo kɛ 'ple "bhuɔ ne, 'e yi "ɛ sɛne 'na dɛku yi, 'e -gba yi ne, Sala -gwɛle 'widiyu.

¹⁰ 'Ɛ -na -kɛ bhiɛ: Ylebeka -gwɛle 'pɔyua 'nyɔkpɔ -bholo "me, -a 'to "yitɔ Izake.

^11-13 "Ɛ 'poyua -wɛ -na -nɛmlɛ gwɛleɔ-, "ne 'wa -na -nɛmlɛ "namanɔ -nyɛ "nyɛnye "bhaa no tɛtɛ "ne Lagɔ yi -lɔ Izake bhulɛle- nɛɛ: "Nɔwli "yitɔ yi "nɔwli -digbɔ "ku lɔbhɔ. Lagɔbɔgo nɛɛ: Zakɔbo 'ye 'e -wamale -lɔ, "ne 'e -gble -lɔ Ezayu. 'ɛ -ylɛle "ɛ soɔ, -se Lagɔ 'na -ye 'ɔ no -gbɔ 'ɔ "kɛ no -wɛ "kɛ 'yli 'wlole. Lagɔ -tɔ -ye 'ɔnɛɛ 'dle 'yɔbhɔ -wɛ. -Ye 'nyɔkpɔ no -wɛ 'ye 'ɔ -na "ku wolo. Lagɔ -bholo -kpee, -ɔ la -wɛ 'ye 'ɛ -ko -lɔ kɔ.

¹⁴ Se -a "kɛ bhɔ lɛ? Lagɔ "ne bhɔ "me ŋwinɛle-? 'Bhɔ gou!

¹⁵ "Naa-, sɛne Lagɔ -bhulɛle -lɔ Moyize nɛɛ: 'E yi 'ce 'nyɛzedle "pɔ, -nyɔ 'na za 'e "kɛ 'nyɛzedle "pɔ -wɛ. 'E yi 'ce "nɛne ko, -nyɔ za 'e "kɛ "nɛne ko -wɛ.

¹⁶ Zaa, Lagɔ 'na "nɛnekoɛ "ne -kɛ -ye 'nyakpa 'yɔbhɔ, "ne 'ɛ "ne -kɛ -ye 'nyakpa 'yɔbhɔ "ne -ye 'wa no -wɛ za yɛ, -mɔ, Lagɔ 'na 'nyɛzedlepɛɛ -bholo -kpee za 'ɔ no -lɔ.

¹⁷ Lagɔbɔgo "me, sɛne Lagɔ -bhulɛle -lɔ Ezipte 'na -klɔgbɔnyɔ Falaŋɔ nɛɛ: 'E "zoa- -eyi -klɔgbɔnyɔ -se -eyi "me 'e "kɛ 'neɛ 'bhɛloɛ 'tua, -se dodo ne "ku 'na 'nyakpa 'klekle "kɛ 'neɛ 'tɔ yibhlele-.

¹⁸ -A -gɛ 'yli, -ye Lagɔ 'yɔbhɔ -wɛ 'ɔnɛɛ 'nyɛzedle 'ɔ 'pɔ -lɔ, "ne 'ɔ 'gba -lɔ -ye 'ɔ "ne 'yɔbhɔ -wɛ 'na 'dle "ku.

Lagɔ 'tɔ 'nyakpa -se 'ɔ -wa -wɛ

¹⁹ -E yi -lalɛ ce -ame no nɛɛ Lagɔ no -lɔ -gbɔ -a no "ɛ li -wɛ 'wɔ, sɔɔbɛɛza 'ɔ "kɛ bhɔ 'lelee -anye "ku gbɛtɛle- 'a? 'Naa, -ɔ "kɛ bhɔ -ye Lagɔ 'yɔbhɔ -wɛ 'yliku 'titi?

²⁰ -Mɔ, -eyi -ye -e -noɔ bhɔ -se Lagɔ "bhaa 'a "kɛ 'kpɛle- 'a? -Bɛɛ' 'na -ye 'wa -no -wɛ, yi bhɔ -ɔ -no -wɛ lo 'yɔbhɔ -gbɔ sɔɔbɛɛza -e -no -ame soɔ 'a?

²¹ Nyidɛmanyɔ 'bhɛle- -se 'ɔ "kɛ 'ɔnɛɛ mɛ -ye 'ɔ 'yɔbhɔ -wɛ "ku ma. 'Ɔ 'bhɛle- 'ɔ "kɛ 'leylislɔ ma "ne 'ɔ 'bhɛle- 'ɔ "kɛ kpli ma.

²² Lagɔ 'yɔbhɔ -gbɔ 'ɔ "kɛ 'ɔnɛɛ 'kɛle -nyɛ 'ɔnɛɛ 'bhɛloɛ "bhaa 'tua. -Mɔ, "ɛ 'nyakpa -ye 'ɔ "kɛ nɛ 'kɛle yɔko 'pɔle-, "ne 'ɔ "koa nɛ gbo 'lua- -wɛ, 'ɔ -yibhlele 'wanɛɛ -slusɛ 'dle 'na "bhle 'piɛ- "me.

²³ -Mɔ -wawɛ, 'ɔ -tua -see 'ɔ -kɛ 'nyɛzedle 'ylime. 'Ɔ 'yɔbhɔ nɛ -gbɔ 'wa yibhlele- 'ɔnɛɛ 'ŋlu "yitɛ, 'ɔ -jijaloa 'wli "kle -se 'wa "kɛ "ɛ 'ŋlu -wɛ yle.

²⁴ "Ɛ 'nyakpa -wɛ, -anye 'waa -lɔ. 'Ɔ la- -bedia zufonya 'glɛme, "ne -wawɛ, -wa "ne Zufonya 'waa -wɛ 'glɛme.

²⁵ Lagɔ -bhulɛ -ɛwɛ "guɔkwɔmenyɔ Oze 'na "bɔgo "me: -Wa "ne nɛ 'neɛ -gligbɛnya 'waa -wɛ 'e yua 'neɛ -gligbɛnya la. 'Nyakpa -ye 'e "ne nɛ -wa -wɛ 'e yua -awale la

²⁶ "Ne -dee 'wa bhulɛle 'awɔ 'nyakpa -gbɔ: 'a "ne 'na -gligbɛnya 'waa, 'wa yua 'ce Lagɔ -ɔ -yɛ gbligbli 'na yua la.

²⁷ 'Ɔnɛɛ "pɛ -ce "ku, Ezayi bhulɛ Izlayɛleyua 'na "kukoweli nɛɛ: Izlayɛleyua kɛ 'se -zimale sɛgbɛɛ jinyɛ yɔko 'na -ylomɛ -ce, 'wanɛɛ 'glɛme 'na yɛ "kɛ 'ce -lɔ "po.

²⁸ "Naa-, dodo ne "ku, -ye Anyinɛnyɔ -bhulɛ -wɛ, 'ɔ 'yi 'ce no 'bhobhlo, "ne 'ɔ 'yi kɔ 'bhiɛ.

²⁹ Ezayi -bhulɛ nɛ "kle nɛɛ: "Metamale-lagɔ -tle -anye yua 'na yɛ yɔko. "Ɛ "mɔ nɛ sɔbhɔ yɛ ne, -a yi nɛ ko sɛgbɛɛ Sodɔme 'na 'du, sɛgbɛɛ Gomɔle 'na 'du.

Lagɔ "zoa- 'nyakpa 'klekle -wa -kɛ Zezu Kli 'dleku -wɛ "meŋwinɛlenya

³⁰ Zaa -se 'a "kɛ bhɔ lɛ? "Naa-, 'nyakpa -wa "ne zufonya 'waa -wɛ "zo- "meŋwinɛlenya 'dle "ku -kɛle -ylime, "ne 'wa "ne tɛle- nɛ -kɛ "meŋwinɛleɛ 'siɛ.

³¹ -Mɔ, Izlayɛle yua 'tɛle 'awɔ "meŋwinɛleɛ 'siɛ -Lɔ "me, -mɔ 'wa "ne -yle.

³² Sɔɔbɛɛza? "Naa-, "ɛ "meŋwinɛleɛ -wɛ, zufonya "ne nɛ -wo 'dlekukɛleɛ "me. 'Wa -tɔle nɛ -gbɔ 'wa 'yi nɛ 'wanɛɛ nonoli "me ylele-, "ne 'wa yi -lɔ 'tiyi -ɛ 'pɔ zɔ -wɛ 'gɔzɔ.

³³ 'Naa Lagɔbɔgo nɛɛ: 'A -gɛ 'yli, 'e 'piɛ Sinyɔ 'na 'du "me 'tiyi -ɛ 'pɔ zɔ -wɛ, cɛko -ɛ 'bhle 'siɛ -wɛ. -Mɔ, 'nyɔkpɔ 'na -ɔ "kɛ "ɛ 'tiyi -wɛ 'tlele- 'dlekukɛleɛ "me ne, zu -kɔ 'ce 'lɔbhɔ.