Wlomɛnya 8 - Nouveau Testament bété de Gagnoa

Lagɔ Zuzu yelea -anye kɔ

¹ -Dɛmeda, -wa -nyɛ Zezu Kli "bhaa 'wa -kole "ku -wɛ, 'wa -koa -da gbo lua-.

² Sɛko -wɛ, Zuzu Wlewle 'na -Lɔ, -ɛ "nyɛ zikpɛ Zezu Kli "me, -sɛ -ame 'nyinyonoli 'na -Lɔ "ne 'kwiɛ 'na 'galu 'yli.

³ Moyize 'na -Lɔ "ne nɛ 'bhɛle- "ne 'ɛ "kɛ -ɛwɛ no, sɛko -wɛ, 'nyɔkpɔ 'na kosɛ "ne "me 'tɛ-, -mɔ, Lagɔ -no. 'Ɔ 'lebhe- 'ɔ Yowli, "ne 'ɔ yi -lɔ 'nyinyonolinonya 'na ku "ku 'libhi, -se 'ɔ "kɛ 'wanɛɛ 'nyinyonoli 'na 'galu 'di. Lɔbhɔ 'ye Lagɔ -luale -lɔ 'nyinyonoli -ɛ ko 'nyɔkpɔ "me -wɛ gbo.

⁴ 'Ɔ -no "ɛ soɔ, -se -Lɔ no gbɔ -a slu -anyɛɛ zikpɛ "ku -wɛ, -a 'cɛ sɔbhɔ slu. Lɔbhɔ 'na dɛku, -anyɛɛ 'nyakpa -kosɛ "me 'na 'siɛwlosɛ 'ye -a "ne -la -su, -mɔ, Zuzu Wlewle -su -lɔ -anye.

⁵ "Naa-, -wa -gɛlele 'nyakpa -sɛku 'na 'siɛwlosɛ -wɛ, 'wanɛɛ 'dlepɔsɛ 'wa "zo -lɔ 'plome. -Mɔ, -wa -gɛlele Zuzu Wlewle -wɛ, "ɛ Zuzu Wlewle -wɛ 'na 'dlepɔsɛ 'wa "zo -lɔ 'plome, -see 'ɔ 'yɔbhɔ -wɛ.

⁶ -Sɔɔdɛku 'nyɔkpɔ -gɛlele 'ɔyigɛsɛ 'na 'dlepɔsɛ -wɛ, 'kwiɛ 'ye 'ɔ mele -lɔ lo, -mɔ, 'nyɔkpɔ "kɛ Zuzu Wlewle -gɛlele, zikpɛ 'ye 'ɔ mele -lɔ lo 'ɛ -nyɛ "kuwɛtɛ "bhaa.

⁷ 'Diɛɛ, 'nyakpa "kɛ 'wayigɛsɛ 'na 'dlepɔsɛ -gɛlele, Lagɔ 'na -gblenya 'waa -lɔ, 'wayi -wɛ, 'wa "ne "zo Lagɔ 'na -Lɔ 'plome, 'wanɛɛ -dɛku, 'ɛ "ne 'bhɛle gou.

⁸ "Ne -wa -gɛlele "ɛ -soɔ 'na 'dlepɔsɛ -wɛ, 'wa -ka Lagɔ -gɛ 'namale-.

⁹ -Mɔ, 'anye, 'a "ne 'nyakpa -sɛku 'na 'dlepɔsɛ -wɛ -gɛlele, -mɔ, Lagɔ 'na Zuzu 'ye -a -gɛlele -lɔ, sɛko -wɛ, 'ɔ -ko 'anye "me. 'Nyɔkpɔ 'na -ye Klise 'na Zuzu "ne "me -ko -wɛ, 'ɔ "ne Klise -nɔ yɔ.

¹⁰ Klise kɛ 'anye "me -ko ne, 'anyɛɛ ku yi "ku 'nyinyonoli za 'oo, Zuzu Wlewle yi 'anye zikpɛ "nyɛ. "Naa-, Lagɔ "zoa- 'anye "meŋwinɛlenya zɛ.

¹¹ "Ne "ɛ Lagɔ -ɔ -sɛ Zezu -glukonya 'glɛme 'na Zuzu kɛ 'anye "me -ko ne, "ɛ Lagɔ -ɔ -sɛ Klise -glukonya 'glɛme -wɛ yi 'ɔnɛɛ Zuzu -ɛ -ko 'anye "me -wɛ "me -ylɛle "ne 'ɔ yi 'anyɛɛ ku -ɛ "ku -wɛ zikpɛ "nyɛ.

¹² 'Ɛza, -nyɔsɔwanye 'gɛgbo -ko -kɛ -anye 'wlime, -anyɛɛ 'nyakpa -kosɛ "ku 'na gbo "ne -kɛ -anye 'wlime -ko: Zaa, -a te -kɛ -anyɛɛ 'nyakpa -sɛku 'na 'dlepɔsɛ -wɛ "me ko.

¹³ 'A "kɛ -kɛ -ɛ -soɔ 'na 'dlepɔsɛ -wɛ -gɛlele 'yiɛ ne, 'a yi "ku, "ɛ "mɔ -kɛ sɔbhɔ yɛ, "ne 'a "kɛ -kɛ Zuzu Wlewle 'na 'kwɛlekwɛleɛ "me 'anyɛɛ -kosɛ -nyɛnye -wɛ 'yi 'tale-, 'a yi 'ce yamale-.

¹⁴ "Naa-, 'nyakpa 'na -ye Lagɔ 'na Zuzu -su -wɛ, Lagɔ 'na yua 'waa -lɔ gou.

¹⁵ "Ne Zuzu 'na -ye 'a -yle -wɛ, "ne 'anye 'juyua 'na -wa -gu -namlɛ 'yiɛ "zoa-, -mɔ, 'ɔ "zoa- 'anye Lagɔ 'na yua. "Ne "ɛ Zuzu -wɛ "me, 'ye 'a 'kpale -lɔ Lagɔ "me "ne 'a no -lɔ: «-Abba! To!»

¹⁶ Zuzu Wlewle 'ɔyigɛsɛ bhulɛle -lɔ -anye nɛɛ: Lagɔ 'na yua 'ye -a -noɔ.

¹⁷ Zaa, -a "kɛ Lagɔ 'na yua 'waa ne, -a yi 'ce Lagɔ 'na -li -nyɔ za 'ɔ -plele 'ɔnɛɛ lokoyua weli kɔ -wɛ 'na 'dlidɛ -ko -me, "ɛ -li -wɛ Klise "bhaa -a 'yi 'gɔme -ylele. 'Diɛɛ, -a "kɛ 'ɔnɛɛ 'kplɛkplɛɛ 'na -didi "me ko -me ne, -a yi 'ce 'lelee 'ɔnɛɛ 'ŋlu 'na -didi "me -ko -me.

Lagɔ 'na 'ŋlu -ɛ "kɛ -yi -wɛ

¹⁸ 'Ye 'e -gɛ 'yli -wɛ, -zeka 'na 'kplɛkplɛɛ "ne -bɛɛ' yɛ, Lagɔ 'na 'ŋlumeɛ 'na 'ye -a "kɛ bhliji "me -yle -wɛ 'na dɛku.

¹⁹ "Naa- 'wlɛwlɛli 'klekle 'na ku tɛtɛle -see 'ɛ "kɛ Lagɔ 'na yua 'na 'ylime -tua -zle 'ylime 'ye.

²⁰ -Glɔ 'klekle 'na kosɛ "ne -bɛɛ' "me kɔ, "ɛ -glɔ -wɛ 'ye 'ɛ -na -kɛ "me 'bhale, -mɔ, Lagɔ -sɛ -lɔ -sɔbhɔ. -Ɛ -ko "ɛ -soɔ "ne -glɔ 'tɛle Lagɔ 'dle 'yiɛ.

²¹ "Naa-, -glɔ 'na 'galu yi 'diɔ "ne 'wa yi kɔ yele-, "ne -ɛ 'lɔbhoa -wɛ, 'wa 'yi nu "bhaa "ne 'wa yi Lagɔ 'na yua 'na 'kɔyeleɛ -nyɛ 'wanɛɛ 'ŋlumeɛ "bhaa 'na 'didi "me ko -me.

²² -A -yi -sɛ -gbɔ 'wlɛwlɛli 'klekle 'kpli "ne 'ɛ 'gbape -na -zɛ sɛgbɛɛ 'gwɛlelɔbhɔŋɔnɔ.

²³ -Mɔ, 'ɛ "ne -kɛ 'ɛyikɔ yɛ, -anye 'lelee, -a 'kpli me -kɛ 'dlezɔ, -mɔ -a -wo -se -a "kɛ -kɛ -diɛnadiɛ 'na Lagɔ 'na yua "zo, -se -a "kɛ kɔ yele- gou. "Ne, -a -yele nɛ -kɛ Zuzu Wlewle "kle, sɛgbɛɛ tɛtɛ -jɔlo -nyɔ za Lagɔ -ple weli -wɛ.

²⁴ "Naa-, -a 'pole- 'dletɛleɛ 'ɛyikɔ "me. -Bɛɛ' 'na -ye -a tɛle- 'dle -a 'cɛ 'yli -gɛɛ, 'ɛ "ne -la 'dletɛleɛ yɛ. -Bɛɛ' 'na -ye -e -gɛ 'yli -wɛ, -e 'yi bhɔ -nazɛ 'dletɛle?

²⁵ -A kɛ -ye -a "ne 'yli -gɛ -wɛ 'dle tɛle- ne, 'wo 'ye -a 'wo -lɔ 'dle 'na "bhle 'piɛ- "me.

²⁶ Zuzu Wlewle yi me 'lelee -anye 'kwɛle -ka, -anye -wa "ne "me 'tɛ-, "ne -a "ne -see 'wa bhubhɔ -wɛ -yi. Zuzu Wlewle 'ɔyigɛsɛ bhubhɔ -anyɛɛ za 'kplikpliɛ -ye 'wa -ka 'beku me -wɛ "me.

²⁷ -Mɔ, Lagɔ -gɛ 'dlezɔ 'yli, 'ɔ -yi -ye Zuzu Wlewle "kɛ lo 'yɔbhɔ. 'Diɛɛ, Zuzu Wlewle bhubhɔ -see Lagɔ 'yɔbhɔ -wɛ, -wa -noɔ 'ɔnoa 'waa -wɛ za.

²⁸ -A -yi -sɛ -gbɔ -li 'klekle -ɛ -noɔ -wɛ, -wa -wa Lagɔ -wɛ "kɛ 'tee -ko za yɛ -lɔ. "Ɛ 'wayi -wɛ 'ye 'ɔ -la -lɔ -ye 'ɔ "kɛ no -wɛ za.

²⁹ "Naa-, -ye Lagɔ -tɔ "kle "kucidɛku -wɛ, 'ɔ 'yɔbhɔ- "ɛ "kucidɛ 'ce "ku -gbɔ 'wa 'wlole 'ɔ Yowli, -se 'ɔ Yowli "kɛ -gligbɛ "yitɛ "ku 'na tɛtɛyu "zo.

³⁰ -Ye Lagɔ -tɔ "kucidɛku 'wɔ -wɛ, 'ɔ la- -moa 'lelee, "ne "ɛ -ye 'ɔ la- 'awɔ -wɛ, "ne 'ɔ yua 'lelee -lɔ "meŋwinɛlenya "zoa-, "ne "ɛ -ye 'ɔ ŋwinɛlea "me -wɛ, 'ɔ yua 'lelee -lɔ 'ɔnɛɛ 'ŋlumeɛ kɔ 'je.

'Ɔ "kɛ bhɔ -anye Lagɔ 'na -waleɛ 'glɛ -sɛ?

³¹ -Se 'wa -na lɛ bhɔ 'lelee 'a? Lagɔ kɛ -anye -nɔ yɔ ne, -ɔ "kɛ bhɔ -anye 'gble 'a?

³² 'Ɔ Yowli 'nabhɛ, Lagɔ "no -kɛ 'kplɛkplɛɛ 'na -gwe "ku -sɛ, -mɔ, 'ɔ -plo -anye 'klekle za. Zaa, sɔɔbɛɛza 'ɔ -ka bhɔ -li 'klekle -anye "fu kɔ 'je, 'ɔ Yowli "bhaa.

³³ -Ɔ "kɛ bhɔ -ye Lagɔ -tɔ -wɛ 'wɔ gbo 'lua-? 'Nyɔkpɔ "ne 'bhɛle! "Naa-, Lagɔ "zoa- "meŋwinɛlenya.

³⁴ -Ɔ "koa bhɔ gbo 'lua-? 'Nyɔkpɔ "ne 'bhɛle! "Naa-, Zezu Kli "ku- "ne 'ɔ 'wlo- 'lelee gluzɔ, 'ɔ -ko Lagɔ 'na lilikwlɛ -gbɔsɔ "ku, "ne 'ɔ bhubhɔ -anyɛɛ za.

³⁵ -Ɔ "kɛ bhɔ -anye Klise 'na -waleɛ 'glɛ -sɛ? 'Kpilɛkpilɛ bha? -Mɔ, 'dlebhɛ bha? 'Gbapegbapeɛ -ɛ 'bhale -alua "me -wɛ bha? Ŋɔŋo bha? 'Poɛ bha? -Mɔ, 'kplɛkplɛɛ "yitɛ -nyɛ 'kwiɛ "bhaa yɛ bha?

³⁶ Lagɔbɔgo nɛɛ: -Neɛ 'tɔ "me, -a -ko 'kwiɛ 'yli -godogodo, 'wa 'gbisi -anye sɛgbɛɛ wlia 'wa kɔme 'wliku -dile -dɛ "me.

³⁷ -Mɔ, -ɛ yle -anye 'klekle -wɛ, -anye zi -lɔ "ku -ɔ -wamale -anye -wɛ za.

^38-39 "Naa-, 'diɛɛ, 'e -kɛ 'dleku gbligbli, -bɛɛ' 'na -vinɛ "ne 'bhɛle- "ne 'ɛ "kɛ -anye Lagɔ 'na -waleɛ -ye 'ɔ -tua -anye 'ylime Anyinɛnyɔ Zezu Kli "me 'ylime -seselia. 'Ɛ "zo 'kwiɛ, zikpɛ, "nɔgɔzilia, zuzu 'wɔ, -zeka "ne 'zegbɛ, -ye -a -gɛ 'yli, "ne -ye -a "ne 'yli -gɛ -wɛ, "ne -wa -kɛ 'bhɛloɛ -wɛ, "ne "nɔgɔ "me 'na 'bhɛloɛ, "ne dodo ne "ku 'na 'bhɛloɛ, 'ɛ -nyɛ 'wlɛwlɛli 'klekle "bhaa, -bɛɛ' "ne 'bhɛle "ne 'ɛ "kɛ -anye -nyɛ Lagɔ "bhaa 'na -waleɛ 'ylime -seselia!