Wlomɛnya 7 - Nouveau Testament bété de Gagnoa

-A "ne -da -Lɔ 'na gbo 'wlime kɛ

¹ -Nyɔsɔwanye, -ye 'e "kɛ 'anye bhulɛle- ne, 'a -yi, "naa-, 'a -yi -Lɔ zɛ. 'A -yi sɛ nɛɛ -dee 'nyɔkpɔ -yɛ -na -wɛ, lɔbhɔ 'ye 'ɔ -kɛ -lɔ -Lɔ 'na gbo 'wlime.

² Sɔbhɔ 'ŋɔnɔ 'na -ɔ -kwɔ 'widi -wɛ, -Lɔ gbɔ -lɔ "ne 'ɔ "luwli "bhaa 'wa -kole -lɔ "ku -sɔɔdɛku 'ɔ -yɛ -na -wɛ. -Mɔ, 'widi kɛ -la "ku-, "ɛ 'ŋɔnɔ ne, -Lɔ -ɛ gbɔ nɛ "ne "ɛ 'widi "bhaa 'wa -kole nɛ "ku -wɛ 'bhɔ- -la -lɔ 'wlime.

³ 'Ɔ kɛ 'nyɔkpɔ 'na -vinɔ 'na 'ŋɔnɔ "zo- -dee 'ɔ "luwli -yɛ -na -wɛ, ŋwɛnɛɛ gbo 'ye 'ɔ zlɛ -lɔ. -Mɔ, 'ɔ "luwli -kɛ "ku-, -Lɔ 'na lu bhɔ -la 'wlime. 'Ɔ yi -la 'nyɔkpɔ 'na -vinɔ 'na 'ŋɔnɔ "zo, 'ɔ "ne -la gbozlɛŋɔnɔ yɔ.

⁴ -Nyɔsɔwanye, 'anyɛɛ -dɛku "ɛ -bhele -wɛ yɛ -lɔ. 'Ɛ kɛ -Lɔ 'na weli yɛ ne, 'a -ko sɛgbɛɛ 'nyakpa 'na -wa "ku-, "naa-, Klise -ɔ "ku- -wɛ "bhaa -bholo 'ye 'a -yle -lɔ. -Dɛmeda, 'a "ne -da -Lɔ -noa 'waa. 'Nyɔkpɔ 'na -vinɔ -noa 'ye 'a -noɔ -lɔ, "ɛ -vinɔ ne, -ɔ -glɔ 'kwiɛ "me -wɛ yɔ -lɔ. Zaa, -a no -ɛ "kɛ Lagɔ -gɛ 'namale- -wɛ.

⁵ 'Diɛɛ, -watɔ -ce, -ye -a no 'awɔ -ye -a 'yɔbhɔ -wɛ, -anye, -anyɛɛ 'dlepɔsɛ -nyɛnye -ylɛle -lɔ -Lɔ "me, "ne -a no -lɔ "nyɛnye. "Ne -ɛ -ylɛ lɔbhɔ -wɛ, 'kwiɛ yɛ -lɔ.

⁶ -Mɔ, -dɛmeda, -a -ylile -ɛ zia -anye 'nyɛze -wɛ "guɔ gou -Lɔ 'na "tenye -ce "me. Zaa, -a yi -la Lagɔ "ku lɔbhɔ kosɛ -lele "me, Zuzu Wlewle 'na 'plomezoɛ "me, "ne -a -ka -la Lagɔ -watɔ 'nasɛ -ce "ku lɔbhɔ- Moyize 'na -Lɔ 'na 'plomezoɛ "me.

-Lɔ -tua -lɔ 'nyinyonoli 'ylime

⁷ Zaa, -se -a "kɛ bhɔ lɛ? -Lɔ, 'nyinyonoli yɛ bha? 'Bhɔ gou! -Mɔ, -Lɔ -gbɔ, "ne 'e yi -lɔ 'nyinyonoli yibhlele-. -Lɔ "mɔ nɛ kɛ no -gbɔ 'e 'luyu 'na -bɛɛ' te -eyi 'ylime 'kamale- ne, -e -ka nɛ kɛ 'sɛ yibhlele- -gbɔ -eluyu 'na -bɛɛ' 'na 'ylime 'kamaleɛ 'nyinyonoli yɛ.

⁸ -Mɔ, 'nyinyonoli, gbagbɛ 'ɛ -ylɛle -lɔ "me, "ne 'ɛ yi -lɔ -ame -alua 'na -li 'klekle 'na to 'dlezɔ "zo. -Lɔ "mɔ nɛ -le ne, 'nyinyonoli "ne nɛ -le.

⁹ -Watɔ -ce, -ye -Lɔ "ne 'awɔ -le -wɛ, 'e -yɛ 'awɔ 'gbligbli. -Mɔ, -ye gbagbɛ -yi -wɛ, 'nyinyonoli -yɛ -da -lɔ,

¹⁰ "ne -ame, 'e "ku-. -Ɛwɛza, gbagbɛ -ɛ "kɛ nɛ -ame zikpɛ "me kɔme -wɛ, -kɔme -ame 'kwiɛ "me.

¹¹ -Naa, 'nyinyonoli, gbagbɛ "me 'ye 'ɛ -ylɛle -lɔ, "ne 'ɛ yi -lɔ -ame ylo no-, "ne 'ɛ yi -lɔ -ame "kua- "ɛ gbagbɛ -wɛ "me.

¹² -Mɔ, -Lɔ -ko 'wlewle, "ne gbagbɛ -ko 'wlewle, "ne 'ɛ ŋwinɛle- "me, "ne 'ɛ 'nɛne.

¹³ Zaa, -bɛɛ' 'na -ɛ 'nɛne -wɛ yi bhɔ 'nyɔkpɔ 'lɔbhɔ, "ne 'ɔ yi bhɔ "ku? 'Bhɔ gou! -Mɔ, -bɛɛ' 'na -ɛ 'nɛne -wɛ 'ye 'nyinyonoli -ylɛle -lɔ "me, "ne 'ɛ yi -lɔ -ame 'lɔbhɔ. "Ɛ sɛbhele -wɛ 'ye gbagbɛ -gbɔ -lɔ "ne -a yi -lɔ 'sɛ yibhlele- -gbɔ 'nyinyonoli -bɛɛ' 'na "nyɛnye yɛ -lɔ. "Ne 'ɛ yi -lɔ -ame 'ɛnɛɛ 'kpokpo 'klekle 'ylime tua-.

'Nyinyonoli 'miɛle- 'nyɔkpɔ 'wli "ku

¹⁴ 'Diɛɛ, -a -yi sɛ -gbɔ Lagɔ "me 'ye -Lɔ 'bhale -lɔ, -mɔ, -ame, 'nyɔkpɔ 'na -ɔ "ne "me 'tɛ- 'ye 'e -noɔ -lɔ, "ne 'e -noɔ 'lelee -lɔ 'nyinyonoli 'na 'juyu yɔ.

¹⁵ -Diɛnadiɛ, 'e "ne -ye 'e no -wɛ "me -nyini. "Ne 'e "ne no -ye 'e 'yɔbhɔ -wɛ, "ne -ɛ "ne -ame -gɛ 'nɛne gou -wɛ 'ye 'e no -lɔ.

¹⁶ 'E kɛ -ye 'e "ne 'yɔbhɔ -wɛ no ne, 'e 'ŋunule -Lɔ, "ne 'e yibhlele- sɛ -gbɔ -Lɔ 'nɛne.

¹⁷ Zaa, 'mɔɔ -na 'se sɔbhɔ "zo, -mɔ, 'nyinyonoli -ɛ 'glile- -ame "me -wɛ yɛ -lɔ.

¹⁸ 'Diɛɛ, 'e -yi sɛ, "nɛne "ne -ame "me -ko, sɛne 'ye 'e no -lɔ -gbɔ 'e "kɛ lɛ nɛɛ -ame, 'mɔɔ "ne "me 'tɛ- ne. 'Neɛ -dɛku, -li 'na -li 'na 'yɛbhɛyɛbhɛɛ, 'e 'bhɛle-, -mɔ, 'e "kɛ -li 'na -li no -wɛ, 'e "ne 'bhɛle-.

¹⁹ "Naa-, -li 'na -li -ye 'e 'yɔbhɔ -gbɔ 'e "kɛ no -wɛ, 'e "ne 'no, "ne "nyɛnye 'na -ye 'e "ne 'yɔbhɔ -wɛ, 'ɛyi 'ye 'e no -lɔ.

²⁰ 'E kɛ -ye 'e "ne 'yɔbhɔ -wɛ no ne, 'mɔɔ -nɛ no, -mɔ, 'nyinyonoli -ɛ 'glile- -ame "me -wɛ yɛ -lɔ.

²¹ Soɔ 'ye 'e 'ye -lɔ "ɛ -Lɔ ne 'ylime. 'E kɛ no -gbɔ 'e "kɛ -li 'na -li no ne, "nyɛnye yi -lɔ -ame 'yliku.

²² 'Neɛ 'dlezɔ, Lagɔ 'na -Lɔ -le -ame 'ŋwana "ku.

²³ -Mɔ, 'e -ylele 'neɛ ku "me -Lɔ 'na -vinɛ, 'ɛ -nyɛ -Lɔ -ye 'neɛ "nɛnoɛ "bhaa 'wa -kole "ku -wɛ "bhaa gwe 'wa gwe -lɔ. "Ɛ -Lɔ ne "zoa -ame 'nyinyonoli -ɛ -ko -ame "me -wɛ 'na -jiɛnyɔ.

²⁴ 'Mɔɔ ne lɛ, 'e -le 'nyɛze "ku! -Ɔ "kɛ bhɔ -ame "ɛ ku ne -ɛ kɔme -ame 'kwiɛ lo 'na galu 'yli -sɛ?

²⁵ -A bhɛle Lagɔ, Anyinɛnyɔ Zezu Kli "me! Sɔbhɔ "ku, 'neɛ "nɛnoɛ "bhaa, 'e "zo- Lagɔ 'na -Lɔ 'na 'juyu. -Mɔ, 'e "ne "me 'tɛ-. Sɔbhɔ za, -ame, 'neɛ ku "me, 'e "zo- 'juyu, -Lɔ 'na 'nyinyonoli za.