Wlomɛnya 6 - Nouveau Testament bété de Gagnoa

-Ɔ ko Klise "me -wɛ "ne -la 'nyinyonoli 'na 'juyu yɔ

¹ -Dɛmeda -se -a kɛ bhɔ lɛ? "Ɛ 'nyinyonoli 'ye -a "kɛ bhɔ no 'yiɛ -se Lagɔ 'na -jɔlo "kɛ -anye "ku 'kwlile-?

² 'Bhɔ gou! 'Kwiɛ "me 'ye -a -ylɛle -lɔ, 'ɛ -gbɔ "ne -anyɛɛ 'nyinyonoli "bhaa -a yi -lɔ yɔko -seliɔ. -Se -a kɛ -na bhɔ -zɛ 'nyinyonoli "me ko 'yiɛ?

³ 'A -yi sɛ: -Anyɛɛ batɛme -kɛ -anye Zezu Kli "bhaa -bholo "zoa- ne, 'ɔnɛɛ 'kwiɛ 'ye 'ɔ "zo- -me -lɔ -anye 'klekle "me.

⁴ Zaa, batɛme "me, 'ɔ -nyɛ -anye "bhaa 'kwiɛ "me -ye -a -plɛ -lɔ. -Mɔ, To 'na 'bhɛloɛ -ɛ me 'ŋlu -golia Klise 'kwiɛ "me, -se -anye 'lelee, -a "kɛ zikpɛ -lele "ku ko.

⁵ "Naa-, 'ɔ -nyɛ -anye "bhaa -a kɛ 'gɔme 'kwiɛ "me -plɛle ne, -a yi 'lelee -gluzɔ 'wlo me 'ɔnɛɛ sɛ.

⁶ -A 'no 'ɛyi ne "me 'tee: -See -a -ko nɛ -watɔ -ce, 'ɛyi -wɛ -koleɔ klowa "klo Klise "bhaa, zaa, 'nyinyonoli -ɛ -ko nɛ -anye 'nabhɛ "me -wɛ -bhiɛ "ku. Zaa, -a "ne -kɛ -la 'nyinyonoli 'na 'juyua 'waa.

⁷ 'Diɛɛ, -ɔ "ku- -wɛ 'na 'nyinyonoli 'na 'galu 'diɔ-.

⁸ -Mɔ, Klise "bhaa -a -kɛ "ku- ne, -a -kɛ 'dleku -gbɔ Klise "bhaa -a yi 'lelee -yamale.

⁹ -A -yi sɛ -gbɔ: -Sɔɔdɛku Klise 'bha- nɛ 'kwiɛ "me -ce, 'ɔ -ka -la "ku, 'kwiɛ "no -la 'bhɛle-.

¹⁰ Klise "ku-, "ne 'ɔnɛɛ 'kwiɛ -wɛ -seseliɔ 'nyinyonoli "bhaa yɔko gou, "ku -bholo 'ye 'ɔ "kule- -lɔ. -Dɛmeda, 'ɔ -yɛ 'gbligbli. 'Ɔnɛɛ zikpɛ, Lagɔ -nɛ yɛ -lɔ gou.

¹¹ "Ɛ sɛbhele -wɛ, 'anye 'lelee sɛne 'ye -a "kɛ -la -lɔ 'dle "pɔ: 'A "ku- "ne 'nyinyonoli yi -lɔ 'anye "guɔ 'ylile gou, -mɔ, Zezu Kli "bhaa 'a "kɛ -bholo "zo- ne, 'anyɛɛ zikpɛ Lagɔ -nɛ -yɛ -lɔ.

¹² Zaa, 'nyinyonoli "ne -la 'anyɛɛ ku -ɛ "kɛ "ku -wɛ 'bhɛle-, "ne 'a -kɛ -la -li -nyɛnye -ye 'anyɛɛ ku 'yɔbhɔ nɛ -wɛ 'na nonoɛ 'plome "zo.

¹³ 'Anyɛɛ ku te -kɛ -la 'nyinyonoli "ku lɔbhɔ- sɛgbɛɛ "nyɛnye 'na nonoɛ. -Wa 'bha- 'kwiɛ "me "ne 'wa -yɛ -wɛ 'nasɛ, 'a lɔbhɔ- Lagɔ "ku. 'A 'libhi 'anyɛɛ ku "ku se 'a "kɛ -ɛ ŋwinɛle- "me -wɛ no.

¹⁴ -Lɔ 'na zikpɛ 'ye 'a "ne -da "ku 'nɔŋo, -mɔ, Lagɔ 'na -wale zikpɛ 'ye 'a -ko -la -lɔ "ku. Zaa, 'Nyinyonoli "ne -da 'anye 'bhɛle.

Lagɔ 'na "kulɔbhɔnya 'ye -a -noɔ -lɔ

¹⁵ -Mɔ, -se -a "kɛ -da lɛ 'a? -A "ne -la -Lɔ 'na zikpɛ "ku 'nɔŋo, "naa-, Lagɔ 'na -jɔlo -zikpɛ "ku -ye -a -ko -da -lɔ, 'ɛza, -a "kɛ bhɔ 'nyinyonoli no 'yiɛ? 'Bhɔ gou!

¹⁶ 'A "ne bhɔ -ɛne -yi? 'A kɛ 'nyɔkpɔ "ku lɔbhɔ- 'juyu 'nasɛ ne, "ɛ 'nyɔkpɔ -ye 'a lɔbhɔ "ku -wɛ 'na 'juyua 'ye 'a -noɔ -lɔ. Zaa, 'a "kɛ 'nyinyonoli 'na 'juyua 'waa, 'nyinyonoli "kɛ -lɔ 'anye 'kwiɛ "me kɔme-, "ne 'a "kɛ Lagɔ 'na "kulɔbhɔnya 'waa ne, Lagɔ yi 'anye "meŋwinɛlenya "zoa-, sɛko -wɛ, 'a -zo 'plome zɛ.

¹⁷ -A bhɛle Lagɔ! Bhlɛme, 'nyinyonoli 'na 'juyua 'ye -a -noɔ 'awɔ -lɔ. -Dɛmeda, 'anyɛɛ 'dle 'klekle zɔ, 'a "zo -ye 'wa -sloa 'nyakpa 'klekle "ne 'a -yle -wɛ 'plome.

¹⁸ 'Anyɛɛ 'nyinyonoli 'na 'galu 'diɔ-. -Ɛ ŋwinɛle- "me -wɛ 'na 'juyua -ye 'a "zo- -da -lɔ.

¹⁹ 'Nyakpa -sɛku, 'ye 'e 'pɛle -lɔ weli weli "ku, "naa-, 'a "ne 'no "me zɛ. Bhlɛme, -se 'juyu lɔbhɔ 'awɔ 'ɔnɛɛ "bhenyɔ "ku -wɛ, -sɔbhɔ 'ye 'anyɛɛ ku lɔbhɔ- -lɔ zikpɛ -nyɛnye "ku "ne 'a -su 'awɔ -lɔ 'ayi bidibidi. 'Ɛnɛɛ 'wlisɛledɛ, Lagɔ 'na 'plomesɛɛ yɛ -lɔ. "Ɛ sɛbhele -wɛ, -zeka, 'juyua 'nasɛ, 'anyɛɛ ku lɔbhɔ "meŋwinɛleɛ "ku! 'Ɛɛ "kɛ -lɔ -gbɔ "ne 'a "kɛ -lɔ Lagɔ -gɛ 'namale-.

²⁰ -Sɔɔdɛku, 'a -noɔ nɛ 'nyinyonoli 'na 'juyua 'waa -wɛ, 'anyɛɛ gbo "ne nɛ "meŋwinɛleɛ 'na nonoli "klo -ko!

²¹ Lɔbhɔ 'na dɛku, -ye 'a -ylele bhɔ "me -tiaa? -Zeka, zu 'lɔbhɔ 'anye, "naa-, 'ɛnɛɛ 'wlisɛledɛ, 'kwiɛ yɛ -lɔ.

²² -Mɔ, -dɛmeda, 'anyɛɛ 'nyinyonoli 'na 'galu 'diɔ- "ne 'a yi -lɔ Lagɔ 'na "kulɔbhɔnya "zo-. 'Ɛza, 'a no -lɔ -li -ɛ labha Lagɔ 'ŋwɛnɛ -wɛ, 'ɛnɛɛ 'wlisɛledɛ -noɔ -lɔ zikpɛ 'na -ɛ -ka lɛ "kubhiɛ yɛ.

²³ "Naa-, 'nyinyonoli 'na 'peɛleɛ 'kwiɛ yɛ -lɔ. -Mɔ, Lagɔ 'na -ye 'ɔ "nyɛ "fu -wɛ -noɔ -lɔ zikpɛ 'na -ɛ ka "kubhiɛ -ye -a -ylele Anyinɛnyɔ Zezu Kli "me yɛ.