Wlomɛnya 5 - Nouveau Testament bété de Gagnoa

Zezu "me 'ye Lagɔ "bhaa -a -seliɔ -lɔ gbo

¹ 'Diɛɛ, -a "zo- "meŋwinɛlenya 'dlekukɛleɛ "me, "ne -dɛmenadɛ ne "ku, -a yi -da -lɔ "kuwɛtɛ yle- Lagɔ yɔko Anyinɛnyɔ Zezu Kli "me.

² Zezu "me, -a -kɛ 'dleku, -a yi Lagɔ 'na -jɔlo yle. "Ɛ -jɔlo -wɛ "me 'ye -a -ko -lɔ. -Ɛ -le -anye 'ŋwana "ku -noɔ -lɔ nɛɛ -a -kɛ 'dleku -gbɔ -a yi Lagɔ 'na 'ŋlu yle -me.

³ -Ɛ -le 'lelee -anye 'ŋwana "ku -noɔ -lɔ -anyɛɛ gbapegbapeɛ yɛ. Sɛko -wɛ, -a -yi 'lelee 'sɛ nɛɛ gbapegbapeɛ 'nɛme -lɔ 'dle 'na "bhle 'piɛ,

⁴ "ne 'dle 'na 'bhle 'piɛ 'nɛme -lɔ 'dlekutamaleɛ, "ne 'dlekutamaleɛ 'nɛme -lɔ 'dletɛleɛ "ne

⁵ 'dletɛleɛ 'ɛ "ne no ylo, "naa-, Lagɔ "zo- -anye 'ɔnɛɛ -waleɛ 'dlezɔ Zuzu Wlewle -ye 'ɔ 'je- -anye kɔ -wɛ "me.

⁶ 'Diɛɛ, -sɔɔdɛku, -a "ne nɛ -ayi 'bhɛle- -wɛ, Klise "ku- 'nyakpa -nyɛnyea za, -dee Lagɔ 'dile- -wɛ yɛ -lɔ.

⁷ "Kle, 'nyɔkpɔ 'na -ɔ ŋwinɛle- "me -wɛ za, -e "kɛ "kuku -gbo "ku 'ŋunu -wɛ 'ɛ 'tɛ- "me. 'Nyɔkpɔ 'na -ɔ no -li 'na -li -wɛ za, -e 'yi -lalɛce "kuku -gbo "ku 'ŋunu.

⁸ -Mɔ, -see Lagɔ -tua -anye 'ɔnɛɛ -waleɛ 'ylime ne lɛ: Klise "ku- -anyɛɛ za, 'ɛ -ko "ɛ -soɔ, "ne -a -noɔ -na nɛ -mlɛ 'nyinyonolinonya 'waa.

⁹ -Dɛmenadɛ ne "ku, 'ɔnɛɛ klowa "klo 'na 'kwiɛ -wɛ "zoa- -lɔ -anye "meŋwinɛlenya. Zaa, -a -kɛ 'dleku -gbɔ Klise yi -anye 'fuɔ, "ne Lagɔ yi 'lelee -anyɛɛ 'kɛle 'yi 'tale-.

¹⁰ 'Diɛɛ, -sɔɔdɛku, -a -noɔ nɛ Lagɔ 'na -gblenya 'waa -wɛ, 'ɔ -selia -anye 'gbo 'ɔyi "bhaa 'ɔ Yowli 'na 'kwiɛ "me, 'ɔ -selia kɛ 'se -la -anye 'gbo 'ɔyi "bhaa za, -a -kɛ 'dleku -gbɔ Lagɔ yi 'lelee -anye 'fuɔ 'ɔ Yowli 'na zikpɛ "me.

¹¹ 'Ɛ "ne -kɛ "bhle -bhiɛ! Lagɔ -le -anye 'ŋwana "ku, Anyinɛnyɔ Zezu Kli 'na za, "naa-, 'ɔyi, 'ɔɔ -gbɔ "ne Lagɔ "bhaa -a -seliɔ -lɔ 'gbo.

Ada "ne Zezu Kli

¹² 'Nyinyonoli -plɛ -anyɛɛ -glɔ "me 'nyɔkpɔ -bholo za, Ada, "ne "ɛ 'nyinyonoli yi -lɔ 'kwiɛ -nɛme. "Ne "ɛ 'kwiɛ -wɛ yi -lɔ 'nyakpa 'klekle kɔ 'sa, sɛko -wɛ, 'nyakpa 'klekle -no 'nyinyonoli zɛ.

¹³ -Sɔɔdɛku, Lagɔ -na nɛ -mlɛ Moyize -Lɔ kɔ 'je -wɛ, 'nyinyonoli -ko nɛ -glɔ zɔ, -mɔ, -Lɔ "mɔ -le ne, -anyɛɛ gbo "ne 'nyinyonoli "klo -ko.

¹⁴ -Se 'ɛ 'bhale Ada 'na "tɛnye -ce "me -kaa "ne 'ɛ -ylɛ Moyize "ku, 'kwiɛ 'na 'bhɛloɛ "tamale- "me kpɛnyee. 'Ɛ 'lɔbhɔ- -me 'lelee 'nyakpa -wa "ne Ada 'na 'nyinyonoli -ye 'ɔ -no -wɛ -no -me. Ada, 'wa 'pɛle- nɛ -lɔ -ɔ "kɛ nɛ yi -wɛ "ku.

¹⁵ -Mɔ, 'ɛ "ne -kɛ -bhele yɛ, Lagɔ 'na -ye 'ɔ "nyɛ "fu, "ne Ada 'na 'nyinyonoli. Ada 'na 'nyinyonoli 'na 'ylime 'nyakpa -kwleyia "ku-. -Mɔ, Lagɔ 'na -ye 'ɔ "nyɛ "fu -wɛ 'kpɔ "ne 'ɛ -zi "ku. "Ɛ -jɔlo -wɛ, 'nyɔkpɔ -bholo "me 'ye 'ɛ -ylɛle -lɔ, 'ɔɔ -noɔ -lɔ Zezu Kli yɔ. "Ne sɔbhɔ za, 'ɔ -ŋwenia -me -li "namanɔ 'nyakpa -kwleyia "ku.

¹⁶ Lagɔ 'na -jɔlo 'na 'wlisɛledɛ -nyɛ 'nyɔkpɔ -bholo 'na 'nyinyonoli 'na 'wlisɛdɛ "bhaa "ne -bhele yɛ. "Naa-, 'nyɔkpɔ -bholo, Ada 'na 'nyinyonoli 'na gbo 'ple- lɛ "bhuɔ ne, Lagɔ 'na 'gbobhleleɛ 'na 'wlisɛledɛ -noɔ -lɔ -gbɔ 'nyinyonoli 'na gbo lu 'nyakpa. "Ɛ "mɔ -kɛ sɔbhɔ yɛ ne, Lagɔ 'na -jɔlo -ye 'ɔ "nyɛ "fu -wɛ -noɔ -lɔ -gbɔ 'nyinyonoli -kwleyi 'na -ye 'wa "kɛ -no, 'wa "zoa- "meŋwinɛlenya

¹⁷ 'Diɛɛ, 'nyɔkpɔ -bholo za, "ne 'nyɔkpɔ -bholo 'na "nyɛnye -no -za 'kwiɛ 'lɔbhɔ- -lɔ -glɔ 'klekle, -mɔ, Zezu Kli 'ɔyikɔ "me 'nyakpa -yle -jɔlo -kwleyi Lagɔ "me. 'Ɔ -joa "fu -li 'na -li kɔ, "ne 'ɔ "zoa- "meŋwinɛlenya Klise "me, 'wa yi 'ce zikpɛ 'na "namanɔ -yle.

¹⁸ Sɔbhɔ za, 'nyɔkpɔ -bholo 'na 'nyinyonoli 'na 'ylime, gbo -lu -lɔ 'nyakpa 'klekle. "Ɛ sɛbhele -wɛ, 'nyɔkpɔ -bholo 'na nonoli -ɛ ŋwinɛle- "me -wɛ 'na 'ylime 'nyakpa 'klekle "zo- -lɔ "meŋwinɛlenya, 'ɛwɛ "me, 'wa -ylele -lɔ zikpɛ.

¹⁹ -Watɔ -ce 'na dɛku, 'nyɔkpɔ -bholo -sɛ -lɔ Lagɔ 'plome, "ne 'nyakpa -kwleyia yi 'awɔ -lɔ 'nyinyonolinonya "zo. "Ɛ sɛbhele -wɛ, 'nyɔkpɔ -bholo 'na 'plome -zo -za, 'nyakpa -kwleyia "zo -lɔ "meŋwinɛlenya.

²⁰ -Lɔ -yi, "ne "nyɛnye yi -lɔ -zimale, -mɔ, -dee 'nyinyonoli -zimale -wɛ, Lagɔ 'na -jɔlo -ye 'ɔ "nyɛ -wɛ -zimale "ne 'ɛ -zi "ku.

²¹ Bhlɛme, 'nyinyonoli -kɛ 'awɔ 'bhɛloɛ -se 'ɛ "kɛ 'kwiɛ "nyɛ. "Ɛ sɛbhele -wɛ, -dɛme 'na dɛku, Lagɔ 'na "nɛnekoɛ -kɛ 'bhɛloɛ -se 'ɛ "kɛ 'nyakpa 'klekle "meŋwinɛlenya "zoa-, -se -a kɛ zikpɛ 'na -ɛ -ka lɛ "kubhiɛ yle Anyinɛnyɔ Zezu Kli "me.