Wlomɛnya 4 - Nouveau Testament bété de Gagnoa

'Dlekukɛlenyɔ Ablame

¹ -Dɛmeda, -se -a "kɛ bhɔ -a 'to 'wa 'to Ablame za lɛ 'a? -Ye 'ɔ -yle bhɔ 'ɔyigɛsɛ za?

² 'Wa "kɛ Ablame -yibhlele "meŋwinɛlenyɔ "ku ne, 'ɔnɛɛ -ye 'ɔ -no -wɛ za 'ɔ yi 'ɔyi "ku zia, -mɔ, 'ɛ "ne Lagɔ 'yliku yɛ.

³ "Naa-, Lagɔbɔgo "me, -ye 'wa -bhulɛ bhɔ? Ablame kɛle- Lagɔ 'dleku, 'ɔnɛɛ 'dlekukɛle -ylime, 'ɛza Lagɔ -yibhlelo -lɔ "meŋwinɛlenyɔ "ku.

⁴ 'Nyɔkpɔ kɛ libhɔ -no, 'peɛle 'wa 'peɛlo- -lɔ. "Ɛ 'peɛleɛ -wɛ "ne "fu yɛ, -mɔ, 'ɔnɛɛ 'gɛgbo -ye 'wa -kɛ -wɛ yɛ -lɔ.

⁵ 'Nyɔkpɔ "mɔ 'se libhɔ no -ce, "ne 'ɔ kɛ 'dleku -kɛ -gbɔ Lagɔ 'di- 'nyinyonolinonyɔ 'na 'galu ne, "ɛ 'nyɔkpɔ -wɛ 'na 'dlekukɛleɛ 'gbɔ -lɔ "ne Lagɔ zoɔ -lɔ "meŋwinɛlenyɔ.

⁶ "Ne Davide 'bhle 'nyɔkpɔ 'ɔ "ne -bɛɛ' -no "ne Lagɔ -yibhlelo "meŋwinɛlenyɔ "ku -wɛ 'na -jɔlo 'na lo.

⁷ 'Nyakpa 'na -nyɔ 'wɔ 'na "nyɛnye Lagɔ 'tale- 'yi, "ne 'ɔ 'tale- 'wanɛɛ 'nyinyonoli 'yi -wɛ, 'ŋwɛnɛ 'lɔbhoa.

⁸ 'Nyɔkpɔ 'na -ye 'ŋwɛnɛ 'lɔbhɔ -wɛ -lɔ. Anyinɛnyɔ "ne wolo 'ɔnɛɛ "nyɛnye "ku.

⁹ "Ɛ -jɔlo ne, zufonya 'wayikɔ -nɛ yɛ bha? -Mɔ, 'nyakpa 'na -wa "ne zufonya 'waa -wɛ -nɛ yɛ -me bha? Sɛne 'ye -a lɛ -lɔ nɛɛ: «Ablame -kɛle Lagɔ 'dleku, zaa, Lagɔ -yibhlelo -lɔ "meŋwinɛlenyɔ "ku, 'ɔnɛɛ -se 'ɔ -kɛ 'dleku -wɛ za.»

¹⁰ -Mɔ, -sɔɔdɛku, Lagɔ -yibhlelo bhɔ "meŋwinɛlenyɔ "ku 'a? -Ye 'wa 'du- "ku "bhuɔ -wɛ bha? -Mɔ, -ye 'wa -na -mlɔ nɛ "ku 'di -wɛ bha? 'Ɛ "ne -kɛ -ye 'wa 'du- "ku "bhuɔ -wɛ yɛ, -mɔ -ye 'wa -na -mlɔ nɛ "ku 'di -wɛ yɛ -lɔ!

¹¹ -Ye 'wa -na nɛ Ablame "ku 'di -wɛ, Lagɔ -yibhlelo nɛ "meŋwinɛlenyɔ "ku. Sɛko -wɛ, 'ɔ -kɛ 'awɔ Lagɔ 'dleku. 'Wa 'du- lɛ "ku "bhuɔ ne, 'ɛ "ku di -be -wɛ tua -lɔ -gbɔ Lagɔ -yibhlelo "meŋwinɛlenyɔ "ku 'ɔnɛɛ 'dlekukɛle -ylime, 'ɛɛ -gbɔ -lɔ "ne Ablame yi -lɔ 'dlekukɛlenya 'klekle -wa "ne "ku 'diɔ- -wɛ 'wa 'to "zo. -Se -wa "ne "ku 'diɔ- 'klekle "ne -wa -kɛ 'dleku -wɛ, Lagɔ yibhleloa -me "meŋwinɛlenya "ku.

¹² Ablame "zo- -me 'lelee -wa 'diɔ- "ku -wɛ 'wa 'to. -Wa 'diɔ- "ku "ne 'wa -gɛlele -a To Ablame 'na -gbudu -wɛ -ye 'e ga -lɔ -tiaa. "Naa-, 'ɔyi 'wa -na mlɔ nɛ "ku 'di "ne 'ɔ yi -lɔ Lagɔ 'dleku -kɛle.

Lagɔ 'na weli -ye 'ɔ -ple -wɛ -wa -kɛ Lagɔ 'dleku 'klekle -wɛ nɛ yɛ -lɔ

¹³ Lagɔ -plele Ablame -nyɛ 'ɔnɛɛ ŋeyi "bhaa weli kɔ -gbɔ 'ɔ yua ce dodo "nyɛ "ne 'ɛ yi 'wanɛɛ "zo. -Mɔ, "ɛ weli -ye 'ɔ -ple ne, 'ɛ "ne -kɛ -gbɔ Ablame "zo- -Lɔ 'plome za yɛ. 'Ɔ -ple weli, -sɛko -wɛ, 'ɔ -yibhlele Ablame "meŋwinɛlenyɔ "ku, 'ɔnɛɛ 'dlekukɛle 'na 'ylime.

¹⁴ Lagɔ 'na -li 'na -li -nyɛ 'ɔnɛɛ weli -ye 'ɔ -ple -wɛ kɛ nɛ -wa "zo -Lɔ 'plome -wɛ 'wayikɔ -nɛ yɛ ne, 'dlekukɛleɛ "ne nɛ -bɛɛ' -ko, "ne Lagɔ 'na weli -ye 'ɔ -ple -wɛ -ka nɛ -bɛɛ' "me ko.

¹⁵ "Naa-, -Lɔ -nɛme -lɔ Lagɔ 'na 'kɛle. -Mɔ -Lɔ "mɔ -le ne, 'wa "ne 'bhɛle- "ne 'wa "kɛ 'cɛ 'plome -sɛ.

¹⁶ 'Ɛnɛɛ 'ylime, 'dlekukɛleɛ "me 'wa ylele -lɔ -li -nyɔ 'na weli Lagɔ -ple -wɛ, "ne -ye 'wa 'nyɛ 'diɛɛ "fu -wɛ yɛ -lɔ. Zaa, "ɛ weli -ye Lagɔ -ple -wɛ, Ablame 'na ŋeyi 'klekle nɛ yɛ -lɔ. 'Ɛ "ne -kɛ -wa "zo -Lɔ 'plome 'wayikɔ -wɛ nɛ -yɛ, -mɔ, 'ɛ -noɔ -me -kɛ -wa -kɛ 'dleku sɛgbɛɛ Ablame, -anye 'klekle 'na 'to nɛ yɛ.

¹⁷ 'Diɛɛ, Lagɔbɔgo nɛɛ: 'E "zoa- -eyi -glɔ -kwleyi 'wa 'to. Ablame, -a 'to yɔ -lɔ Lagɔ 'yliku, 'ɔyi -ye 'ɔ -kɛle 'dleku -wɛ. Lagɔ 'nyɛ -lɔ -wa "ku -wɛ zikpɛ, "ne 'ɔ la -lɔ -ɛ "ne -mlɛ zikpɛ "ku -ko -wɛ "ne 'ɛ yi -lɔ lele-.

¹⁸ 'Dletɛleɛ "ne nɛ -le, "ne 'ɛ -ko sɔbhɔ "ne Ablame "tɛle- nɛ 'dle. 'Ɔ -kɛle Lagɔ 'dleku, 'ɛnɛɛ 'ylime, 'ɔ "zo- -glɔ -kwleyi 'wa 'to. Lagɔbɔgo nɛɛ: 'Neɛ ŋeyi yi 'ce "me 'tlomale- kpɛnyee.

¹⁹ 'Ɔnɛɛ 'dlekukɛleɛ 'tɛ- 'ce "me 'yiɛ, "ne Ablame me 'awɔ 'ylobɛ -glo 'umgbu yle -ka. "Ne 'ɔ -yi 'awɔ 'sɛ -gbɔ 'ɔnɛɛ ku yɔle- "ne 'ɔnɛɛ 'ylobɛ 'ple- nɛ lɔbhɔ, "ne Sala -ka nɛ -la yu gwɛle-.

²⁰ Lagɔ 'na weli -ye 'ɔ -ple -wɛ 'yliku, 'ɔ "ne -la 'dlekukɛleɛ -bɔ, "ne 'ɔnɛɛ 'dlekukɛleɛ "tamalo 'kwɛme, "ne 'ɔ -kwa Lagɔ 'ŋlu.

²¹ 'Ɔ -kɛ nɛ -bɛɛ' -bholo 'dleku: Weli -ye Lagɔ -ple -wɛ, 'ɔ -kɛ 'bhɛloɛ -se 'ɔ 'cɛ no.

²² 'Ɛza, Lagɔ -yibhlele -lɔ Ablame "meŋwinɛlenyɔ "ku.

²³ -Sɔɔdɛku Lagɔbɔgo bhulɛ nɛɛ: Lagɔ -yibhlelo "meŋwinɛlenyɔ "ku, 'ɛ bhulɛweli -wɛ "ne -kɛ Ablame nɛ 'ɔyikɔ yɛ.

²⁴ 'Ɛ -noɔ -me -kɛ -anye -nɛ yɛ, "ne Lagɔ yi -kɛ -anyɛɛ 'dlekukɛleɛ "ku wolo. "Naa-, -a -kɔ 'dleku, 'ɔyi, -ɔ -sɛ Anyinɛnyɔ Zezu -glukonya 'glɛme -wɛ.

²⁵ 'Wa -ple 'awɔ Zezu -anyɛɛ 'nyinyonoli 'na gbo "me, -mɔ, Lagɔ -sɔ -glukonya 'glɛme -se 'ɔ "kɛ -anye "meŋwinɛlenya "zoa-.