Wlomɛnya 3 - Nouveau Testament bété de Gagnoa

"Meŋwinɛlenyɔ "ne -le

¹ 'Ɛ kɛ soɔ -ko ne, 'nɛne 'na -ye 'wa ylele bhɔ zufonyɔ 'na "zozoɛ "me 'a? "Kudiɛ -ye 'ɛ ko bhɔ "me 'a?

² 'Diɛɛ, sɛ 'klekle "me, zufonyɔ 'na "zozoɛ 'nɛne. "Naa-, "kucidɛku, Zufonya 'ye Lagɔ -kulɛle -lɔ 'ɔnɛɛ weli "ku.

³ Zaa, -see -a kɛ bhɔ lɛ, zufonya 'na -bedia "mɔ Lagɔ 'na weli 'plome "zo ne, 'ɛyi -wɛ "kɛ bhɔ gbɔ "ne Lagɔ "kɛ bhɔ 'ɔnɛɛ weli "ku 'bha- 'a?

⁴ 'Bhɔ gou! -Ye -a "kɛ yibhlele- ne lɛ: Lagɔ bhulɛ gbaa, "ne 'nyakpa 'klekle yonya 'waa -lɔ. "Naa-, Lagɔbɔgo nɛɛ: -Neɛ' bhulɛweli "me 'wa "kɛ -lɔ 'sɛ yibhlele- -gbɔ -e ŋwinɛle- "me. 'Wa kɛ -eyi 'gbobhlele ne, -eyi 'ye 'ɛ "kɛ -lɔ kɔ 'namale-.

⁵ -Mɔ, "nyɛnye -ye -a no -wɛ kɛ Lagɔ 'na "meŋwinɛleɛ 'ylime tua ne, -se 'wa -na lɛ bhɔ? Lagɔ "pɔle -anye 'kɛle yɔko za "me -ye 'ɔ "ne bhɔ ŋwinɛle- 'a? 'Nyakpa sɛku -ye 'e bhulɛ me -lɔ.

⁶ 'Bhɔ gou! "Naa-, Lagɔ "mɔ "me ŋwinɛle- ne, -se 'ɔ "kɛ bhɔ -glɔnya 'gbobhlele 'a?

⁷ -Mɔ, 'neɛ yowlɛ "me, Lagɔ 'na gbɛklɛklɛ kɛ moɔ 'klekle ŋwɛne-, "ne 'ɔnɛɛ 'tɔ kɛ 'ŋlu me ne, 'wa yi bhɔ 'lelee -ame 'nyinyonolinonyɔ la bha?

⁸ 'Nyakpa 'na -bedia 'yli -anye, "ɛ soɔ -noa -wɛ -ŋwa -jiɛnya "ku. 'Wa lua -anye gbo nɛɛ -anye no -gbɔ 'wa no "nyɛnye -se 'ɛ "kɛ "namanɔ "me 'yli-!

⁹ -Mɔ, -se 'a "kɛ -da lɛ? -Anye, zufonya, -anye zi bhɔ -wawɛ 'wɔ "ku 'a? 'Ɛ "ne sɔbhɔ yɛ! 'E -tua nɛ -bɛɛ' -bholo 'anye 'ylime: Zufonya ko, -wa "ne zufonya 'waa -wɛ ko, 'wayi 'klekle 'nyinyonoli 'na 'wawe 'gbhlua- -lɔ 'wlime.

¹⁰ Lagɔbɔgo nɛɛ: 'Nyɔkpɔ -ɔ ŋwinɛle- "me "ne -le "ne 'ɔ "kɛ -bholo -kpee -yle!

¹¹ 'Nyɔkpɔ 'na -ɔ "nɛ- "ne -le "ne -ɔ "nɛ- "ne 'ɔ "kɛ Lagɔ 'siɛ -tɛle "ne -le.

¹² 'Wayi 'klekle 'wa 'bha- -gwe -ɛ "nɛne -wɛ "ku, 'wayi 'klekle -vilinya 'waa -lɔ. -Ɔ no -li 'na -li "ne -le, "ne 'ɔ "kɛ -bholo -kpee -yle!

¹³ 'Wanɛɛ 'nɔkɔzɔ 'diɔ- nuɔ sɛgbɛɛ -biɛ, 'wanɛɛ nu 'na weli no 'nyakpa ylo, weli -ɛ 'bhaloa nu -wɛ -leɛ "ŋwetɛbhɛ 'na 'kɛle.

¹⁴ 'Wanɛɛ nuɛgwe yiɛ- "kubhleweli "ku, 'ɛyi -nyɛ weli -ɛ 'siɛ yɔko -wɛ "bhaa.

¹⁵ 'Nyakpa -dlu 'na 'siɛ -slu -za, 'wa 'pa 'sokwɛ.

¹⁶ 'Wa 'nyimɔ -dee 'wa ylɛle -wɛ 'na -li, "ne 'wa 'tle -lɔ 'nyɛze.

¹⁷ "Kuwɛtɛɛ 'na -gwe, 'wa "ne dɛ -yi.

¹⁸ 'wa "ne "zo Lagɔ 'plome.

¹⁹ "Ne -a -yi sɛ -gbɔ -ye -Lɔ bhulɛ 'klekle -wɛ, -wa 'cɛ 'plome "zo -wɛ za 'ɛ bhulɛ -lɔ. -Se 'nyɔkpɔ te -kɛ 'ɔyi 'gbo -sɛ Lagɔ 'yliku. -Se -glɔ ne zɔ 'na 'nyakpa 'klekle 'wa "kɛ 'sɛ yibhlele- -gbɔ gbo -lua Lagɔ 'yliku.

²⁰ -Ɛwɛza, Lagɔ 'yliku, -ɔ "kɛ 'ce "me ŋwinɛle- "ne -le, -Lɔ 'na 'kɔkɛleɛ "me. "Naa-, -Lɔ, 'ɛyi, 'nyakpa -ye 'ɛ 'luɔle -lɔ 'dle -gbɔ 'wa -no 'nyinyonoli.

'Dlekukɛleɛ 'gbɔ "ne -a "zo -lɔ "meŋwinɛlenya

²¹ -Mɔ, -dɛmeda, Lagɔ "ne -Lɔ "me ylɛle "ne 'ɔ "kɛ -anye "meŋwinɛlenya "zoa-. Moyize 'na -Lɔ "ne "guɔkwɔmenya -bhulɛ -me 'ɛnɛɛ weli.

²² 'Nyɔkpɔ 'na -ɔ -kɛ Zezu Kli 'dleku -wɛ, Lagɔ "zoɔ- "menwinɛlenyɔ. "Naa-, Lagɔ "ne 'gbezi 'nyakpa "me.

²³ 'Wayi 'klekle -no 'nyinyonoli, "ne 'wa "ne Lagɔ 'na 'ŋlu -yle.

²⁴ 'Ɔnɛɛ 'nɛnekoylime, Lagɔ "zoa- -lɔ "fu "meŋwinɛlenya, Zezu Kli, -ɔ 'di- 'wanɛɛ 'nyinyonoli 'na 'galu -wɛ "me.

^25-26 Lagɔ -sɛ -lɔ Zezu Kli bɔbɔli "ku, -se 'ɔ "kɛ 'nyinyonoli 'na gbo "ku 'titli 'ɔnɛɛ dlu 'na 'siɛ -sluɛ "me. 'Ɔnɛɛ 'kwiɛ "me 'ye Zezu 'pɔ- -lɔ -wa -kɔ 'dleku 'klekle "ne 'wa -no 'nyinyonoli -wɛ 'na nyɛzedle. Soɔ, Lagɔ 'yɔbhɔ -lɔ -gbɔ 'ɔ kɛ 'ɔnɛɛ "meŋwinɛleɛ 'nyakpa 'ylime -tua, bhlɛ "me, -dee 'nyakpa no 'awɔ 'nyinyonoli -wɛ, Lagɔ "noa 'awɔ gbo ylea-, "naa-, 'ɔ 'piɛ 'awɔ 'wanɛɛ za "bhle 'dle. -Mɔ, -zeka, Lagɔ -tua -se 'ɔ "zoa- "meŋwinɛlenya 'ylime, 'ɔyi 'yliku. "Naa-, 'ɔyi, 'ɔ ŋwinɛle- "me, "ne 'ɔ libhi 'nyakpa 'na -wa -kɛ Zezu 'dleku -wɛ "ku "meŋwinɛlenya 'nasɛ.

²⁷ Zaa, -ɛ 'nɛne bhɔ -anye kɔ, -se 'a "kɛ bhɔ 'ayi "ku zia? -Ɛ "ne -le! Sɔɔbɛɛza yɛ bhɔ? "Naa-, -ɛ 'nɛne -wɛ, -Lɔ 'na 'plomezoɛ -ye 'ɛ "ne -noɔ, -mɔ, 'dlekukɛleweli yɛ -lɔ.

²⁸ 'Diɛɛ, -se -a 'pɔ 'dle ne lɛ: 'Nyakpa "zo "meŋwinɛlenya 'dlekukɛleɛ "me. -Mɔ 'ɛ "ne -Lɔ 'na 'plome -zo za yɛ.

²⁹ "Ne Lagɔ, zufonya 'wayikɔ 'na Lagɔ -ye 'ɔ -noɔ bha? 'Ɔ "ne bhɔ 'lelee -wa "ne zufonya 'waa -wɛ 'na Lagɔ yɔ -me? 'Diɛɛ yɛ -lɔ, 'ɔ -noɔ me -wa "ne zufonya 'waa -wɛ 'na Lagɔ yɔ.

³⁰ "Naa-, Lagɔ -yle -bholo -kpee. 'Ɔɔ "kɛ -lɔ -wa 'diɔ- "ku "ne -wa "ne "ku 'diɔ- -wɛ "meŋwinɛlenya "zoa-, 'wanɛɛ 'dlekukɛle -ylime.

³¹ Zaa, -a kɛ 'dleku -kɛ ne, -Lɔ 'ye -a -na bhɔ foo pla bha? 'Ɛ "ne -soɔ yɛ gou! -Mɔ, -Lɔ 'ye -a "zo -lɔ -bhlegbi "me.