Wlomɛnya 2 - Nouveau Testament bété de Gagnoa

Lagɔ 'na 'gbobhleleɛ

¹ -Eyi -mɔɔ 'bhlele -elua gbo -wɛ, -ɛ "kɛ -eyi gbo -sɛ -wɛ "ne -le, -see -e yi ko -ce, -e 'bhlele -elua gbo, "ne -e no -me 'wanɛɛ sɛ! Zaa, gbo -ye -e bhle -wɛ, -eyi 'nabhɛ -ye -e 'gbli -lɔ gbo 'wlime.

² 'Diɛɛ, -a -yi -sɛ, -see Lagɔ 'bhlele gbo gbɛklɛklɛ -wa "zo "ɛ -soɔ -wɛ za.

³ -Eyi, -e 'bhlele -wa no "ɛ -soɔ 'na -li -wɛ 'wɔ gbo, "ne -e no -me -kɛ 'wanɛɛ sɛ! -Neɛ' dɛku, Lagɔ 'na gbobhleleɛ yi bhɔ -eyi yɔko "me 'ple bha?

⁴ Lagɔ -ko 'nɛne kpɛnyee, "ne 'ɔ 'piɛ "bhle 'dle kpɛnyee, "ne 'ɔ -yi wosɛ. 'Ɛ "ne no bhɔ -eyi -bɛɛ'? -E "ne bhɔ sɛ -yi -gbɔ Lagɔ 'na "nɛnekoɛ yi 'gbɔ "ne -neɛ' zikpɛ yi kɔ 'bheliɔ-?

⁵ -E -sɛ 'ɛnɛɛ "me noɛ 'na lo, -e "ne 'yɔbhɔ -gbɔ -e "kɛ kɔ 'bheliɔ zɛ. -Ɛwɛza, -e lale -lɔ -eyi 'kɛle "yitɛ -ɛ "kɛ -zle -wɛ yi -wɛ "ku. "Ɛ -zle -wɛ, Lagɔ yi -eyi 'ylime tua -gbɔ 'ɔɔ 'bhlele -lɔ -glɔnya gbo "meŋwinɛlesɛ.

⁶ «'Ɔ yi -ɔkɔkokɔko 'ɔnɛɛ nonoli za 'peɛle. »

⁷ -Wa 'tɛle -godogodo 'nɛne 'na nonoɛ 'siɛ -gbɔ 'wa "kɛ 'ŋlu me, 'wa "koa -bhlegbi "me "zo, -se 'wa "kɛ zikpɛ 'na -ɛ -ka "kubhiɛ -wɛ yle, "ɛ 'wayi -wɛ, Lagɔ "bhaa, 'wa yi 'ce "ku 'glile- -godogodo.

⁸ -Mɔ, -wa 'ciciɔlo 'ylime -wɛ, "ne -wa "ne "zo -gbɛklɛklɛ 'plome -wɛ, "ne 'wa no "nyɛnye -wɛ, "ɛ 'wayi -wɛ, Lagɔ yua 'ce 'ɔnɛɛ 'kɛle "yitɛ 'ylime tua.

⁹ 'Kpilɛkpilɛ "ne 'guguɛ yi 'ce 'nyakpa 'klekle 'wa no "nyɛnye -wɛ yle, zufonya tɛɛ, "ne -wa "ne zufonya 'waa -wɛ "kɛ -la -lɔ yi.

¹⁰ -Mɔ, Lagɔ yi 'ce 'ŋlumeɛ, -bhlegbi "ne "kuwɛtɛ, 'nyakpa 'klekle -wa no -li 'na -li -wɛ kɔ 'je, zufonya 'cɛ -lɔ yle tɛɛ, "ne -wa "ne zufonya 'waa -wɛ "kɛ -lɔ yi.

¹¹ "Naa-, Lagɔ "ne 'gbezi 'nyakpa "me zɛ.

¹² 'Nyakpa 'klekle -wa "ne Moyize 'na -Lɔ -yi -wɛ "ne 'wa no 'nyinyonoli -wɛ yi 'ce "ku me, "ne 'wa "koa 'ce "ɛ -Lɔ -wɛ 'na gbo 'bhlele-. -Mɔ, 'nyakpa 'klekle 'na -wa no 'nyinyonoli "ne 'wa -yi Moyize 'na -Lɔ -wɛ, "ɛ -Lɔ -wɛ "koa 'ce -lɔ gbo 'bhlele-.

¹³ -Wa 'fo "fu Moyize 'na -Lɔ 'yukwli -wɛ, 'wa "ne "meŋwinɛlenya 'waa Lagɔ 'yliku, -mɔ, Lagɔ yi 'ce -wa "zo -Lɔ 'plome -wɛ "meŋwinɛlenya "zoa-.

¹⁴ -Wa "ne zufonya 'waa -wɛ, "ne Moyize 'na -Lɔ -yi, 'ɛ -ko sɔbhɔ "ne -bedia no -Lɔ 'na -ye 'ɛ 'yɔbhɔ -wɛ. "Ɛ 'nyakpa -wɛ "ne -Lɔ -kɛ, 'wayigɛsɛ -noɔ -lɔ 'wanɛɛ -lɔ 'waa.

¹⁵ "Ɛ -doɔ 'na dɛku, 'wanɛɛ nonoli tua -glɔnya 'ylime -gbɔ Moyize 'na -Lɔ 'kɛleɔ- 'wanɛɛ 'dlezɔ, 'wanɛɛ 'dlepɔsɛ -noɔ -lɔ 'wanɛɛ 'ɔyeɛdɛ yɛ. 'Wanɛɛ 'dlepɔsɛ 'joa -zlewɛ gbo, "ne -zlewɛ yi "ne 'ɛ soa gbo.

¹⁶ -A yi 'ce 'ylime 'ye 'tee gbobhlezle. Sɛko 'Denaade -ye 'e sɛ 'na dɛku ne, "ɛ zle -wɛ, Lagɔ yi 'ce Zezu Kli "me -ɛ 'zizɔ- 'klekle 'nyakpa 'na zikpɛ "me "ku -wɛ 'na gbo 'bhle.

Zufonya "ne -Lɔ

¹⁷ -Eyi -mɔɔ -noɔ zufonyɔ yɔ -wɛ, -e -kɛ -Lɔ kɔ "ne -e zia -eyi "ku 'neɛ Lagɔ za.

¹⁸ -E -yi 'ɔnɛɛ -ye 'ɔ 'yɔbhɔ -wɛ, "ne -Lɔ 'na 'kwɛlekwɛleɛ "me -e 'bhɛle- -e "kɛ -ɛ 'nɛne -wɛ tɔ-.

¹⁹ -E -kɛ 'dleku -gbɔ -e yi 'yligbeyinya 'yuku gɛle-, "ne -e yi 'nyakpa 'na -wa -ko titiɛ "me -wɛ 'na -zle "zo,

²⁰ "ne -wa "ne -bɛɛ' -yi "ne -wa -noɔ yua 'waa -wɛ 'na sloanyɔ "zo. 'Diɛɛ, -e -kɛ 'dleku -gbɔ -Lɔ 'ɛɛ -sibha -lɔ -eyi "ɛ -diɛnadiɛ 'na gbɛklɛklɛ 'na yibhleleɛ 'yliku.

²¹ -Eyi, -mɔɔ 'sloa -elua -wɛ, -e "ne sloa me bhɔ -eyi 'a? -E bhulɛloa -gbɔ 'wa te 'wi 'yli, -mɔ, -eyi, -e 'yli 'wi!

²² -E nɛɛ: 'Wa te gbo zlɛ-, -mɔ, -eyi, -e zlɛ gbo. -E "ne 'yɔbhɔ "fu 'na Lagɔ 'wɔ, -mɔ, -e 'yli -ɛ -ko 'wanɛɛ bɔbɔ-bhudu "me -wɛ 'wi!

²³ -E zia -eyi "ku -Lɔ za, -mɔ, -e "ne "zo "ɛ -Lɔ -wɛ 'plome, lɔbhɔ 'na dɛku, Lagɔ 'na 'ŋlumeɛ 'ye -e sɛ -lɔ "ku.

²⁴ "Naa-, Lagɔbɔgo nɛɛ: 'Anyɛɛ 'tɔ "me za, -wa "ne zufonya 'waa -wɛ ziɛ -lɔ Lagɔ 'na 'tɔ 'dii.

²⁵ 'Diɛɛ yɛ -lɔ, -sɔɔdɛku, -e no -ye -Lɔ 'yɔbhɔ lo -wɛ, "kudiɛ -ŋwa sɔbhɔ. -Mɔ, -e "mɔ -Lɔ 'plome "zo, -e "kɛ 'se "ku 'diɔ- 'ce, -e -ko sɛgbɛɛ 'nyɔkpɔ 'na -ɔ "ne lɛ "ku 'diɔ- ne.

²⁶ -Lalɛce: 'Nyɔkpɔ "mɔ "ku 'diɔ-, "ne 'ɔ "kɛ -Lɔ 'plome "zo ne, Lagɔ -kɔ bhɔ "ku 'wolo- sɛgbɛɛ 'nyɔkpɔ 'na -ɔ 'diɔ- "ku 'a?

²⁷ "Ɛ 'nyɔkpɔ -wɛ "ne "ku 'diɔ-, -mɔ 'ɔ "zo -Lɔ 'plome. 'Ɔyi, 'ɔɔ "kɛ 'ce -lɔ -eyi gbo 'bhlele-, -eyi -mɔɔ "ne "zo -Lɔ 'plome -wɛ. "Ne -e -kɛ kɛ "ɛ -Lɔ -ɛ 'kɛleɔ- -nyɛ "kudiɛ "bhaa kɔ.

²⁸ 'Bhɔ, 'nyɔkpɔ 'na -ɔ -su 'ɔyi Zufonyɔ 'nasɛ -wɛ, 'ɔ "ne "klepaa zufonyɔ gbaa yɔ. "Ne "kudiɛ gbaa "ne -kɛ 'be -ye 'wa 'tli yɔko -wɛ yɛ.

²⁹ 'Nyɔkpɔ kɛ zufonyɔ gbaa yɔ ne 'dlezɔ 'ye 'ɔ -noɔle -lɔ. "Ne "kudiɛ -gbaa 'dlezɔ yɛ -lɔ. Zuzu Wlewle "me 'ye 'ɛ 'bhale- -lɔ. -Mɔ, gbagbɛ -ɛ 'kɛleɔ -wɛ "me 'ye 'ɛ -na 'bhale-. Zufonyɔ gbaa, 'nyakpa 'na 'ŋlukwɛɛ 'ye 'ɔ -na yle, -mɔ, Lagɔ -nɛ 'ye 'ɔ yle -lɔ.