Wlomɛnya 16 - Nouveau Testament bété de Gagnoa

Bhɛleweli

¹ 'E 'yɔbhɔ -gbɔ 'a kwɛle- Febe, -a "nɔyɔ -ɔ lɔbhɔ Sacle 'na Lagɔgligbɛ "ku -wɛ.

² 'A 'sɔ 'tee Anyinɛnyɔ 'na 'tɔ "me, sɛgbɛɛ Lagɔnya 'na -ye 'wa "kɛ no -wɛ. 'A kwɛlo- 'ɔ kɛ 'anye -bɛɛ' 'yɔbhɔle- 'yiɛ ne. 'Ɔyi, 'nabhɛ, 'ɔ -kwɛle 'nyakpa -kwleyia, "ne 'ɔ -kwɛle me 'lelee -ame.

³ 'A bhɛle- Plisile "ne Akilase nyɔ 'wɔ "bhaa, 'e no Zezu Kli 'na libhɔ -wɛ.

⁴ 'Wa 'bhale- 'wanɛɛ zikpɛ "me, "ne 'wa yi -lɔ 'neɛ 'fuɔ. Zaa, -ame, 'ayikɔ 'ye 'e -gba "kɛ 'nɛne -ye 'wa 'no -ame 'wli -wɛ -yibhlele. Lagɔgligbɛ 'klekle -ɛ "ne zufonya -nɛ yɛ -wɛ -ko me 'lelee.

⁵ 'A bhɛle- -me 'lelee Lagɔnya -wa "zole 'wanɛɛ -bhudu "me 'wli -wɛ. 'A bhɛle- -a 'tito Epenɛte. 'Ɔɔ -noɔ -lɔ tɛtɛnyɔ -ɔ -kɛle Klise 'dleku Azi -glɔ "me -wɛ yɔ.

⁶ 'A bhɛle- Mali: 'Ɔɔ -no 'anyɛɛ za libhɔ kpɛnyee.

⁷ 'A bhɛle- Adlonicuse "ne Zuniase. 'Neɛ -nyoa 'waa -lɔ, "ne 'wayi 'wɔ "bhaa -a -ko nɛ -lɔ -jiɛ "me 'gɔme. "Kɔlepɔnya "yitia 'waa -lɔ, 'waa- -yibhlele -lɔ Klise 'neɛ za 'tɛ-.

⁸ 'A bhɛle- -a 'tito Apliatuse -ɔ -kɛ 'neɛ 'dle kɔ Anyinɛnyɔ "me.

⁹ 'A bhɛle- Ylubɛ, -nyɔ "bhaa, -a -no Klise 'na libhɔ -wɛ, "ne -a 'tito Satakise.

¹⁰ 'A bhɛle- Apelɛse, -ɔ -tua 'ɔyi Lagɔnyɔ gbaa "ku -wɛ. 'A bhɛle- Alisetobule 'na -bhudu "me 'na 'nyakpa.

¹¹ 'A bhɛle- Elodiɔne, -ɔ -noɔ 'neɛ -nyɔ yɔ -wɛ. 'A bhɛle- Nalesise 'na -bhudu "me 'na 'nyakpa 'wa -kɛ Anyinɛnyɔ 'dleku -wɛ.

¹² 'A bhɛle- Tlifɛne "ne Tlifɔse. 'Wa -no Anyinɛnyɔ 'na libhɔ kpɛnyee. 'A bhɛle- 'neɛ 'bheyi Pɛleside. 'Ɔyi 'lelee, 'ɔ -no Anyinɛnyɔ 'na libhɔ kpɛnyee.

¹³ 'A bhɛle- Wlufuse -ye Anyinɛnyɔ -tɔ -wɛ, "ne 'ɔ "nɔ, -ɔ -noɔ me -ame "nɔ yɔ -wɛ.

¹⁴ 'A bhɛle- Asɛklite, Flegɔ, Ɛlemɛse, Patlobase, Ɛlemase, 'wa -nyɛ "nowlia "ne "nɔyoa -nyɔ 'wɔ "bhaa 'wa -ko lɔbhɔ -wɛ.

¹⁵ 'A bhɛle- Filoloze "ne Juliuse, Nele "ne 'ɔ "nɔyɔ, Olɛpase "ne Lagɔnya 'klekle -nyɔ 'wɔ "bhaa 'wa -ko lɔbhɔ -wɛ.

¹⁶ 'A bhɛlebhɛlele-, -se 'a tutule "ku sɛgbɛɛ "nowlia "ne "nɔyoa -wa -noɔ Lagɔnya 'waa -wɛ. Klise 'na gligbɛnya 'klekle bhɛle 'anye.

Pɔle 'na 'demezoweli

¹⁷ -Nyɔsɔwanye, -ye 'e 'yɔbhɔle 'anye "me lo ne lɛ: 'A 'luɔle- -kɛ 'nyakpa 'wa 'dlidlile Lagɔgligbɛ "me -wɛ "ku. 'Wa yi -kɛ 'dlekukɛlenya zɔ 'pɔ, -see 'wa -sɛ 'anyɛɛ -sloaweli -ye 'a -yle -wɛ 'bhulɛ "ku -wɛ za. 'A 'toa -kɛ -la gɛlele gou!

¹⁸ "Naa-, "ɛ soɔ 'na 'nyakpa -wɛ, 'wa "ne lɔbhɔ Anyinɛnyɔ Klise "ku, 'wanɛɛ 'mene 'na libhɔ 'ye 'wa no -lɔ! 'Wanɛɛ 'ŋu -jibhiweli "ne 'wanɛɛ bhulɛweli "namanɔ -wɛ 'wɔ 'wa nole -lɔ 'nyakpa -wa -ko foo -wɛ "me ylo.

¹⁹ 'Diɛɛ, 'nyakpa 'klekle -yi -se 'a "zo 'plome, 'ŋwɛnɛ 'lɔbhɔ -ame 'anyɛɛ za. -Mɔ, 'e 'yɔbhɔ -gbɔ 'a yamale- 'ylime kpɛnyee, -se 'a "kɛ -li 'na -li no, -se 'a "kɛ "nyɛnye 'guɔ 'ylile-.

²⁰ -Dee "kuwɔtɔ Lagɔ "kɛ Sata 'anyɛɛ 'bhozɔ wlɛle "ne -la "me tlo. Anyinɛnyɔ Zezu 'na -jɔlo ko 'anye "ku!

²¹ Timote, -nyɔ "bhaa -a no libhɔ -wɛ bhɛle 'anye. Licuse, Zasɔ "ne Sosipatɛle 'wa -noɔ 'neɛ nyoa 'waa -wɛ bhɛle -me 'lelee 'anye.

²² -Ame, Tɛletiyuse, "mɔ 'kɛle lɛ "ɛ "bɔgo ne. 'E bhɛle 'anye, Anyinɛnyɔ 'ɔɔ gbɔ "ne -a -kole "ku -wɛ 'na 'tɔ "me.

²³ Gayuse bhɛle 'anye. 'Ɔnɛɛ -doɔ 'ye 'e -ko -lɔ, "ne Lagɔgligbɛ 'klekle "zole -lɔ 'ɔnɛɛ -bhudu "me 'wli. Elase bhɛle 'anye, "ɛ 'du -wɛ "me 'na 'dlasikulɛnyɔ yɔ -lɔ, "ne -a "nɔwli Kaletuse bhɛle -me 'anye.

²⁴ [Anyinɛnyɔ Zezu Kli 'na -jɔlo ko 'anye "ku 'klekle!] Amɛn!

Lagɔ -bholo -kpee 'bhe- -lɔ 'ŋlumeɛ

²⁵ Lagɔ me 'ŋlu! 'Ɔ -kɛ 'bhɛloɛ -se 'ɔ "kɛ 'anye "me "tamalea- 'Denaade -ye 'e 'sɛle 'anye Zezu Kli za -wɛ "me. "Ɛ 'Denaade ne "me, Lagɔ 'sloa 'ɔnɛɛ diɛweli -ɛ zizɔ- nɛ "ku -godogodo -wɛ 'dɛ.

²⁶ "Ne -dɛmeda, 'wa "zo- -zle "ku gbɛklɛklɛ, zaa, 'nyakpa 'klekle -wa "ne zufonya 'waa -wɛ yi "guɔkwɔmenya 'na "bɔgo "me yibhlele-. Lagɔ -ɔ -le 'ce -godogodo -wɛ -no -lɔ -gbɔ 'wa yibhlele- -se 'nyakpa 'klekle "kɔ 'dleku 'kɛle-, -se 'wa "kɔ 'plome "zo.

²⁷ Lagɔ me 'ŋlu, 'ɔyikɔ 'ɔ 'bhe- -lɔ 'ylimeyamaleɛ! 'Ɔ 'bhe- -lɔ 'ŋlumeɛ Zezu Kli "me, -godogodo! Amɛn!