Wlomɛnya 15 - Nouveau Testament bété de Gagnoa

-A gɛle Zezu 'na -gbudu

¹ -Anye 'tɛ- "me 'dlekukɛleɛ "me ne, -anye "kɛ -lɔ -wa "ne "me 'tɛ- 'dlekukɛleɛ "me -we kwɛle-, -a te -ɛ 'nɛne -anye -gɛ -wɛ 'siɛ tɛle-.

² -Anye 'glɛme, -ɔkɔkokɔko tɛle- -se 'ɔ "kɛ "zo "ne 'ɔ "kɛ 'ɔluyu -gɛ "namale -wɛ 'siɛ, -se -anyɛɛ -gligbɛ "kɛ "me "tamale-.

³ "Naa-, 'ɔyi, Klise, -ɛ 'nɛno -gɛ -wɛ 'ye 'ɔ "ne 'siɛ -tɛle. -Mɔ, Lagɔbɔgo nɛɛ: -Ye 'wa 'yli nɛ -eyi -wɛ, -ame -ye "ɛ weli -wɛ mele nɛ -lɔ "ku.

⁴ "Naa-, bhlɛme 'na Lagɔbɔgo 'klekle 'kɛleɔ- -se 'ɛ "kɛ -anye sloa-, -se 'ɛ "kɛ -anyɛɛ 'dle "bhle 'piɛ, -se 'ɛ "kɛ -anye 'kwɛme "tamalea-, -se -a "kɛ 'dletɛleɛ yle.

⁵ 'Dle 'na 'bhlepiɛ "ne 'kwɛmetamaleɛ, Lagɔ 'ye 'ɛ 'bhale -lɔ "me. Zaa, Lagɔ gbɔ 'se -se -waleɛ "kɛ 'anye 'glɛme ko 'tee Zezu Kli 'na -gbudu 'na gɛleleɛ "me!

⁶ -Se 'dle -bholo "me, 'nuɔgwe -bholo "me, 'a "kɛ Anyinɛnyɔ Zezu Kli 'ɔ To Lagɔ 'na 'ŋlumeɛ "me lo 'dile.

⁷ -See Klise 'sa- 'anye kɔ 'tee Lagɔ 'na 'ŋlu me -za -wɛ, 'a 'sasale- -me sɔbhɔ kɔ 'tee.

⁸ 'Anye 'ye 'e bhulɛle -lɔ, weli -ye Lagɔ -ple -wɛ, 'ɔ "ne 'bhɛ -kɛ "ku. 'Ɛza, Klise "zo- -lɔ zufonya 'na "kulɔbhɔnyɔ. -Se weli -ye Lagɔ -plele 'awɔ -a 'to 'wa 'to 'wɔ kɔ -wɛ "kɛ 'yli 'wlole.

⁹ "Ne -wa "ne zufonya 'waa -wɛ 'di -lɔ -see Lagɔ 'nɛne 'dleku -wɛ 'na 'ŋlu me -lo. "Naa-, Lagɔbɔgo nɛɛ: -Ɛwɛza, 'e yi 'ce -neɛ' -jajo no, -glɔnya 'klekle 'glɛme, "ne -neɛ' 'tɔ -wɛ za, 'e yi 'ce lo 'di.

¹⁰ Lagɔbɔgo bhulɛ 'lelee nɛɛ: -Glɔnya 'nye, 'a no 'ŋwɛnɛ 'a -nyɛ -glɔ -ye Lagɔ -tɔ -wɛ "bhaa.

¹¹ Lagɔbɔgo bhulɛ 'lelee nɛɛ: -Glɔnya 'klekle, 'a 'dile Anyinɛnyɔ lo keyi! -Glɔnya 'klekle 'a 'kwɔ- 'ŋlu!

¹² "Guɔkwɔmenyɔ Ezayi bhulɛ -me 'lelee nɛɛ: 'Nyɔkpɔ yi 'ce Jese 'na -gligbɛ "ku 'bhale-. "Ne 'ɔ yi 'ce -glɔnya 'kamalea, "ne "ɛ -glɔnya -wɛ yu 'ce 'dletɛle.

¹³ -Se, 'Dletɛle Lagɔ, 'ɔ 'yiɛ- 'anye "kuwɛtɛ -nyɛ 'ŋwɛnɛ "bhaa "ku 'anyɛɛ 'dlekukɛle za! -Se 'anyɛɛ 'dletɛleɛ "kɛ lɔbhɔ 'ple Zuzu Wlewle 'na 'bhɛloɛ "me.

Pɔle, Klise 'na "kulɔbhɔnyɔ

¹⁴ -Nyɔsɔwanye, -ame 'ye 'ɛ "kɛ -noɔ, 'e -kɛ 'dleku -gbɔ 'a 'bhɛle- -se 'a kɛ -li 'na "namanɔ -kwleyi no, 'a -yi -li 'na -bɛɛ', "ne 'a 'bhɛle- 'a kɛ 'de "me "zozole-.

¹⁵ "Ne "ɛ "bɔgo ne "me 'na dɛ -bedi, 'kwɛmetamaleɛ "me, 'e 'sibha- 'anyɛɛ 'dle -li 'na -ye 'a -yi "kle -wɛ "ku. 'E -nole Lagɔ 'na "nɛnekoɛ "me,

¹⁶ 'ɔ "zoa- -ame Anyinɛnyɔ Zezu Kli 'na "kulɔbhɔnyɔ, -wa "ne zufonya 'waa -wɛ za. 'Ɔ "zo- -ame 'neɛ 'dɛ, -se 'e "kɛ 'Denaade -glɔnya -sɛle. -Se -wa "ne zufonya 'waa -wɛ "kɛ bɔbɔli -ɛ "nɛne Lagɔ -gɛ -wɛ "zo, "ne Zuzu Wlewle gbɔ -lɔ "ne "ɛ bɔbɔli -wɛ "namale -lɔ Lagɔ -gɛ.

¹⁷ Zezu Kli "bhaa -a -kole "ku za, libhɔ -ye 'e -no Lagɔ za -wɛ, 'e yi 'ɛnɛɛ 'ylime -ayi "ku zia.

¹⁸ "Naa-, 'e "kɛ -bɛɛ' 'na weli bhulɛ ne, -ye Klise -nole 'ɛyikɔ -ame "me -wɛ -se -wa "ne zufonya 'waa -wɛ "kɛ Lagɔ 'plome "zo. 'Ɔ -nole bhulɛweli "me, "ne nonoli "me,

¹⁹ 'be "ne -li 'na -ɛ 'sɛ geji "ku -wɛ "me, Lagɔ 'na Zuzu 'bhɛloɛ "me. Soɔ 'ye 'e -sɛ -lɔ Klise 'na 'Denaade -se 'ɛ 'bhale 'ce Zeluzalɛme "ne 'ɛ -ylɛle -glɔ -ye 'wa la Ilili -wɛ 'na 'pɛɛ -ce "ku.

²⁰ -Mɔ, 'mɔɔ 'yɔbhɔ- -lɔ -gbɔ 'e "kɛ Lagɔ 'na 'Denaade -glɔ -wɛ 'wɔ, -wa -namlɛ Klise -yibhlele -wɛ 'ɛyikɔ -sɛle 'tɛ-. 'E -sɛ "ɛ soɔ -se 'e te -kɛ 'nyɔkpɔ 'na -vinɔ 'na -dee 'ɔ 'cile- "ku -wɛ 'sɔbhɔle.

²¹ -Ye Lagɔbɔgo -bhulɛ -wɛ 'ye 'e -gɛlele -lɔ: 'Nyakpa 'na -ye 'wa -nɛ -mlɛ -sɛle -me -wɛ 'yi 'ylime 'ye, -wa "ne 'ɔnɛɛ dɛku "me 'no- gou -wɛ 'yi "me 'no -me.

Pɔle 'na -glɔkumeweli

²² -Ɛ gbɔ -godogodo "ne 'e "ne 'anyɛɛ moɔ 'wlo- -wɛ -lɔ.

²³ -Mɔ, -dɛmeda, 'e -bhiɛ 'neɛ libhɔ kɔ -glɔ -wɛ 'wɔ "ku. "Ne 'ylobɛ 'gbagbo ne lɛ -se 'anyɛɛ moɔ 'na memeto lɔbhɔ -ame.

²⁴ Zaa, 'e "kɛ -glɔ 'ye 'wa la Esepanye -wɛ me ne, 'e yi 'anyɛɛ moɔ ylɛle-. 'Diɛɛ, 'e "kɛ "bhle -yi ne, 'e -yi -sɛ -gbɔ 'a yi -ame kwɛle-, "ne 'e yi "bhle -ylɛ. -Se 'ɛ "mɔ -ko "ne -se 'ɛ kɛ -ko, 'e yi 'anye yɔko 'gwlɛ 'tekeyi.

²⁵ -Mɔ, -dɛme ne, Zeluzalɛme 'ye 'e me -lɔ, -se 'e "kɛ "bhle 'na 'nyakpa -wa -noɔ Lagɔ -noa 'waa -wɛ kwɛle-.

²⁶ "Naa-, Masedoane "ne Akayi -glɔ "me 'na 'nyakpa -wa -noɔ Lagɔ -noa 'waa -wɛ -sɛ 'dlasi -se 'wa "kɛ Zeluzalɛme 'na 'nyakpa -wa -noɔ Lagɔ -noa 'waa -wɛ 'na 'glɛme 'na "nyɛzenya kwɛle-.

²⁷ 'Waa- -no -lɔ -gbɔ 'wa "koa kwɛle-, -mɔ, "kle 'na dɛku, 'wanɛɛ 'gɛgbo 'wa -kɛ nɛ -lɔ. Zufonya 'na -jɔlo 'ye Lagɔ -ylɛle -lɔ "me "ne 'ɔ yi -lɔ -wa "ne zufonya 'waa -wɛ 'ŋu 'pɔ. 'Ɛza, 'wa "koa -lɔ 'wanɛɛ 'ye 'wa -kɛ -wɛ "me kwɛlele-.

²⁸ 'E kɛ Zeluzalɛme 'na Lagɔgligbɛ 'na 'dlasi kɔ 'je- "bhuɔ ne, 'e yi 'anyɛɛ moɔ -ylɛle, 'e kɛ Esepanye me ne.

²⁹ "Ne 'e -yi -sɛ -gbɔ -zle 'e "kɛ 'anyɛɛ moɔ -yi, 'e -su Klise 'na 'ŋupɛɛ 'klekle.

³⁰ -Nyɔsɔwanye, -a 'gwele- 'gɔme 'a "kɛ 'neɛ za Lagɔ bhubhɔ. 'E 'yɔbhɔle 'anye Anyinɛnyɔ Zezu Kli "ne -waleɛ -ye Zuzu Wlewle 'je -anye kɔ -wɛ "me.

³¹ 'A bhubhɔ -se 'e te -kɛ Zudedu "me 'na 'nyakpa -wa "ne Klise 'dleku -kɛ -wɛ kɔ 'sibhɔ. 'A bhubhɔ, -se Zeluzalɛme 'na Lagɔnya "kɛ -kɛ "ɛ 'dlasi -wɛ 'dle "namanɔ "me "ku 'libhile.

³² Lɔbhɔ 'na dɛku, 'e yi 'anyɛɛ moɔ yi 'ŋwɛnɛsɛ "ku, "ne Lagɔ 'cɛ "ku 'ŋunu- ne, 'e yi 'anyɛɛ moɔ 'nyɔpɔle- 'tekeyi 'anye 'wɔ "bhaa.

³³ Lagɔ -ɔ 'nyɛ "kuwɛtɛ "bhaa 'a 'kole- "ku 'klekle! Amɛn.