Wlomɛnya 14 - Nouveau Testament bété de Gagnoa

'A te 'alua gbohlele 'wanɛɛ 'dlepɔsɛ za

¹ Nyɔnɛɛ 'dlekukɛleɛ "ne "me 'tɛ- -wɛ, 'a 'sɔ -kɛ 'tee. -Mɔ, 'a 'to "kɛ 'ɔnɛɛ -see 'ɔ 'pɔ 'dle -wɛ za -sɛ.

² 'A 'pɛle weli weli "ku, 'nyɔkpɔ 'na -ɔwɛ 'pɔ 'dle gbɔ 'ɔ yi li 'klekle li, -mɔ, 'nyɔkpɔ -nyɔ 'na 'dlekukɛleɛ "ne "me 'tɛ- -wɛ li -lɔ zɔpo fu 'ɛyikɔ.

³ -Ɔ li 'klekle -wɛ, te -ɔ 'gbezi lilɛ "me -wɛ 'dii ziɛ. "Ne -ɔ "ne li 'klekle -wɛ, te 'ɔluyu -ɔ li 'klekle -wɛ 'gbobhlele-. "Naa-, Lagɔ 'sa- -mo kɔ zɛ.

⁴ -Eyi -ye -e -noɔ bhɔ, "ne -e -kɛ bhɔ -eluyu 'na "kulɔbhɔnyɔ 'gbobhlele? 'Ya 'ye 'ɔ "kɛ 'nyegblele- "ne zɔ 'ye 'ɔ "kɛ -bhli, 'ɔnɛɛ -ye 'ɔ lɔbhɔ "ku -wɛ 'na gbo yɛ -lɔ. "Ne 'ɔ yi 'ce 'ya 'nyegblele, -sɛko -wɛ Anyinɛnyɔ 'bhɛle- -se 'ɔ "kɔ 'kwɛme "tamalea-.

⁵ 'Nyɔkpɔ 'na -ɔwɛ "pɔ 'dle -gbɔ zle "me 'ye 'ɛ -kokole, "ne 'ɔnɛɛ -ɔwɛ "pɔ 'dle -gbɔ zle -bhele yɛ -lɔ 'klekle. -Ɔkɔkokɔko -kɛle -se 'ɔ 'pɔ 'dle -wɛ 'dleku.

⁶ 'Nyɔkpɔ 'na -ɔ seselia zle 'yli "me -wɛ, Anyinɛnyɔ za 'ɔ 'no -lɔ. "Ne 'nyɔkpɔ 'na -ɔ li -li 'klekle -wɛ, Anyinɛnyɔ za 'ɔ 'no -lɔ, "naa-, Lagɔ -ye 'ɔ bhɛle -lɔ zɛ. "Ne 'ɔ "ne li gou -wɛ, Anyinɛnyɔ za 'ɔ "ne li -lɔ, "ne 'ɔ bhɛle me 'lelee -lɔ Lagɔ.

⁷ -Anye 'glɛme 'na -ɔ -yɛ 'ɔyigɛsɛ za -wɛ "ne -le, "ne -ɔ "ku 'ɔyigɛsɛ za -wɛ "ne 'lelee -le.

⁸ -A kɛ -yɛ ne, Anyinɛnyɔ za -a -yɛ -lɔ. "Ne -a kɛ "ku ne, Anyinɛnyɔ za -a "ku -lɔ. Zaa, -a kɛ -yɛ "ne "ku -a kɛ "ku-, Anyinɛnyɔ 'bhe- -lɔ -anye.

⁹ 'Diɛɛ, Klise "ku-, "ne 'ɔ yi -lɔ gluzɔ 'wlo. -Se 'ɔ "kɛ -wa -yɛ "ne -wa "ku- -wɛ 'na "Bhenyɔ "zo.

¹⁰ -Mɔ, -eyi, sɔɔbɛɛza -e 'bhlele bhɔ -e "nɔwli gbo? "Ne -eyi sɔɔbɛɛza -e 'ziɔ bhɔ 'dii? "Naa-, -anye 'klekle, Lagɔ yi 'ce -anye 'gbobhlele-.

¹¹ Lagɔbɔgo nɛɛ: -Ame, Anyinɛnyɔ -ɔ -yɛ lɛ ne, 'e bhulɛle 'anye gou. 'Nyakpa 'klekle yi 'ce -ame -kokomini 'yliku 'pɔle, "ne 'nyakpa 'klekle yi 'ce Lagɔ 'ŋlu 'kwa.

¹² 'Ɛza, -ɔkɔkokɔko yi 'ce -ye 'ɔ -no -wɛ 'na 'de Lagɔ -sɛle.

'A tɛle- -ɛ nɛme "kuwɛtɛ -wɛ 'siɛ

¹³ -A te 'se gbo bhlebhlele-. -Mɔ, -ye 'a "kɛ nɛ no ne lɛ: 'A te 'a "nɔwli -bɛɛ' 'na -ɛ kɔ zɔ "pɔ "ne 'ɛ kɔ "nyɛnye -noa -wɛ 'yliku 'piɛ.

¹⁴ 'E -yi sɛ, "ne Anyinɛnyɔ Zezu za, 'e -kɛ 'dleku: -Bɛɛ' 'na -ɛ -pla 'fe "ne -le, -mɔ, 'nyɔkpɔ "kɛ 'dle 'pɔ gbɔ -bɛɛ' -kɛ 'fe ne, 'ɔnɛɛ dɛku, 'fe 'ye 'ɛ -kɛ -lɔ.

¹⁵ -E kɛ -e "nɔwli -ye -e li -wɛ za 'gbapea ne, 'ɔnɛɛ 'ŋwɛnɛ "ne -lɔ 'ɛyi "me -ko, lilɛ za, te -nyɔ za Klise "ku- -wɛ 'kwlɛ bhlia-.

¹⁶ -Ye -a no -gbɔ 'ɛ 'nɛne 'anyɛɛ dɛku -wɛ, 'anye -na te gbɔ -se -alua te no -gbɔ 'ɛ "ne 'nɛne.

¹⁷ "Naa-, Lagɔ 'na klɔgbɔdu "ne kɛ lilɛ -nyɛ no "bhaa 'na weli yɛ. Lagɔ 'na -klɔgbɔdu -noɔ -lɔ "meŋwinɛleɛ, "kuwɛtɛ "ne 'ŋwɛnɛ -ye Zuzu Wlewle 'nyɛ -wɛ yɛ.

¹⁸ -Ɔ lɔbhɔ soɔ Klise "ku -wɛ, 'ɔ 'nɛne Lagɔ -gɛ "ne 'nyakpa 'ŋunulo.

¹⁹ Zaa, -a tɛle- -ɛ "kɛ "kuwɛtɛ -nɛme "ne 'ɛ "kɛ -anyɛɛ -gligbɛ "me "tamalea- -wɛ 'siɛ.

²⁰ Te Lagɔ 'na libhɔ nyimɔ lilɛ za! 'Diɛɛ, lilɛ 'klekle -ko 'wlele. -Mɔ, -e "kɛ -bɛɛ' 'na -ɛ "kɛ -elua "nyɛnye "me 'sile -wɛ li ne, 'ɛ "ne 'nɛne.

²¹ -Ɛ 'nɛne ne lɛ: Te nɛmɛ li, te duvɛ 'nɔmɔ, te -bɛɛ' 'na -ɛ "kɛ -e "nɔwli "nyɛnye "me 'sile -wɛ "ku 'libhi gou.

²² -Bɛɛ' 'na 'ye -e -kɛ 'dleku Lagɔ 'yliku -wɛ, 'nyegbe "ku. -E 'cɛ 'dleku -kɛ -gbɔ -ye -e -no -wɛ 'ɛ "ne 'tetelia -neɛ' 'dle "me ne, 'ŋwɛnɛ 'lɔbhɔ -eyi.

²³ -Ɔ li lilɛ "ne 'ɛ lo 'dlebhɛ "ku -wɛ, Lagɔ yu gbo ylea-, "naa-, 'ɔnɛɛ 'dlekukɛleɛ "me -ye 'ɔ "ne -nole, "ne -ɛ "ne 'bhale 'dlekukɛleɛ "me -wɛ, 'nyinyonoli yɛ -lɔ.