Wlomɛnya 12 - Nouveau Testament bété de Gagnoa

Klise "me 'na zikpɛ -lele

¹ -Nyɔsɔwanye, Lagɔ -ko "nɛne -kpɛnye -anyɛɛ za. 'Ɛza, 'e 'yɔbhɔle -lɔ 'anye -ɛne lo: 'A 'je 'ayi Lagɔ kɔ gou sɛgbɛɛ bɔbɔli 'na yɛyɛ nɛ, -ɛ -sɔ lɔbhɔ Lagɔ -nɛ "ku "ne -ye 'ɔ -wa yɛ -lɔ. -See 'a "kɔ 'diɛɛ "zo -wɛ -lɔ.

² 'A te zikpɛ ne "ku 'na kosɛ -nyɛnye gɛlele-, -mɔ, 'a 'tale Lagɔ 'yi -se 'ɔ "kɛ 'anyɛɛ "nɛnoɛ -nyɛ zikpɛ "bhaa kɔ 'bhelia- gou. 'Ɛɛ "kɛ -lɔ -gbɔ "ne 'a "kɛ 'ce -lɔ -ye 'ɔ -wa -wɛ yibhlele-: 'Ɛ 'nɛne, 'ɛ lo 'ŋwɛnɛ "ku, "ne 'ɛ "ne 'nuɔsɔbhɔledɛ -kɛ gou.

³ Lagɔ 'je- -ame "fu 'ɔnɛɛ -li -ɛ 'nɛne -wɛ kɔ. 'Ɛza, 'e 'bhɛle- 'e "kɛ -ɔkɔkokɔko bhulɛle- nɛɛ: 'A kɛ lɔbhɔ -ko ne, 'a te no -gbɔ 'a "kɛ 'ayi "ku zia- -see 'a "ne -ko -wɛ, -mɔ, -ɔkɔkokɔko -bhlele 'ɔyi gbo 'dlekukɛleɛ -ye Lagɔ 'jo- kɔ -wɛ "me.

⁴ "Naa-, -anyɛɛ ku 'na -dawli zu, "ne 'ɛyi 'klekle libhɔ -bhele 'ye 'ɛ -na no.

⁵ 'Ɛ sɛbhele -wɛ, -anye -kwleyia ne, ku -bholo -ye -a -noɔ -lɔ Klise "bhaa 'na "kukoleɛ "me. -Ɔkɔkokɔko -kɛ 'ɔnɛɛ -ye 'ɔ no -wɛ, -see ku 'na -dawli -ko -bholo -bholo -wɛ.

⁶ Lagɔ 'nyɛ- -anye -jɔlo 'wɔ, 'ɛ "ne -kɛ -bhele yɛ, -ɔkɔkokɔko "kɛ 'ɔnɛɛ. Zaa, 'nyɔkpɔ "kɛ "guɔkwɔmenyɔ 'nasɛ 'na bhulɛbhulɛ -jɔlo -yle ne, 'ɔ bhulɛ -se 'ɔnɛɛ bhulɛweli 'nɔŋo -kɛ 'dlekukɛleɛ 'na -gwe "ku.

⁷ 'Nyɔkpɔ "kɛ "kulɔbhɔjɔlo -yle ne, 'ɔ lɔbhɔ- "ku, 'nyɔkpɔ "kɛ sloasloa -jɔlo -yle ne, 'ɔ sloa.

⁸ 'Nyɔkpɔ "kɛ 'kwɛmetamaleɛ 'na -jɔlo -kɛ ne, 'ɔ 'tamalea 'kwɛme. -Ɔ "nyɛ -ɔlua -wɛ, 'ɔ 'te zɛle, -se 'ɔ "nyɛ, -ɔ -su 'ɔlua 'na -zakpɛ -wɛ, 'ɔ -slua -se 'ɔ te yɛle plɛ, -ɔ 'kwɛle 'nyɛzenya -wɛ, 'ɔ 'no 'ŋwɛnɛsɛ.

⁹ 'Anyɛɛ 'nyakpa 'na wamalesɛ "me ko -kɛ gbaa. 'A 'ylile 'nyinyonoli 'guɔ gou! 'A -wamale -li 'na -li kpɛnyee.

¹⁰ 'A -wale -anyɛɛ 'dle 'klekle zɔ -see "nowlia -nyɛ "nɔyoa "bhaa -wale -wɛ. 'Anye -na "zo 'ce 'alua 'plome tɛɛ.

¹¹ 'A lɔbhɔ- Anyinɛnyɔ "ku kwɛmetamaleɛ "me, 'a te yɛle plɛ, 'anyɛɛ 'dle 'klekle zɔ.

¹² 'Ŋwɛnɛ 'lɔbhɔ 'anye, -see 'a "tɛle- 'dle -wɛ za. "Nyɛnye "kɛ 'anye -yle ne, 'a 'piɛ- "bhle 'dle -vlee, -se 'a bhubhɔ 'yiɛ.

¹³ 'A kwɛle- 'a "nowlia -wa -ko 'kplɛkplɛɛ "me -wɛ. -Wa yile 'anye lo -wɛ, 'a 'soa 'tee.

¹⁴ -Wa 'gbapea 'anye -wɛ, 'a 'poa 'ŋu, 'a 'poa 'ŋu -se 'a 'toa "ku 'bhle.

¹⁵ -Ye 'ŋwɛnɛ 'lɔbhɔ -wɛ "bhaa, 'a nole- 'ŋwɛnɛ 'gɔme. -Wa 'tu -wɛ "bhaa, 'a 'tule 'gɔme.

¹⁶ 'A 'nonole- "ku "me 'ayi 'glɛme, 'a te -ɛ 'kpɔ- -wɛ 'siɛ tɛle-, -mɔ -ɛ -ko foo -wɛ 'ye 'a -na tɛle- 'siɛ. 'A te 'ayi 'ylimeyamalenya la.

¹⁷ 'Nyɔkpɔ -ɔ -no 'anye "nyɛnye 'wli -wɛ, 'a 'to "nyɛnye 'wli no me. 'Nyakpa 'klekle 'yliku, 'a no -ɛ 'nɛne -wɛ.

¹⁸ -See 'a bhɛle- 'ce 'yiɛ -wɛ, 'anyɛɛ dɛglinya "bhaa 'a wɔtɔ- "ku 'klekle.

¹⁹ 'Titoa -ye 'e -wa 'wanye, 'a te 'anyɛɛ 'na kpɛ -sɛ. -Mɔ, Lagɔ -na 'pɔ 'anyɛɛ 'kɛle. "Naa-, Lagɔbɔgo "me Anyinɛnyɔ Lagɔ nɛɛ: 'Mɔɔ "kɛ -lɔ 'anyɛɛ 'kpɛ -sɛ! 'Mɔɔ "kɛ -lɔ -ɔkɔkokɔko 'na -ɛ -ŋwɔ "ku -wɛ kɔ 'je!

²⁰ -Mɔ, Lagɔbɔgo -gbɔ -me 'lelee sɛne: Ŋɔŋo kɛ -neɛ' -gblenyɔ 'lɔbhɔ ne, "nyɔ lilɛ, "ne 'ŋuto kɔ 'lɔbhɔ ne, "nyɔ 'ŋu -se 'ɔ -nɛmɛ. -E 'cɛ soɔ 'sa ne, 'ɛ -le sɛgbɛɛ -kafe 'ye -e -slu 'wli.

²¹ "Nyɛnye te "kɛ -eyi lu-, -mɔ, -mɔɔ -na lu "nyɛnye -li 'na -li 'na nonoɛ "me.