Wlomɛnya 11 - Nouveau Testament bété de Gagnoa

Lagɔ "ne Izlayɛleyua 'kwlɛ "me pɔ-

¹ Zaa, lo 'e 'yɔbhɔ -kɛ: Lagɔ yi nɛ "kɛ bhɔ Izlayɛleyua 'kwlɛ "me 'pɔ? 'Bhɔ gou! "Naa- -ame, Izlayɛleyu 'ye 'e -noɔ -lɔ, Ablame 'na ŋeyi "me 'ye 'e 'bhale -lɔ, "ne 'e -noɔ -lɔ Bɛzamɛ 'na -gligbɛ "ku -nɔ yɔ.

² Lagɔ "ne 'ɔnɛɛ 'nyakpa -ye 'ɔ -tɔ "kle -wɛ 'kwlɛ "me pɔ-. Lagɔbɔgo "me Eli 'klɛle- 'awɔ Izlayɛleyua Lagɔ yɔko. 'A -yi 'se "ɛ -ye 'ɔ -bhulɛ -wɛ ne.

³ "Ɛ -ye 'ɔ -bhulɛ ne lɛ: Anyinɛnyɔ, 'wa lɔbhɔ- -neɛ' "guɔkwɔmenya, "ne 'wa -wlɛ -neɛ' bɔbɔledɛ 'wɔ. -Ame -bholo 'mɔɔ -to lɔbhɔ ne 'wa 'yɔbhɔ -gbɔ 'wa "kɛ -ame 'lɔbhɔ me.

⁴ -See Lagɔ -sɛ "ɛ weli -wɛ keyi ne lɛ: 'E -kulɛ 'neɛ za 'nyakpa 'na glo 'umgbu 'na digbi kogbɔ mɔɔnɔ (7.000) -wa "ne lɛ Baale 'kokomini 'yliku 'pɔle- ne.

⁵ "Ɛ sɛbhele -wɛ yɛ -lɔ -dɛmeda, Lagɔ 'na 'nyakpa 'na 'yɛyuɛ -ye 'ɔ -tɔ -waleɛ "me -wɛ -ko 'ce lɔbhɔ -godogodo.

⁶ -Mɔ, Lagɔ 'koa -tɔ -walesɛku ne, 'ɛ "ne -kɛ -ye 'wa -no -wɛ za yɛ, sɔbhɔ 'ye 'ɛ kɛ nɛ -kɛ noɔ- ne, -a -ka nɛ Lagɔ 'na -waleɛ yle "fu.

⁷ -See 'ɛ sɛ bhɔ zɔ 'a? -Ye Izlayɛleyua 'tɛle 'siɛ -wɛ, 'wa "ne -yle, -mɔ, -ye Lagɔ -tɔ 'awɔ -wɛ -yle -lɔ "ɛ -ye 'wa 'tɛle 'awɔ 'siɛ -wɛ. -Bedia "ne 'awɔ 'ɛnɛɛ "me 'no -gbo 'ŋunu-. Lagɔ "tamaloa- 'yukwli "me -see 'wa te -kɛ "me 'no -wɛ.

⁸ "Naa-, Lagɔbɔgo nɛɛ: -Dɛme -nazɛ, Lagɔ 'pɔ- 'wanɛɛ "nɛnoɛ 'yla "me, 'ɔ 'gba- 'wanɛɛ 'yli "ku -se 'wa te -kɛ 'siɛ 'ye "ne Lagɔ 'gba- 'wanɛɛ 'yukwli "ku -se 'wa te -kɛ 'gbo 'no.

⁹ -Klɔgbɔnyɔ Davide bhulɛ -me 'lelee nɛɛ: 'Wanɛɛ -jajo lilɛ "zo 'wanɛɛ -gbotu, -se 'ɛ "zo 'wanɛɛ -sɔkɔ 'na -mee 'wa "kɛ bhli -wɛ, -se 'wa "kɛ "gbape!

¹⁰ 'Wa "zo 'yli 'gbeyinya -see 'wa te -bɛɛ' 'ylime 'ye gou! cicia 'wanɛɛ 'kulɛ "me -se 'ɛ te 'ce "me 'je gou!

¹¹ Zaa lo 'e 'yɔbhɔ -kɛ: Zufonya -bhli bhɔ -gbotu 'yli -godogodo 'na dɛ 'a? 'Bhɔ gou! -Mɔ, 'wanɛɛ 'ye 'wa "ne 'plome "zo -wɛ 'na 'ylime, -wa "ne zufonya 'waa -wɛ -yle -lɔ 'popoɛ. Sɔbhɔ za Izlayɛleyua, 'walua yua 'lelee -lɔ 'ylime -kamale.

¹² 'Wanɛɛ -ye 'wa "ne 'plome "zo -wɛ -nɛme -li 'na -li -glɔnya "ku, 'wanɛɛ "kukwileɛ "me, -wa "ne zufonya 'waa -wɛ -yle -lɔ -li 'na -li. Zaa, "ɛ zufonya kɛ 'ce "ɛ 'popoɛ -wɛ 'na -didi "me -ko gou ne -li 'na -li yi 'ce lɔbhɔ ple.

-Wa "ne zufonya 'waa -wɛ -yle 'popoɛ

¹³ -Dɛmeda, 'anye "ne zufonya 'waa -wɛ, 'anye 'ye 'e bhulɛle -lɔ. -Wa "ne zufonya 'waa -wɛ 'na Zezu 'na "kɔlepɔnyɔ 'ye 'e -noɔ -lɔ. "Ɛ libhɔ -ye 'e no ne, -ame 'ye 'ɛ 'kwa -lɔ 'ŋlu.

¹⁴ -Se "ɛ -ye 'e no ne "kɛ -a "nowlia "ne -a "nɔyoa zufonya 'ylime kamale-, -se "ɛ zufonya 'na -bedia "kɛ 'po.

¹⁵ "Naa-, -sɔɔdɛku Lagɔ 'bhoa- 'beku -wɛ, 'ɔyi -nyɛ -glɔnya "bhaa 'gbo 'wa -seliɔ -lɔ. Zaa, 'ɔ 'koa 'ce "kusɔ "klo -glɛle ne, -ɛ "kɛ 'ce bhɔ lɔbhɔ ylɛle? -Wa "ku- -wɛ "kɛ -lɔ zikpɛ "ku "kusɔ 'ylile-.

¹⁶ Tɛtɛfɔlɔ 'na 'cibhɛ kɛ Lagɔ -nɛ yɛ ne, 'ɔɔ 'bhe- -me 'lelee -lɔ "ɛ "fɔlɔ 'na -ɛ 'tuɔle- "ku gou -wɛ. "Ne sukplu kɛ Lagɔ -nɛ yɛ ne, "ɛ suklɛ -wɛ 'ɔnɛɛ yɛ -me 'lelee -lɔ.

¹⁷ Izlayɛle -ko sɛgbɛɛ 'gloglo su 'na "namanɔ -nyɔ 'na 'klɛ 'na -bedi 'wa 'di- "ku. -Eyi, -e -ko sɛgbɛɛ 'kwlɛ "me 'na -suklɛ, "ne 'wa yi -lɔ -eyi 'gloglosu yɔko glɛ-. -Dɛmeda, -e 'bhɛle- -se -e "kɛ 'ŋu -ɛ 'bhale 'ɛnɛɛ -kpulu "me -wɛ "ku 'libhi me "ɛ -suklɛ -wɛ 'wɔ 'nasɛ.

¹⁸ Zaa, te "kɛ -eyi "ku zia- 'klɛ 'wɔ 'yliku! -E 'yɔbhɔ -lalɛce -gbɔ -e "kɛ -eyi "ku zia-? -Mɔ, -mɔɔ "ne -kɛ -kpulu -su, -kpulu -su -kɛ -lɔ 'ɛyi.

¹⁹ 'E yi no nɛɛ: 'Wa 'di- -suklɛ "ku "ne 'wa 'yi -lɔ -ame -glɛ.

²⁰ 'Diɛɛ, 'wa 'di 'awɔ "ɛ -suklɛ -wɛ "ku, sɛko -wɛ 'dlekukɛleɛ "no 'awɔ "me -ko: "Ne -eyi, -e -glɛ su 'glɛ, sɛko -wɛ 'dlekukɛleɛ -ko -eyi "me zɛ. Zaa, te -eyi "ku zia-, -mɔ, 'gu 'ye -e "kɛ nɛ -lɔ 'gu.

²¹ "Naa-, Lagɔ kɛ 'gloglosu 'na 'klɛ "ku 'di-, 'ɛ kɛ 'se 'gloglosu 'nabhɛ yɛ -ce, Lagɔ 'bhɛle 'ɔ "kɛ 'ɛyi "ɛ -bhele -wɛ 'wli no.

²² Zaa, 'wolo "ku: Lagɔ -ko 'nɛne "ne 'ɔ 'kɛle yɔko. 'Ɔ 'kɛle yɔko -wa -bhli zɔ -wɛ za, 'ɔ -ko 'neɛ za 'nɛne, -e "kɛ 'ɔnɛɛ zikpɛ 'na "namanɔ "ku -ko, 'ɛ "mɔ -kɛ sɔbhɔ yɛ, 'wa yi 'lelee -eyi "ku 'di me sɛgbɛɛ suklɛ.

²³ -Mɔ, -zle -wɛ, zufonya kɛ 'dlekukɛlegbo 'ŋunu- ne, Lagɔ 'bhɛle- -se 'ɔ "koa "kusɔ su 'tilɔ "me 'glɛle-.

²⁴ "Naa-, -eyi 'kwlɛ "me 'na su 'na 'klɛ 'ye -e -noɔ -lɔ, "ne 'wa yi -lɔ -eyi "ku 'di-, "ne 'wa yi -lɔ -eyi 'gloglosu 'na 'klɛ 'glɛme glɛ, -neɛ' "bhaa 'wlo 'a "ne 'wlo-! Zufonya, 'wayi, 'wa -noɔ -lɔ 'gloglosu 'na 'klɛ 'waa. Zaa, Lagɔ 'bhɛle- -se 'ɔ "koa su 'tilɔ "me -dee 'wa 'gbale- 'kwɛle -wɛ glɛ cuu.

Izlayɛleyua yi 'ce 'popoɛ yle

²⁵ -Nyɔsɔwanye, Lagɔ 'na diɛweli -ɛ zizɔ- lɛ "ku ne, 'e 'cɛ 'anye sloa, -se 'a te kɛ 'dle 'pɔ -gbɔ 'ylimeyamalenya 'ye 'a -noɔ. Izlayɛleyua 'na -bedia "ne 'bhɛle- 'wa 'cɛ "me 'no, "ne 'ɛyi -wɛ yi 'ce "me -gwlɛ -kaa, "ne -wa "ne zufonya 'waa -wɛ "kɛ -lɔ Lagɔ lo 'yli-.

²⁶ Lɔbhɔ 'na dɛ -wɛ "ku Lagɔ yi 'ce Izlayɛleyua 'klekle 'fuɔ. Lagɔbɔgo 'na se 'ɛ lɛ yɛ -lɔ: 'Galuylisɛnyɔ, Sinyɔ, 'ye 'ɔ "kɛ 'ce -lɔ 'bhale-. "Ne 'ɔ "kɛ 'ce -lɔ Zakɔbo 'na -gligbɛnya 'na 'nyinyonoli 'na gbo 'bhia-.

²⁷ 'E "kɛ 'wanɛɛ 'nyinyonoli 'na gbo 'yi 'tale-, 'ɛɛ -noɔ -lɔ mɛnenoɛ -ye 'wayi 'wɔ "bhaa -a "kɛ no yɛ.

²⁸ 'Wa -sɛ 'Denaade 'na lo, 'ɛ za, 'wa "zo- -lɔ Lagɔ 'na -gblenya, 'anyɛɛ "namanɔ yɛ -lɔ. 'Ɛ -ko sɔbhɔ, "ne Lagɔ -toa 'awɔ -gbɔ 'wa "kɛ 'awɔ 'ɔnɛɛ yua "zo, Lagɔ -wa "ɛ yua -wɛ 'wa 'to 'wa 'to 'wɔ za.

²⁹ "Naa-, Lagɔ "ne libhile 'ɔnɛɛ -jɔlo -ye 'ɔ 'je kɔ -wɛ "kusɔ "ku, "ne 'ɔ "ne 'pɔ -ye 'ɔ la- -wɛ 'kwlɛ "me.

³⁰ -Watɔ -ce, 'a "ne 'awɔ Lagɔ 'plome "zo-, -dɛmeda, Lagɔ 'pɔ- 'anyɛɛ 'nyɛzedle, sɛko -wɛ, zufonya -sɛ 'awɔ Lagɔ 'plome zɛ.

³¹ 'Wanɛɛ dɛku, "ɛ sɛbhele yɛ -lɔ. -Dɛmeda, 'wa "ne Lagɔ 'plome "zo, -se Lagɔ "kɛ 'anyɛɛ 'nyɛzedle 'pɔ. Zaa, -dɛme, Lagɔ yi 'wanɛɛ 'nyɛzedle "pɔ.

³² Lagɔ 'taloa- 'yi 'klekle "ne 'wa yu -lɔ 'plome -sɛ, -se 'ɔ "kɛ 'wayi 'klekle 'ɔnɛɛ 'nyɛzedlekɛleɛ 'ylime tua-.

Lagɔ 'kpɔ

³³ Lagɔ 'kpɔ 'diɛɛ! 'Ɔnɛɛ 'ylimeyamaleɛ, "ne 'ɔnɛɛ 'dlepɔsɛ tlo 'diɛɛ "me kpɛnyee, 'nyɔkpɔ "ne 'bhɛle- "ne 'ɔ "kɛ 'ɔnɛɛ 'dlepɔsɛ yibhlele-, 'nyɔkpɔ "ne 'bhɛle "ne 'ɔ "kɛ 'ɔnɛɛ -ye 'ɔ no -wɛ "me 'no. Lagɔbɔgo nɛɛ:

³⁴ -Ɔ -yi bhɔ Anyinɛnyɔ 'na 'dlepɔsɛ 'a? -Ɔ "kɔ bhɔ 'de "me "zo 'a?

³⁵ -Ɔ 'nyɔ- bhɔ -bɛɛ' tɛɛ 'a? "Ne Lagɔ "kɛ bhɔ 'ɔnɛɛ 'beme "zo 'a?

³⁶ 'Diɛɛ, 'ɔyi 'ye 'ɛ 'bhale -lɔ "me 'klekle, 'ɔnɛɛ za 'ɛ -le -lɔ 'klekle, "ne 'ɔ 'bhe- -lɔ 'klekle, Lagɔ 'bhe- -lɔ 'ŋlu -godogodo! Amɛn!