Wlomɛnya 10 - Nouveau Testament bété de Gagnoa

Anyinɛnyɔ -bhele -wɛ 'ye zufonya "ne -wa "ne zufonya 'waa -wɛ -kɛ -lɔ

¹ -Nyɔsɔwanye, 'neɛ 'dle 'klekle zɔ -ye 'e 'yɔbhɔle Lagɔ -noɔ -lɔ -gbɔ zufonya "po.

² 'Diɛɛ, 'e yi no -gbɔ, 'wa si Lagɔ za "me, -mɔ, "ɛ "mesiɛ -wɛ, -bɛɛ' 'na yibhleleɛ 'na zle "ne 'le "ku.

³ 'Wa "ne -see Lagɔ "zoa 'nyakpa "meŋwinɛlenya -wɛ 'na weli "me 'no-, 'wa -tɛle -see 'nyakpa "kɛ 'wanɛɛ "meŋwinɛlesɛ slu klepaa -wɛ 'siɛ. -Soɔ 'wa -sɛ -lɔ Lagɔ 'na -gwe -ye 'ɔ bhli "ne 'ɔ ŋwinɛlea- 'nyakpa "me -wɛ 'na lo.

⁴ "Naa-, Klise -noɔ -lɔ Moyize 'na -Lɔ 'na "nenidɛ yɔ, zaa -dɛmeda, -wa -kɔ 'dleku 'klekle -wɛ, Lagɔ yua "meŋwinɛlenya "zoa-.

⁵ Moyize kɛ "meŋwinɛleɛ -ɛ 'bhale -Lɔ "me -wɛ 'na weli bhulɛ ne, 'ɔ nɛɛ: -Lɔ yi -ɔ "zo 'ɛnɛɛ gbagbɛ 'klekle 'plome -wɛ zikpɛ "nyɛ.

⁶ -Mɔ, -see 'ɔ bhulɛ "ɛ "meŋwinɛleweli -ɛ 'bhale 'dlekukɛleɛ "me ne lɛ: Te -kɛ 'dlezɔ bhulɛle- -gbɔ -ɔ "kɛ 'ce bhɔ "nɔgɔ "me 'gblɛ? -E kɛ "ɛ soɔ -gbɔ, 'ɛ -leɛ sɛne 'ye -e 'yɔbhɔ lo -gbɔ -ɔ "kɛ bhɔ Klise zɔ 'kwlia.

⁷ Te -kɛ 'lelee no -gbɔ: -Ɔ "kɛ bhɔ -glukonya 'glɛme "me 'a? -E kɛ "ɛ soɔ -gbɔ, 'ɛ -leɛ Klise 'ye -e sɛ 'lelee -glukonya glɛme.

⁸ Zaa, -see Moyize bhulɛ "meŋwinɛleweli Lagɔbɔgo "me ne lɛ: Bhulɛweli -ko -eyi yɔko, -neɛ' nuɛgwe "me, "ne -neɛ' 'dlezɔ. "Ɛ bhulɛweli ne, 'dlekukɛleweli -ye -a sɛle 'nyakpa -wɛ yɛ -lɔ.

⁹ -E kɛ 'nyakpa 'klekle 'yliku -yibhlele -gbɔ Zezu, Anyinɛnyɔ yɔ, "ne -e kɛ 'dleku -kɛ -gbɔ Lagɔ -sɔ -glukonya 'glɛme ne, -e yi "po.

¹⁰ "Naa-, -a "kɛ -anyɛɛ 'dle 'klekle "me 'dleku -kɛ, Lagɔ ŋwinɛlea -anye "me, -a "kɛ -diɛnadiɛ -anyɛɛ 'dlekukɛleweli 'nyakpa 'klekle 'yliku bhulɛle ne, 'ɔ 'fuɔ -anye.

¹¹ 'Diɛɛ, Lagɔbɔgo nɛɛ: -Wa -kɔ 'dleku -wɛ, zu -kɔa 'ce lɔbhɔ.

¹² Zaa, "me -seseliɛ "ne -wa -noɔ zufonya "ne -wa "ne zufonya 'waa -wɛ 'glɛme -ko. 'Wayi 'klekle Anyinɛnyɔ -bholo -kpee 'wa -kɛ -lɔ. -Wa lɔ 'klekle -wɛ 'ye 'ɔ 'je -lɔ 'ɔnɛɛ -li 'na -li kɔ.

¹³ Lagɔbɔgo nɛɛ: -Wa la Anyinɛnyɔ 'klekle -wɛ yi 'ce "po.

'Denaade 'na -sɛsɛɛ

¹⁴ -Mɔ, -see -e "kɛ bhɔ Anyinɛnyɔ -eyi lo lale- -e "mɔ 'dleku -kɛ 'a? "Ne -see -e kɛ bhɔ Anyinɛnyɔ 'dleku kɛle-, -e "mɔ 'ɔnɛɛ "kukoweli 'no- 'a? "Ne -see -e "kɛ bhɔ 'ɔnɛɛ "kukoweli 'no 'nyɔkpɔ "mɔ -eyi 'ɔnɛɛ 'de 'sɛle-,

¹⁵ "ne -see -e "kɛ bhɔ 'ɔnɛɛ 'de -sɛ, 'wa "mɔ 'ɛnɛɛ za -eyi -lebhe ne? 'Naa Lagɔbɔgo nɛɛ: -Wa sɛ 'Denaade -wɛ kɛ 'du ylɛ, 'ɛ -le 'ŋwana "ku.

¹⁶ -Mɔ, 'wayi 'klekle "ne "ɛ 'Denaade -wɛ 'plome "zo-. 'Diɛɛ, Ezayi -bhulɛ nɛɛ: Anyinɛnyɔ, -ɔ -kɛle bhɔ -anyɛɛ 'desɛweli 'dleku 'a?

¹⁷ -Ye 'nyɔkpɔ 'no- "me -wɛ "zoɔ -lɔ 'dlekukɛlenyɔ "ne -ye 'ɔ 'no- "me -wɛ, Klise 'na bhulɛweli yɛ -lɔ.

¹⁸ 'Ɛza, 'e 'yɔbhɔ -lɔ lo nɛɛ: Zufonya "ne bhɔ "ɛ bhulɛweli ne 'no- 'a? 'Wa 'no- -kɛ "me. "Naa-, Lagɔbɔgo nɛɛ: -A 'no- "guɔkwɔmenya 'na weli "me dodo 'kpɛtɛ ne "ku, "ne 'wanɛɛ bhulɛweli -me -kaa "ne 'ɛ 'sibhɔ- dodo 'na 'wlisɛledɛ "me.

¹⁹ 'Ɛza, 'e 'yɔbhɔ -lɔ lo nɛɛ: Izlayɛleyua "ne bhɔ "me 'no-? Lagɔ -bhulɛle "kle Moyize 'na 'nuɛgwe "me: 'E yi gbɔ "ne 'a yi -wa "ne kɔkɛkɛle- -wɛ lɔbhɔzo 'wli no. 'E yi gbɔ "ne 'a yi -gligbɛnya -wa "ne "nɛ- -wɛ kɛle yɔko "pɔle.

²⁰ "Ne Ezayi -bhulɛ "kwɛmetamale -sɛku Lagɔ 'na 'tɔ "me nɛɛ: -Wa "ne tɛle- nɛ -ame 'siɛ -wɛ, 'wayi -wɛ 'wa -yle -lɔ -ame. "Ne 'e yi -lɔ -wa "ne 'yɔbhɔle -ame -bɛɛ' -wɛ 'ayi 'ylime tua-.

²¹ -Mɔ, 'ɛ kɛ Izlayɛle 'na -gligbɛnya za yɛ, Lagɔ nɛɛ: Zle o -zle, 'e 'tua 'neɛ 'kwlɛ -gligbɛnya -wa "ne "zo 'plome "ne -wa "ne sɔbhɔ -ame 'yli -wɛ 'ylime.