Wlomɛnya 1 - Nouveau Testament bété de Gagnoa

Bhɛleweli

¹ -Ame, Pɔle, Zezu Kli 'na "kulɔbhɔnyɔ, 'e 'kɛle 'anye "ku, Lagɔ la- -lɔ -ame -se 'e "kɛ Zezu 'na "kɔlepɔnyɔ "zo, "ne 'ɔ "zo- -ame 'neɛ -tiaa 'dɛ, -se 'e "kɛ 'Denaade -sɛ.

² 'Ɛ 'Denaade ne, Lagɔ -ple 'ɛnɛɛ weli lɔbhɔ -gwlɛ "me, 'ɔnɛɛ "guɔkwɔmenya kɔ Lagɔbɔgo 'wɔ "me.

³ 'Ɛ bhulɛ 'ɔ Yowli 'na weli, 'nyɔkpɔ sɛku, 'ɔ 'to 'ɔ 'to Davide 'na -gligbɛ "ku 'wa 'gwɛlelo -lɔ.

⁴ Zuzu Wlewle "me, Lagɔ 'jilɛ- 'ɔnɛɛ 'bhɛloɛ 'ɔ Yowli "me. -Sɔɔdɛku, 'ɔ -sɔ -glukonya 'glɛme -wɛ. Anyinɛnyɔ Zezu Kli yɔ -lɔ.

⁵ 'Ɔyi "me, 'e -yle Zezu 'na "kɔlepɔnyɔ 'na "zo "zo -jɔlo. 'E "kɛ -gbɔ -se -glɔ 'klekle "ku 'na 'nyakpa -wa "ne zufonya 'waa -wɛ "kɔ 'dleku 'kɛle, -se 'wa "kɔ 'plome "zo.

⁶ 'Anye 'lelee, 'a -ko -me "ɛ 'nyakpa -wɛ lo, sɛko -wɛ, Zezu Kli la- -lɔ 'anye zɛ.

⁷ 'Anye 'klekle -wa -ko Wlɔmo -wɛ, Lagɔ -wa 'anye, "ne 'ɔ la- 'anye -se 'a "kɛ 'wlewle ko. -A To Lagɔ "ne Anyinɛnyɔ Zezu Kli 'pɔ 'anye 'ŋu, -se 'ɔ "nyɛ 'anye "kuwɛtɛ!

Pɔle 'yɔbhɔ -gbɔ 'ɔ "kɛ Wlɔmo 'na 'klecɛnya 'ylime 'ye ka me

⁸ "Kucidɛku, 'e bhɛle 'neɛ Lagɔ Zezu Kli "me 'ayi 'klekle za, sɛko -wɛ, 'wa bhulɛ 'anyɛɛ 'dlekukɛleweli dodo -kpɛtɛ ne "ku.

⁹ -Sɔɔdɛku, 'e -sɛ Lagɔ Yowli 'na 'Denaade -wɛ, 'e lɔbhɔ Lagɔ "ku 'neɛ 'dle 'klekle zɔ. "Ne 'ɔyi, 'ɔ -yi sɛ nɛɛ gbɛklɛklɛ -ye 'e bhulɛ -lɔ nɛɛ: 'E kɛ bhubhɔ ne, 'e 'sɔbhɔle 'ce 'anyɛɛ 'tɔ 'yiɛ,

¹⁰ "Ne 'e bhubhɔ Lagɔ "ne 'e "ne 'diɔle-, -se 'e -kɛ 'anyɛɛ moɔ yi, Lagɔ 'cɛ "ku 'ŋunu- ne.

¹¹ 'Diɛɛ, 'anyɛɛ -to lɔbhɔ -ame kpɛnyee, 'e 'yɔbhɔ -gbɔ 'e "kɛ 'anye 'ylime 'ye, -se Zuzu Wlewle 'na -jɔlo -ye 'ɔ 'nyɛ -ame -wɛ, 'e 'cɛ 'anye 'dlile, -se 'ɛ "kɛ 'anye 'kwɛme "tamalea-.

¹² "Ne -tia, -zle 'e kɛ 'ce 'anye yɔko -ylɛ, -a yi 'ce "me "tamale, "ne 'dlekukɛleɛ -ye -a -kɛle 'gɔme -wɛ yi 'ce -anye 'dleku "tamalea- 'klekle.

¹³ -Nyɔsɔwanye, 'a yibhlele- 'sɛ! 'E 'yɔbhɔ nɛ -gbɔ 'e "kɛ 'anyɛɛ moɔ "ku yiyile-, 'e "ne -no. 'E -kɛ nɛ 'dleku -gbɔ 'neɛ libhɔ yi nɛ bhi 'na -bhi tlo 'anyɛɛ moɔ, -see 'ɛ 'tlole- -glɔ -wɛ 'wɔ "ku -wɛ.

¹⁴ -E -noɔ glɛke -yu yɔ o, -e "ne glɛke -yu yɔ o, -e -plɛ suklu o "ne -e "ne suklu -plɛ o, -ye 'e "kɛ no -noɔ -lɔ 'e "kɛ 'Denaade 'nyakpa 'klekle -sɛle yɛ.

¹⁵ Zaa, 'e 'yɔbhɔ -gbɔ 'e "kɛ 'anye 'Denaade -sɛle, 'anye -wa -ko -me 'lelee Wlɔmo -wɛ.

'Denaade ne lɛ

¹⁶ 'E kɛ 'Denaade sɛ, -zu "ne lɔbhɔ -ame. 'Ɛɛ -noɔ -lɔ Lagɔ 'na 'bhɛloɛ -ɛ "kɛ -wa -kɛ 'dleku 'klekle fuɔ -wɛ yɛ, zufonya "bhuɔ, "ne -wa "ne zufonya 'waa -wɛ -ko -da -lɔ lɔbhɔ.

¹⁷ "Naa-, 'Denaade 'tua -ɛne, 'nyakpa 'klekle -wa -kɛ Lagɔ 'dleku -wɛ 'ylime, 'wanɛɛ 'dlekukɛleɛ 'ɛyikɔ -gbɔ -lɔ "ne 'wa yi -lɔ "meŋwinɛlenya "zo. 'Diɛɛ, Lagɔbɔgo "me sɛne 'wa lɛ -lɔ nɛɛ: -Ɔ "zo "meŋwinɛlenyɔ 'ɔnɛɛ 'dlekukɛleɛ za -wɛ, 'ɔ yi zikpɛ yle.

'Nyakpa 'klekle 'nyinyonolinonya 'waa -lɔ

¹⁸ Lagɔ -ko "nɔgɔ "me, "ne 'ɔ tua 'nyakpa 'ɔnɛɛ 'kɛle 'ylime, sɛko -wɛ, 'nyakpa, 'nyinyonolinonya 'waa -lɔ, "naa-, 'wa no "nyɛnye zɛ. 'Wanɛɛ nonolinyɛnye -wɛ za 'wa 'titi -lɔ gbɛklɛklɛ 'yliku.

¹⁹ 'Diɛɛ, -ye 'wa "kɛ Lagɔ za yibhlele- -wɛ, 'ɛ -ko gbɛklɛklɛ 'wanɛɛ dɛku. Sɛko -wɛ, Lagɔ -leloa -zle "ku.

²⁰ -See zikpɛ "mɔ 'awɔ 'wlɔ ne, Lagɔ 'na 'bhɛloɛ "ne -nɛnidɛ -kɛ, "ne 'ɔnɛɛ Lagɔkosɛ 'ɛ "ne 'yli -gɔ. -A kɛ 'ɔnɛɛ nonoli "ku wolo ne, 'ɛ 'noɔ "me gbɛklɛklɛ, "ne 'nyakpa 'na "nyɛzedlepɔsɛ "ne -la -le.

²¹ "Naa-, 'wa -yibhlele Lagɔ, -mɔ, 'wa "no 'ŋlu -kwa, "ne 'wa "no -bhɛle. "Naa-, -ye -a "kɛ nɛ Lagɔ za no -wɛ yɛ -lɔ. 'Wanɛɛ 'dlepɔsɛ "ne 'nɛne, "ne 'wanɛɛ "nanoɛ "ne gbɛklɛklɛ -ko.

²² 'Wa nɛɛ 'ylime 'wa -yɛ, -mɔ, 'wa "zo- "kukwɛnya.

²³ 'Wa "kɛ -kɛ 'ŋlu me Lagɔ -ɔ "ne "ku -wɛ bɔbɔ ne, -li -wɛ 'wɔ 'wa bɔbɔ -lɔ. "Ɛ -li -wɛ 'wɔ, 'nyɔkpɔ -ɔ "ku -wɛ, 'zea, 'nɛmea -wa "nɔŋole bho -mɔɔnɔ 'yli -wɛ, "ne bɛbɛ -nɛmea -wɛ 'wɔ, 'wanɛɛ zuzu 'wa bɔbɔ -lɔ.

²⁴ 'Ɛza, Lagɔ "taloa- -lɔ 'yi "ne 'wa yi -lɔ -li -nyɛnye -ye 'wa 'yɔbhɔ -wɛ no. "Ne "ɛ -soɔ, 'wayigɛsɛ 'na ku 'wa pla -lɔ 'fe zusɛ.

²⁵ 'Diɛɛ 'na Lagɔ -wɛ 'ye 'wa -zigbalea -lɔ "fu 'na Lagɔ "me. 'Wa bɔbɔ "ne 'wa lɔbhɔ -ye Lagɔ 'wlɛ -wɛ "ku, 'Wlɛnyɔ 'na bhulɛ "me. 'Ɔɔ 'bhe- lɔ 'ŋlumeɛ -godogodo! Amɛn!

²⁶ 'Ɛza, Lagɔ "taloa- -lɔ 'yi "ne 'wa yi -lɔ -ɛ 'lɔbhoa -zu -wɛ gɛlele-. 'Wanɛɛ 'ŋwenea -nyɛ 'widia "bhaa 'wa "ne go -da, -mɔ, 'wa -nyɛ 'ŋwenea 'na -vinoa 'wɔ "bhaa "ne 'wa go -lɔ, -ye 'wa no "ɛ -soɔ -wɛ, -bɛɛ' 'na 'ye 'wa "ne no zikpɛ ne "ku yɛ -lɔ.

²⁷ "Ɛ -bhele -wɛ 'ye 'widia no -lɔ. 'Wa -nyɛ 'ŋwenea "bhaa 'wa "ne go -da, -mɔ, 'ŋuto- 'koa 'lɔbhɔ ne, 'wayi 'na 'kpakpɛ "ne 'wa go -lɔ, -ɛ -le 'zu "ku! Soɔ 'ye 'wayi 'nabhɛ -yle -lɔ 'kleyeɛ -ye 'wanɛɛ -kosɛ -nyɛnye -nɛmoa "ku -wɛ.

²⁸ 'Wa "ne 'yɔbhɔ -gbɔ 'wa "kɛ -kɛ 'se Lagɔ yibhlele- za, Lagɔ "taloa- 'yi "ne 'wa yi -lɔ 'wanɛɛ 'dlepɔsɛ -nyɛnye -wɛ gɛlele-, "ne 'wa no -lɔ -ye 'nyɔkpɔ -ka no -wɛ.

²⁹ -Li 'klekle -ɛ "ne 'nɛne -wɛ -koa "me. 'Wa no "nyɛnye. -Ɛ -noɔ 'walua -nɛ yɛ -wɛ 'wa 'yɔbhɔ -lɔ, 'wa -ko konyinɛ "me, lɔbhɔzɔnoɛ yua- "ku -kpakpa. 'Wa 'lɔbhɔ 'nyakpa "ne 'wa "ku, 'wa no gbo, 'wa no 'walua ylo, 'wa no -ye 'wa 'yɔbhɔ -wɛ. 'Wa wlɛle 'nyakpa yo yɔko.

³⁰ "Ne 'wa bhulɛ 'walua 'na "ku 'na welinyɛnye. Lagɔ 'na -gblenya 'waa -lɔ, 'wa 'yli- 'walua, 'wa 'bha, 'wa zia 'wayi "ku, 'wa -bhɛme 'wa "kɛ "nyɛnye no. 'Wa "ne "zo 'wanɛɛ gwɛlenya 'plome.

³¹ 'Wa "ne "nɛ-, 'wa "ne "zo 'wanɛɛ weli -ye 'wa -ple -wɛ 'plome, gbo "ne ploa, "ne 'wa "ne nyɛzedle -kɛ.

³² 'Ɛ -ko sɔbhɔ "ne 'wa -yi -see Lagɔ 'bhlele 'nyɔkpɔ gbo. -Wa no "ɛ soɔ -wɛ, 'kwiɛ -ŋwa -lɔ "ku. "Ɛ -li -ye 'wa no -wɛ, 'ɛyikɔ 'ye 'ɛ "ne -noɔ, -mɔ, 'wa 'ŋunule me 'ɛnɛɛ nonya!