Tite 3 - Nouveau Testament bété de Gagnoa

-See 'klecɛnyɔ "kɛ 'ɔyi slu- ne lɛ

¹ Luɔle 'wayi 'klekle 'dle -gbɔ 'wa 'kwlialea- 'wayi "ku, "cifia "ne 'kamalenya 'yliku, 'wa "zo 'plome, -se 'wa no -li 'na -li.

² 'Wa te 'nyɔkpɔ 'yli-, 'wa te gbo no, 'wa namale- 'dleku, 'wa 'kɛle- 'dle -wɔtɛ "me 'nyakpa 'klekle za.

³ "Ne -anye 'lelee, bhlɛme, -a "ne 'awɔ "nɛ-, 'kpokponya 'ye -a -noɔ 'awɔ -lɔ, "kwlɛ -a -bhli 'awɔ -lɔ, -li 'klekle -ɛ "ne 'nɛne -wɛ 'ye -a no nɛ -lɔ, "ne -a -noɔ 'awɔ -lɔ konyinɛnya 'waa, "ne -a tu 'awɔ -lɔ -alua 'na -li "ku, "ne -a -gblegblele 'awɔ -lɔ, "ne -a no 'awɔ -lɔ -li -nyɛnye.

⁴ -Mɔ, -anyɛɛ Fuɔnyɔ Lagɔ -tua 'ɔnɛɛ 'dlekunanoɛ "ne 'ɔnɛɛ 'ŋwɛnɛ 'nyakpa 'ylime.

⁵ "Ne 'ɔ yi -lɔ -anye fuɔ, 'ɛ "ne -kɛ -anyɛɛ -li 'na -li -ye -a no -ayigɛsɛ -wɛ za yɛ. -Mɔ, -see 'ɔ -kɛ -nyezedle za yɛ -lɔ. 'Ɔnɛɛ -ye 'ɔ -gwɛlele -anye "kusɔ -wɛ "zoa- -lɔ -anye 'wlele. "Ne Lagɔ yi -lɔ -anye zikpɛ 'na 'lele 'nyɛ Zuzu Wlewle "me.

⁶ Lagɔ -ŋwɛnea -anye "ɛ Zuzu Wlewle ne "ku, -anyɛɛ 'Fuɔnyɔ Zezu Kli "me.

⁷ -Se 'ɔnɛɛ -jɔlo -wɛ "kɛ -anye "meŋwinɛlenya "zoa- Lagɔ 'yliku, -se 'dlekukɛleɛ "me, -a "kɛ zikpɛ -ɛ -ka "kubhiɛ -wɛ yle -me.

Pɔle "zo Tite 'de "me

⁸ "Ɛ weli ne, 'ɛ -kɛ 'dleku kɛle- -sɛ. 'Ɛza, 'e 'yɔbhɔ -lɔ -gbɔ 'fo 'yukwli 'tee, -se 'nyakpa 'klekle 'na -wa -kɛ Lagɔ 'dleku -wɛ "kɛ 'wayi "kɔ 'tɔtɔle- -se 'wa "kɛ -li 'na -li no. -Bɛɛ' 'na -bɛɛ' -ɛ "kɛ 'nyakpa 'klekle kwɛle- yɛ -lɔ.

⁹ -Mɔ, te kɛ "fu -li -wɛ 'wɔ "me 'veɛ: -Sɛgbɛɛ -a 'to 'wa 'to 'wɔ 'na ŋeyi 'na zɛlezɛleɛ, gbonoɛ, Moyize 'na -Lɔ 'na "kukpɛleɛ -wɛ 'wɔ, 'ylile- guɔ: 'Ɛ "ne -bɛɛ' "me -ko, "ne "fu yɛ -lɔ.

¹⁰ 'Nyɔkpɔ 'na 'ɔ 'cicia Lagɔ 'na weli kɔ "ne 'ɔ 'dlidlile 'klecɛnya "me -wɛ, bhulɛlo "ku bholo, "kusɔ 'na dɛ. 'Ɔ "mɛ "me no ne, ylialeɔ -eyi 'guɔ.

¹¹ -E -yi sɛ, "ɛ soɔ 'na 'nyɔkpɔ -wɛ, -gwe -nyɛnye 'ye 'ɔ bhli -lɔ, 'nyinyonolinonyɔ yɔ -lɔ, 'ɔyi 'ye 'ɔ "pɔ -lɔ -jiɛ "me.

Pɔle 'na 'bebhiɛleweli

¹² 'E "mɔ -eyi Aletemase "ku -lebhele ne, 'e yi -eyi Tisike "ku lebhele-. -Mɔ -eyi "pulɔ "bhle, -se ylele- -ame Nikopolise -du "me. Lɔbhɔ 'ye 'e no -lɔ -gbɔ 'e "kɛ wɔtlɔ yi dɛku ko.

¹³ Zolea- -kɛ Zenase, gbobhlenyɔ "ne Apolɔse 'na -gloku -mee 'wa "kɛ me -wɛ 'na weli 'yli "ku 'tee. No kɛ -see -bɛɛ' 'toa -kɛ kɔ bɔ -wɛ 'na -li.

¹⁴ "Nowlia -nyɛ "nɔyoa 'wɔ -wa -noɔ 'klecɛnya -waa -wɛ, 'wa ciɛ -li 'na -li 'na nonoɛ, -se 'wa "kɛ 'walua kwɛle- 'wa kɛ kplɛkplɛɛ "me -ko ne, -mɔ, 'wa te "fu 'sɔ "me plaplalea-.

¹⁵ 'Nyakpa 'klekle -nyɔ 'wɔ "bhaa -a -ko "ɛ mɛne 'bhɛle- -eyi. Bhɛle- -me 'lelee -anyɛɛ 'titoa -nyɔ 'wɔ "bhaa -a -kɛ Lagɔ 'dleku -wɛ. Lagɔ 'pɔ 'anye 'ŋu 'klekle!