Tite 2 - Nouveau Testament bété de Gagnoa

"Yitia 'na 'demezoɛ

¹ -Mɔ, -eyi Tite, sloa -ɛ -noɔ Lagɔ 'na "kukoweli yɛ -wɛ -kpee.

² -Se bhulɛle 'nyakpa 'na -wa gɔ- -wɛ -gbɔ -li 'klekle "me 'wa mana "me. -Se 'wa no 'plome -zo -li, -ye 'wa bhulɛ -wɛ, 'ɛ me 'dleku 'tee. -Se 'wanɛɛ 'dlekukɛleɛ "tamale- "me, 'wa wale -se 'wa 'piɛ -kɛ "bhle 'dle.

³ 'Ɛ ko me "ɛ sɛbhele -wɛ, 'ŋwenea 'na 'wa gɔ- -wɛ 'na dɛku, 'wa slu 'wanɛɛ zikpɛ 'tee -see 'ɛ "kɛ Lagɔ -gɛ 'namale -wɛ, 'wa te 'walua 'na weli -nyɛnye bhulɛ, 'wa te no 'na 'juyua "zo, 'wa sloa -ɛ 'nɛne -wɛ.

⁴ -Se 'wa sloa me 'ŋwenea -digbia, 'waluwlia 'wɔ 'na -wamalesɛ, "ne 'wanɛɛ yua 'na -wamalesɛ,

⁵ -se 'wa "kɛ 'nyakpa 'na -wa 'piɛle 'wayi "ku "ne -wa -ko 'wlele -wɛ "zo. -Se 'wa "zolea- -kɛ 'wanɛɛ -bhudu "me 'yliku, -se 'wa no wamale wamale -li, -se 'wa "zo 'waluwlia 'wɔ 'plome. 'Ɛ kɛ soɔ -ko ne, 'wa -ka -la Lagɔweli diziɛ-.

'Teyigba 'na 'kwɛmetamalea weli

⁶ Tite, "tamalea- me -kɛ 'teyigba 'kwɛme, -se 'wanɛɛ -kosɛ "kɛ -kɛ 'yliku "me 'tee.

⁷ -Li 'klekle "me, -tua -neɛ' -kosɛ "namanɔ 'nyakpa 'ylime. 'Ɛ -noɔ -lɔ -gbɔ ko 'tee, -se -neɛ' sloasɛ ko 'tee.

⁸ -Neɛ' bhulɛweli 'je "me 'tee, -see 'wa 'toa -kɛ -sɛ. -Se -anyɛɛ -gbhlenya te -kɛ weli -nyɛnye -ye 'wa "kɛ -anye bhulɛle -wɛ yle, -se zu "koa lɔbhɔ.

'Juyua

⁹ 'Juyua 'wa 'kwlilea- 'wayi "ku 'wanɛɛ "bhenya 'yliku 'wanɛɛ nonoli 'klekle "me, -se 'wa -tɛle -see 'wa "kɛ 'wanɛɛ "bhenya -gɛ 'namale- "ne 'wa -ka "slɛ -wɛ siɛ.

¹⁰ 'Wa te -kɛ 'wiyli, -se 'wa ko -kɛ -kpee -godogodo, -see 'wanɛɛ "bhenya "koa -kɛ 'dleku -kɛle -wɛ 'nasɛ. -Se nonoli 'klekle "me, 'wa "kɛ -kɛ 'Fuɔnyɔ Lagɔ 'na sloaweli 'ŋlu kwa-.

Zezu 'na wosɛ

¹¹ "Naa-, Lagɔ tua 'ɔnɛɛ -waleɛ -ɛ "kɛ 'nyakpa 'klekle 'fuɔ -wɛ 'ylime.

¹² 'Ɛ 'ŋwɛnɛ -wɛ 'sloa -lɔ -anye -gbɔ -a 'bha- -kosɛ -nyɛnye, "ne zikpɛ ne "ku 'na -li 'ye 'dle -glɛglɛ -wɛ "bhaa 'beku, -se -a "kɛ -kɛ "nane sɛku zikpɛ ne "ku -ko me, "me ŋwinɛleɛ "me, "ne Lagɔ 'na 'dletɛleɛ "me.

¹³ 'A -ya no "ɛ -li -wɛ 'wɔ -kaa -se zle "namanɔ -ye -a tɛle- 'dle -wɛ "kɛ 'ce yi. "Ɛ -zle -wɛ, Lagɔ "yitɔ, "ne "Bhenyɔ Zezu Kli 'wa "kɛ 'ce -lɔ 'wayi -klɔgbɔsɛ 'nyakpa 'ylime 'tua.

¹⁴ 'Ɔ -ple 'ɔnɛɛ zikpɛ -anyɛɛ za, -se -anyɛɛ 'nyinyonoli 'na gbo "kɛ bhiɛ. 'Ɔ 'yɔbhɔ nɛ -gbɔ 'ɔ "kɛ nɛ -anye -zakpɛ -bholo "me 'wlewle "zoa-. 'Nyakpa -wa "kɛ 'ɔnoa "zo- -wɛ, -wa -ko lɔbhɔ -godogodo -se -wa "kɛ -li 'na -li no.

¹⁵ Soɔ 'ye -e "kɛ -lɔ bhulɛ, 'titliloa- -kɛ 'yukwli "me, te "gu, -mɔ, bhulɛloa -ye 'wa no "ne 'ɛ "ne 'nɛne -wɛ 'na weli. -Se te 'nyɔkpɔ 'yi 'tale, -se 'ɔ te -kɛ -eyi yua sɛ slu.