Tite 1 - Nouveau Testament bété de Gagnoa

Pɔle bhulɛle Tite

¹ -Ame Pɔle, Lagɔ 'na "kulɔbhɔnyɔ "ne Zezu Kli 'na "kɔlepɔnyɔ 'ye 'e -noɔ -lɔ. 'Ɔ -sɛ -lɔ -ame lɔbhɔ -se 'e "kɛ Lagɔ 'na 'nyakpa -ye 'ɔ -tɔ -wɛ 'dlekukɛleɛ kɔme- -se 'wa "kɛ gbɛklɛklɛ yibhlele-, -se 'wa "kɛ Lagɔ 'dle 'tɛle.

² -Se 'wa "kɛ zikpɛ 'na -ɛ -ka "kubhiɛ, "ne Lagɔ -ɔ "ne yo -kɛ no -gbɔ 'ɔ "kɛ -anye kɔ 'je -wɛ 'dleku kɛle- -godogodo -dee 'wa -na 'awɔ zikpɛ 'wlɛ -wɛ.

³ 'Yli -ye 'ɔ di- -wɛ -ylɛ lɛ ne, -anyɛɛ Fuɔnyɔ Lagɔ 'na weli -ye 'ɔ -bhulɛle -ame -gbɔ 'e -sɛle -glɔnya -wɛ, 'ɛyi 'ye 'e sɛloa lɛ.

⁴ Tite, -eyi 'ye 'e 'kɛle lɛ "ku. 'Neɛ yu 'gbaa 'ye -e -noɔ -lɔ 'dlekukɛleɛ -ɛ -gbɔ "ne -a -kole "ku -wɛ "me: Zaa, To Lagɔ "ne -anyɛɛ 'Fuɔnyɔ Zezu Kli 'na 'tɔ "me, yle -jɔlo "ne "kuwɛtɛ.

Lagɔgligbɛ 'na 'yukugɛlenyɔ 'na -see 'ɔ "kɛ 'ɔyi slu

⁵ 'E kɛ -eyi 'ŋusuɛledu Klɛte -tle, "ne -e kɛ "bhle 'na zakpɛ 'wli jijale -kɔ bhiɛ, me -se -e "kɛ 'duku 'duku 'na "yitia -duku 'jilɛ, -see 'e no -gbɔ 'sɛ -wɛ.

⁶ 'Nyɔkpɔ 'na -ɔ -gɛ lagɔgligbɛ 'yuku -wɛ, 'ɔ te -kɛ nuɔsɔbhɔledɛ -kɛle gou, 'ɔ kɛle -kɛ 'ŋɔnɔ -bholo, -se 'ɔnɛɛ yua "zo -kɛ 'klecɛnya, -se 'wa te -kɛ 'gbeyi "ku ko, -se 'wa te -kɛ 'nyakpa 'plome -sɛ.

⁷ "Naa-, -ɔ -gɛ Lagɔgligbɛ 'yuku -wɛ, 'ɔ "ne kɛle- -da nuɔsɔbhɔledɛ kplokplo, -see 'ɔ -gɛ Lagɔgligbɛ 'yuku -wɛ za: 'Ɔ te -kɛ "bhabhanyɔ, "kɛlenyɔ, nogbinɔmɔnyɔ, 'gɔlegwenyɔ "zo, -se 'ɔ te "kɛ 'lelee 'dlasi -vi "me "ku libhile.

⁸ -Mɔ, 'ɔ yibhlele- -kɛ 'nyakpa 'na "sa sɛ, -se 'ɔ 'wamale- -kɛ -ɛ 'nɛne -wɛ, -se 'ɔ slu -kɛ 'ɔyi 'tee, -se 'ɔ ŋwinɛle- -kɛ "me, -se 'ɔ -ko -kɛ 'wlewle, -se 'ɔ yibhlele- -kɛ 'ɔyi 'na "ku piɛle sɛ.

⁹ -Se Lagɔweli -ye 'wa -sloɔ -wɛ, 'ɔ te -kɛ visɛ slu, -mɔ, -see 'wa -sloɔ -kpee -wɛ sɔbhɔ 'ye 'ɔ -na kɛle -kɛ kɔ. Lɔbhɔ 'na dɛku, 'ɔ yi -ɛ -noɔ gbɛklɛklɛ yɛ -wɛ sloa. -Se 'ɔ "kɛ -wa -noɔ Zezu Kli -noa 'waa -wɛ 'kwɛme "tamalea-. -Se 'ɔ "kɛ -wa "ne 'yɔbhɔ 'ɔnɛɛ sloasɛ -wɛ 'ylime 'tua -gbɔ 'ɔ -na 'gbi 'to.

'Sloasɛ -nyɛnye

¹⁰ Zufonya -wa noɔ 'klecɛnya 'waa -wɛ 'glɛme 'na 'nyakpa -kwleyia 'wa "ne 'yɔbhɔ -gbɔ 'wa "kɛ -diɛnadiɛ 'na sloasɛ gɛlele. "Ne 'wa no 'nyakpa ylo "ne 'wa bhulɛ 'ye 'wa 'yɔbhɔ -wɛ.

¹¹ Zaa, 'a "gba 'se 'wanɛɛ nuɛ "ku. "Naa-, -gligbɛnya 'wa sɛ -lɔ 'dlekukɛleɛ 'na -gwe "ku, "ne 'wa sloa -lɔ -ye 'wa -ka no -wɛ, -se 'wa "kɛ -kɛ -vi "me 'dlasi "ku libhile.

¹² 'Wanɛɛ 'glɛme 'na "guɔkwɔmenyɔ "yitɔ -bholo nɛɛ: «Klɛte 'na 'nyakpa, -godogodo 'na yowlɛnya 'wa -lɔ, 'wa -ko -konyinɛ "me kpɛnyee, 'wanɛɛ 'mene 'ɛyikɔ 'wa 'pɔ -lɔ "ku 'dle, "ne 'wa 'gble-!»

¹³ Zaa, -ye 'wa bhulɛ ne, 'diɛɛ yɛ -lɔ. 'Ɛnɛɛ za, 'a bhulɛloa 'kpokposɛ -se 'wa "kɛ 'dlekukɛleɛ -ɛ -ko 'wlewle -wɛ yle.

¹⁴ 'Wa te -kɛ Zufonya 'na bhlɛgɔgɔweli -ɛ "ne 'gbaa "me -ko -wɛ 'dle "tɛle, -se 'wa te -kɛ 'lelee 'nyakpa -wa -glɛ gbɛklɛklɛ keyi -wɛ 'na gbagbɛ 'plome "zo.

¹⁵ -Li 'klekle -ko 'wlele, -wa -ko 'wlele -wɛ za. -Mɔ, -wa "ne 'wlele -ko -wɛ, "ne -wa sɛ 'dleku kɛle -lo -wɛ, -bɛɛ' "ne -la 'wanɛɛ dɛku 'wlele -ko. -Mɔ, 'wanɛɛ "nanoɛ, "ne 'wanɛɛ 'dlepɔsɛ 'nabhɛ -kɛ 'fe.

¹⁶ 'Wa no -lɔ -gbɔ 'wa -yi Lagɔ, -mɔ, 'wanɛɛ nonoli "me, 'wa "ne lagɔnya 'wlole-. 'Wa "ne "klo wolo -sɛ -kɛ, 'wa "ne "zo 'plome "ne 'wa "ne no -li 'na -li.