Filemɔ 1 - Nouveau Testament bété de Gagnoa

Bhɛleweli

¹ -Ame Pɔle, Zezu Kli 'na -jiɛnyɔ, "ne Timote -a "nɔwli "bhaa, -eyi, Filemɔ -a -wale, -nyɔ "bhaa -a nole libhɔ "ku ne, 'ye -a 'kɛle lɛ "bɔgo ne "ku,

² "Ne Lagɔgligbɛ -ɛ "zole -neɛ' -bhudu "me 'wli -wɛ, -a "nɔyɔ Apia 'ɔ -nyɛ Alekipe -anyɛɛ 'togwe -zakpɛ "me 'na 'nɔŋonyɔ:

³ -A To Lagɔ "ne Anyinɛnyɔ Zezu Kli "nyɛ 'anye -jɔlo -nyɛ "kuwɛtɛ "bhaa.

Pɔle 'bhɛle- Lagɔ, Filemɔ 'na 'dleku -kɛle -za

⁴ -Se 'e 'bhubhɔ 'ce 'yiɛ -wɛ, 'e 'pɔ -eyi "ku 'dle Filemɔ "ne -e bhɛle -lɔ 'neɛ Lagɔ;

⁵ 'Naa-, 'e no -see -e -kɛ 'wlewlea 'klekle 'na 'ŋwɛnɛ "me, "ne -see -e -kɛ Anyinɛnyɔ Zezu 'dleku.

⁶ 'E 'bhubhɔ Lagɔ -se 'dlekukɛleɛ -ye -a -gbɔle "ku -wɛ, -ɛ tlo 'bhi -na -bhi. 'Tua -anye 'nɛne 'klekle 'ylime -ye -a 'bhɛle- "ne -a "kɛ no, "ne -a "kɛ Klise "ku lɔbhɔ -wɛ.

⁷ "Nɔwli, 'ŋwɛnɛ 'lɔbhɔ- -ame "yitɛ "ku, "ne 'ɛ "tamalea- -ame "kwɛme, sɛko -wɛ, -neɛ' 'ŋwɛnɛ -ye -e -kɛ 'wlewlea za "me -wɛ "zoa -nyɔŋo "me.

Pɔle bhubhɔ 'ɔ 'tito Filemɔ -gbɔ 'ɔ libhi Onezime "ku

⁸ 'E 'yɔbhɔ -gbɔ 'e "kɛ -eyi -bɛɛ' 'yɔbhɔle. Zezu Kli "me 'e -yele kɔ -se 'e "kɛ -eyi -ye -e "kɛ no -wɛ sloa.

⁹ -Mɔ, -waleɛ 'na 'ylime, 'e 'yɔbhɔ -gbɔ 'e "kɛ -eyi zlɛ. Sɛko -dɛme ne, -diɛɛ, -ame Pɔle, -nyɛbhlogɔgɔ 'mɔɔ -ko -dɛme -jiɛ "me Zezu Kli za ne,

¹⁰ 'e zlɛ -eyi Onezime za, 'ɔ "zo- -ame Yowli 'mɛne -jiɛ "me.

¹¹ -Watɔ 'ce, -e "no nɛ -bɛɛ' "me -ylele, -mɔ, -dɛmeda, 'ɔ -ko -bɛɛ' "me -anye "sɔ za.

¹² -Dɛme, 'e sɔbhɔlo -eyi yɔko 'wli, 'ɔyi, -ɔ -noɔ 'na 'dle 'na 'pɛɛ yɔ.

¹³ 'E 'yɔbhɔ nɛ -gbɔ 'e "kɔ 'ayi yɔko kulɛle- -se 'ɔ "kɛ nɛ -kɛ -ame "ku lɔbhɔ -neɛ' bhulɛ "me -dee 'e -ko -namlɛ 'Denaade za -jiɛ "me ne.

¹⁴ -Mɔ, 'e "ne 'yɔbhɔ nɛ -gbɔ 'e "kɛ 'neɛ -tiaa -bɛɛ' no, -e "mɔ "ku 'ŋunu- ne, -li 'na -li -ye -e "kɛ no -wɛ, 'e -na -kɛ no -gbɔ 'no klepaa, -mɔ, nole- 'dlewɔtɛ "me.

¹⁵ Onezime 'bha- -lalɛce -eyi yɔko 'tekeyi, -se 'ɔ "kɛ -eyi yɔko yi -godogodo 'na dɛ.

¹⁶ -Mɔ, -dɛmeda, 'ɔ "ne -ka -la "fu 'na 'juyu yɔ, 'ɔ 'zi 'juyu "ku, "nɔwli -ɔ -kɛ 'dle kɔ yɔ -lɔ. 'Ɔ -kɛ 'na 'dle kɔ kpɛnyee, -mɔ, -eyi, -e yu -wamale "ne 'ɛ yi lɔbhɔ "ple, "naa-, -see 'ɔ -noɔ 'nyɔkpɔ yɔ, "ne 'ɔ "zo- 'klecɛ -wɛ za.

¹⁷ Zaa, -e 'cɛ 'dleku -kɛ -gbɔ -neɛ' 'tito 'ye -e -noɔ ne, 'sɔ kɔ sɛgbɛɛ -ame 'nabhɛ.

¹⁸ -Neɛ' -bɛɛ' 'ye 'ɔ kɛ nɛ -kɛ -nyimɔ, "ne -neɛ' 'gɛgbo 'ye 'ɔ kɛ nɛ -kɛ, 'ɛ "zo 'neɛ 'wlime -nɛ.

¹⁹ -Ame, Pɔle 'ayigɛsɛ 'ye 'e 'kɛle lɛ "ɛ "bɔgo ne 'neɛ kwlɛ nu: -Ame Pɔle, 'mɔɔ 'cɛ -lɔ 'beme "zo. 'E -na -kɛ -eyi 'luɔ-, -e -yi 'lelee sɛ -gbɔ -e -kɛ 'na gbo. -Mɔ, -eyi 'nabhɛ, 'neɛ gbo -ye -e -kɛ -wɛ -neɛ' zikpɛ yɛ -lɔ.

²⁰ Zaa, "nɔwli, 'e bhubhɔ -eyi, kwɛle- -ame Anyinɛnyɔ 'na 'ylime. "Tamalea- -ame 'dleku Klise 'na "ku -koleɛ "me.

²¹ -Ye 'e 'kɛle ne, 'e -kɛ 'dleku -gbɔ -e 'yi no, -e 'yi no "ne 'ɛ yi lɔbhɔ "ple.

²² -Dɛme ne, -sɛ -kɛ lɔbhɔ 'neɛ -plɛdɛ. 'E 'pɔ 'dle -gbɔ 'anyɛɛ bhubhɔweli kɔ, 'e yi "kusɔ 'anyɛɛ moɔ yi.

Bhɛleweli 'na 'bebhiɛle nɛ

²³ Epaflase -nyɔ "bhaa -a -ko -jiɛ "me Zezu Kli za -wɛ, bhɛle -eyi.

²⁴ Malke, Alisetake, Demase "ne Luke -nyɔ 'wɔ "bhaa -a no libhɔ -wɛ bhɛle 'anye.

²⁵ Anyinɛnyɔ Zezu Kli 'na -jɔlo ko 'anye "ku.