Nonoli 6 - Nouveau Testament bété de Gagnoa

'Wa -sɛ lɔbhɔ 'nyakpa -gbɔsɔ -se 'wa "kɛ "kɔlepɔnya kwɛle-

¹ 'Ɛ dɛ -wɛ "ku, Zezu 'na gɛlenya zimale 'awɔ 'yiɛ. "Ne 'dlekukɛlenya -wa gbɔ 'glɛkegbo -wɛ "pɔle- 'awɔ -lɔ -wa gbɔ Eble -gbo -wɛ kɛle yɔko nɛɛ: «-Se 'a dli 'ce 'yiɛ- -wɛ, 'a dlu -anyɛɛ "kwiziŋwenea "ku.»

² 'Ɛza, "kɔlepɔnya -kogbɔ "sɔ -wɛ la- 'awɔ -lɔ Zezu 'na gɛlenya 'klekle. Ŋwɛnɛɛ: «Lilɛ -dli -za, -a "ne 'bhɛle- "ne -a "kɛ Lagɔweli 'na -sloasloɛ 'yi 'tale.

³ -Mɔ, -nyɔsɔwanye, 'anye 'glɛme, 'a 'be "bhle 'nyakpa -gbɔsɔ -nyɔ -wanɛɛ 'de 'nyakpa sɛ 'tee -wɛ, "ne -ye Zuzu Wlewle 'yiɛ- "ku "ne 'wa -yɛ 'ylime -wɛ, -se 'wa "kɛ -da "ɛ lilɛ ne dli-,

⁴ -se -anye -a "kɛ bhubhɔweli -nyɛ Lagɔweli "bhaa 'na libhɔ "me ko 'ɛyikɔ.»

⁵ "Ɛ weli -cibhɛ -wɛ -leloa 'awɔ 'ŋwɛnɛ "ku 'klekle. "Ne 'wa yi -lɔ lɔbhɔ Etiɛne -sɛ. 'Ɔ -noɔ 'awɔ 'dlekukɛlenyɔ yɔ, "ne Zuzu Wlewle 'yiɔ- 'awɔ "ku. 'Wa -sɛ -me 'lelee lɔbhɔ Filipo, Plokɔle, Nikanɔle, Timɔɔ, Palemenase "ne Nikola. "Ɛ Nikola -wɛ, Atiɔse -du "me 'na 'nyɔkpɔ yɔ 'awɔ -lɔ, "ne 'ɔ bhubhɔ nɛ -lɔ zufonya 'nasɛ.

⁶ "Ɛ 'nyakpa -gbɔsɔ ne, 'wa yua -lɔ "kɔlepɔnya 'ylime tua- -ka me. "Ne "ɛ "kɔlepɔnya yua -lɔ sɔ 'wli 'piɛ-, "ne 'wa yi -lɔ 'wanɛɛ dɛ bhubhɔ-.

⁷ Lagɔweli -ŋwɛne 'awɔ moɔ 'klekle, "ne Zezu 'na gɛlenya zimale 'awɔ kpɛnyee Zeluzalɛme -du "me. Bɔbɔnya 'na gbagboa yi 'awɔ -lɔ Zezu 'dleku -kɛle.

Zufonya sa- Etiɛne "ne 'wa 'pɔ- -jiɛ "me.

⁸ Lagɔ -ko 'awɔ Etiɛne keyi "ne 'ɔ 'nyɔ- 'awɔ 'bhɛloɛ zaa, 'ɔ 'pɔ 'awɔ zɛzɛ -kwleyi -ɛ 'nyea 'awɔ lɛ -glɔnya ne.

⁹ Silɛne -du "ne Alɛzadli -du "me 'na Zufonya me 'awɔ zle 'oo -zle Zufonya 'na bhubɔbhudu "me. "Ɛ bhubhɔbhudu -wɛ 'ɛyi 'wa la -lɔ «'juyua 'na -ye 'wa -sɛ 'galu- 'yli -wɛ 'na "me Bhubhɔlebhudu.» "Ɛ 'wayi -wɛ, Silisi "ne Azi -glɔ "me 'na Zufonya 'wɔ "bhaa, 'wa -nyɛ Etiɛne "bhaa yi -lɔ weli "me -seselia -ku 'ci.

¹⁰ -Mɔ, 'wa "ne Etiɛne 'bhɛle-, "naa-, Lagɔ 'na Zuzu Wlewle 'nyɔ 'awɔ "nɛnoɛ, "ne 'ɔ bhulɛ 'awɔ -lɔ.

¹¹ 'Ɛza, 'wa 'je- -lɔ 'nyakpa 'dlasi kɔ, -se 'wa "kɛ no nɛɛ: «-A 'na me, Etiɛne ziɛ Lagɔ -nyɛ Moyize "bhaa 'dii.»

¹² 'Wa sɛ- nɛ "ɛ soɔ -wɛ, 'ɛ -gbɔ "ne -glɔnya 'klekle, "ne "yitia, "ne -Lɔsloanya yi -lɔ "ɛ -zakpɛ -wɛ Etiɛne nu "zolea- "ne 'wa yi -lɔ 'kɛle 'pɔ- "yitɛ "ku, "ne 'wa yi -lɔ Etiɛne 'kpokposɛ "ku 'bhlile-, "ne 'wa yu -lɔ "sa, "ne 'wa yu -lɔ zufonya 'na gbobhle-zejilɛ "ku kɔme-.

¹³ Lɔbhɔ 'ye 'wa -nɛme 'lelee -lɔ yowlɛnya "ne 'wa yi -lɔ no nɛɛ: «'Nyɔkpɔ -ye 'a 'wolo -dɛne "ku ne, 'ɔ bhulɛ weli -nyɛnye -anyɛɛ "Mebɔbɔlebhudu 'wlewle 'na dɛku, "ne 'ɔ bhulɛ 'lelee Moyize 'na -Lɔ 'na weli -nyɛnye!

¹⁴ -Sɛne 'ye "ɛ Etiɛne 'gbɔ 'awɔ -lɔ: Nazalɛte 'na Zezu yi -anyɛɛ "Mebɔbɔlebhudu ne 'wlɛ-, "ne 'ɔ yi Moyize 'na gbagbɛ -ye 'ɔ 'je- -anye kɔ -wɛ 'bhulɛ "me -sɛ.»

¹⁵ 'Nyakpa -wa -ko "ɛ gbobhle-zejilɛ "ku 'klekle -wɛ, 'wolo Etiɛne "ku 'wewe, 'ɔnɛɛ "klo "zo- sɛgbɛɛ "nɔgɔzilɔ 'na klo.