Nonoli 28 - Nouveau Testament bété de Gagnoa

Pɔle -ko 'ŋusuɛledu Malte

¹ -A 'bha- lɛ "ɛ 'kwiɛ -wɛ 'yli "bhuɔ ne, "ne -a yi -da -lɔ 'sɛ yibhlele- -gbɔ "ɛ 'ŋusuɛledu -wɛ 'pa- -lɔ Malte.

² Malte 'na 'nyakpa 'namale- -anyɛɛ za 'dleku. 'Wa -zɔbhɔ -kosu -gbagbo, "ne -a yi -lɔ yɔko -gli. Sɛko -wɛ 'ŋu lɔbhɔ nɛ, "ne wɔtlɔ yi nɛ zɛ.

³ Zaa, Pɔle 'libhi gbɛle 'na 'gbo, "ne 'ɔ 'yi -lɔ -kosu "me -slu. -Dee -sinɔ -plɛle "ŋwetɛbhɛ -wɛ 'ɔ 'wlo zɔ "ne 'ɔ yi -lɔ Pɔle 'na sɔ bubɔ-.

⁴ "Ne Malte -du "me 'na 'nyakpa "kɛ "ɛ "ŋwetɛbhɛ -ɔ -bubɔ Pɔle 'na sɔ -wɛ 'ylime 'ye ne, 'wa -bhulɛ -bhulɛle nɛɛ: «"Ɛ 'nyɔkpɔ ne, 'nyakpalɔbhɔnyɔ yɔ -lɔ -diɛɛ. Jinyɛ "no lɔbhɔ, -mɔ Lagɔ -ɔ 'ŋwinɛle- "me -wɛ yi -gbɔ "ne 'ɔ -ka 'lele-.»

⁵ "Ne Pɔle yi -lɔ "ɛ "ŋwetɛbhɛ -kosu "me 'vukule, -bɛɛ' "no nɛ -no gou.

⁶ -Bedia -kɛ 'dleku -gbɔ Pɔle yi yle, "ne 'ɔ yi zɔ bhli "ne 'ɔ yi "ku cuu. "Ɛ 'nyakpa -wɛ -wo 'yiɛ, -mɔ 'wa 'na 'wolo, -bɛɛ' 'na "nyɛnye "ne Pɔle -yle. -Ɛwɛza, 'wa no -da -lɔ nɛɛ: «-Ɔ -wɛ, Lagɔ yɔ -lɔ!»

⁷ Lɔbhɔ yɔko, 'dubhenyɔ -bholo 'na sue -ko lɔbhɔ, 'ɔ 'pa Pubilise. 'Ɔ no- -anye -li 'na -li 'wli 'yli ta 'na dɛ, "ne 'ɔ 'nyɛ- -anye 'ɔnɛɛ -bhudu "me -godɛ -se 'wa 'sa 'titoa 'wɔ -wɛ.

⁸ Pubilise 'ɔ 'to 'pe- nɛ -duku. 'Gbagbeyi -nyɛ dlu -mene "bhaa 'lɔbhɔ nɛ zɛ. Pɔle -mo 'ylime 'ye ka, 'ɔ -bhubhɔ, "ne 'ɔ yu -lɔ 'kwlɛ 'wli 'piɛ, "ne 'ɔ yu -lɔ 'yamalea-.

⁹ 'Ɛyi -wɛ "ple- lɛ "bhuɔ ne, "ɛ 'du -wɛ "ku 'na 'gwizinya 'klekle -yi Pɔle "bhle yle -ka. "Ne 'ɔ yua -lɔ 'yamalea-.

¹⁰ "Ɛ 'du -wɛ "ku 'na 'nyakpa "zo- -anye "klo 'kpɔ "me kpɛnyee. -Dee -a -ko me dɛku "ku -wɛ, 'wa 'je- -anye -ye -a "kɛ -slu 'klekle "ne -a "kɛ 'glɔ "ku me -wɛ kɔ.

Pɔle 'bha Malte "ne 'ɔ me Wlɔmo

¹¹ 'Ce ta "ple- lɛ "bhuɔ ne, "ne -a yi -lɔ bato -ɛ 'bhale Alɛzadli -du "me -wɛ "me 'gblɛ, wɔtlɔ -yi dɛku yɛ nɛ -lɔ, "ɛ 'ŋusuɛledu -wɛ "ku, "ɛ bato -wɛ 'pa -lɔ «Jiɔkule.»

¹² -A -ylɛ 'du -ye 'wa la Silakuse. "Ne -a yi -lɔ zɔ 'kwli. -A -sɛ lɔbhɔ 'yli ta.

¹³ -Doɔ 'ye 'a 'bha- "ne -a yi -lɔ -cicɛ "ku 'tetlele-, "ne -a yi -lɔ Ylezio -du "me ylɛ, 'yli -bholo "ple- "ne 'pepe yi -lɔ -mee ylo 'wlole zɔ 'na lilikwlɛ "ku yi, 'ɛnɛɛ za 'yli "sɔ 'ple- "ne -a yi 'lelee -lɔ 'du -ye 'wa la Puzɔlese -wɛ ylɛ.

¹⁴ "Ɛ 'du -wɛ "me 'ye -a -ylele -lɔ 'klecɛnya. "Ne 'wa yi -lɔ -no -gbɔ -a -soa dimasi -bholo yɔko. -Se -a -zo "ne -a yi Wlɔmo me -wɛ -lɔ.

¹⁵ Wlɔmo 'na 'klecɛnya 'no- "me -gbɔ -a yi za, "ne 'wa yi -lɔ -anye Apiuse 'na "pɔloku 'wole "ne -dee 'lowlinya 'go "ne 'wa la lɔbhɔ "godɛ Ta -wɛ. Pɔle 'yoa- lɛ 'ylime ne, Lagɔ 'ye 'ɔ -bhɛle -lɔ. "Ne 'kwɛme yi -lɔ Pɔle "tamale-.

Pɔle -sɛle Lagɔ 'na 'Denaade Wlɔmo

¹⁶ -A ylɛ lɛ Wlɔmo 'du, 'wa 'nyɛ- Pɔle 'ɔnɛɛ -tiaa -bhudu "ne "slojayu -bholo -kole -lɔ "klo.

¹⁷ 'Yli ta "ple- lɛ "bhuɔ ne, Pɔle lale- 'ɔnɛɛ sueme zufonya 'na "cifia. "Ne 'ɔ yua -lɔ bhulɛle nɛɛ: «-Nyɔsɔwanye, 'e "ne "nyɛnye 'neɛ -gligbɛnya "ne -a 'to 'wanɛɛ -Lɔ 'wli -no. -Mɔ, 'ɛ -ko "ɛ -soɔ "ne 'wa "nyegbea- -ame Zeluzalɛme, "ne 'wa -plele -ame Wlɔmo 'na 'nyakpa kɔ.

¹⁸ Wlɔmo 'na 'nyakpa -bhlele lɛ -ame gbo "bhuɔ ne, 'wa 'yɔbhɔ nɛ -gbɔ 'wa "kɛ nɛ -ame 'yi 'tale. "Naa-, 'wa -gɛ 'yli -gbɔ weli 'na 'ye 'e "kɛ 'kwiɛ "me ylele "ne -wɛ.

¹⁹ -Mɔ, Zufonya "ne "ku 'ŋunu-. -Ɛwɛza, 'e -no -lɔ -gbɔ Wlɔmo 'na -klɔgbɔnyɔ "yitɔ -na "bhle -da. -Mɔ, 'e -na -kɛ 'neɛ -gligbɛnya gbo 'gla.

²⁰ -Ɛwɛza, 'e la -lɔ 'anye, -se -a "kɛ 'de "ku "zolea-. -Diɛɛ- yɛ -lɔ. 'A -yi -se Izlayɛleyua 'na 'Fuɔnyɔ 'ye 'wa "tɛle 'dle -noɔ -lɔ Zezu 'ye 'wa 'wo yɔ. 'Ɛnɛɛ za, 'wa 'gbɛtele -lɔ -ame 'gɔgɔ nu.»

²¹ Zufonya -sɛ "ɛ weli keyi -wɛ nɛɛ: «-Anye, -neɛ' "kukoweli 'na "bɔgo -namlɛ Zude 'bhale. "Ne 'nyɔkpɔ 'na -vinɔ -namlɛ -anye -neɛ' weli -nyɛnye bhulɛle.

²² -Mɔ, -anye, -a 'yɔbhɔ -gbɔ -eyigɛsɛ bhulɛ -se -e 'pɔ 'dle -wɛ 'na weli. "Naa-, -a -yi -sɛ -gbɔ 'nyakpa bhulɛ -neɛ' -zakpɛ "me 'na 'nyakpa 'na weli -nyɛnye moɔ 'klekle.»

²³ Zufonya -nyɛ Pɔle "bhaa -sɛ lɔbhɔ 'yli -bholo -se 'wa "kɛ "ku 'sibhɔle. "Ɛ -zle -wɛ, 'wa -zimale Pɔle 'na sueme kpɛnyee. 'Zegbakpɔme -kaa kugbedɛku, Pɔle -bhulɛ Lagɔ 'na 'Kamalezikpɛ 'na "kukoweli. Pɔle -bhulɛ Zezu 'na "kukoweli -se 'wa 'cɛ "me 'no -wɛ. Moyize 'na -Lɔ -nyɛ "guɔkwɔmenya 'na "bɔgo -wɛ 'klekle, sɔbhɔ 'ye 'ɔ bhulɛ nɛ -lɔ 'ɛnɛɛ weli.

²⁴ "Ɛ weli -kwleyi -wɛ -me -bedia 'dleku 'tee, -mɔ, -bedia "ne nɛ 'dleku -kɛle 'kplokplo.

²⁵ -Dee 'wa -ko me dɛku -wɛ, -ɔkɔkokɔko bhulɛ 'ɔnɛɛ -ye 'ɔ 'yɔbhɔ -wɛ. Pɔle -bhulɛ weli -cibhɛ -bholo -kpee nɛɛ: «Zuzu Wlewle 'na weli 'nɛne -ye 'ɔ -bhulɛle 'awɔ -a 'to 'wɔ, "guɔkwɔmenyɔ Ezayi 'na 'nuɔ -gwe "me -wɛ:

²⁶ Yle "bhle 'nyakpa ne -se bhulɛloa nɛɛ: 'A yi 'ce "fu 'yukwli 'fo. -Mɔ, 'a -cɛ "me 'no. 'A yi 'ce "ku wolo -vlee, -mɔ 'a -cɛ 'ylime 'ye.

²⁷ "Naa-, 'nyakpa ne 'na 'dle -ko 'bhetitli. 'Wa 'gba- 'yukwli "ku, 'wa 'gba- 'yli "ku, -se 'wa te -kɛ -siɛ 'ye. -Se 'wanɛɛ 'yukwli te -kɛ gbo no. -Se -bɛɛ' 'toa -kɛ 'dleku "me, -se 'wa te -kɛ -ame "klo 'glɛ. 'Ɛ -ko "ɛ soɔ -wɛ, 'e yua nɛ bhɔ yamalea- -a.

²⁸ "Ne Pɔle yi 'lelee -lɔ no nɛɛ: -Ye 'a "kɛ yibhlele- ne lɛ. -Wa "ne Zufonya 'waa -wɛ za 'Denaade -yi -lɔ -tiaa. "Naa-, 'wayi, 'wa 'yi 'ce 'yukwli fo zɛ!» [

²⁹ -Sɔɔdɛku Pɔle bhiɛ bhulɛ kɔ -ɛ soɔ -wɛ, zufonya me, "ne 'wa bhulɛbhulɛle -lɔ "yitɛ "ku 'wayi 'glɛme.]

³⁰ Pɔle -sɛ "ɛ -bhudu -ye 'ɔ 'peɛle 'ɔyigɛsɛ -wɛ "me 'ylobɛ "sɔ. -Wa yi 'ɔnɛɛ za -wɛ, 'ɛ -bhudu -wɛ "me 'wa "zole nɛ -lɔ 'de.

³¹ Pɔle -sɛle Lagɔ 'na 'Kamalezikpɛ "me 'na 'de -glɔnya, "ne 'ɔ -sloa nɛ -lɔ Anyinɛnyɔ Zezu Kli 'na "ku -kosɛ 'klekle 'nyakpa, 'ɔ "ne "gu nɛ "ne 'nyɔkpɔ "ne bhlu nɛ nuɔ "ku.