Nonoli 27 - Nouveau Testament bété de Gagnoa

Fesetuse -kɔme Pɔle Wlɔmo -du "me

¹ 'Wa bhulɛ -gbɔ -a yi bato "me 'gblɛ, -se -a "kɛ Itali -du "me me, 'wa 'je "slojayu -bholo Zuliuse "yitɔ, Pɔle "ne -jiɛnya 'na yɛ kɔ. "Ɛ -klɔgbɔnyɔ "yitɔ -wɛ, "slojanya -wa no "ɛ -klɔgbɔnyɔ "yitɔ 'na libhɔ -wɛ 'na -zakpɛ "me 'ɔ -ko -me -lɔ

² 'Du -ye 'wa la Adlamite 'bhle 'ye "ɛ bato -ye -a 'gblɛ "me -wɛ 'bhale -lɔ. Azi -glɔ "me 'na 'du -mee bato 'nyegbe nɛ -wɛ -a me -lɔ. "Ne Alisetake Tesalonike -du "me 'na 'nyɔkpɔ, Masedoane 'na nyɔkpɔ -ko -me -anye 'glɛme.

³ Zle 'na -vinɛ -ze lɛ ne, "ne -a yi -lɔ Sidɔ 'nyegbe. "Slojayu Zuliuse -ko 'awɔ Pɔle 'na dɛku 'nɛne, zaa, 'ɔ 'nyɔ- 'de -gbɔ 'ɔ yle "bhle 'ɔ 'titoa 'wɔ -se 'wa "kɔ 'yliku "zolea-.

⁴ -Sɔɔdɛku -a 'bha nɛ Sidɔ -wɛ "ne -a yi -lɔ Siple -glɔ yɔko ylɛle, sɛko -wɛ -pepe 'yli nɛ -anye lo zɛ.

⁵ 'Ɛyi -wɛ "ple- lɛ "bhuɔ ne, "ne -a yi -lɔ jinyɛ -ɛ -tetlele Silisi "ne Pafili -wɛ "to, "ne -a yi -lɔ Lisi -glɔ "me 'na 'du -ye 'wa la Mila -wɛ ylɛ.

⁶ Lɔbhɔ 'ye Wlɔmo 'na "slojayu yi -lɔ bato -ɛ 'bhale Alɛzadli "ne 'ɛ me Itali -wɛ 'ylime 'ye, "ne 'ɔ yi -lɔ "bhle -anye 'gbla-.

⁷ -A -sɛ jinyɛ "klo 'yli -vu, -sɛko -wɛ, -anyɛɛ bato "ne "pulɔ nɛ zɛ. -A 'ye 'klee, "ne -a yi -da -lɔ 'du 'ye 'wa la Kinidi -wɛ yɔko 'nyiɔ. -Mɔ -pepe 'yli nɛ -anye lo, zaa, -a "ne -da "bhle 'wlo, "ne -a yi -lɔ 'ŋusuɛledu Klɛte 'na 'pɛɛ "ku mele-, "ne -a yi -lɔ Salemɔne -du "me ylɛle.

⁸ "Ne -a yi -lɔ jinyɛ 'na 'kakpɛ yɔko 'tetlele 'kplɛkplɛɛ "me, "ne -a yi -lɔ 'du 'ye 'wa la Lase yɔko 'na dɛne -bholo -dee 'wa la «Bɔ Pɔle» -wɛ ylɛ (bato 'na "nyegbedɛ 'na namanɔ).

⁹ -Mɔ, -a 'gwlɛ -gwe "ku kpɛnyee, "ne 'ŋu "klo 'na bato "me -koɛ "tamale nɛ "me. "Naa-, zufonya 'na 'nuɛteɛ 'na 'yli "ple nɛ "bhuɔ. Pɔle nɛɛ 'ɔ "kɛ -se 'ɔ "pɔ 'dle -wɛ 'na weli bhulɛ.

¹⁰ 'Ɔ nɛɛ: «'Na 'titoa 'wanye, -a -gɛyli -gbɔ memeɛ yi "me "tamale jinyɛ "ne 'tee -ko, 'ɛ yi bato -nyimɔ 'ɛ -nyɛ -li -ye 'ɛ -su -wɛ "bhaa. -Anye 'nabhɛ, -a 'yi "me to-.»

¹¹ -Mɔ, Wlɔmo 'na "slojayu, bato 'na -sulunyɔ "ne 'ɛnɛɛ "bhenyɔ 'ye 'ɔ -kɛ -lɔ dleku "ne 'ɛ -zi -lɔ Pɔle "ku. 'Ɔnɛɛ dɛku, -ye Pɔle bhulɛ -wɛ 'ɔ "ne 'plome "zo.

¹² -Dee bato 'nyegbe -wɛ "ne 'nɛne, wɔtlɔ 'na dɛku yɛ -lɔ zɛ, zaa, 'nyakpa 'klekle -wa -ko bato "me -wɛ nɛɛ -a 'bha- "ɛ -dɛne -se -a me -vidɛ, -se -a "kɛ Klɛte -glɔ "me 'na 'du -ye 'wa la Fenise "ne ylo bhlile- "bhle -wɛ 'na 'pɛɛ 'ce "ku mene. -Se -a "kɛ "bhle ko wɔtlɔ -yi dɛku.

"Gupepe -yi jinyɛ "klo

¹³ 'Foofo -ɛ 'bhale jinyɛ "me -wɛ "tamalea- bato "me -glinya 'dleku "ne 'wa yi -lɔ bhulɛ "me 'bha, "ne 'wa yi -lɔ Klɛte -du "me 'na jinyɛ 'tetlele.

¹⁴ -Mɔ, cuu ne, "gupepe -ye 'wa la Elakilɔ "ne 'ɛ 'bhale Klɛte -du "me yi -lɔ yi.

¹⁵ 'Ɛ -biti 'gɔlo "ku. 'Ɛ 'pɔ -anye dɛ, "nɛ -kɔme -anye 'dɛ.

¹⁶ "Ne -a yi -lɔ 'ŋusuɛledu -bhueyi yle, 'ɛ 'pa- Koda. -Ɛ kakale -lɔ -anye "ku "ne yi -lɔ -anyɛɛ 'gɔlo -bhueyi -ɛ "fuɔ -wɛ 'na "lu 'di 'kplɛkplɛɛ "me.

¹⁷ "Ne -a yi -lɔ "ɛ 'gɔlo -bhueyi ne "yitɛ "me 'gbla-. "Ne -a yi -da -lɔ bato "lu nu 'gbɛtele-, -se 'ɛ te "kɛ bhulɛ "me 'bha -wɛ zɛ. 'Wa "gu, 'ɛ 'toa "kɛ Libi -glɔ "me 'na -ylomɛ -wɛ "klo 'pɔ zɛ, 'ɛza, 'wa 'pɔ -lɔ -ɛ 'cɛ 'nyegbea -wɛ 'ŋu "klo "ne -pepe yi -da -lɔ kɔme.

¹⁸ Zle -ze lɛ ne, "ne "ɛ -pepe -yi -lɔ 'kpokposɛ 'yiɛ. 'Ɛza, bato "me 'na libhɔnonya yi -lɔ jinyɛ "me 'gbudu 'na -bedi "pɔ.

¹⁹ 'Yli 'na tanɛ -wɛ "me, -wa no bato "me libhɔ -wɛ 'wayi-gɛsɛ yi -lɔ "bhle 'na -li -wɛ 'ŋu "me "pɔ.

²⁰ 'Yli -vu 'na dɛ -a "ne 'ye nɛ ylo 'ylime, "ne -a "ne 'ye nɛ -zeli 'ylime. "Gupepe yi nɛ 'kpokposɛ 'yiɛ. -A "ne nɛ -la 'dleku -kɛ -gbɔ -a yi "po.

²¹ -A -na -bɛɛ' li 'na dɛ 'ya "me 'gwlɛ, "ne Pɔle yi -lɔ "ku -sɔ, 'ɔ nɛɛ: 'Na 'titoa 'wanye, 'a -kɛ nɛ -ame 'yukwli 'fo ne, -a -ka nɛ Klɛte -glɔ "me 'bha, "gupepe -ka nɛ -anye keyi "ku yle, "ne -anyɛɛ -li -ka nɛ soɔ nyimɔ-.

²² -Dɛmeda, 'a "tamale 'kwɛme. -Mɔ, -dɛne, 'nyɔkpɔ -ka 'kwiɛ yle. Bato 'ɛyikɔ "kɛ -lɔ nyimɔ.

²³ -Sabo ne "me, Lagɔ -ye 'e lɔbhɔ "ku, "ne -ɔ "bhe -ame -wɛ 'na "nɔgɔzilɔ 'sibhɔ- -ame yliku.

²⁴ 'Ɔ bhulɛle -ame nɛɛ: «Pɔle, te "gu! -Klɔgbɔnyɔ "yitɔ 'yliku 'wa "kɛ -lɔ -eyi 'gbobhlele-. -Neɛ' za, -nyɔ "bhaa -a 'nɔŋo -wɛ 'kwiɛ -koa yle.»

²⁵ 'Titoa 'wanye, 'a "tamale 'kwɛme! 'E -kɛ Lagɔ 'dleku, "ne -ye 'ɔ -bhulɛle- -ame -wɛ yi 'yli 'wlole.

²⁶ -A "kɛ -dɛme 'ŋusuɛledu yle ne, lɔbhɔ 'ye -anyɛɛ bato "kɛ -lɔ -pi.

'Wa 'bha- 'kwiɛ nu

²⁷ -A 'ya jinyɛ "klo 'yli -kogbɔ -mɔɔnɔ -sɛ. "Ne "ɛ -pepe 'tɛ- "me, 'ɛ kɔme -anye jinyɛ -kpɔ 'ye 'wa la Adliatike -wɛ "klo. -Sabo -gbanyede, -wa no bato "me libhɔ -wɛ nɛɛ dodo "ne -la dɛtlo.

²⁸ "Ne 'wa yi -lɔ 'lu 'ŋu "me "pɔ. Lɔbhɔ kɛ -kɛ "me tlo. Lɔbhɔ 'na "me 'tlomaleɛ -bhli "mɛtle 'na glo -bholo yɛ -kogbɔ -gbɔsɔ. "Ne 'wa yi -lɔ 'yuku 'nyiɔ, "ne 'wa yi -lɔ 'lu nu wɔkɔle lɔbhɔ 'na "me 'tlomaleɛ -bhli 'mɛtle 'glo -bholo 'mɛtle -gbɔta.

²⁹ 'Wa "gu, bato te -kɛ 'tiyi kɔ 'ze, 'ɛza, 'wa yi -lɔ kɔwɛlemale -bɛɛ' -mɔɔnɔ 'ŋu "me "pɔ. -Doɔ -ye -a -ko, "ne -a -wo -lɔ zle 'na zezeɛ.

³⁰ "Ne 'nyakpa -wa no bato "me libhɔ -wɛ yi -lɔ 'gɔlo -bhueyi 'ɛ 'fuɔ -wɛ -kwlia, ŋwɛnɛɛ: «-A "kɛ kɔwɛlemale -bɛɛ' -mɔɔnɔ bato 'yuku "pɔ.» 'Yo 'wa 'wlɛ -lɔ -doɔ. 'Wanɛɛ 'dle -ko 'fɔtɔfɔtɔ -dɛ zɛ.

³¹ Zaa, Pɔle bhulɛle "slojayu "yitɔ -nyɛ 'ɔlua "bhaa. 'Ɔ nɛɛ: «"ɛ 'nyakpa ne "mɔ 'ɛ 'gɔlo ne "me -ko -me ne, 'a -cɛ nu "po.»

³² -Ɛwɛza, "slojanya 'di- -lɔ 'gɔlo -bhueyi 'na 'lu. "Ne 'wa 'yi -lɔ 'yi 'tale "ne 'ɛ yi -lɔ jinyɛ "klo me.

³³ 'Wayi 'klekle -wo zle 'na zezeɛ. "Ne Pɔle yua -lɔ bhulɛle -gbɔ 'wa li -bɛɛ' 'tekeyi "ne 'ɔ yi 'lelee -lɔ no nɛɛ: «-Se 'a "ne li -bɛɛ' 'na 'yli -kogbɔ -mɔɔnɔ ne lɛ.

³⁴ 'E bhulɛle 'anye -gbɔ 'a li lilɛ, 'a kɛ no -gbɔ 'a 'cɛ 'nu "po. -Mɔ, -sɛne 'ye 'e lɛ- -lɔ nɛɛ: 'Anyɛɛ 'glɛme 'na -bholo -ka "ku "ne 'anyɛɛ 'wli 'na 'nyi 'na yɛ -bholo -ka bhli-.»

³⁵ 'Ɛyi -wɛ "ple lɛ "bhuɔ ne, Pɔle 'libhi "fɔlɔ "ku, "ne 'wayi 'klekle 'yliku, 'ɔ -bhɛle Lagɔ. "Ne 'ɔ yi -lɔ "fɔlɔ "me 'didile, "ne 'ɔ 'yi -lɔ dli-, "ne 'ɔ 'yi -lɔ li.

³⁶ "Ne 'kwɛme yua -lɔ "tamale. "Ne 'wa yi -da -lɔ li -me.

³⁷ -Anye -ko "ɛ bato "me -wɛ, -a yle glo 'umgbu 'na 'du "sɔ, 'glo ta yɛ -kogbɔ 'gbeplo (276).

³⁸ 'Wa li-, 'wa lo-, "ne 'wa yi -lɔ -ɛ 'bhle -ɛ to nɛ bato "me -wɛ jinyɛ "me 'slu -se bato "kɛ 'foo -plɛ zɛ.

Bato "me 'glinya kleklee 'po -mɔ bato -nyimɔ

³⁹ Zle -ze lɛ "bhuɔ ne, 'nyakpa 'wa no bato "me libhɔ -wɛ, "ne -dee 'wa -ko -wɛ -yibhlele. "Ne 'wa yi -lɔ -dee -ylomɛ -zu -wɛ 'ylime 'ye. "Ne 'wa yi -lɔ no -gbɔ -ɛ -kɛ 'bhɛle- ne, 'wa "kɛ lɔbhɔ "ɛ bato -wɛ "nyegbea-.

⁴⁰ -Ɛwɛza 'wa -vulu -lɔ kɔwɛlemale -bɛɛ' 'na 'lu, "ne 'wa yi -lɔ jinyɛ "me 'tle. "Ne 'wa yi -lɔ lokwi 'yuku 'gbɛtele. -Se "ɛ -pepe "koa 'kwlɛ 'glɛ 'tekeyi, -se 'wa "kɛ "kakpɛ "ku 'nyia.

⁴¹ Lɔbhɔ -ye 'wa -ze -lɔ -ylomɛ kɔ. Zaa, Bato -ka -la -bhulɛ "me 'bha, "naa-, 'ɛnɛɛ 'yuku pi -ylomɛ "me zɛ, "ne 'ɛ "ne 'bhɛle "n 'ɛ "kɛ -da "bhle 'bha, "ne 'ŋu 'na 'kpokpo -gbɔkɔle 'wlɛ -lɔ bato 'na 'beme.

⁴² "Slojanya 'yɔbhɔ -gbɔ 'wa "kɛ 'ɛ -jiɛnya 'lɔbhɔ -se 'wa "kɛ "ku. 'Wa te -kɛ 'ŋu dlu -se 'wa te -kɛ 'fɔtɔ zɛ.

⁴³ -Mɔ, "slojayu "yitɔ 'yɔbhɔ -gbɔ 'ɔ "kɛ Pɔle 'fuɔ za, 'ɔ nɛɛ: 'Wa 'toa 'lɔbhɔ, -mɔ -wa kɛ 'ŋu dlu sɛ -yi, 'wa bhli 'ŋu "me 'tɛ-, -se 'wa "kɛ me.

⁴⁴ -Bedia kɛ supɛ kɔ, -bedia kɛ gɔlo 'na 'pɛɛ kɔ "ne 'wa 'yi -lɔ 'ŋu "tole, "nyɛnye "ne 'nyɔkpɔ -bholo yle.