Nonoli 26 - Nouveau Testament bété de Gagnoa

Pɔle -sɛ 'ɔyi 'gbo -klɔgbɔnyɔ Aglipa 'yliku

¹ "Ne Aglipa yi -lɔ 'ɛ Pɔle bhulɛle nɛɛ: «-E 'bhɛle -e "kɛ -eyi gbo -sɛ 'a?» Lɔbhɔ 'ye Pɔle -glo -lɔ sɔ "me "ne 'ɔ yi -lɔ bhulɛ.

² Pɔle nɛɛ: Gbo 'klekle -ye Zufonya 'gbli -ame 'wlime -wɛ za, 'ŋwɛnɛ 'lɔbhɔ -ame -klɔgbɔnyɔ Aglipa 'yliku, 'e "kɛ -zeka 'ayi gbo -sɛ.

³ -E -yi 'se Zufonya 'na gbɛɛ 'klekle ne, "ne -e -yi -me 'lelee 'wanɛɛ weli 'na "me -seseliasɛ, zaa, -yaya 'e "kɛ -kɛ -eyi bhulɛle, 'piɛ "kɛ "bhle 'dle -vlee -se 'fo kɛ -ame 'yukwli.

⁴ 'Neɛ -zikpɛ 'na -see 'ɛ ci- "ku, -sɔɔdɛku 'e -noɔ 'teyigbɔ yɔ -wɛ, 'na 'ye 'e no -glɔnya 'klekle 'yliku "ne Zeluzalɛme, 'na 'ye 'e no "bhle -wɛ Zufonya 'klekle -yi.

⁵ 'Wa -yi -ame lɔbhɔ 'gwlɛ "me, 'wa "kɛ 'yɔbhɔ 'wa yi -ame 'ŋunule-, -mɔ, faliziɛnya 'na -Lɔ 'na 'kɔkɛleɛ "me 'ye 'e bhoɔle- -lɔ.

⁶ Zaa, -zeka 'na zle ne "me, 'wa -kɛ -ame 'gbobhlezejilɛ "ku -jilɛ ne, 'e -yi -sɛ -gbɔ Lagɔ 'na weli 'ye 'ɔ -bhulɛle -a 'to 'wɔ -wɛ 'wlole -lɔ 'yli.

⁷ 'Ɛyi -wɛ -ye -gligbɛ 'wli -kogbɔ "sɔ -wɛ -kɛle -me 'awɔ -lɔ 'dleku -gbɔ Lagɔ 'na bhulɛweli yi 'awɔ 'ce 'yli 'wlole, 'ɛza, 'wa lɔbhɔ -lɔ Lagɔ "ku zle 'oo -zle. -Klɔgbɔnyɔ Aglipa, -ame 'lelee, 'e -cɛ -me 'dleku. 'Ɛza -ame "nowlia zufonya 'gbli -lɔ -ame gbo 'wlime

⁸ 'Anye zufonya, sɔɔbɛɛza 'a "ne bhɔ 'dleku -kɛ -gbɔ Lagɔ yi -glukonya 'golia 'a?

⁹ "Ne -ame, 'e -cɛ nɛ 'dleku -gbɔ "ɛ 'ye 'e no nɛ -gbɔ 'wa te Nazalɛte 'na Zezu Kli 'na 'tɔ 'di gou -wɛ, 'e 'tagbɔ -bɛɛ' 'na "namanɔ yɛ nɛ.

¹⁰ -Ɛwɛ, 'ɛyi 'ye 'e no -lɔ Zeluzalɛme. 'E 'pɔ- 'awɔ 'nyakpa -kwleyia 'na -wa -kɛ Lagɔ 'dleku -wɛ -jiɛ "me, bɔbɔnya "yitia 'nyɛ- -lɔ -ame 'ɛnɛɛ 'bhɛloɛ. 'Ɛza, -wa 'lɔbhoa -wɛ "bhaa -a -kole nɛ "ku.

¹¹ Zufonya 'na "mebhubhɔlebhudu -wɛ klekle "me, 'ye 'e ylɛle 'awɔ -lɔ, "ne 'e 'kpla- 'awɔ -lɔ 'klecɛnya -gbɔ 'wa ziɛ- Zezu Kli 'na 'tɔ 'dii, -se 'wa nyimɔ- 'ɔnɛɛ 'tɔ. 'Kɛle 'lɔbhɔ nɛ -ame "yitɛ "ku 'wanɛɛ za, 'ɛza 'e moa -lɔ 'sa -ka mɛne 'na 'du ne "me -kaa 'lowlime.

Pɔle bhulɛ- -see Lagɔ -lɔ -wɛ 'na weli

¹² 'Ɛnɛɛ za 'yli -bholo "me, bɔbɔnya "yitia -lebhe -lɔ -ame Damase -du "me 'na 'klecɛnya "ku -se 'e "koa 'sa.

¹³ 'E 'nɔŋo nɛ -gwe "ku, 'oo 'na -klɔgbɔnyɔ Aglipa, -sɔɔdɛku zle me -jijɛ "ku 'sibhɔ -ka -wɛ, "ne 'e yi -lɔ zle 'na "nɔgɔ "me 'bhale nɛ 'ylime 'ye, 'ɛnɛɛ "meleleɛ "ple lɔbhɔ, "ne "ɛ zle -wɛ yi -lɔ -anye 'wlime 'gbli -ame -nyɛ 'neɛ gɛlenya 'wɔ "bhaa.

¹⁴ "Ne -a yi -lɔ zɔ -bhli 'klekle, "ne 'e yi -lɔ weli "me 'no. 'Ɛ 'gbɔ zufonya 'na Eble -gbo, 'ɛ nɛɛ: «Sɔle, Sɔle sɔɔbɛɛza 'e 'gbapea bhɔ -ame -soɔ 'a? "Ne -e 'tɛ- 'yukwli "me sɛgbɛɛ -bhili 'ye 'ɔnɛɛ gɛlenyɔ 'sɛpɔ 'ɔnɛɛ -kple nu. -Eyi 'ye -e 'kpla -lɔ!»

¹⁵ "Ne 'e yi -lɔ lo 'yɔbhɔ nɛɛ: Anyinɛnyɔ -ye -e -noɔ bha? "Ne 'ɔ yi -lɔ -ame bhulɛle nɛɛ: -Ame Zezu, -ame 'ye -e 'gbapea -lɔ.

¹⁶ -Mɔ, -sɔ "ku, -se "nyegbele- 'ya, sɔɔbɛɛza 'e 'sibhɔ- -eyi 'yliku -wɛ, 'e "kɛ -eyi bhulɛle nɛɛ: -Ame, 'e -sɛ lɔbhɔ -eyi -se -e "kɛ 'neɛ "kulɔbhɔnyɔ "zo. -Se 'e "kɛ 'ce -se 'e 'sibhɔ -eyi 'yliku "ne -se -e 'ye -ame 'ylime -zeka -wɛ 'na 'de 'glɔnya -sɛle, -se -ye 'e "kɛ 'ce 'lelee -eyi sloa- -wɛ 'na 'de -glɔnya -sɛle bhliji "me.

¹⁷ 'E yi 'ce -eyi zufonya -nyɛ -wa "ne zufonya 'wa -wɛ "bhaa "ku 'lebhele. -Mɔ, 'e -ko -eyi keyi.

¹⁸ -Se -e "kɛ 'wanɛɛ 'yli "ku -vulu, -se 'wa "kɛ titiɛ "me 'bha, 'se 'wa "kɛ zle "ku 'sibhɔ. -Se 'wa te -kɛ -la Sata 'na 'bhɛloɛ "me ko, -se 'wa "kɛ Lagɔ lo 'yli. -Wa -kɛ -ame 'dleku -wɛ, 'wanɛɛ 'nyinyonoli 'na gbo yi "ku 'titliɔ-. "Ne 'wa yi Lagɔ 'na "gugbɛ 'na 'cibhɛ yle -me, -wa -kɛ -ame 'dleku -wɛ 'nasɛ.

Damase -ye Pɔle sɛle- -lɔ 'ye 'ɔ -no 'klekle 'na 'de

¹⁹ "Ne Pɔle yi -lɔ -klɔgbɔnyɔ Aglipa bhulɛle- nɛɛ: «"Ɛ 'bhale -la lɛ 'doɔ, 'e "ne 'ce la -ye 'e 'ye- 'ylime, "ne -ɛ 'bhale "nɔgɔ "me -wɛ 'plome -sɛ.

²⁰ -Mɔ, Damase 'na 'nyakpa 'ye 'e me -lɔ bhulɛle -ka 'tɛ-, "ne 'e yi -lɔ Zeluzalɛme -nyɛ Zude -glɔ klekle "ku me, "ne 'e yi 'lelee -lɔ 'nyakpa 'na -wa "ne "zo Lagɔ -wɛ lo mele-, "ne 'e yua -lɔ bhulɛle- -gbɔ 'wa 'bheliɔ- kɔ -se 'wa mele- Lagɔ lo, 'wa no -li 'na -li -se 'wa "kɛ 'sɛ yibhlele- -gbɔ 'wanɛɛ -zikpɛ 'bheliɔ- kɔ.

²¹ -Ɛwɛza, Zufonya 'sale- -lɔ -ame "Mebɔbɔlebhudu "me, "ne 'wa 'na lɔbhɔle -lɔ "bhle -ame.

²² -Mɔ, Lagɔ -ko 'ce -ame yɔko -godogodo, zaa, 'e yi 'ce 'ɔnɛɛ 'Denaade 'glɔnya -sɛle, yua "ne 'nyakpa "yitia, -mɔ, "guɔkwɔmenya "ne Moyize 'wa bhulɛ- 'awɔ -ɛ "kɛ yi -wɛ 'na "kukoweli "klee. -Ame, 'e -ka -la lɔbhɔ weli 'na -vinɛ "zo.

²³ "Ne -ame, sɛne 'ye 'e no -lɔ nɛɛ: Klise 'gbape-. "Ne 'ɔɔ -noɔ -lɔ tɛtɛ 'nyɔkpɔ 'na -ɔ 'wlo -glukonya 'glɛme zɔ tɛɛ -wɛ yɔ. "Ne 'ɔɔ "kɛ -lɔ zle -ɛ -le gbɛklɛklɛ -wɛ 'na 'de zufonya "ne -wa "ne zufonya 'wa -wɛ -sɛle.»

Pɔle nɛɛ Aglipa -kɛle Lagɔ 'dleku

²⁴ Pɔle -sɛ 'ɔyi gbo 'wlime, "ne Fesetuse yi -lɔ "me "kpa nɛɛ: «Pɔle, "kukwɛ 'sa bhɔ -eyi 'a? -E -ciɛ "bɔgo kpɛnyee za "kukwɛ 'ɛ -nɛmele bhɔ -eyi "ku 'a?»

²⁵ "Ne Pɔle yi -lɔ gbodi nɛɛ: «-A 'to Fesetuse "kukwɛɛ -na 'se -ame 'sa, -mɔ weli 'na -ɛ "ne 'yo "me -ko, "ne 'ɛ -ko gbɛklɛklɛ -wɛ 'ye 'e bhulɛle -lɔ 'anye.

²⁶ -Klɔgbɔnyɔ -ye 'e 'nyegbe 'yliku "ne 'e bhulɛ ne -yi "ɛ -li -wɛ 'klekle za sɛ. 'Ɛza 'e bhulɛ -lɔ 'dlekukɛlesɛ 'ɔyi 'yliku. 'E -cɛ 'dleku -gbɔ 'ɔ -yi -li -wɛ 'klekle za sɛ, sɛko -wɛ, -bɛɛ' 'na -ɛ zizɔ- "ku 'ye 'ɛ "ne -noɔ.

²⁷ -Klɔgbɔnyɔ Aglipa, -e -kɛ bhɔ "guɔkwɔmenyɔ 'na bhulɛweli 'dleku 'a? 'Diɛɛ, 'e -yi -sɛ -gbɔ -e -cɛ 'dleku.»

²⁸ "Ne Aglipa yi -lɔ Pɔle bhulɛle- nɛɛ: «'Ɛ -to -la "bhle 'tekeyi -se -e "kɛ -ame 'klecɛ "zoa!»

²⁹ "Ne Pɔle yi -lɔ -klɔgbɔnyɔ Aglipa bhulɛle- nɛɛ: «-E kɛ nɛ 'klecɛnya "zo- zle "me "ne 'watɔ, 'e bhubhɔ Lagɔ -gbɔ 'ɛ te "kɛ -eyikɔ "zo, -mɔ -wa 'fo -ame 'yukwli -zeka -wɛ, 'wa "zo -me 'klecɛnya 'neɛ -sɛne. 'E -sɛ "kɛ "bhle 'gɔgɔ -ye 'wa 'gbɛtele -ame nu 'na weli!»

³⁰ -Klɔgbɔnyɔ Aglipa "ne 'Kamalenyɔ "yitɔ Fesetuse, "ne Belenise -nyɛ -wa 'gli lɔbhɔ -wɛ 'wɔ "bhaa yi -lɔ "ku sɔ.

³¹ 'Wa 'yli "guɔ, "ne 'wa bhulɛ bhulɛle -lɔ 'dle "zo. Ŋwɛnɛɛ: «"Ɛ 'nyɔkpɔ ne "ne -bɛɛ' 'na 'ɛ kɔ -jiɛ "me "pɔ "ne 'ɔ "kɛ "ku -wɛ no.»

³² "Ne Aglipa yi -lɔ Fesetuse bhulɛle- nɛɛ: «"Ɛ 'nyɔkpɔ ne -a yu nɛ -kɛ 'yi 'tale, 'ɔ "mɔ nɛ -kɛ -anyɛɛ -Klɔgbɔnyɔ "yitɔ Sezale bhulɛle -gbɔ 'ɔ "kɛ 'ɔnɛɛ gbo 'bhle ne.»