Nonoli 25 - Nouveau Testament bété de Gagnoa

'Wa -kɔme Pɔle 'Kamalenyɔ "yitɔ Fetuse 'yliku

¹ 'Yli ta ne lɛ, -see Fesetuse -noɔ Zude -glɔ "me 'na 'Kamalenyɔ "yitɔ yɔ. Fesetuse "bhaa -lɔ Sezale "ne 'ɔ yi -lɔ Zeluzalɛme me.

² "Ne "bhle 'na bɔbɔnya "yitia, "ne Zufonya 'na "yitia yi -lɔ Pɔle Fesetuse yɔko "klɛle, "ne 'wa yu -lɔ kɔ 'titli.

³ "Ne 'wa yi -lɔ Fesetuse no nɛɛ: «-A bhubhɔ -eyi, -nɛme Pɔle Zeluzalɛme. "Naa-, Zufonya 'na -bedia 'yɔbhɔ nɛ -gbɔ 'wa "kɔ nɛ -gbotu -cile, -see 'wa "kɔ nɛ -gwe "ku lɔbhɔle -se 'ɔ "kɛ nɛ "ku.»

⁴ -Mɔ, Fesetuse -sɛ weli keyi nɛɛ: «Pɔle -koo Sezale -jiɛ "me, "ne -ame 'nabhɛ 'e yi "bhle 'wlizɔ 'zi 'na dɛ "ne -la "me tlo.

⁵ "Ne 'ɔ yi -lɔ no nɛɛ: 'Anyɛɛ "cifia -yi -see 'wayi 'wɔ "bhaa -a "kɛ Sezale 'gɔme mele, -see "ɛ 'nyɔkpɔ ne "kɛ nɛ -kɛ -bɛɛ' "nyɛnye no ne, -a "kɔ 'gboo 'wlime 'gbli!»

⁶ Fesetuse -sɛ 'yli -gbɔta 'lalɛ -ce 'yli -kogbɔ Zeluzalɛme, "ne 'ɔ yi -lɔ Sezale 'wlizɔ -zi. Zle "kɛ 'ze ne, "ne 'ɔ yi -lɔ 'gbobhlebhudu "me 'gli -ka me, "ne 'ɔ yi -lɔ no -gbɔ 'wa -nɛme Pɔle.

⁷ 'Ɛ Pɔle "kɛ -yi ne, Zufonya -wa "bhaa Zeluzalɛme -wɛ yu -lɔ -bli, "ne 'wa yu -lɔ gbo 'na -kwleyi 'wlime 'gbli, -mɔ, 'wayi 'nabhɛ 'cɛ 'nyɔkpɔ 'ylime -tua -gbɔ 'diɛɛ yɛ.

⁸ -Mɔ, Pɔle -sɛ 'ɔyi gbo 'wlime, 'ɔ nɛɛ: «'E "ne "nyɛnye no, "ne 'e "kɛ Zufonya 'na -Lɔ 'plome -sɛ, "ne 'wanɛɛ "Mebɔbɔlebhudu 'plome -sɛ, "ne 'e "ne 'lelee 'wanɛɛ -Klɔgbɔnyɔ "yitɔ Sezale 'plome -sɛ.»

⁹ -Mɔ, Fesetuse 'yɔbhɔ 'awɔ -gbɔ 'ɔ "kɛ Zufonya 'ŋwɛnɛ labha, "ne 'ɔ yi -lɔ Pɔle lo 'yɔbhɔ nɛɛ: «-E 'yɔbhɔ -gbɔ 'wa 'bhlele -neɛ' gbo Zeluzalɛme -ame 'yliku 'a?»

¹⁰ Pɔle nɛɛ: «"Bhɔɔ -Klɔgbɔnyɔ "yitɔ Sezale 'na 'gbobhlebhudu 'nuɔ "ku 'ye 'e -ko lɛ. Lɔbhɔ 'wa "kɛ -lɔ -ame 'gbobhlele. 'E "ne Zufonya "nyɛnye no. "Ne -eyi 'nabhɛ -e yi -sɛ 'tee.

¹¹ 'E "kɛ 'diɛɛ "nyɛnye noo, "ne 'ɛyi -wɛ 'ɛ "kɛ -lɔ 'neɛ 'kwiɛ "zo, 'e -na "kuku losɛ zɛ. -Mɔ, "ɛ gbo -ye 'wa 'gbli -ame 'wlime -wɛ kɛ yo yɛ, 'nyɔkpɔ "ne 'bhɛle "ne 'ɔ "koa -ame kɔ "plele-. 'E 'yɔbhɔ -gbɔ -Klɔgbɔnyɔ "yitɔ Sezale 'bhle 'neɛ gbo.»

¹² "Ne Fesetuse -nyɛ 'ɔnɛɛ 'demezonya "bhaa 'wa yi -lɔ bhulɛ-, "ne 'ɔ yi -lɔ Pɔle bhulɛle nɛɛ: «-E nɛɛ: -E "kɛ -Klɔgbɔnyɔ "yitɔ 'yliku me zaa, "bhle -e "kɛ -lɔ me.»

'Wa -kɔme Pɔle -klɔgbɔnyɔ Aglipa 'yliku

¹³ 'Yli yɛ "kɛ "ple ne, -klɔgbɔnyɔ Aglipa -nyɛ 'ɔ "nɔyɔ Belenise "bhaa 'wa -yi -lɔ Sezale, -see 'wa "kɛ Fesetuse 'bhɛle.

¹⁴ 'Wa -sɛ lɔbhɔ 'yli -vuu, "ne Fesetuse yi -lɔ -klɔgbɔnyɔ 'ɛ Pɔle 'na weli zɔ 'sibhale nɛɛ: «'Nyɔkpɔ -bholo -ye Felise -tle -jiɛ "me -wɛ -ko mɛne.

¹⁵ -Sɔɔdɛku, 'e -ko nɛ Zeluzalɛme -wɛ, bɔbɔnya "yitia, "ne Zufonya 'na "yitia yu "klɛ -ka, "ne 'wa yi -lɔ no -gbɔ 'a "luɔ gbo.

¹⁶ "Ne 'e yua -lɔ bhulɛle nɛɛ: Wlɔmo 'na 'nyakpa 'bhale soɔ 'nyɔkpɔ "me, 'wa -mana 'ɔnɛɛ bhulɛweli "no "bhuɔ "ne -ɔ "klɔ -wɛ "bhaa 'wa -mana weli "me -seselia "bhuɔ. "Ne 'ɔ -sɛ -la -lɔ 'ɔyi gbo 'ɛ -wa 'klɔ -wɛ 'yliku.

¹⁷ "Ne 'wa yi -lɔ 'ɛ -dɛne "ku 'sibhɔle 'wa "ne -da -ame 'yli "nyɛ "ne -zle 'na -vinɛ yi -lɔ 'ze, "ne 'e yi -lɔ 'gbobhlebhudu "me me, "ne 'e yi -lɔ no -gbɔ 'wa -nɛme -ame "ɛ 'nyɔkpɔ -wɛ.

¹⁸ 'Ɔnɛɛ 'gbowlimegblinya "kɛ -yi ne, 'e 'tagbɔ nɛɛ 'wa yu nɛ gbo 'na 'ɛ 'kpɔ nɛ -zi "ku -wɛ 'wlime 'gbli, -mɔ, 'ɛ "ne sɔbhɔ ylele-.

¹⁹ -Ame 'e "ne -kɛ -sɔɔ gbo -koa 'glɛme -yi. -Mɔ, 'wanɛɛ Lagɔ "me 'na weli -bholo yɛ -lɔ. Ŋwɛnɛɛ: 'Nyɔkpɔ -bholo 'pa- Zezu, "ne 'ɔ "ku, 'ɔyi Pɔle no -lɔ nɛɛ: "Ɛ Zezu -wɛ -yɛ.

²⁰ 'E "ne -see "kɛ "ɛ -soɔ 'na weli -wɛ bhulɛ -yi, 'ɛza 'e bhulɛle -lɔ Pɔle, 'ɔ ''kɛ nɛ no -gbɔ 'ɔ yi nɛ -kɛ Zeluzalɛme me, -see 'wa "kɛ "bhle 'ce 'ɔnɛɛ gbo 'bhlele.

²¹ -Mɔ, Pɔle nɛɛ 'Kamalenyɔ "yitɔ -na bhlolo- gbo. Zaa, 'e nɛɛ: 'Ɔ -ko -namlɛ "ɛ -jiɛ -wɛ "me, -se 'e "kɔ -kɛ -la "ɛ 'Kamalenyɔ "yitɔ 'yliku kɔme.»

²² "Ne Aglipa yi -lɔ Fesetuse bhulɛle nɛɛ: «-Ame, 'e 'yɔbhɔ -gbɔ 'e "kɛ "ɛ 'nyɔkpɔ ne 'na weli 'yukwli 'fo -me. Fesetuse nɛɛ: Zle kɛ -ze, -e yu 'yukwli 'fo.»

²³ Zle "kɛ ze ne, Aglipa -nyɛ Belenise "bhaa yi -lɔ -zakpɛ "me 'du ylɛ- "Ne 'wa yi -lɔ 'gbobhlebhudu "me -plɛ, 'wa -nyɛ "slojanya "yitia "ne "ɛ 'du -wɛ "me 'na gbobhlenya "bhaa "ne Fesetuse yi -lɔ no -gbɔ 'wa -nɛme Pɔle "ne 'wa yu -lɔ -nɛme.

²⁴ "Ne Fesetuse yi -lɔ weli "ku 'libhi, 'ɔ nɛɛ: «-Klɔgbɔnyɔ Aglipa, "ne 'anye 'wa -ko "ɛ -dɛne 'wayi 'wɔ "bhaa -wɛ, 'a -gɛ "ɛ 'nyɔkpɔ "ne 'yli, Zufonya 'klekle -yi -ame Zeluzalɛme "ne -dɛne ylele -ka, 'wa 'kpa "me, ŋwɛnɛɛ: "Ɛ 'nyɔkpɔ ne -ŋwa -lɔ 'kwiɛ "ku.»

²⁵ -Mɔ, 'neɛ dɛku, 'e "ne -bɛɛ' 'na -ɛ "kɛ 'nyɔkpɔ 'lɔbhɔ, "ne 'ɔ "kɛ "ku -wɛ 'ɔnɛɛ nonoli "me -ylele. -Mɔ, 'ɔ nɛɛ: -Klɔgbɔnyɔ "yitɔ -na 'bhle "kɛ 'ɔnɛɛ gbo za, 'ɔyi 'ye 'e "kɔ -lɔ kɔme.

²⁶ "Naa-, 'e "ne -bɛɛ' 'na -ye 'e "kɛ -klɔbgɔnyɔ "yitɔ "ku kɛle 'ɔnɛɛ 'tɔ "me -wɛ -yi. 'Ɛza, 'e -nɔmo -lɔ 'anye 'yliku, -mɔ, tiaa- -eyi -klɔgbɔnyɔ Aglipa, -eyi 'ye 'e -nɔmo -lɔ, -se -e "kɔ -na lo 'yɔbhɔ "bhuɔ, -se 'e "kɛ -da kɛle.

²⁷ "Naa-, 'wa "kɛ -jiɛnyɔ -nɛme "ne 'wa "mɔ gbo -ye 'wa 'gblu 'wlime -wɛ 'na weli -bhulɛ, 'neɛ dɛku, 'ɛ "ne -bɛɛ' "me -ko.