Nonoli 24 - Nouveau Testament bété de Gagnoa

Zufonya 'gbli- Pɔle gbo 'wlime 'Kamalenyɔ "yitɔ Felise 'yliku

¹ 'Yli 'umgbu "plea lɛ "bhuɔ ne, "ne bɔbɔnyɔ "yitɔ Ananiase "ne "yitia 'na yɛ -nyɛ 'nyɔkpɔ -ye 'wa la Teletuluse avoka -wɛ 'wɔ "bhaa, "ne 'wa yi -lɔ Sezale -du "me me. "Ne 'wa yi -lɔ Pɔle 'Kamalenyɔ "yitɔ Felise yɔko "klɛle.

² "Ne 'wa yi -lɔ Pɔle -zejilɛ "ku -nɛme, lɔbhɔ 'ye Teletuluse 'gblulo -lɔ gbo 'wlime, 'ɔ nɛɛ: «-A 'to Felise, -li 'klekle -ye -e no -anyɛɛ za -wɛ "ne -ye -e 'bhelia- kɔ 'neɛ -gligbɛnya za -wɛ -a yibhlele-, "naa-, 'ɛɛ gbɔ -lɔ "ne -a yi -lɔ "kuwɛtɛ yle.

³ Zaa, -da "mɔ ko "ne -da kɛ ko 'a 'to Felise 'neɛ -ye -e no -anye 'wli 'klekle -wɛ -a yibhlele-. -A 'bhɛle -eyi -ka 'ɛza.

⁴ -Mɔ, 'ee 'yɔbhɔ "kɛ -gbɔ 'e "kɛ -neɛ' "tɛnye -vu "ku 'libhi, -e te "kɛ boɔ- zɛ. 'Ɛza ze 'e bhubhɔ -kɛ -lɔ -eyi -se -e "kɛ -kɛ -anye 'yukwli fo.

⁵ -Anye, -a yibhlele- -la -dɛme sɛ -gbɔ 'nyɔkpɔ -gbeyi yɔ -lɔ sɛgbɛɛ zlɛ -didile 'nyakpa "me. 'Ɔ 'diale 'awɔ Zufonya 'na -glɔ "me, "ne 'ɔ -noɔ "kɛ 'lelee -lɔ Nazalɛte 'na 'nyakpa 'na -zakpɛ 'na "cifi yɔ.

⁶ 'Ɔyi 'nabhɛ 'yɔbhɔ nɛ -gbɔ 'ɔ "kɛ nɛ "Mebɔbɔlebhudu 'dii ziɛ-, 'ɛza, -a "nyegbeɔ -lɔ. [-A nɛɛ -a "kɔ 'gbohlele -anyɛɛ -Lɔ 'nasɛ

⁷ -Mɔ, "slojanya 'na "cifi -ye 'wa la Liziase -yi -lɔ, "ne 'ɔ yu -lɔ -anye kɔ -sɛ 'kpokposɛ.

⁸ "Ne "slojanyɔ "yitɔ Liziase yi -lɔ 'ɔnɛɛ 'gbowlimegblinya bhulɛle- -gbɔ 'wa yi -eyi 'yliku] Zaa, -eyi -gɛsɛ 'nabhɛ 'yɔbhɔ 'se lo, -se -e "kɛ 'sɛ yibhlele- -gbɔ -ye -a bhulɛ 'ɔnɛɛ dɛku -wɛ 'diɛɛ yɛ.»

⁹ "Ne Zufonya -wa glɔ gbo 'klee -wɛ -nyɛ Teletuluse "bhaa yi -lɔ "ku 'ŋunu nɛɛ: «-Ye 'ɔ bhulɛ 'klekle -wɛ 'diɛɛ yɛ -lɔ.»

Pɔle -sɛ 'ɔyi gbo

¹⁰ Lɔbhɔ 'ye 'Kamalenyɔ "yitɔ wɔkɔle -lɔ, "ne Pɔle yi -lɔ 'gbo 'di nɛɛ: «'E -yi -sɛ -gbɔ 'mɔɔ -noɔ -lɔ -glɔnya 'klekle 'na 'gbobhlenyɔ yɔ, -e 'bhle gbo 'na 'ylobɛ ne zɛlesɛ -kɛ, zaa, 'e bhulɛ, 'ee "gu -se 'e "kɛ 'ayi gbo 'wlime -sɛ -eyi 'yliku.

¹¹ -E 'bhɛle -kɛ -se -e 'cɛ "kɛ -eyigɛsɛ "me 'wlole, -mɔ, 'yli -kogbɔ "sɔ ne lɛ 'ye 'e ylɛ Zeluzalɛme -se 'e "kɛ Lagɔ "zo.

¹² 'Wa -na 'ce -la -ame "Mebɔbɔlebhudu "me "ne Zufonya 'na "mebhubhɔlebhudu -wɛ "me 'nyɔkpɔ "bhaa 'na 'gbo no 'dɛ "me ylele- tɛtɛ, "ne -ɛ 'du ne "me 'nabhɛ 'wa -na 'ce -lɔ 'no nɛɛ: 'Ɔ "pɔ lɛ 'ce 'nyakpa.

¹³ Zaa, 'neɛ "kukoweli -ye 'nyakpa bhulɛle -wɛ, 'wa -cɛ 'nyɔkpɔ 'ylime -tua -gbɔ 'diɛɛ yɛ.

¹⁴ 'Neɛ -ye 'e yibhlele ne lɛ: 'E lɔbhɔ -a 'to 'wɔ 'na Lagɔ "ku, Anyinɛnyɔ 'na -gbudu 'na bhlibhliɛ "me. 'Wanɛɛ dɛku -gwe "nyɛnye -ye 'e -bhli -lɔ, -mɔ, "guɔkwɔmenya 'na "bɔgo -nyɛ -Lɔ 'na "bɔgo "me 'na -ye 'wa kɛle- -wɛ, 'e -cɛ -me 'dleku 'klekle.

¹⁵ 'E "tɛle Lagɔ 'dle -see 'wayi, 'wa "tɛle -mo 'dle -wɛ. 'Ɛ -noɔ -lɔ -gbɔ Lagɔ yi 'ce -wa "ku-, -wa 'ŋwinɛle- "me "ne -wa "ne "me ŋwinɛle- -wɛ glu -sɛ.

¹⁶ -Ɛwɛza, 'e -su -lɔ 'ayi 'tee Lagɔ 'yliku "ne 'nyakpa 'yliku.

¹⁷ Zaa, -ye 'ylobɛ -vu 'ple- 'awɔ "bhuɔ -wɛ, "ne 'e yi 'awɔ -lɔ Zeluzalɛme 'wlizɔ 'zi. 'E -su 'awɔ 'neɛ 'nyakpa 'na 'dlasi, "ne 'e -su -me 'awɔ 'lelee bɔbɔli. 'E -ko 'awɔ "Mebɔbɔlebhudu "me bhubhɔ dɛku, "ne 'wa yi -lɔ -ame "bhle ylele-.

¹⁸ 'E "bhaa nɛ bɔbɔ -ka -se e "kɛ 'wlele -plɛ, 'wa yle -ame bhubhɔbhudu "me 'nyakpa "ne 'awɔ "bhle gbo -no dɛku -ko "ne 'kple "ne 'awɔ 'lelee "bhle -ko.

¹⁹ -Glɔ -ye 'wa la Azi -wɛ 'na Zufonya 'na yɛ -ko -me 'awɔ lɔbhɔ. 'Ɛ 'wayi -wɛ, 'wa "kɛ -lɔ -eyi 'yliku 'sibhɔ -se 'wa "kɛ -ame gbo 'wlime 'gbli-. 'Neɛ gbo -koa -kɛ 'dleku ko 'diɛɛ ne.

²⁰ 'Diɛɛ 'anye 'nyakpa 'wa ko -dɛne ne, 'wa bhulɛle -eyi -gbaa, "nyɛnye 'na 'ye 'e -no "ne 'wa kɔme -ame gbobhlenya 'yliku, "ne 'wa 'ye 'ylime -wɛ, 'wa bhulɛle -eyi 'klekle.»

²¹ "Ne 'e yi -lɔ "ɛ 'nyakpa -wɛ 'glɛme "ku -sɔ, "ne 'e yi -lɔ "me "kpa, 'e 'cɛ 'dleku -gbɔ Lagɔ yi -glukonya glu -sɛ: «'Ɛ weli -cibhɛ -bholo -kpee -wɛ za 'a 'bhlele bhɔ -ame 'ayi 'klekle 'yliku gbo 'a.»

²² Felise -yi 'ɛ Lagɔ 'na -gwe 'dɛ 'tee, zaa, 'ɔ 'pelia 'ɛ 'gbobhleleɛ 'na 'yli "ku. 'Ɔ nɛɛ: «bhliji "me 'ye 'cɛ 'ce -lɔ 'bhle -zle "slojanya 'na 'kamalenyɔ "yitɔ Liziase "kɛ 'ce -yi.»

²³ "Ne Felise yi -lɔ 'ɛ "slojayu bhulɛle -gbɔ: 'Kɔmo -jiɛ "me, -se -e 'too "kɛ 'gbɛte, 'ɔnɛɛ 'titoa 'wɔ kɔ -kɛ 'bhɛle -ka -yi ne 'toa 'wli -sabha.

Pɔle -ko -jiɛ "me

²⁴ 'Yli yɛ "ple lɛ "bhuɔ ne, "ne Felise -nyɛ 'ɔ "nɔŋɔ Dlusile -ɔ -noɔ Zufoŋɔnɔ yɔ -wɛ "bhaa yi -lɔ 'du ylɛ, "ne Felise yi -lɔ Pɔle 'nyakpa "ku 'lebhele -gbɔ 'ɔ -yi. "Ne 'ɔ yu -lɔ 'yukwli 'fo. "Ne Pɔle yi -lɔ Zezu Kli 'na 'dlekukɛle weli bhulɛ.

²⁵ "Ne Pɔle yu -lɔ zɔ 'sibhalea 'ɔ nɛɛ: «-See 'nyɔkpɔ "kɛ -ko "ne 'ɔ "kɛ Lagɔ -gɛ 'namale, "ne -see 'nyɔkpɔ "kɛ "bhle 'dle 'piɛ, "ne 'ɔ yua 'lelee -lɔ bhulɛle nɛɛ: Lagɔ yi 'ce -glɔnya 'klekle 'gbobhlele, "ne Felise 'dlebhɛ yu -lɔ lɔbhɔ "ne 'ɔ yi -lɔ Pɔle no nɛɛ: 'Ɛ -ko -mlɛ soɔ, -mɔ, bhliji "me "kɛ -yi, 'e yi -eyi la.»

²⁶ Kamalenyɔ "yitɔ Felise -ta -gbɔ Pɔle yu nɛ 'dlasi kɔ 'je: 'Ɛza, 'ɔ la la lo -lɔ "ku, -se 'ɔ -nyɔ "bhaa 'wa "kɛ bhulɛ.

²⁷ -Ye 'ylobɛ "sɔ "ple -wɛ, "ne Pɔleciuse Fesetuse yi -lɔ Felise 'na "bhulɛ "me "plele. -Mɔ, 'ɔ 'yɔbhɔ -gbɔ 'ɔ -kaa 'wɔ Zufonya 'ŋwɛnɛ labha-, 'ɛza, 'ɔ 'tlea -lɔ Pɔle -jiɛ "me.